Davidi wʋ-cɔgɔ kʋm
19
Ba ma vu ba ta ba brɩ Zoabɩ ba wɩ: «Pɛ Davidi tiini o keeri o bu Absalɔn tʋʋnɩ dɩm ŋwaanɩ mʋ.» 2 Davidi jar-kərə bam ma ni nɩ o yɔɔrɩ o keeri o bu luə kam mʋ. Kʋ ma pa ba warɩ ba di ywəəni dɩntʋ dɛ dɩm nɩ, yɩ dɛ dɩm kʋntʋ lɛɛrɩ dɩ ji wʋ-cɔgɔ dɛ. 3 Dɩntʋ dɛ dɩm nɩ, nɔɔna bam lɔɔrɩ mʋ ba joori ba zʋ tɩʋ kʋm wʋnɩ, nɩnɛɛnɩ nɔɔna na di-ba najara baŋa nɩ yɩ cavɩɩra jɩgɩ-ba te tɩn. 4 Davidi ma kwe o jɩn o kwǝli o yibiyə yɩ o kaasɩ baŋa baŋa o wɩ: «Aaa! A bu Absalɔn! A bu yoo!»5 Zoabɩ ma zaŋɩ o vu o zʋ pɛ te yɩ o ta dɩd-o o wɩ: «Nmʋ zɩm tiini n kɩ n jar-kərə bam cavɩɩra. Yɩ swe nɩ bantʋ mʋ joŋi nmʋ tɩtɩ ŋwɩa, dɩ n kaana ŋwɩa, dɩ n bəkəri dɩ n bukwa ŋwɩa, dɩdaanɩ n ka-bi sɩm maama ŋwɩa ba yagɩ! 6 Nmʋ na kɩ te tɩn, kʋ nyɩ dɩ nmʋ soe balʋ na culi‑m tɩn mʋ, yɩ n daarɩ n culi balʋ na soe-m tɩn. Nmʋ zɩm brɩ jaja nɩ n yigə tǝrǝ dɩ n jar-kərə bam dɩ n dɩdɛɛra bam maama. Amʋ maanɩ nɩ Absalɔn ya na ŋwɩ: yɩ dɩbam maama tɩ, kʋntʋ yaá poli nmʋ wʋʋ. 7 Nmʋ nan na lagɩ cɩga, sɩ n zaŋɩ n nuŋi n vu n nɔɔna bam te n pa ba joori ba na baarɩ. A dugi dɩ Baŋa-Wɛ yɩrɩ nɩ: nmʋ nan na vɩn sɩ n kɩ kʋntʋ, sɩ tɩga daa ta na jɩgɩ ka pʋʋra, nɔɔn-nɔɔnʋ daa bá daarɩ sɩ kʋ tu taa zɩgɩ n kwaga nɩ. Kʋntʋ, kʋ laan wʋ́ tiini kʋ ji lɛɛrʋ mʋ kʋ pa‑m, sɩ kʋ dwǝni cam dɩlʋ maama na tu n baŋa nɩ, kʋ zɩgɩ n biini nɩ kʋ ba kʋ yi zɩm tɩn!»
8 Pɛ Davidi na ni kʋntʋ tɩn, o ma zaŋɩ o vu o jǝni tɩʋ kʋm manchoŋo kʋm ni nɩ. O nɔɔna bam ma ni nɩ pɛ wʋm nuŋi pooni o je da. Ba ma vu o te ba gilimi daanɩ o yigə nɩ.
Davidi joori o zʋ Zeruzalɛm tɩʋ wʋnɩ
Yisɩrayɛlɩ tiinə balʋ na tɔgɩ Absalɔn kwaga tɩn dɛɛn nan ya joori ba sam mʋ. 9 Ba maama ma puli sɩ ba taa bwɛ daanɩ ba wɩ: «Pɛ Davidi mʋ joŋi dɩbam o yagɩ dɩ́ dʋna jɩŋa nɩ. Wʋntʋ ta mʋ vrɩ dɩbam o ja o nuŋi Filisi tiinə bam jɩŋa nɩ. Absalɔn laan ma zǝl-o pa o duri o daarɩ dɩ́ tɩʋ kʋm. 10 Dɩ́ nan ya kuri Absalɔn mʋ sɩ o taa yɩ dɩ́ pɛ. O dɩ ma tɩ najara yam wʋnɩ. Dɩ́ daa zɩgɩ dɩ́ daanɩ sɩ bɛɛ mʋ? Pa-na sɩ dɩ́ vu dɩ́ ja Pɛ Davidi dɩ́ joori dɩ́ ba yo seeni.»
