Bʋazɩ di Ruuti o ma o kɩ o kaanɩ
4
Bʋazɩ ma vu tɩʋ kʋm manco-pɩɩna yam ni o jǝni mɛ nakwa bam dɛɛn na je ba di taanɩ tɩn. Kʋ na kɩ fɩɩn tɩn, o yɩra nɔɔnʋ wʋlʋ dɩ daa na tiini o bwələ yɩ o ta o taanɩ tɩn ma tɔgɩ da o maa kɛa. Bʋazɩ ma bǝŋ-o o wɩ: «A cʋrʋ, ba n jǝni yo.» O ma vu o jǝni da. 2 Bʋazɩ ma bəŋi tɩʋ kʋm nakwa fugə o pa ba dɩ jǝni ba tee nɩ. Ba na jǝni tɩn, 3 o ma ta dɩ o cʋrʋ kʋm o wɩ: «Noemi laan nuŋi Moabɩ o joori o ba. O maa lagɩ sɩ o kwe dɩbam cʋrʋ Elimelɛkɩ tɩga kam o yəgi. 4 Amʋ na bʋŋɩ te tɩn, kʋ maŋɩ sɩ n ta n ye kʋ ni nɩ. Nmʋ na laga sɩ n yəgi tɩga kam, sɩ n yəgi-ka nakwa bam dɩ nɔɔna balʋ maama na je yo tɩn yigə nɩ. N na lagɩ n joŋi-ka, nan joŋi! N daa n na ba laga, sɩ n ta sɩ a lwarɩ. Nmʋ mʋ wʋ́ da yigə sɩ n yəgi-ka. Nmʋ nan na wʋ yəgi-ka, amʋ wʋ́ wanɩ a yəgi.» Nɔɔnʋ wʋm ma ləri o wɩ: oó yəgi-ka.5 Bʋazɩ maa wɩ: «Tɔ. N nan na yəgi tɩga kam Noemi tee nɩ, ta n ye nɩ: nmʋ wʋ́ maŋɩ sɩ n di Ruuti na yɩ kadəm yɩ o nuŋi Moabɩ tɩn n wǝli da. Kʋntʋ mʋ wʋ́ pa tɩga kam maŋɩ o bar-dooru wʋm dwi jɩŋa nɩ.» 6 Nɔɔnʋ wʋm na ni kʋntʋ tɩn, o ma ta o wɩ: «Kʋ nan na yɩ kʋntʋ, amʋ daa bá yəgi tɩga kam. A na yəgi-ka, a biə jwa bá taa te-ka. Nmʋ nan na wʋ́ ləri a yuu nɩ n yəgi-ka, sɩ n kɩ kʋntʋ.»
7 Kʋ dɛɛn na yǝni kʋ kɩ te Yisɩrayɛlɩ tiinə bam tee nɩ tɩn, nɔɔna na yəgi wǝǝnu ba pa daanɩ, ba dɩdʋa mʋ wʋ́ lɩ o natrɩ o kwe o pa wʋdoŋ wʋm, sɩ kʋ brɩ nɩ ba sɛ pipiu kʋm. Kʋntʋ dɛɛn brɩ nɩ kǝm dɩm tɔgɩ cwǝŋǝ cɩga cɩga. 8 Kʋntʋ ŋwaanɩ, Bʋazɩ cʋrʋ kʋm na tagɩ o wɩ: Bʋazɩ mʋ wʋ́ yəgi tɩga kam tɩn, o ma lɩ o natrɩ o pa‑o. 9 Bʋazɩ laan ma ta dɩ nakwa bam, dɩ balʋ maama na wʋra tɩn o wɩ: «Abam maama zɩm nɛ nɩ amʋ yəgi woŋo kʋlʋ maama ya na yɩ Elimelɛkɩ nyɩm tɩn, kʋ wǝli dɩ o biə Kiliyɔnɩ, dɩ Maklɔnɩ dɩ wǝǝnu maama Noemi tee nɩ. 10 Kʋ na yɩ Moabɩ tiinə bukɔ Ruuti wʋlʋ na yɩ Maklɔnɩ kadəm tɩn, amʋ joŋ-o a wǝli da pa o yɩ a kaanɩ. Kʋntʋ wʋ́ pa tʋ wʋm yɩrɩ taa wʋ o jɩjɩgɩrʋ baŋa nɩ, yɩ o dwi taa toŋi taa dɩ́ tɩʋ kʋm nɩ. Abam zɩm maanɩ nɩ kʋ yɩ cɩga.»
11 Nakwa bam dɩ balʋ maama na wʋ tɩʋ kʋm manco-pɩɩna yam ni nɩ tɩn ma sɛ yɩ ba wɩ: «Dɩbam sɩɩnɩ dɩ́ na kʋlʋ na kɩ tɩn. Baŋa-Wɛ wʋ́ pa kaanɩ wʋlʋ n zɩm na di tɩn lʋ biə, nɩnɛɛnɩ Rasɛɛlɩ dɩ Lea dɛɛn na lʋgɩ biə pa Yisɩrayɛlɩ dwi dɩm daga tɩn.a Wɛ wʋ́ pa nmʋ tiini n ji nadum Efrata tɩʋ nɩ yɩ n ta n jɩgɩ yɩrɩ Betelɩhɛm tɩʋ nɩ. 12 Baŋa-Wɛ wʋ́ pa kaanɩ wʋntʋ lʋ biə zanzan o pa‑m, pa n dwi dɩm yɩrɩ zaŋɩ nɩnɛɛnɩ Zuda dɩ Tamaarɩ dɛɛn na lʋgɩ Farɛsɩ yɩ o pa Zuda sɔŋɔ kʋm yalɩ te tɩn.»
Bʋazɩ dwi dɩm sɩ kʋ yi Davidi
13 Bʋazɩ ma kwe Ruuti o ma kɩ o kaanɩ. Ba ma pəni daanɩ. Baŋa-Wɛ ma pa Ruuti ja pugə, yɩ o lʋ bəkərə. 14 Tɩʋ kʋm kaana bam laan ma ta dɩ Noemi ba wɩ: «Baŋa-Wɛ maŋɩ dɩ tiə! Bɛŋwaanɩ, DƖ zɩm pɛ‑m naa sɩ o taa nii n baŋa nɩ. Wɛ wʋ́ pa bu wʋm yɩrɩ zaŋɩ Yisɩrayɛlɩ tiinə maama tee nɩ! 15 Wʋntʋ wʋ́ pa n ŋwɩa daa taa jɩgɩ ywǝǝni yɩ o fɔgɩ o nii nmʋ baŋa nɩ n kʋkwɩɩrʋ maŋa nɩ. N bu-kaanɩ Ruuti mʋ lʋga. Wʋntʋ nan tiini o so-m lanyɩranɩ yɩ o dwe bu-baara barpɛ n tee nɩ.»
16 Noemi ma joŋi bu wʋm o kukwəri. Wʋm mʋ kɔn-o, yɩ o ba o bɩ. 17 Kaana balʋ na zʋʋrɩ ba bwələ dɩ ba tɩn maa wɩ: «Noemi bu mʋ tɩntʋ.» Ba ma pa bu wʋm yɩrɩ wɩ Obɛdɩ. Wʋntʋ dɛɛn mʋ lʋgɩ Zese. Zese dɩ ma ba o lʋ Pɛ Davidi.b
18 Perɛtsɩ dwi dɩm taanɩ mʋ tɩntʋ: