Usayi brɩ Absalɔn sɩ o sa cwǝŋǝ
17
Kʋntʋ kwaga nɩ Ayitofɛlɩ ma ta dɩ Absalɔn o wɩ: «Pa-nɩ cwǝŋǝ sɩ a kuri nɔɔna mʋrrʋ fugǝ-tɩle (12,000), sɩ dɩ́ nuŋi tɩtɩ dɩntʋ dɩ́ vu dɩ́ beeri Davidi je dɩ́ ja. 2 Kʋ na yɩ te tɩn, amʋ wʋ́ vu a zaŋɩ o baŋa nɩ dɩ o tiini o bugi yɩ o vwana dɩ parɩ. Amʋ wʋ́ pa o bɩcarɩ di, pa o nɔɔna bam maama duri ba daarɩ‑o. A laan wʋ́ gʋ pɛ Davidi yɩranɩ, 3 sɩ a daarɩ a ja o nɔɔna bam maama a joori a ba a kɩ nmʋ kwaga nɩ. Nɔɔnʋ wʋlʋ nmʋ na beeri tɩn yɩranɩ na tɩga, ba maama wʋ́ joori n tee nɩ dɩ ba yazurə.» 4 Ayitofɛlɩ kwiə yam kʋntʋ dɛɛn maa lana ya paɩ Absalɔn dɩdaanɩ Yisɩrayɛlɩ nakwa bam maama.5 Absalɔn ma ta o wɩ: «Dɩ́ nan daa wʋ́ cəgi Ariki tu Usayi dɩ kwǝrǝ mʋ sɩ dɩ́ lwarɩ wʋntʋ wʋbʋŋa na yɩ te tɩn.» 6 Usayi ma zʋ o te yɩ Absalɔn ta o wɩ: «Ayitofɛlɩ brɩ nɩ dɩ́ kɩ tɩntʋ mʋ. Dɩ́ wʋ́ sɛ o ni dɩm naa, nmʋ dɩ wʋ́ brɩ dɩbam dɩ́ na wʋ́ kɩ te? Nan ta sɩ dɩ́ nii.»
7 Usayi ma ləri Absalɔn o wɩ:
«Amʋ tee nɩ, Ayitofɛlɩ na pɛ kwiə yalʋ tɩntʋ tɩn ba lana. 8 Nmʋ maŋɩ n ye nɩ n ko dɩ o nɔɔna bam yɩ nɔn-babɛ mʋ cɩga cɩga. Lele kʋntʋ ba laan je dɩ ban-zɔŋɔ mʋ nɩnɛɛnɩ ba na vrɩ nywənkurəa biə ba daarɩ-ka te tɩn. Kʋ wǝli da, nmʋ ko na yɩ jara-kǝm nɔn-babɩa tɩn ŋwaanɩ, tɩtɩɩ dɩntʋ o bá pəni o nɔɔna bam na tigi mɛ tɩn. 9 Tɩntʋ wɛɛnɩ o beeri piu bɔɔnɩ, naa gugoro kʋdoŋ mʋ o səgi da. Wʋntʋ waɩ o loori yigə o nuŋi o jeeri dɩbam dɩ najara. Nɔɔna laan na niə, baá ta ba wɩ: ‹Hei! Ba wanɩ Absalɔn kɔgɔ kʋm, yɩ ba zanzan tɩ.› 10 Kʋntʋ wʋ́ pa nmʋ jar-kərə nɔn-babɛ sɩm tɩtɩ wʋrʋ ga baarɩ, yɩ fʋʋnɩ zʋ-ba. Yisɩrayɛlɩ tiinə maama nan maŋɩ ba ye n ko na tiini o ye najara laŋa te, dɩdaanɩ o jar-kərə bam na yɩ pamaŋ-bɩbɛ cɩga cɩga te tɩn.