11 Davidi ma tʋŋɩ kwǝrǝ Wɛ kaanɩm tiinə Sadoki dɩ Abɩatarɩ tee nɩ o wɩ:
«Ve-na Zuda nakwa bam te á ta dɩ ba nɩ: ‹Yisɩrayɛlɩ dwi tiinə bam maama taanɩ dɩm maŋɩ dɩ tʋ amʋ zwɛ nɩ. Bɛɛ mʋ pɛ á yɩ balʋ na kweeli sɩ á bəŋi á pɛ wʋm sɩ o joori sɔŋɔ? 12 Abam yɩ amʋ cʋrrʋ mʋ, á yɩ amʋ tɩtɩ yɩra dɩdaanɩ a jana. Bɛŋwaanɩ mʋ abam nan maŋɩ kwaga nɩ, yɩ nɔɔna badonnǝ loori yigə ba bǝŋi-nɩ sɩ a joori?›
13 Nan ta ve-na Amasa te á ta dɩd-o nɩ: ‹Nmʋ daɩ amʋ cʋrʋ mʋ na? Wɛ wʋ́ pa lɛɛrʋ yi-nɩ nɩnɛɛnɩ a na wʋ pɛ nmʋ laan ləri Zoabɩ yuu nɩ n ji a jar-kərə bam yigə tu.› »a
14 Davidi taanɩ dɩm ma dwe Zuda dwi tiinə bam maama bɩcara. Ba ma kɩ ba ni daanɩ nɩ nɔɔnʋ dɩdʋa te, pa ba tʋŋɩ kwǝrǝ ba pa Davidi ba wɩ: «Ja n nɔɔna bam maama sɩ á joori sɔŋɔ.»
15 Davidi dɛɛn ma zaŋɩ o kwe cwǝŋǝ o maa joori Zeruzalɛm. O na yi Zʋrdɛn bugə kam tɩn, dɩdaanɩ Zuda tiinə bam nuŋi Giligalɩ nɩ ba vu ba jeer-o sɩ ba zən‑o sɩ o bɛ bugə kam. 16 Gera bu Simeyi na yɩ Bɛnzamɛn tu yɩ o nuŋi Bawurim tɩn dɩ ma kɩ lɩla o tɔgɩ o wǝli Zuda tiinə kɔgɔ kʋm wʋnɩ sɩ o da o jeeri Pɛ Davidi. 17 Bɛnzamɛn dwi dɩm nɔɔna mʋrʋ mʋ dɛɛn tɔgɩ o kwaga, kʋ wǝli dɩ Ziba na yɩ Sooli gaba-kwɩa tɩn, dɩ wʋntʋ biə fugə-banu bam, dɩ o tɩntʋŋna fiinle. Ba maama ma nuŋi ba kɩ lɩla ba vu ba yi Zʋrdɛn bugə kam ni ba loori pɛ wʋm yɩ ba cəg‑o. 18 Davidi na yi tɩn, ba ma bɛ bugə kam ba ja o digə tiinə bam dɩ ba zɩla yam ba joori ba bɛ. Ba dɛɛn ta ma kɩ kʋlʋ maama na tɔgɩ pɛ wʋm wʋbʋŋa tɩn.
Simeyi yɩra taanɩb
Simeyi dɩ ma bɛ o vu o yi Pɛ Davidi te. O ma tʋ o vin o yibiyə Davidi yigə nɩ. 19 O ma ta o wɩ: «Pɛ, a loori‑m sɩ n yagɩ a kǝm-balɔrɔ kʋm n ma n cɛ-nɩ. Kʋ na yɩ kʋlʋ amʋ ya na kɩ nmʋ yɩra nɩ, maŋa kam nmʋ na duri n daarɩ Zeruzalɛm tɩn, yɩ kwe-kʋ n kɩ n yuu nɩ. 20 Amʋ tu, amʋ lwarɩ lanyɩranɩ nɩ a kɩ lwarɩm mʋ. Kʋntʋ ŋwaanɩ mʋ amʋ dɛ yigə Zʋzɛfʋ dwi tiinəc maama wʋnɩ sɩ a ba a jeeri‑m.»
21 Zeruya bu Abisayi ma ta o wɩ: «Simeyi maŋɩ sɩ o tɩ mʋ, bɛŋwaanɩ o sɔɔlɩ lwarɩm mʋ o yagɩ wʋlʋ Baŋa-Wɛ na kuri sɩ o taa yɩ pɛ tɩn yuu nɩ.» 22 Davidi ma ləri Abisayi o wɩ: «Abam Zeruya biə bam! Á yigə mʋ ka kɔ? Abam zɩm mʋ jigi amʋ sɩbara na? Zɩm dɛ dɩntʋ mʋ Yisɩrayɛlɩ tiinə bam joori ba pa-nɩ cwǝŋǝ sɩ a taa yɩ ba pɛ. Kʋntʋ ŋwaanɩ, ba bá gʋ nɔɔn-nɔɔnʋ zɩm.» 23 Pɛ wʋm laan ma pipiri o ta dɩ Simeyi o wɩ: «Amʋ goni ni a pa‑m nɩ: n bá tɩ.»
