21
Zʋzafatɩ ma tɩ yɩ o vu o kwə te. Ba ma kwe‑o ba kɩ o kwə bam yibeeli wʋnɩ Davidi tɩʋ Zeruzalɛm nɩ. O tʋʋnɩ dɩm kwaga nɩ o bu Yoram ma ləri o yuu nɩ o ji pɛ.2 Zʋzafatɩ dɛɛn ta jɩgɩ biə badonnǝ. Ba yɩra maa yɩ Azarɩa, dɩ Yehiyɛlɩ, dɩ Zakari, dɩ Azariawu, dɩ Misɛɛlɩ, dɩ Sefatɩa. Bantʋ maama yɩ Yoram nyaana mʋ.3 Ba ko dɛɛn kwe səbu-poŋo dɩ səbu-sɩŋa zɩla yalʋ na jɩgɩ kuri tɩn mʋ o pa ba maama. O ta ma pa-ba tɩɩnɩ dɩlʋ na wʋ Zuda nɩ yɩ dɩ lɔ dɩ pɩ tɩn. Kʋ nan na yɩ paarɩ dɩm, o kwe-dɩ o pa Yoram mʋ, o na yɩ o bu-kwɩan tɩn ŋwaanɩ.
Zuda tɩʋ pɛ Yoram taanɩ
4 Yoram na tu o ba o joŋi o ko paarɩ dɩm o ba o ti, yɩ o paarɩ dɩm na dam tɩn, mʋ o gʋ o nyaana bam maama, kʋ wǝli dɩ Yisɩrayɛlɩ tɩʋ dɩdɛɛra badaara. 5 O dɛɛn jɩgɩ bɩna fiintɔ-yale mʋ yɩ o laan ji pɛ. O ma jǝni Zeruzalɛm nɩ o di paarɩ dɩm o kɩ bɩna nana. 6 Yoram dɛɛn kwe Yisɩrayɛlɩ pwa bam tɩtʋŋ-naga mʋ, nɩ Pɛ Akabɩ dɩ o dwi dɩm na kɩ te tɩn, Bɛŋwaanɩ o di Akabɩ bukɔ mʋ. Kʋntʋ tɩn, o dɛɛn tʋŋɩ lwarɩm o cɔgɩ Baŋa-Wɛ yigə.a 7 Baŋa-Wɛ nan wʋ sɛ sɩ o cɔgɩ Pɛ Davidi dwi dɩm, bɛŋwaanɩ DƖ maŋɩ DƖ goni ni dɩd-o nɩ: o digə kam wʋ́ taa te paarɩ dɩm taan wuu.
8 Yoram paarɩ dim maŋa nɩ mʋ Edɔm dwi dɩm vɩn sɩ ba taa wʋ Zuda pɛ wʋm dam kuri nɩ. Ba ma lɛɛrɩ ba tiŋi ba tɩtɩ pɛ. 9 Yoram ma ja o jar-kərə, dɩ ba dɩdɛɛra bam, dɩ ba tərikooru tɩm maama o vu sɩ o kɩ najara dɩ Edɔm tiinə. Edɔm tiinə bam ma ba ba gilimi o dɩ o nɔɔna bam ba kɩ tɩtarɩ nɩ. Tɩtɩɩ nɩ mʋ Yoram dɩ o jar-kərə bam wanɩ ba lu ba jɩŋa nɩ ba joori sɔŋɔ. 10 Dɩ zɩm maama Edɔm tiinə ta vɩn mʋ sɩ ba taa wʋ Zuda tiinə dam kuri nɩ. Libina tɩʋ tiinə dɩ dɛɛn kɩ kʋntʋ doŋ mʋ. Kʋ yɩ Yoram na mɛ o kwaga o ya Baŋa-Wɛ dɩm na yɩ o nabaara Wɛ tɩn ŋwaanɩ mʋ kʋ dɛɛn kɩ kʋntʋ. 11 O dɛɛn ta lɔgɩ wara-je kaanɩm bimbinə Zuda zwəənu tɩm yuu nɩ mʋ. Kʋntʋ ma pa Zeruzalɛm dɩ Zuda tiinə bam tusi mʋ dɩ ba na dɛ ba zuli jwǝnǝ ba daarɩ Baŋa-Wɛ tɩn.