11 Kwiə yalʋ amʋ na jɩgɩ tɩn mʋ tɩntʋ: la Yisɩrayɛlɩ tiinə bam maama n kɩ daanɩ, kʋ na zɩgɩ Dan laŋa kam seeni sɩ kʋ yi Bɛɛr-Seba tɩn. Nmʋ jar-kərə bam kɔgɔ laan maa wʋ́ taa daga nɩ nɩnɩʋ ni kasʋlʋ te. Nmʋ tɩtɩ laan wʋ́ da ba yigə sɩ á vu á kɩ najara yam. 12 Davidi zɩ na wʋ mɛ dɩ mɛ maama, dɩ́ wʋ́ beeri o je dɩ́ yi‑o. Dɩ wʋ́ tʋ o baŋa nɩ dɩ́ li‑o mʋ nɩnɛɛnɩ nyɔnɔ na tʋɩ tɩga nɩ te tɩn. Kʋntʋ mʋ Davidi dɩ o jar-kərə bam wʋlʋwʋlʋ daa bá daarɩ, dɩ dɩdʋa dɩ. 13 O ta na maŋɩ o duri sɩ o zʋ tɩʋ kamunu kʋlʋ wʋnɩ dɩ, dɩ́ kɔgɔ kʋm maama wʋ́ beeri ŋʋnɩ mʋ ba kwe ba vɔ tɩʋ kʋm kʋntʋ kandwa yam ba tuuri ba ja ba tu bolo tɩga. Tɩʋ kʋm kʋntʋ kandwɛ dɩdwɩ tɩtɩ daa bá daarɩ dɩ taa zɩgɩ da.»
14 Absalɔn dɩdaanɩ Yisɩrayɛlɩ nakwa bam maama ma ta ba wɩ: «Usayi kwiə yam jɩgɩ kuri ya dwe Ayitofɛlɩ nyɩna yam.» Bɛŋwaanɩ, Baŋa-Wɛ na lagɩ sɩ lɛɛrʋ ba Absalɔn baŋa nɩ tɩn ŋwaanɩ, DƖ dɛɛn tɔgɩ cwǝŋǝ kam kʋntʋ mʋ sɩ DƖ pa Ayitofɛlɩ kwiə yam yɩ zɩgɩ, dɩ ya na maŋɩ ya lana tɩn dɩ.
15 Usayi ma zaŋɩ o vu Wɛ kaanɩm tiinə Sadoki dɩ Abɩatarɩ te o tʋlɩ kʋlʋ na kɩ tɩn o brɩ-ba yɩ o wɩ: «Ayitofɛlɩ ya brɩ Absalɔn dɩdaanɩ Yisɩrayɛlɩ nakwa bam sɩ ba kɩ tɩntʋ dɩ tɩntʋ mʋ, amʋ dɩ ma brɩ-ba sɩ ba kɩ tɩntʋ dɩ tɩntʋ. 16 Kʋntʋ nan kɩ-na lɩla á tʋŋɩ kwǝrǝ Davidi tee nɩ nɩ: zɩm tɩtɩɩ nɩ o yɩ maŋɩ kagʋa kam nɩ o pəni bugə kam ni nɩ. O nan maŋɩ sɩ o bɛ Zʋrdɛn bugə kam lɩla o kɛ o vu yigə, sɩ ba yɩ ba ba di o dɩdaanɩ o nɔɔna bam maama.»
17 Zonatan dɩ Ahimaazi dɛɛn kwarɩ sɩ ba zʋ Zeruzalɛm tɩʋ kʋm wʋ, sɩ nɔɔna wʋ́ na-ba mʋ. Kʋntʋ ŋwaanɩ ba ma yǝni ba səgi En-Rogelɩ nɩ sɩ bukɔ bu ja kwǝrǝ kalʋ maama na wʋra o ba o pa-ba sɩ ba dɩ laan vu ba ta dɩ Davidi. 18 Dɛ dɩdwɩ nɔn-dʋŋʋ kʋdoŋ ma na-ba yɩ o vu o ta o brɩ Absalɔn. Zonatan dɩ Ahimaazi ma kɩ lɩla ba duri ba vu Bawurim ba səgi nɔɔnʋ wʋdoŋ sɔŋɔ nɩ. Vʋlɩ dɛɛn wʋ o kʋnkɔlɔ wʋnɩ. Nɔɔna bale bam ma tu dɩ wʋnɩ. 19 Nɔɔnʋ wʋm kaanɩ ma kwe woŋo o ma o pu vʋlɩ dɩm ni, yɩ o daarɩ o jarɩ mɩna dɩ baŋa nɩ. Kʋ ma pa nɔɔn-nɔɔnʋ yǝri kʋlʋ na wʋra tɩn.