Mefibosɛtɩ yɩra taanɩd
24 Sooli naa Mefibosɛtɩ dɩ ma da o vu sɩ o jeeri Pɛ Davidi. Kʋ dɛɛn zɩgɩ maŋa kalʋ Davidi na nuŋi Zeruzalɛm nɩ tɩn, sɩ kʋ yi o daa na maa joori dɩ yazurə tɩn maama, Mefibosɛtɩ wʋ dɔɔrɩ o namim-bwəri, o ta maa wʋ fanɩ o twanɩ, naa o zarɩ o gwaarʋ. 25 O na nuŋi Zeruzalɛm o ba o yi Davidi te kʋntʋ tɩn, o ma daanɩ pɛ wʋm pwəgə. Davidi ma bwe‑o o wɩ: «Mefibosɛtɩ, bɛɛ mʋ kɩ yɩ n wʋ dɛ amʋ kwaga sɩ dɩ́ kɛ?»
26 O ma ləri o wɩ: «Pɛ, nmʋ ye a na maŋɩ a yɩ gɔrɔ te tɩn. Kʋntʋ mʋ te a pɛ ni nɩ ba ti a bɩnaga kam yigə ba pa-nɩ sɩ a din a ma tɔgɩ dɩ nmʋ. Amʋ tɩntʋŋnʋ Ziba mʋ nuŋi a kwaga nɩ. 27 O ma co amʋ n yigə nɩ. Nmʋ nan ye woŋo maama kuri, nɩnɛɛnɩ n yɩ Wɛ malɛka mʋ te. Kɩ kʋlʋ maama na wʋ n wʋbʋŋa nɩ sɩ n kɩ tɩn. 28 Bɛŋwaanɩ, amʋ ko-nakwɩ dwi tiinə bam yɔɔrɩ ba maŋɩ sɩ n ya gʋ dɩbam maama mʋ, yɩ n ta sɛ sɩ amʋ taa tɔgɩ a di nmʋ sɔŋɔ nɩ. Amʋ daa wʋ́ taa jɩgɩ cwǝŋǝ sɩ a loori woŋo kʋdoŋ nmʋ tee nɩ a wǝli da na?»
29 Pɛ wʋm ma lǝr-o o wɩ: «Daa n yɩ cɔgɩ n ni. Amʋ pɛ ni sɩ nmʋ dɩdaanɩ Ziba pɔɔrɩ tɩga kalʋ maama na yɩ Sooli nyɩm tɩn á pa daanɩ.» 30 Mefibosɛtɩ ma ləri o wɩ: «Amʋ tu, o na lagɩ tɩɩ maama, sɩ o kwe o taa jɩga. Nmʋ na joori sɔŋɔ dɩ n yazurə tɩn maŋɩ kʋ pa amʋ.»
Bazilayi yɩra taanɩ
31 Galadɩ tu Bazilayi dɩ ma zɩgɩ Rogelim nɩ o ba sɩ o jeeri Pɛ Davidi sɩ ba bɛ Zʋrdɛn bugə kam, sɩ o daarɩ o yag-o cwǝŋǝ nɩ sɩ o kɛ. 32 Bazilayi dɛɛn nan tiini o kwɩn mʋ o yi bɩna funɔnɔ. Maŋa kam Davidi dɩ o nɔɔna bam na wʋ Mahanayimi nɩ tɩn, mʋ o dɛɛn jaanɩ wʋdiu o vu o pa-ba, o na tiini o yɩ nadum tɩn ŋwaanɩ. 33 Davidi ma ta dɩd-o o wɩ: «Da n bɛ Zʋrdɛn bugə kam n tɔgɩ dɩbam sɩ dɩ́ vu Zeruzalɛm, sɩ a taa nii n baŋa nɩ.»
