Ruuti dɩ Bʋazɩ jeeri daanɩ
2
Noemi cʋrʋ kʋdoŋ dɛɛn mʋ wʋra o na nuŋi o barʋ Elimelɛkɩ dwi kʋm tɩn, o yɩrɩ mʋ Bʋazɩ. O maa yɩ nadum yɩ o jɩgɩ yɩrɩ lanyɩranɩ. 2 Dɛ dɩdwɩ Moabɩ tiinə bukɔ Ruuti ma ta dɩ Noemi o wɩ: «Pa a vu karɩ sɩm wʋnɩ a larɩ mɩna.a Amʋ wʋ́ beeri nɔɔnʋ wʋlʋ na wʋ́ pa-nɩ cwǝŋǝ sɩ a kɩ kʋntʋ tɩn.» Noemi ma sɛ yɩ o wɩ: «A bukɔ, nan ve.»3 Ruuti ma nuŋi o vu o beeri karɩ sɩm wʋnɩ. O ma tɔgɩ tɩntʋŋna bam kwaga o larɩ mɩna yam. Kʋ na lagɩ kʋ wǝǝnu tɩn, o ma vu o yi kara kalʋ na yɩ Bʋazɩ nyɩm tɩn. Wʋntʋ nuŋi Elimelɛkɩ dwi kʋm mʋ.
4 Kʋ na kɩ fɩɩn tɩn, Bʋazɩ ma nuŋi Betelɩhɛm tɩʋ wʋ o yi kara kam. O ma warɩ o tɩntʋŋna bam o wɩ: «Baŋa-Wɛ taa wʋ á tee nɩ!» Ba ma sɛ yɩ ba wɩ: «Baŋa-Wɛ wʋ́ kɩ nmʋ yu-yoŋo!» 5 Bʋazɩ ma bwe o tɩntʋŋna yigə tu wʋm o wɩ: «Bukɔ wʋm yɩ wɔɔ bu mʋ?» 6 Yigə tu wʋm ma ləri o wɩ: «O yɩ Moabɩ tiinə bukɔ mʋ yɩ o tɔgɩ dɩ Noemi o ba yo. 7 O nan loori-nɩ mʋ sɩ a pa‑o cwǝŋǝ sɩ o taa tɔgɩ tɩntʋŋna bam kwaga o larɩ mɩna yam. O tu zɩzɩŋa nɩ mʋ o tʋŋɩ yo yɩ o laan zaŋɩ o vu sɩ o jǝni vwe dɩm nɩ.»
8 Bʋazɩ ma vu o ta dɩ Ruuti o wɩ: «A bukɔ, cəgi-nɩ. Daa n yɩ ve nɔn-gaa kara n larɩ mɩna, kʋ na daɩ kara kantʋ nɩ. Maŋɩ yo seeni n tɔgɩ dɩ kaana bam sɩ á taá tʋŋa. 9 Maanɩ sɩ n nii ba na wʋ́ gwe mɩna yam mɛ dɩ mɛ tɩn, sɩ n ta n wʋ kaana bam tee nɩ. Amʋ kaanɩ baara bam sɩ ba yɩ daanɩ‑m. Na-nyɔm na jɩgɩ-m, sɩ n lɛɛrɩ na kɔɔra balʋ nɔɔn-dʋnnʋ tɩm na mɔɔnɩ na ba kɩ da tɩn wʋnɩ n nyɔ.»
10 Ruuti na ni kʋntʋ tɩn, o ma vi o yibiyə tɩga nɩ yɩ o ta dɩ Bʋazɩ o wɩ: «Amʋ tu, bɛŋwaanɩ mʋ n yigə tiini ka wʋra dɩ amʋ tɩntʋ? Amʋ na yɩ vəru abam tɩʋ kʋm nɩ tɩn, bɛŋwaanɩ mʋ n kɩ-nɩ lanyɩranɩ kʋntʋ?» 11 Bʋazɩ ma lǝr-o o wɩ: «Amʋ lwarɩ woŋo kʋlʋ maama n na kɩ n pa Noemi, kʋ zɩgɩ n barʋ wʋm na tɩga sɩ kʋ ba kʋ yi zɩm tɩn. A ni nɩ n yagɩ n ko, dɩ n nu, dɩ n tɩʋ kʋm kwaga nɩ mʋ, yɩ n daarɩ n ba n zʋʋrɩ yo, dɩ nɔɔna balʋ n na maŋɩ n yǝri tɩn. 12 Baŋa-Wɛ wʋ́ joori DƖ ŋwɩ nmʋ kǝm-laarʋ tɩm jɩnɩ, pa n na wo-laarʋ zanzan DƖ tee nɩ. N tu Yisɩrayɛlɩ tiinə Baŋa-Wɛ dɩm te mʋ sɩ DƖ yarɩgɩ DƖ vɔna DƖ kwǝli‑m, yɩ dɩntʋ wʋ́ sɩɩnɩ DƖ wəli‑m.»b 13 Ruuti ma ləri o wɩ: «Amʋ tu, a kɩ n le. N tiini n kɩ-nɩ lanyɩranɩ pa a bɩcarɩ zuri dɩ n taanɩ dɩm, yɩ a maŋɩ a wʋ yi n tɩntʋŋna bam dɩdʋa dɩ.»
