Zʋzafatɩ wanɩ o dʋna najara wʋnɩ
20
Kʋ kwaga seeni mʋ Moabɩ tiinə bam, dɩ Amɔn tiinə bam, dɩ Meyunim tiinə badaara tu sɩ ba zaŋɩ najara dɩ Zʋzafatɩ.2 Nɔɔna badonnǝ ma vu ba ta dɩ Zʋzafatɩ ba wɩ: «Kɔ-fɔrɔ mʋ zɩgɩ Edɔm seeni, kʋ na maŋɩ dɩ Yɛ nɩnɩʋ kʋm bubɛ dɩdoŋ dɩm nɩ tɩn, ba bɩɩnɩ‑m dɩ jara. Ba nan maŋɩ ba yi Hasason-Tamarɩ.» (En-gedi mʋ kʋntʋ.) 3 Fʋʋnɩ ma zʋ Zʋzafatɩ, yɩ o sɩɩnɩ o yiǝ o loori Baŋa-Wɛ sɩ o lwarɩ o na wʋ́ kɩ te tɩn. O ta ma pa ni sɩ balʋ maama na zʋʋrɩ Zuda nɩ tɩn vɔ ni. 4 Zuda tiinə bam ma jeeri daanɩ Zeruzalɛm nɩ sɩ ba loori zǝnǝ Baŋa-Wɛ tee nɩ. Nɔɔna dɩ dɛɛn maa nuŋi Zuda tɩɩnɩ dɩm maama wʋnɩ ba ba, sɩ ba beeri Baŋa-Wɛ.
5 Zʋzafatɩ laan ma zaŋɩ o zɩgɩ Zuda tiinə bam, dɩ Zeruzalɛm tiinə bam kɔ-fɔrɔ kʋm yigə nɩ. Ba maa wʋ Baŋa-Wɛ digə kam kʋnkɔl-dʋŋʋ kʋm yigə nɩ. 6 O maa wɩ:
«Baŋa-Wɛ, nmʋ mʋ yɩ dɩ́ nabaara bam Wɛ. Nmʋ wʋ wɛyuu nɩ mʋ, yɩ n jɩgɩ paarɩ n di tɩga baŋa tɩɩnɩ dɩm maama nɩ. Nmʋ tiini n dana mʋ, yɩ nɔɔn-nɔɔnʋ warɩ nmʋ yigə o cʋa. 7 Dɩbam Tu Wɛ, nmʋ nɔɔna Yisɩrayɛlɩ tiinə bam dɛɛn na tu yo seeni tɩn, n zəli balʋ ya na zʋʋrɩ tɩga kantʋ wʋnɩ tɩn mʋ, yɩ n daarɩ n kwe-ka n pa n ciloŋ Abraham dwi dɩm n wɩ: ba taa te-ka sɩ kʋ taa ve maŋa maama.a 8 Ba dɩ nan na zʋʋrɩ tɩga kam wʋnɩ tɩn, ba lɔgɩ wara-digə mʋ n yɩrɩ dɩm zulə ŋwaanɩ. Ba maa wɩ: 9 ‹Nɩ cam dwi dɩlʋ maama mʋ na yi dɩbam tɩga kantʋ wʋnɩ, kʋ na yɩ najara mʋ, naa waarɩm, naa yawɩ-cɛɛrʋ, naa kana mʋ dɩ, dɩ́ wʋ́ ba dɩ́ zɩgɩ digə kantʋ na yɩ n yɩrɩ dɩm zulə ŋwaanɩ tɩn yigə nɩ dɩ́ loori zǝnǝ nmʋ tee nɩ. Nmʋ dɩ maa wʋ́ cəgi dɩ́ wɛ-loro kʋm n daarɩ n joŋi dɩbam n yagɩ.›
