Davidi dɩdaanɩ Ziba taanɩ
16
Pɛ Davidi na yɔɔrɩ o gaalɩ piu kʋm yuu sɩ o kɛ tɩn, mʋ Mefibosɛtɩ tɩntʋŋnʋ Ziba ba o nuŋi o zɩgɩ da sɩ o jeer-o. Wʋntʋ ya kwe bɩnɛ mʋ o vɔ wʋdiiru zanzan o zɩŋɩ o ja o ba. Wʋdiiru tɩm maa yɩ dɩpwa biə-yale, dɩdaanɩ maasa bwɛn bi, dɩ tweeru biə badonnǝ bwɛn bi, dɩdaanɩ sana lɔɔ kamunu.2 Davidi ma bwe Ziba o wɩ: «Nmʋ jɩgɩ tɩntʋ maama sɩ n ma n kɩ bɛɛ mʋ?» Ziba ma lǝr-o o wɩ: «Nmʋ digə tiinə wʋ́ wanɩ ba di bɩnɛ sɩm ba taa veǝ. Kʋ na yɩ wʋdiiru tɩm dɩdaanɩ tweeru biə bam, tɩ yɩ n nɔɔna bam nyɩm mʋ sɩ ba di. Sana bam maa yɩ sɩ balʋ na wʋ́ ba ba bugi kagʋa cwǝŋǝ kam nɩ tɩn nyɔ sɩ ba yɩra joori ya na dam.»
3 Davidi daa ma bwe‑o o wɩ: «Sɩ Mefibosɛtɩ na yɩ n tu Sooli naa tɩn, o wʋ yən mʋ?»a Ziba ma lǝr-o o wɩ: «O maŋɩ Zeruzalɛm nɩ mʋ yɩ o bʋŋɩ o wɩ: ‹Yisɩrayɛlɩ tiinə bam laan wʋ́ kwe a ko-nakwɩ paarɩ dɩm ba joori ba pa-nɩ.› »
4 Davidi ma ta dɩd-o o wɩ: «Kʋ na yɩ kʋntʋ tɩn, wǝǝnu tɩlʋ maama Mefibosɛtɩ ya na te tɩn mʋ, amʋ laan kwe-tɩ a pa nmʋ sɩ tɩ ji nmʋ nyɩm.» Ziba ma lǝr-o o wɩ: «Amʋ tu, a kɩ nmʋ le. Amʋ yɩ nmʋ tɩntʋŋnʋ mʋ. Wɛ wʋ́ pa a kikiə taa sui nmʋ yi maŋa maama.»
Simeyi sɔɔlɩ lwarɩm o yagɩ Davidi yuu nɩ
5 Pɛ Davidi dɛɛn ma o vu o twɛ Bawurim tɩʋ kʋm. Nɔɔnʋ wʋdoŋ ma nuŋi o jeer-o yɩ o sɔɔlɩ lwarɩm o daŋɩ o yuu nɩ. O yɩrɩ mʋ Simeyi. O ko yɩrɩ maa yɩ Gera, yɩ o nuŋi Sooli dwi dɩm wʋnɩ. 6 Simeyi maa jɩgɩ kandwa o dʋlɩ Davidi dɩdaanɩ o dɩdɛɛra bam, dɩ Davidi pamaŋna bam maama yaa cɩgɩ Davidi mʋ ba kɩ tɩtarɩ nɩ, jazɩm dɩ jagwiə maama. 7 Simeyi maa jɩgɩ Davidi o twɩa yɩ o wɩ: «Ve daa, ve daa! Nmʋ yɩ nɔn-gʋrʋ! Nmʋ tiini n yɩ nɔn-wo-kʋrʋ mʋ dɩ! 8 Nmʋ vrɩ Sooli paarɩ dɩm n joŋi, yɩ n daarɩ n gʋ o digə tiinə bam zanzan. Kʋntʋ nan mʋ pɛ Baŋa-Wɛ wʋra DƖ ŋwɩ jɩnɩ dɩm kʋntʋ n yuu nɩ. DƖ joŋi paarɩ dɩm mʋ DƖ pa n bu Absalɔn. Kʋʋ́ ni‑m, nɔn-gʋrʋ!»b
9 Zeruya bu Abisayi ma ta dɩ Davidi o wɩ: «Pɛ, kakur-tɩka kantʋ wʋ maŋɩ sɩ o taa jɩgɩ-m o yáala. Pa-nɩ cwǝŋǝ sɩ a yi a goni o yuu kʋm a dɩ tɩga nɩ.» 10 Davidi ma ləri o wɩ: «Abam Zeruya biə bam, kʋ kɔ mʋ yɩ abam yigə? Baŋa-Wɛ mʋ na tagɩ dɩ Simeyi sɩ o sɔɔlɩ lwarɩm o yagɩ amʋ yuu nɩ, nɔɔn-nɔɔnʋ ba jɩgɩ cwǝŋǝ sɩ o cɩ-o.»