20 Absalɔn dɩdɛɛra bam ma vu ba yi kaanɩ wʋm te yɩ ba bwe‑o ba wɩ: «Ahimaazi dɩdaanɩ Zonatan wʋ yən mʋ?» Kaanɩ wʋm ma lǝri-ba o wɩ: «Ba bɛ bugə kam mʋ ba kɛ.» Nɔɔna bam ma beeri-ba ba ga, yɩ ba joori Zeruzalɛm wʋnɩ.
21 Absalɔn dɩdɛɛra bam na kɛ ba daarɩ tɩn, mʋ Ahimaazi dɩdaanɩ Zonatan nuŋi vʋlɩ dɩm wʋnɩ ba duri ba vu ba yi Davidi te. Ba ma tʋlɩ kʋlʋ maama Ayitofɛlɩ na ŋɔɔnɩ kʋ vu Davidi seeni tɩn, yɩ ba daarɩ ba ta dɩd-o ba wɩ: «Kɩ lɩla n zaŋɩ n bɛ bugə kam!» 22 Sɩntʋ nɛ sɩm ni nɩ mʋ Davidi dɩdaanɩ o kwaga kam maama zaŋɩ sɩ ba taa bɛ Zʋrdɛn bugə kam. Tɩga na jɩgɩ ka pʋʋrɩ tɩn, dɩdaanɩ ba maama dɛɛn bɛ bugə kam mʋ, ba dɩdʋa daa wʋ daarɩ.
23 Ayitofɛlɩ na maanɩ nɩ Absalɔn dɩ Yisɩrayɛlɩ nakwa bam vɩn sɩ ba sɛ o kwiə yam tɩn, mʋ o diini o bɩnaga o joori o tɩtɩ sɔŋɔ Giloo nɩ. O na yi da tɩn, mʋ o brɩ o sɔŋɔ tiinə ba na wʋ́ kɩ te nɩ o na tǝrǝ. O laan ma kwe ŋʋna o vu o kuuri o tɩtɩ o tɩ. Ba ma kwe‑o ba kɩ o kwə di-doŋo nɩ.
24 Absalɔn dɩdaanɩ Yisɩrayɛlɩ kɔgɔ kʋm maama dɛɛn ma vu ba bɛ Zʋrdɛn bugə kam, dɩdaanɩ Davidi duri o vu o yi Mahanayimi tɩʋ kʋm. 25 Absalɔn nan ya pɛ Amasa mʋ ləri Zoabɩ yuu nɩ o ji o jar-kərə bam yigə tu. Amasa ko yɩrɩ mʋ yɩ Yetɛrɩ. O maa yɩ Ismayɛlɩ tu.b Amasa nu dɛɛn yɩ Nahasɩ bukɔ Abigayɛlɩ, Abigayɛlɩ maa yɩ Zoabɩ nu Zeruya cʋrʋ.
26 Absalɔn dɩdaanɩ Yisɩrayɛlɩ tiinə bam ma vu ba cwi ba vwə Galadɩ laŋa kam nɩ.
27 Davidi na yi Mahanayimi tɩn, mʋ nɔɔna batɔ dɛɛn jeer-o. Bantʋ wʋ dɩdʋa yɩ Nahasɩ bu Sobi na nuŋi Amɔn tiinə tɩʋ Raba tɩn mʋ. Wʋdoŋ maa yɩ Amiyɛlɩ bu Makira na nuŋi Lodebarɩ tɩn. Batɔ tu wʋm maa yɩ Galadɩ tu Bazilayi na nuŋi Rogelim tɩn. 28 Bantʋ maama ma ja sarɩ, dɩ zwɩ dɩ kambi, kʋ ta wǝli dɩ wʋdiiru dwi dwi ba ba ba pa-ba. Wʋdiiru tɩm maa yɩ mɩna, dɩ muni, dɩ mɩn-wɔa, dɩdaanɩ soonə, dɩ siə, 29 dɩ tʋʋrʋ, dɩ nayɩla, kʋ wǝli dɩ peeni, dɩdaanɩ nayɩl-dɔa. Ba ma kwe tɩntʋ maama ba pa Davidi dɩdaanɩ o nɔɔna bam sɩ ba di. Bɛŋwaanɩ, ba dɛɛn tagɩ mʋ ba wɩ: «Kana dɩdaanɩ na-nyɔm mʋ tiini kʋ cɛ nɔɔna bam, ba na wʋ kagʋa kam nɩ ba ve taan yɩ ba tiini ba bugi tɩn ŋwaanɩ.»