10 Nan fɔgɩ n nii kʋlʋ na yi dɩbam lele. Dɩ́ dʋna nuŋi Amɔn, dɩ Moabɩ, dɩ Edɔm pweeru laŋa kam nɩ mʋ ba ba sɩ ba jeeri dɩbam dɩ jara. Dɩ́ nabaara bam dɛɛn na nuŋi Ezipi nɩ ba ba yo seeni tɩn, tɩɩnɩ dɩm kʋntʋ nan yɩ dɩlʋ n na tagɩ dɩ ba nɩ: ba yɩ cɔgɩ-dɩ tɩn mʋ. Ba ma sɩɩnɩ ba pipiri ba yagɩ tɩɩnɩ dɩm kʋntʋ, ba wʋ cɔgɩ-dɩ. 11 Ba laan na lagɩ ba joori ba ŋwɩ dɩbam te tɩn mʋ tɩntʋ: ba bʋŋɩ sɩ ba zəli dɩbam mʋ tɩga kalʋ nmʋ tɩtɩ na kwe n pa dɩbam sɩ dɩ́ taa te tɩn wʋnɩ. 12 Dɩ́ Tu Wɛ, nmʋ nan bá waarɩ-ba na? Dɩbam ba jɩgɩ dam sɩ dɩ́ jeeri kɔ-fɔrɔ kʋntʋ na bɩɩnɩ sɩ ba zaŋɩ najara dɩ dɩbam tɩn. Dɩbam yɔɔrɩ dɩ́ yɩ borɩmaa mʋ kǝm dɩntʋ wʋnɩ. Dɩ́ tɩɩna nan za daŋɩ nmʋ baŋa nɩ mʋ.»b
13 Zuda dwi tiinə maama dɛɛn zɩgɩ Baŋa-Wɛ yigə nɩ, kʋ wǝli dɩ ba kaana, dɩ ba biə, dɩ ba bu-sɩsɩn mʋ. 14 Levi dwi tu Yahazeli dɛɛn tɔgɩ o wʋ kɔgɔ kʋm wʋnɩ. O maa yɩ Zakari bu mʋ. O dɛɛn yɩ Azafɩ sɔ-yuu kʋm nɔɔnʋ mʋ, yɩ o nuŋi Matanɩa, dɩ Yeyiyɛlɩ, dɩ Benaya dwi dɩm wʋnɩ. Baŋa-Wɛ Joro dɛɛn ma ba kʋ tu o baŋa nɩ mʋ, 15 yɩ o wɩ:
«Zʋzafatɩ, nmʋ dɩ balʋ maama na zʋʋrɩ Zuda, dɩ Zeruzalɛm wʋnɩ tɩn, cəgi-na a taanɩ dɩntʋ. Baŋa-Wɛ na tagɩ te dɩ abam tɩn mʋ tɩntʋ: Yɩ taá fʋna, nan yɩ pa-na sɩ á vwana parɩ kɔ-fɔrɔ kʋntʋ ŋwaanɩ. Kʋ daɩ abam mʋ te jara yam, sɩ kʋ yɩ Baŋa-Wɛ mʋ te-ya. 16 Jwaanɩ nan nuŋi-na sɩ á jeeri á dʋna bam dɩ najara. Baá taa diini Ziza zoŋo kʋm cwǝŋǝ kam pa á jeeri-ba bolo kʋlʋ na wʋ Yeruɛlɩ kagʋa kam wa-puli seeni tɩn ni nɩ. 17 Abam maŋɩ á ba lagɩ á kɩ najara yam! Nan ve-na á fɔgɩ á toŋi á zɩgɩ á zɩga je sɩm nɩ, sɩ á nii á na Baŋa-Wɛ na lagɩ DƖ tɔgɩ cwǝŋǝ kalʋ DƖ joŋi abam DƖ yagɩ tɩn. Kʋntʋ ŋwaanɩ, Zuda dɩ Zeruzalɛm tiinə bam, yɩ pa-na fʋʋnɩ ta jɩgɩ abam. Nan yɩ pa-na sɩ á vwana parɩ. Jwa ve-na á jeeri-ba dɩ najara, sɩ Baŋa-Wɛ wʋ á tee nɩ.»c
18 Zʋzafatɩ na ni kʋntʋ tɩn, o ma tiiri o vin o yibiyə tɩga nɩ o zuli Baŋa-Wɛ. Zuda dɩ Zeruzalɛm tiinə bam maama dɩ ma kɩ kʋntʋ. 19 Levi tiinə bam badaara na nuŋi Keyatɩ dɩ Kʋra sɔ-yuni tɩm nɩ tɩn dɩ ma zaŋɩ wɛɛnɩ ba leeni le dɩ kwər-dɛ ba ma zuli Baŋa-Wɛ dɩm na yɩ Yisɩrayɛlɩ tiinə Wɛ tɩn.