12 Dɛ dɩdʋa mʋ Yoram joŋi tɔnɔ Wɛ nijoŋnu Eli jɩŋa nɩ yɩ kʋ pʋpʋnɩ kʋ wɩ:
«Baŋa-Wɛ dɩm na yɩ n ko Davidi Wɛ tɩn mʋ taga DƖ wɩ: Nmʋ wʋ sɛ sɩ n kwe n ko Zʋzafatɩ tɩtʋŋ-naga kam, naa n ko-nakwɩ Asa tɩtʋŋ-naga kam dɩ.b 13 Nmʋ nan na kɩ te tɩn, n kwe Yisɩrayɛlɩ pwa tɩtʋŋ-naga kam mʋ n tɔga. N ma n da kʋ ŋwaanɩ n pa Zuda tiinə dɩ Zeruzalɛm tiinə bam yagɩ Baŋa-Wɛ, ba daa ba zuli‑DƖ, nɩnɛɛnɩ Akabɩ dɩ o kwaga kam dɩ na kɩ te tɩn. Kʋ wǝli da, n ta yɔɔrɩ n gʋ n nyaana balʋ na yɩ n tɩtɩ ko biə tɩn. Bantʋ nan ya garɩ‑m. 14 Baŋa-Wɛ dɩ laan nan yɔɔrɩ DƖ ti DƖ yigə mʋ sɩ DƖ dʋlɩ n nɔɔna bam ja-guli-zanɩ, kʋ wǝli dɩ n biə, dɩ n kaana, dɩ n na jɩgɩ kʋlʋ maama tɩn. 15 Nmʋ tɩtɩ nan lagɩ n na yawɩ-cɛɔ mʋ pa kʋ tiini kʋ ja n wʋʋ lʋrʋ tɩm taan, yɩ tɩ laan pi tɩ nuŋi tɩ tʋ tɩga nɩ.»
16 Kʋ kwaga seeni mʋ Baŋa-Wɛ ciŋi Filisi tiinə bam, dɩ Arabi tiinə balʋ dɛɛn na zʋʋrɩ ba twɛ dɩ Kusi tiinə bam tɩn, DƖ pa ba ja dɩ Yoram. 17 Ba ma vu ba zaŋɩ najara dɩ Zuda laŋa kam ba di-ka. Ba ma zʋ pɛ sɔŋɔ kʋm ba pɛ zɩla yalʋ maama na wʋra tɩn ba ja ba viiri. Ba ta ma kalɩ Yoram kaana, dɩ o biə bam ba ja ba wǝli da ba kɛ. Ahazɩa yɩranɩ mʋ ba dɛɛn yag-o da. Wʋntʋ mʋ yɩ balaŋa Yoram bəkəri sɩm maama wʋnɩ.
18 Wǝǝnu tɩntʋ maama kwaga nɩ, Baŋa-Wɛ ma pa yawɩ-cɛɔ ja Yoram o wʋʋ lʋrʋ tɩm nɩ, yɩ kʋ soonim tǝrǝ. 19 Bɩna yale na kɛ tɩn mʋ o wʋʋ lʋrʋ tɩm tagɩ tɩ nuŋi, pa o na zʋnnɩ zanzan yɩ o tɩ. O nɔɔna bam dɛɛn maa wʋ tarɩgɩ min-vʋ-zɔŋɔ sɩ ba ma zuli o yɩrɩ, nɩ ba na yǝni ba kɩ te o nabaara bam tʋʋnɩ baŋa nɩ tɩn.
20 Yoram dɛɛn jɩgɩ bɩna fiintɔ-yale mʋ yɩ o ji pɛ. O ma jǝni Zeruzalɛm nɩ o di paarɩ o kɩ bɩna nana. O tʋʋnɩ dɩm wʋ daanɩ nɔɔn-nɔɔnʋ. Ba ma kwe‑o ba kɩ Davidi tɩʋ Zeruzalɛm nɩ, sɩ kʋ daɩ pwa yibeelǝ yam wʋnɩ mʋ ba kɩ-o.c