Absalɔn tʋʋnɩ
18
Davidi dɛɛn ma jeeli o nɔɔna bam o kɩ daanɩ, yɩ o laan pɔɔrɩ-ba mʋrʋ mʋrʋ laŋa nɩ dɩdaanɩ bi bi wʋnɩ. O ta ma lɩ yigǝ tiinǝ o pa ba nii pʋpwara maama. 2 O ma pɔɔrɩ o jar-kərə bam kuni bɩtɔ. O ma kwe kɔgɔ dɩdʋa o kɩ Zoabɩ jɩŋa nɩ. O nyaanɩ Abisayi na yɩ Zeruya bu tɩn dɩ maa wʋ ba kɔgɔ dɩdʋa yigə nɩ. Balʋ maama na daarɩ tɩn, o ma kɩ-ba Gatɩ tu Itayi jɩŋa nɩ. Davidi laan ma ta o jar-kərə bam maama o wɩ: «Amʋ tɩtɩ wʋ́ tɔgɩ abam sɩ dɩ́ vu dɩ́ zaŋɩ najara yam.»3 Nɔɔna bam ma lǝr-o ba wɩ: «Dɩ́ bá sɛ sɩ n tɔgɩ n vu. Dɩ́ dʋna bam na zəli dɩbam yɩ dɩ́ duri sɩ dɩ́ lu, kʋntʋ daɩ kʋlʋkʋlʋ ba tee nɩ. Dɩbam nɔɔna bam cicoro na maŋɩ ba tɩ najara wʋnɩ, kʋ ta bá taa jɩgɩ kuri kʋ pa-ba. Sɩ kʋ na yɩ nmʋ yɩranɩ, nmʋ garɩ dɩbam nɔɔna mʋrrʋ fugə. Nan maŋɩ tɩʋ kʋm wʋnɩ yo, sɩ dɩ́ na lagɩ zǝnǝ, sɩ n pa dɩ yi dɩbam. Kʋntʋ wʋ́ taa gara.»
4 Pɛ Davidi ma lǝri-ba o wɩ: «Amʋ wʋ́ kɩ kʋlʋ maama na su abam yi tɩn mʋ.» O ma lɛɛrɩ o maŋɩ tɩʋ kʋm manchoŋo kʋm ni nɩ o nii, yɩ jar-kərə bam nuŋi ba nuŋi ba maa kɛa, nɔɔna bi bi dɩdaanɩ nɔɔna mʋrʋ mʋrʋ. 5 Davidi ma pa ni Zoabɩ, dɩ Abisayi, dɩ Itayi yɩ o wɩ: «Tɔgɩ-na amʋ ŋwaanɩ á zuri á yɩra dɩ a bu Absalɔn, sɩ á yɩ kɩ-o zʋnnɩ.» Davidi na tagɩ bɩtara kantʋ tɩn dɩ o jar-kərə yigǝ tiinǝ bam tɩn mʋ nɔɔna bam maama ni o ni dɩm kʋntʋ.
6 Davidi jar-kərə bam ma nuŋi ba vu ba jeeri Yisɩrayɛlɩ tiinə bam dɩ najara Efrayim kagʋa kam seeni. 7 Najara yam na cɛ tɩn, Davidi nɔɔna bam ma kwaanɩ ba di Yisɩrayɛlɩ tiinə bam. Dɩntʋ dɛ dɩm nɩ ba ma gʋ nɔɔna mʋrrʋ fiinle (20,000). 8 Najara yam ma jagɩ ya zʋ je sɩm kagʋa kam maama wʋnɩ. Kagʋa kam tɩtɩ dɛɛn pɛ nɔɔna zanzan tɩ, sɩ kʋ dwǝni jar-kərə bam sʋ-lwaanʋ na gʋ balʋ tɩn.