20 Tɩga na pʋʋrɩ tɩtɩɩtɩ tɩn, nɔɔna bam ma zaŋɩ sɩ ba nuŋi ba vu Tekoa kagʋa kam seeni. Zʋzafatɩ ma zɩgɩ ba yigə nɩ o ta wɩ: «Zuda dɩ Zeruzalɛm tiinə bam, cəgi-na a taanɩ dɩntʋ. Kɩ-na á wʋ-dɩdʋa dɩ á Tu Baŋa-Wɛ dɩm, sɩ Dɩntʋ wʋ́ pa á na dam. Kwe-na á cɩga á kɩ DƖ nijoŋnǝ bam dɩ wʋnɩ, sɩ á wʋ́ na wɔnɔ.» 21 Pɛ wʋm laan ma bwɛ dɩ o nɔɔna bam, yɩ o daarɩ o kuri balʋ na wʋ́ taa leeni ba zuli Baŋa-Wɛ yɩ ba tee‑DƖ o paarɩ-zulǝ yam ŋwaanɩ tɩn. O ma pa ba tʋ jar-kərə bam yigə nɩ ba leeni ba wɩ:
«Kɩ-na Baŋa-Wɛ le,
DƖ sono kʋm na wʋra maŋa maama tɩn ŋwaanɩ.»
22 Ba na yɔɔrɩ ba puli sɩ ba taa leeni kʋntʋ tɩn, mʋ Baŋa-Wɛ da DƖ zaŋɩ Zuda tiinə dʋna bam baŋa nɩ.d 23 Amɔn tiinə bam dɩ Moabɩ tiinə bam ma li Edɔm jar-kərə bam ba yɔɔrɩ ba gʋ ba maama. Kʋntʋ kwaga nɩ mʋ ba tɩtɩ daa pipiri ba gʋ daanɩ.
24 Zuda tiinə bam na nuŋi ba vu ba yi jǝgǝ kalʋ na jeeri kagʋa kam tɩn, mʋ ba zɩgɩ da ba tʋlɩ ba na nɩ ba dʋna kɔ-fɔrɔ kʋm maama laan yɔɔrɩ ba yɩ twa mʋ ba tigi tɩga kam maama nɩ, yɩ ba wʋlʋwʋlʋ wʋ lugi. 25 Zʋzafatɩ dɩ o jar-kərə bam ma yɔɔrɩ ba vu ba pɛ wo-kuri dwi maama sɩ ba ja-tɩ ba viiri. Ba dɛɛn wanɩ ba kwalɩmɩ jara zɩla zanzan, dɩ gwaarʋ, dɩ wo-kurə yadonnə mʋ. Ba dɛɛn kwe da yatɔ mʋ ba kwalɩmɩ wǝǝnu tɩm kʋntʋ, yɩ ba ga tɩdaara ŋwa ba yagɩ-tɩ da. 26 Da yana dɛ dɩm nɩ, ba ma jeeri daanɩ Berakae bolo kʋm nɩ sɩ ba tee Baŋa-Wɛ. Dɩ zɩm maama, ba ta jɩgɩ bolo kʋm kʋntʋ yɩrɩ ba bǝi nɩ ‹Tiə Bolo› mʋ.
27 Zʋzafatɩ laan ma tʋ Zuda dɩ Zeruzalɛm tiinə bam maama yigə nɩ pa ba leeni dɩ wʋpolo ba maa joori Zeruzalɛm. Ba kɩ kʋntʋ bɛŋwaanɩ Baŋa-Wɛ mʋ pɛ ba di ywəəni ba dʋna bam cɔgɩm ŋwaanɩ. 28 Ba na yi Zeruzalɛm tɩn, mʋ ba yɔɔrɩ Baŋa-Wɛ digə kam ba zʋ ka wʋʋ, yɩ ba daa ta magɩ ba kwaanʋ, dɩ kwɛɛra zɩla dwi dwi, yɩ ba wu nabwaanʋ.