11 Davidi laan ma ta dɩ Abisayi dɩ o dɩdɛɛra bam maama o wɩ: «Amʋ tɩtɩ bu-lʋra mʋ beeri-nɩ sɩ o gʋ. Bɛnzamɛn tu wʋntʋ laan mʋ wʋ́ yagɩ-nɩ na? Yag-o-na sɩ o ta twɩa sɩ Baŋa-Wɛ mʋ ga wɩ o twɩ. 12 Baŋa-Wɛ nan daa na nɛ a cam dɩm, yɩ DƖ pa o na twɩ amʋ tɛ zɩm tɩn pipiri kʋ ji lanyɩranɩ kʋ pa-nɩ.»
13 Davidi dɩ o kwaga kam maa lɛɛrɩ ba ve cwǝŋǝ kam yuu nɩ. Ba na maa ve tɩn, Simeyi maa dalɩ zoŋo kʋm təŋə o tɔgɩ-ba, yɩ o sɔɔlɩ o yagɩ ba yuu nɩ, o daarɩ o dʋlɩ-ba dɩ kandwa. O ta maa taɩ fogo o kɩ ba yɩra nɩ.
14 Pɛ Davidi dɩdaanɩ o nɔɔna bam dɛɛn ma vu ba yi Zʋrdɛn bugə kam. Ba maama ma tiini ba bugi. Ba ma maŋɩ da yɩ ba yɩra zuri.
Usayi dɩdaanɩ Ayitofɛlɩ kwiə yam
15 Absalɔn dɩdaanɩ Yisɩrayɛlɩ tiinə bam maama ma vu ba zʋ Zeruzalɛm tɩʋ kʋm wʋ, yɩ Ayitofɛlɩ tɔgɩ o wʋ ba wʋnɩ. 16 Ariki tu Usayi na yɩ Davidi ciloŋ tɩn dɩ ma vu o zʋ tɩʋ kʋm. O ma vu o yi Absalɔn te o ta dɩd-o o wɩ: «Pɛ, Wɛ wʋ́ pa n paarɩ dɩm taa wʋra taan wuu!»
17 Absalɔn ma bwe‑o o wɩ: «Nmʋ dɩ Davidi ciloŋo kʋm cɔgɩ lɩla mʋ na? Bɛɛ mʋ kɩ yɩ n wʋ dɛ dɩd-o n viiri?» 18 Usayi ma lǝr-o o wɩ: «Amʋ maŋɩ sɩ a tɔgɩ pɛ wʋlʋ Baŋa-Wɛ na kuri tɩn mʋ, wʋlʋ kɔgɔ kʋntʋ dɩdaanɩ Yisɩrayɛlɩ tiinə bam maama na kuri sɩ o taa yɩ pɛ tɩn. A nan wʋ́ kwe a cɩga maama mʋ a pa‑m. 19 Kʋ na wǝli da tɩn, a laan lagɩ a taa tʋŋɩ a paɩ a tu wʋm bu mʋ. Amʋ nan wʋ́ tʋŋɩ a wǝli nmʋ dɩ, nɩnɛɛnɩ a dɛɛn na tʋŋɩ a wǝli n ko te tɩn.»
20 Absalɔn laan ma bwe Ayitofɛlɩ o wɩ: «Dɩ́ na tu dɩ́ wʋra tɩn, bɛɛ mʋ dɩ́ laan wʋ́ kɩ? Nmʋ wʋbʋŋa yam yɩ tɛ mʋ?» 21 Ayitofɛlɩ ma lǝr-o o wɩ: «Zaŋɩ n vu n pəni dɩ n ko ka-bi sɩlʋ o na duri o daarɩ sɩ ba leeni ba taa nii o sɔŋɔ kʋm tɩn. Nmʋ na kɩ kʋntʋ, Yisɩrayɛlɩ tiinə bam maama wʋ́ lwarɩ nɩ n kikiə maama lwe n ko mʋmwa nɩ mʋ, dɩ n na cɔgɩ o yigə te tɩn ŋwaanɩ. Kʋ maa wʋ́ pa balʋ maama na tɔgɩ-m tɩn fɔgɩ ba na baarɩ.» 22 Ba ma di pɛ sɔŋɔ kʋm nayuu ba cwi vwe ba pa Absalɔn. Absalɔn ma zʋ dɩ wʋnɩ o lagɩ o ko ka-bi sɩm maama yɩ Yisɩrayɛlɩ tiinə bam maama zɩgɩ ba niə.c
23 Da yam kʋntʋ nɩ Absalɔn dɛɛn sɛ o tɔgɩ kwiə yalʋ maama Ayitofɛlɩ na pɛ‑o tɩn, nɩnɛɛnɩ o ko Davidi dɩ ya na sɛ o tɔgɩ-ya te tɩn. Ayitofɛlɩ taanɩ maama dɛɛn nyɩ dɩ o bwe o joŋi-dɩ Wɛ tɩtɩ tee nɩ mʋ yɩ o ta.