34 Bazilayi ma ləri pɛ wʋm o wɩ: «A lagɩ a da dɩ nmʋ a vu Zeruzalɛm a kɩ bɛɛ mʋ? Amʋ ŋwɩa daa bá daga. 35 Amʋ jɩgɩ bɩna funɔnɔ mʋ tɩntʋ, yɩ a daa warɩ wʋpolo dɩ cam a pɔɔrɩ daanɩ. A daa warɩ a ni-wʋdiu ywəəni. Nɔɔna na leeni le, a ba ni. Kʋntʋ ŋwaanɩ amʋ na dɛ dɩ nmʋ a vu sɔŋɔ, kʋʋ́ taa yɩ daanɩm yɩranɩ kʋ pa‑m. 36 Pɛ, nan yagɩ sɩ a da dɩ nmʋ a bɛ Zʋrdɛn bugə kam, yɩ a kogili‑m sɩ dɩ́ yi yigə fɩɩn. Amʋ na yɩ n tɩntʋŋnʋ tɩn, kʋntʋ wʋ́ taa yɩ zulə yalʋ na maŋɩ dɩ amʋ tɩn. 37 Pa-nɩ cwǝŋǝ sɩ a laan joori sɔŋɔ, sɩ a vu a tɩ a tɩʋ nɩ yɩ ba kwe-nɩ ba kɩ a ko dɩ a nu yibeelǝ tee nɩ. Nan nii a bu Kimam mʋ tɩntʋ. Wʋntʋ wʋ́ tɔgɩ-m sɩ á vu Zeruzalɛm. Oó taa tʋŋɩ o pa‑m, yɩ n dɩ na lagɩ sɩ n kɩ te maama n pa‑o, n waɩ n kɩ.» 38 Pɛ Davidi maa wɩ: «Tɔ. Kimam wʋ́ da amʋ o vu Zeruzalɛm, sɩ a kɩ kʋlʋ maama na wʋ́ poli n wʋ tɩn a pa‑o. Kʋ daarɩ, woŋo kʋlʋ maama nmʋ na wʋ́ ta n lagɩ amʋ tee nɩ tɩn, amʋ wʋ́ kɩ-kʋ a pa‑m.»
39 Davidi jar-kərə bam maama laan ma bɛ Zʋrdɛn bugə kam. Pɛ wʋm tɩtɩ dɩ ma bɛ. O ma kukwəri Bazilayi o ban‑o o yagɩ cwǝŋǝ nɩ pa o joori o vu sɔŋɔ. 40 Zuda nɔɔna bam maama, dɩdaanɩ Yisɩrayɛlɩ nɔɔna bam cicoro mʋ dɛɛn kogili Davidi ba bɛ bugə kam ba maa kɛa. Kimam dɩ ma tɔgɩ Pɛ Davidi, yɩ ba kɛ ba vu ba yi Giligalɩ.
41 Kʋ dɛɛn na kɩ fɩɩn tɩn, Yisɩrayɛlɩ tiinə bam maama maa yǝni ba ve pɛ wʋm te yɩ ba pʋʋna ba wɩ: «Bɛɛ mʋ te sɩ dɩ́ cʋrrʋ Zuda tiinə bam bʋŋɩ nɩ bantʋ yɩranɩ mʋ jɩgɩ cwǝŋǝ sɩ ba jeeri nmʋ dɩ n digə tiinə bam dɩ n jar-kərə bam yɩ ba kogili abam sɩ á bɛ Zʋrdɛn bugə kam?»
42 Zuda tiinə bam dɩ dɛɛn ma ləri ba wɩ: «Pɛ wʋm nuŋi dɩbam Zuda dwi tiinə bam wʋnɩ mʋ. Bɛɛ mʋ yɩ kǝm dɩntʋ daanɩ abam pa á banɩ zaŋɩ? Dɩ́ wʋ di pɛ wʋdiu, dɩ́ nan wʋ joŋi o kʋlʋkʋlʋ dɩ́ tɩtʋŋɩ dɩm ŋwaanɩ.»
43 Yisɩrayɛlɩ tiinə bam daa ma lǝri-ba ba ba wɩ: «Abam na tagɩ á wɩ á dwi dɩm nɔɔnʋ yɩ Pɛ tɩn, nan lwarɩ-na nɩ dɩbam yɩ Yisɩrayɛlɩ dwiə fugə nɔɔna mʋ, pa dɩbam te‑o kuni fugə. Bɛɛ mʋ yɩ á tiini á gooni dɩbam kʋntʋ? Yɩ swe-na nɩ dɩbam mʋ loori abam yigə dɩ́ ja bʋbʋŋɩ sɩ dɩ́ vu dɩ́ ja pɛ wʋm dɩ́ joori dɩ́ ba sɔŋɔ.»
Dɩ kʋ dɩ, Zuda tiinə bam dɛɛn ta ŋɔɔnɩ taanɩ dɩm dɩ baarɩ mʋ sɩ kʋ dwǝni Yisɩrayɛlɩ tiinə bam taanɩ dɩm na yɩ te tɩn.