29 Tɩɩnɩ dɩlʋ na gilimi da tɩn nɔɔna na ni Baŋa-Wɛ na jaŋɩ te o wanɩ Yisɩrayɛlɩ tiinə dʋna DƖ pa-ba tɩn, mʋ fʋʋnɩ tiini dɩ ja-ba Wɛ dam dɩm ŋwaanɩ. 30 Kʋntʋ dɩ ma pa yazurə wʋ Zʋzafatɩ paarɩ laŋa kam wʋnɩ. Bɛŋwaanɩ, o Tu Wɛ dɩm dɛɛn cɩgɩ-ba ba dʋna maama jɩŋa nɩ pa ba daa ba yaarɩ-ba.
Zʋzafatɩ paarɩ na kweeli te tɩn
31 Zʋzafatɩ dɛɛn jɩgɩ bɩna fiintɔ-yanu mʋ yɩ o puli sɩ o di Zuda tɩʋ paarɩ. O ma jǝni Zeruzalɛm nɩ o di paarɩ dɩm o kɩ bɩna fiinle-yanu. O nu dɛɛn yɩ Sili bukɔ Azuba mʋ. 32 Zʋzafatɩ dɛɛn yɔɔrɩ o kwe o ko Asa tɩtʋŋ-naga kam mʋ, o wʋ ywəri ka wʋnɩ maŋa dɩ maŋa, pa o tɩtʋŋa su Baŋa-Wɛ yi. 33 O dɛɛn nan wʋ wanɩ o cɔgɩ wara-je kaanɩm bimbinə yam. Nɔɔna ya ta wʋ kɩ ba wʋbʋŋa nɩ sɩ ba taa zuli ba nabaara Wɛ dɩm.
34 Zʋzafatɩ dɛɛn na di paarɩ yɩ o kɩ wǝǝnu tɩlʋ maama tɩn, kʋ zɩgɩ o paarɩ dɩm pulim nɩ sɩ kʋ yi dɩ na kweeli maŋa kalʋ tɩn, ba pʋpʋnɩ-tɩ ba tiŋi Hanani bu Zehu mɩmaŋa tɔnɔ kʋm wʋnɩ, yɩ tɩ ta wʋ Yisɩrayɛlɩ tɩʋ pwa tɔnɔ kʋm wʋnɩ.
35 Zʋzafatɩ ta na yɩ Zuda pɛ tɩn, mʋ o kɩ ni-mɔrɔ dɩ Yisɩrayɛlɩ pɛ Ahazɩa. Ahazɩa nan tiini o tʋŋɩ wo-balɔrɔ tɩtʋŋɩ mʋ. 36 Zʋzafatɩ ma kɩ ni dɩd-o pa ba kɩ nabwǝǝru sɩ ba taa ma ba pipiə. Ba dɛɛn zɩgɩ Ezion-Ebɛrɩ nɩ mʋ ba kɩ-tɩ. 37 Eliezɛrɩ na yɩ Dodavawu bu yɩ o nuŋi Maresa tɩʋ nɩ tɩn ma ŋɔɔnɩ yiyiu-ŋwɛ o vanɩ Zʋzafatɩ o wɩ: «Nmʋ na ve n kɩ ni-mɔrɔ dɩ Ahazɩa tɩn ŋwaanɩ, Baŋa-Wɛ lagɩ DƖ ja nabwǝǝru tɩlʋ n na kɩ tɩn mʋ DƖ cɔgɩ DƖ yagɩ.» Nabwǝǝru tɩm ma sɩɩnɩ tɩ cɩcʋgɩ yɩ tɩ daa wʋ wanɩ tɩ tɔgɩ nɩnɩʋ kʋm baŋa tɩ kɩ pipiu.