9 Najara yam wʋnɩ mʋ, Absalɔn duri o vu o tʋ Davidi nɔɔna bam badonnǝ wʋnɩ. O dɛɛn dɔgɩ bɩna-sisəŋə baŋa nɩ mʋ. O sisǝŋǝ kam ma duri ka zʋ tweeru tɩm na tiini dɩ li mɛ tɩn. O yuu ma gɩrɩmɩ dɩ tiu kʋdoŋ nɛ, pa o lǝgi wɛɛnɩ, o warɩ sɩ o joŋi o tɩtɩ o yagɩ. O sisǝŋǝ kam ma duri ka kɛ ka daarɩ‑o pa o sɩgɩlɩ tiu kʋm nɛ sɩm nɩ.
10 Davidi nɔɔnʋ wʋdoŋ ma na‑o yɩ o duri o vu o ta o brɩ Zoabɩ o wɩ: «Amʋ nɛ Absalɔn na sɩgɩlɩ tiu nɛ nɩ!» 11 Zoabɩ ma ta dɩ nɔɔnʋ wʋm o wɩ: «Bɛ? Nmʋ nɛ Absalɔn mʋ yɩ n wʋ gʋ-o ka jǝgǝ da? Nmʋ ya na mag-o n gʋ, a yaá pa‑m səbu-poŋo səbu-dala fugə, yɩ a daarɩ a pa‑m nɔn-babɩa kilǝ a wǝli da.»
12 Nɔɔnʋ wʋm ma ləri Zoabɩ o wɩ: «Nmʋ na maŋɩ n jɩgɩ səbu-poŋo səbu-dala mʋrʋ sɩ n kɩ a jɩŋa nɩ lele, a ta bá sɛ sɩ a dwe pɛ bu wʋm. Bɛŋwaanɩ, dɩ́ maama zɩgɩ mʋ yɩ pɛ Davidi ta dɩ nmʋ, dɩ Abisayi dɩdaanɩ Itayi o wɩ: ‹Tɔgɩ-na amʋ ŋwaanɩ á cɩ a bu Absalɔn sɩ nɔɔn-nɔɔnʋ yɩ kɩ-o zʋnnɩ.› 13 Amʋ ya na vɩn pɛ wʋm ni yɩ a paalɩ a gʋ Absalɔn, pɛ daa ta wʋ́ ni kʋ ŋwa. Bɛŋwaanɩ, kʋlʋkʋlʋ ba səgi pɛ yigə nɩ. Nmʋ nan ya bá zɩgɩ a kwaga nɩ.»
14 Zoabɩ ma ta o wɩ: «Amʋ bá wanɩ a zuri a yɩra sɩ a taa cəgi lara yantʋ!» O ma zaŋɩ o kwe cicwə yatɔ o vu o yi tiu kʋm dɩdaanɩ Absalɔn ta ŋwɩ mʋ o sɩgɩlɩ tiu kʋm nɛ sɩm nɩ. Zoabɩ ma lɩ cicwə yatɔ yam o zɔ Absalɔn bɩcarɩ nɩ. 15 Zoabɩ nɔn-dʋnnʋ fugə na ze o najara zɩla yam tɩn laan ma yi ba gilimi Absalɔn ba mag-o ba gʋ.
16 Zoabɩ laan ma pa ba wu nabɔnɔ sɩ kʋ brɩ nɩ najara yam ti. O jar-kərə bam ma yagɩ Yisɩrayɛlɩ tiinə bam zəlim yɩ ba joori o te. 17 Ba ma kwe Absalɔn yɩra yam ba dʋlɩ ba yagɩ goŋ-canluŋu wʋnɩ, kagʋa kam nɩ. Ba ma pɛ kandwa-kamunə ba ma li-kʋ pa ya tiŋi baŋa baŋa. Kʋntʋ maama tɩn, dɩdaanɩ Yisɩrayɛlɩ nɔɔna bam maama duri ba joori ba sam mʋ.
