Zuda tɩʋ pɛ Ahazɩa taanɩ
22
Zeruzalɛm tɩʋ tiinə bam ma pa Yoram bu Ahazɩa ji pɛ o ləri o ko yuu nɩ, Arabi tiinə vɩnvɩrna bam na wuuri ba gʋ Yoram bəkər-kwɩn sɩm ba daarɩ Ahazɩa yɩranɩ tɩn ŋwaanɩ. Kʋntʋ tɩn, Ahazɩa na yɩ Yoram bu-balaŋa kam tɩn ma puli sɩ o di Zuda tɩʋ paarɩ. 2 O dɛɛn jɩgɩ bɩna fiinle-yale mʋ yɩ o laan ji pɛ. O ma jǝni Zeruzalɛm nɩ o di paarɩ dɩm o kɩ bɩnɩ dɩdwɩ. O nu dɛɛn mʋ yɩ Atalia wʋlʋ na yɩ Yisɩrayɛlɩ tɩʋ pɛ Omiri naa tɩn.3 Ahazɩa dɛɛn kwe pɛ Akabɩ dɩ o dwi dɩm tɩtʋŋ-naga kam mʋ, o nu na sʋg-o o dɩ kǝm-balwaarʋ wʋnɩ tɩn ŋwaanɩ. 4 O tiini o tʋŋɩ lwarɩm o ma o cɔgɩ Baŋa-Wɛ yigə, nɩ Akabɩ dwi dɩm na kɩ te tɩn. Bɛŋwaanɩ, o ko tʋʋnɩ kwaga nɩ, bantʋ mʋ yǝni ba brɩ-o pa o tusə. 5 O ma sɛ ba kwiə yam pa o da dɩ Yisɩrayɛlɩ tɩʋ pɛ Akabɩ bu Zʋram o vu Ramɔtɩ-Gileadɩ sɩ ba zaŋɩ najara dɩ Siiri tɩʋ pɛ Azayɛlɩ. Siiri tiinə bam ma kɩ Zʋram zʋnnɩ najara yam wʋnɩ. 6 Kʋntʋ ŋwaanɩ o joori o vu Zizreyɛlɩ tɩʋ sɩ ba sooni o fufwələ yam ba pa‑o. O na wʋ Zizreyɛlɩ nɩ tɩn, Zuda tɩʋ pɛ Ahazɩa ma vu o te sɩ o war‑o dɩ o zʋnnɩ dɩm.
7 Ahazɩa na ve sɩ o daanɩ Zʋram yawɩʋ kʋm tɩn, Wɛ dɛɛn tɔgɩ o kǝm dɩm kʋntʋ baŋa nɩ mʋ sɩ DƖ pa o paarɩ dɩm ti. O ta na wʋ Zʋram tee nɩ tɩn mʋ ba tɔgɩ daanɩ ba vu sɩ ba na Nimisi bu Zehu. Baŋa-Wɛ nan ya maŋɩ DƖ kuri Zehu mʋ sɩ o pa Akabɩ dwi dɩm yɩrɩ saarɩ. 8 Zehu na yɔɔrɩ o wʋra o cɔgɩ Akabɩ dwi dɩm kʋntʋ tɩn, mʋ o nɛ Zuda tɩʋ nakwa badaara, dɩ Ahazɩa zɩmbaara bam biə badonnǝ. Ahazɩa na ve sɩ o daanɩ Zʋram yawɩʋ kʋm tɩn, bantʋ ya tɔgɩ o kwaga mʋ. Zehu ma gʋ ba maama. 9 Kʋntʋ kwaga nɩ, mʋ o tʋŋɩ o nɔɔna sɩ ba beeri Ahazɩa je. Ba ma na nɩ o ve o səgi o tɩtɩ Samari nɩ mʋ. Ba ma zi‑o ba ja ba vu Zehu te yɩ o dɩ gʋ-o.a
Ba ma da o ko-nakwɩ Zʋzafatɩ yɩrɩ ŋwaanɩ ba kwe Ahazɩa ba kɩ. Bɛŋwaanɩ, ba dɛɛn tagɩ ba tɩtɩ nɩ mʋ ba wɩ: «Zʋzafatɩ dɛɛn zuli Baŋa-Wɛ dɩ o bɩcarɩ maama, yɩ Ahazɩa dɩ yɩ o naa mʋ.» Nɔɔn-nɔɔnʋ dɛɛn daa maa wʋ daarɩ Ahazɩa dwi dɩm wʋnɩ sɩ kʋ tu wanɩ o di Zuda paarɩ dɩm.b
Atalia dɩ Zoasɩ taanɩ
10 Pɛ Ahazɩa nu Atalia na maanɩ nɩ o bu wʋm tɩga tɩn, o ma zaŋɩ sɩ o pa ba gʋ Zuda pa-digə kam nɔn-biə maama. 11 Ba na tu sɩ ba gʋ pɛ wʋm biə bam tɩn, Pɛ Yoram bukɔ Yehoseba ma ŋɔ Ahazɩa bu-sɩsɩŋa kam yɩrɩ na yɩ Zoasɩ tɩn o səgi. O ma kwe bu wʋm dɩ kaanɩ wʋlʋ na jɩg-o o kɔna tɩn o vu o səgi o pwəgə je nɩ sɩ Atalia yɩ na‑o. Yehoseba dɛɛn yɩ Ahazɩa nakɔ yɩ o kwǝri o yɩ Wɛ kaanɩm tu Yehoyada kaanɩ. Kʋ ma pa o səgi Zoasɩ pa Atalia wʋ nɛ cwǝŋǝ sɩ o gʋ-o. 12 Zoasɩ dɛɛn maŋɩ ba tee nɩ bɩna yardʋ mʋ, yɩ ba səg‑o Wɛ wara-je sɩm digə kadoŋ wʋnɩ. Maŋa kam kʋntʋ nɩ Atalia ma nii Zuda tɩʋ paarɩ dɩm baŋa nɩ.