14 Ba na jǝni sɩ ba di wʋdiu tɩn, Bʋazɩ ma ta dɩ Ruuti o wɩ: «Ba n wǝli dɩbam wʋnɩ sɩ dɩ́ di wʋdiu.»c O ma jǝni tɩntʋŋna bam tee nɩ sɩ o di. Boozi maa kɩ mɩna yalʋ ba na kwarɩ tɩn o pa-o. O ma di o su yɩ o daarɩ kʋdoŋ. 15 Ruuti laan ma zaŋɩ o maa ve sɩ o larɩ mɩna yam. Bʋazɩ ma pa o nɔɔn-dʋnnʋ tɩm ni o wɩ: «Pa-na-o cwǝŋǝ sɩ o taa larɩ mɩna yam, dɩ kʋ na maŋɩ kʋ yɩ mɩn-zwarʋ tɩm na wʋ mɛ tɩn dɩ. Á yɩ cɩ-na o yigə. 16 Á na wʋra á pɛ mɩna yam, lɩ-na mɩn-ŋʋna yadonnə á paalɩ á dɩ tɩga nɩ sɩ o wanɩ o larɩ-ya. Yɩ bagɩ-na-o.»
17 Ruuti ma vu kara kam o wʋra o larɩ mɩna yam sɩ kʋ taa ve dɩdaan-ni nɩ. O ma fɩrɩ-ya yɩ o na sɩ kʋ maŋɩ dɩ kʋnkwannʋ tɩle. 18 O ma kwe mɩna yam o zɩŋɩ o joori tɩʋ kʋm wʋnɩ yɩ o vu o brɩ o barʋ-nu Noemi o na nɛ kʋ ma te tɩn. O ma daarɩ o pa‑o wʋdiu kʋlʋ o ya na di o daarɩ tɩn. 19 Noemi ma bwe‑o o wɩ: «N ve n tʋŋɩ wɔɔ kara nɩ mʋ yɩ n na tɩntʋ maama? Kʋ na yɩ wʋlʋ na nii n baŋa nɩ tɩn, Wɛ wʋ́ kɩ o yu-yoŋo.» Ruuti ma ta o brɩ-o o na ve o tʋŋɩ nɔɔnʋ wʋlʋ kara nɩ tɩn, yɩ o wɩ: «Nɔɔnʋ wʋm yɩrɩ mʋ Bʋazɩ.» 20 Noemi ma fɔgɩ o ta o wɩ: «Baŋa-Wɛ wʋ́ kɩ Bʋazɩ yu-yoŋo! Wɛ ta yǝni DƖ kɩ lanyɩranɩ DƖ paɩ naŋʋna dɩ balʋ na tɩgɩ tɩn.» O ta ma ta o wɩ: «Bʋazɩ yɩ dɩbam yɩra nɔɔnʋ wʋlʋ na maŋɩ sɩ o nii dɩbam baŋa nɩ tɩn.» 21 Ruuti daa ta ma ta o wɩ: «Kʋlʋ na wǝli da tɩn mʋ yɩ o pɛ cwǝŋǝ sɩ a tɔgɩ dɩ o tɩntʋŋna bam a larɩ mɩna yam sɩ kʋ taa nii ba kara kam tɩtʋŋa maama na ti.» 22 Noemi ma ləri o wɩ: «A bukɔ, n na tɔgɩ dɩ Bʋazɩ tɩntʋŋ-kana bam n tʋŋa, kʋ gara. N na ve nɔn-gaa kara, ba waɩ ba daanɩ‑m.»
23 Ruuti ma sɩɩnɩ o kɩ kʋntʋ. O ma salɩ Bʋazɩ tɩntʋŋna bam yɩra nɩ o larɩ mɩna yam sɩ ba ba ba ti mɩna yam zagɩm maama. O dɛɛn maa zʋʋrɩ o barʋ-nu Noemi tee nɩ.