18 Absalɔn dɛɛn ta na ŋwɩ tɩn, o ya cwi kandwɛ-kamunu mʋ o zɩgɩ Pɛ bolo kʋm nɩ sɩ kʋ taa bǝi o yɩrɩ. O dɛɛn ya bʋŋɩ o tɩtɩ nɩ mʋ o wɩ: «Amʋ ba jɩgɩ bəkərə sɩ o jwa bəŋi a yɩrɩ.» O ma kwe o tɩtɩ yɩrɩ o pa kandwɛ dɩm. Dɩ zɩm maama, ba ta bə-kʋ wɩ: ‹Absalɔn Kandwɛ› mʋ.
Davidi keeri Absalɔn ŋwaanɩ
19 Sadoki bu Ahimaazi ma ta dɩ Zoabɩ o wɩ: «Pa-nɩ cwǝŋǝ sɩ a duri a vu ta Pɛ Davidi wɩ Baŋa-Wɛ joŋ-o DƖ yagɩ o dʋna jɩŋa nɩ.» 20 Zoabɩ ma lǝr-o o wɩ: «Nmʋ zɩm ba jɩgɩ kwər-ywəŋə sɩ n ja n vu n pa pɛ. Kʋʋ́ taa yɩ dɛ dɩdoŋ nɩ mʋ sɩ kʋ daɩ zɩm. Bɛŋwaanɩ, pɛ wʋm bu mʋ tɩga.»
21 Zoabɩ ma daarɩ o ta dɩ Kusi tu na zɩgɩ o tee nɩ tɩn o wɩ: «Ve n ta nmʋ yi na nɛ kʋlʋ maama tɩn n brɩ pɛ wʋm.» Kusi tu wʋm ma tiiri tɩga nɩ o jɔɔn‑o yɩ o zaŋɩ o duri o maa kɛa.
22 Sadoki bu Ahimaazi daa ta ma ta dɩ Zoabɩ o wɩ: «Kʋ na yɩ te maama dɩ, nan sɛ sɩ amʋ dɩ duri a saŋɩ Kusi tu wʋm kwaga a vu Pɛ Davidi te.» Zoabɩ ma bwe‑o o wɩ: «A bu, bɛŋwaanɩ mʋ n yɔɔrɩ n lagɩ sɩ n kwe kwǝrǝ kam n ja n vu? Ka ba lagɩ ka ja nyɔɔrɩ ka pa nmʋ.»
23 O ta ma fɩn yɩ o wɩ: «Dɩ kʋ maama dɩ, a ta lagɩ sɩ a vu mʋ!» Zoabɩ ma ga laŋa kam yɩ o ta dɩd-o o wɩ: «Nmʋ dɩ nan ve!» Ahimaazi ma zaŋɩ o kwe Zʋrdɛn bolo cwǝŋǝ kam o duri o vu o gaalɩ Kusi tu wʋm o kɛ.
24 Davidi dɛɛn nan ya je tɩʋ kʋm manchoŋo ni bwəəru tɩle tɩm tɩtarɩ laŋa nɩ mʋ.a Tɩʋ kʋm yɩrɩnʋ ma vu o din o dɔgɩ tɩʋ kʋm manchoŋo kəbrə kam yuu nɩ. O ma nii o tʋlɩ o na nɔɔnʋ na duri o yɩranɩ o bɩɩnɩ. 25 Yɩrɩnʋ wʋm ma tɔɔlɩ o ta dɩ Pɛ Davidi. Davidi ma ləri o wɩ: «Kʋ tu na duri o yɩranɩ, kʋ brɩ nɩ kʋ yɩ kwər-ywəŋə mʋ o jɩgɩ o bɩɩnɩ.»
