Ruuti nɛ barʋ
3
Dɛ dɩdwɩ: Noemi ma ta dɩ Ruuti o wɩ: «A bukɔ, kʋ maŋɩ sɩ a kwaanɩ a lagɩ jǝŋǝ je a pa‑m, sɩ n ta n zʋʋrɩ da dɩdaanɩ yazurə. 2 Cɩga tɩn, Bʋazɩ wʋlʋ n na tʋŋɩ o tɩntʋŋ-kana bam tee nɩ tɩn yɩ dɩbam yɩra nɔɔnʋ mʋ. Zɩm dɩdaan-ni nɩ oó taa wʋ mɩna fɩrɩm jǝgǝ kam nɩ sɩ ba caarɩ o mɩna yam. 3 Ve n swɛ n yɩra n daarɩ n kwɛ n tɩtɩ lanyɩranɩ dɩ tralɩ nugə dɩdaanɩ gwaarʋ tɩlʋ na lana tɩn. Laan zaŋɩ n vu mɩna fɩrɩm jǝgǝ kam sɩ n jeer-o. O ta na wʋ di o ti, yɩ pa o lwarɩ nɩ kʋ yɩ nmʋ mʋ. 4 O na ve sɩ o pəni, maanɩ o na tigi o dɔa mɛ tɩn, sɩ n laan vu n zǝŋi o gar-jalɩ dɩm o nɛ sɩm seeni yɩ n daarɩ n pəni dáanɩ. Oó ta dɩ nmʋ n na wʋ́ kɩ woŋo kʋlʋ tɩn.» 5 Ruuti ma ləri o wɩ: «N na tagɩ kʋlʋ maama tɩn, amʋ wʋ́ kɩ.»6 Ruuti dɛɛn ma vu mɩna fɩrɩm jǝgǝ kam o kɩ kʋlʋ o barʋ-nu wʋm na tagɩ o brɩ-o tɩn. 7 Bʋazɩ na di wʋdiu o ti tɩn, o wʋ ma poli lanyɩranɩ. O ma vu mɩn-poə yam təŋə nɩ o tigi da o dɔa. Ruuti ma lɩ o vu mɛmɛ o yi o te. O ma puri o gar-jalɩ dɩm o nɛ sɩm seeni yɩ o pəni dáanɩ. 8 Tɩtɩɩ-kʋnkʋrʋ nɩ Bʋazɩ yɩra maa saɩ yɩ o pipiri. O ma da o na kaanɩ na tigi o nɛ sɩm seeni. 9 O ma bwe o wɩ: «Nmʋ yɩ wɔɔ mʋ?» O ma ləri o wɩ: «N bukɔ Ruuti mʋ. Amʋ tu, nmʋ yɩ dɩbam yɩra nɔɔnʋ wʋlʋ na maŋɩ sɩ n nii amʋ baŋa nɩ tɩn mʋ. Nan kwe n gar-jalɩ n ma n pu amʋ sɩ a zʋ n woro kʋm wʋnɩ.»a
10 Bʋazɩ ma ləri o wɩ: «A bukɔ, Baŋa-Wɛ wʋ́ kɩ nmʋ yu-yoŋo. Nmʋ lanyɩranɩ kǝm dɩntʋ dwǝni faŋa kǝm dɩm. N wʋ sɛ n tɔgɩ tɩʋ kʋm nɔɔn-dʋnnʋ tɩm kwaga, ba ya zɩ jɩgɩ wǝǝnu naa ba na yɩ zʋra dɩ. 11 A bukɔ, nan yɩ ta n fʋna. N na lagɩ woŋo kʋlʋ tɩn, a wʋ́ kɩ a pa‑m. Tɩʋ kʋm nɔɔna bam maama maanɩ nɩ n yɩ ka-yʋrʋ mʋ. 12 Kʋ yɩ cɩga mʋ wɩ amʋ yɩ n yɩra nɔɔnʋ, sɩ nɔɔnʋ wʋdoŋ wʋra o na wʋ yigə nɩ o dwe amʋ sɩ o nii n baŋa nɩ.b 13 Ta n tigi yo seeni tɩtɩ dɩntʋ maama, sɩ tɩga na pʋʋrɩ, dɩ́ wʋ́ bwe dɩ́ nii o wʋbʋŋa tɔgɩ kǝm dɩntʋ naa ya ba tɔga. O na sɛ sɩ o kɩ kʋntʋ, kʋ lamma. A dugi dɩ Baŋa-Wɛ dɩlʋ na ŋwɩ tɩn yɩrɩ wɩ: o daa na wʋ sɛ, amʋ wʋ́ taa nii n baŋa nɩ. Pəni yo seeni sɩ kʋ taa ve tɩ-pʋra.»
14 Ruuti ma pəni Bʋazɩ nɛ sɩm seeni. O ma daarɩ o goni tɩga o zaŋɩ lɩla sɩ nɔɔn-nɔɔnʋ yɩ na‑o. Bɛŋwaanɩ, Bʋazɩ ba lagɩ sɩ nɔɔn-nɔɔnʋ lwarɩ wɩ Ruuti tu o te. 15 Bʋazɩ ma ta o wɩ: «Dwanɩ n gar-vɔɔ kʋm n lwarɩ tɩga nɩ.» O ma lwarɩ-kʋ. Bʋazɩ ma lo caara bwɛn sɩrdʋ o kɩ da o daarɩ o ja o zɩŋ‑o. O laan ma joori o vu tɩʋ kʋm wʋ.
16 Ruuti na yi sɔŋɔ tɩn, o barʋ-nu Noemi ma bwe‑o o wɩ: «A bukɔ, n na ve da tɩn, kʋ kɩ ta mʋ?» Ruuti ma ta o brɩ-o woŋo kʋlʋ maama Bʋazɩ na kɩ o pa‑o tɩn, 17 yɩ o wɩ: «O wɩ a yɩ joori dɩ jɩ-kʋrɩ. O ma pa-nɩ mɩna yantʋ maama.» 18 Noemi laan ma ta dɩ Ruuti o wɩ: «Nan zuri n yɩra sɩ dɩ́ nii tɩntʋ maama na lagɩ kʋ kɩ te tɩn. Bʋazɩ na wʋ nɛ taanɩ dɩm kuri, o bá sin.»