Wʋlʋ na duri tɩn ma tiini o vaŋɩ o twɛ-ba. 26 Yɩrɩnʋ wʋm daa ma tʋlɩ o na nɔɔnʋ wʋdoŋ dɩ na duri o bɩɩnɩ. O ma tɔɔlɩ o ta dɩ manchoŋo yɩrɩnʋ wʋm o wɩ: «Nii nɔɔnʋ wʋdoŋ dɩ na duri o yɩranɩ o maa bɩɩna.» Pɛ wʋm maa wɩ: «O dɩ wʋ́ taa jɩgɩ kwər-ywəŋə mʋ o bɩɩnɩ.»
27 Yɩrɩnʋ wʋm ma zɩgɩ kəbrə kam yuu nɩ o tɔɔlɩ o wɩ: «Amʋ na nɛ tɩn, pulim nɔɔnʋ wʋm duri nɩnɛɛnɩ Sadoki bu Ahimaazi na yǝni o duri te tɩn mʋ.» Davidi ma ləri o wɩ: «Wʋntʋ yɩ nɔn-ŋʋm mʋ. Tɩntʋ wɛɛnɩ o jɩgɩ ta-ŋʋm mʋ o bɩɩnɩ.»
28 Ahimaazi na yi tɩn, mʋ o tɔɔlɩ o ta dɩ pɛ wʋm o wɩ: «Woŋo maama kɩ lam!» O ma vin o yibiyə tɩga nɩ o jɔɔnɩ pɛ wʋm yɩ o wɩ: «Pɛ, n Tu Baŋa-Wɛ maŋɩ dɩ tiə, DƖ na pɛ n di n dʋna balʋ na lɔgɩ n kwaga nɩ tɩn ŋwaanɩ.»
29 Pɛ wʋm ma bwe‑o o wɩ: «A bu Absalɔn jɩgɩ yazurə na?» Ahimaazi ma ləri o wɩ: «Maŋa kalʋ Zoabɩ na lagɩ o tʋŋɩ amʋ dɩdaanɩ n nɔn-dʋŋʋ wʋm sɩ dɩ́ ba tɩn, mʋ a nɛ kɔgɔ na gilimi yɩ kʋ maama yɩ vugimə yɩranɩ. Amʋ nan yǝri bɛŋwaanɩ ba na kɩ sɔɔ kʋm tɩn.»
30 Pɛ wʋm maa wɩ: «Kɛ n zɩgɩ dáa nɩ!» Ahimaazi ma fʋfɔ o zɩgɩ dáa nɩ.
31 Sɩntʋ nɛ sɩm nɩ mʋ Kusi tu wʋm dɛ o yi. O ma ta o wɩ: «Pɛ, a jɩgɩ ta-ŋʋm mʋ sɩ a ta a brɩ-m! Baŋa-Wɛ zɩm joŋi nmʋ mʋ DƖ yagɩ balʋ maama na zaŋɩ ba zɩgɩ sɩ ba cɔgɩ‑m tɩn jɩŋa nɩ.»
32 Pɛ Davidi ma bwe Kusi tu wʋm o wɩ: «A bu Absalɔn jɩgɩ yazurə na?» Kusi tu wʋm ma lǝr-o o wɩ: «Amʋ tu, Wɛ wʋ́ pa n dʋna bam dɩ balʋ maama na lagɩ ba lɔ n kwaga nɩ tɩn ŋwɩa guri nɩnɛɛnɩ nɔn-dʋŋʋ wʋntʋ zɩm na guri te tɩn.»
33 Pɛ wʋm na ni kʋntʋ tɩn, o wʋʋ ma tiini kʋ cɔgɩ zanzan. O ma vu o din o zʋ wɛyuu digə kalʋ na yeeri dɩ tɩʋ kʋm manchoŋo kʋm tɩn o tʋ kərə nɩ. O na maa ve tɩn, o tiini o kaasɩ mʋ yɩ o wɩ: «Amʋ bu Absalɔn! Aaa! Absalɔn, a bu yoo! Amʋ ya mʋ na tɩga yɩ nmʋ ŋwɩ: kʋ ya ba gara na? Aaa! Absalɔn, a bu yoo!»b