Ruuti Tɔnɔ
Noemi dɩ Ruuti taanɩ
1
Faŋa faŋa dɩdɛɛra nii Yisɩrayɛlɩ tiinə bam baŋa nɩ yɩ ba ta wʋ tiŋi pɛ tɩn, mʋ kana dɛɛn tu ba tɩʋ kʋm. Nɔɔnʋ wʋdoŋ dɛɛn maa wʋra, o na nuŋi Zuda tɩʋ kʋdoŋ, kʋ yɩrɩ mʋ Betelɩhɛm. Nɔɔnʋ wʋm dɩ o kaanɩ dɩ o bəkəri sɩle ma zaŋɩ ba vu Moabɩ tɩʋ sɩ ba taa zʋʋrɩ da maŋa fɩnfɩɩn wʋnɩ. 2 Nɔɔnʋ wʋm yɩrɩ mʋ Elimelɛkɩ. O kaanɩ yɩrɩ maa yɩ Noemi. O bəkəri sɩm yɩra maa yɩ Maklɔnɩ dɩ Kiliyɔnɩ. Ba dɛɛn yɩ Efrata dwi dɩm tiinə mʋ ba na nuŋi Zuda tɩʋ, Betelɩhɛm. Ba ma sɩɩnɩ ba vu ba zʋʋrɩ Moabɩ tɩʋ kʋm nɩ. 3 Ba na wʋra tɩn, Elimelɛkɩ ma tɩ yɩ o daarɩ Noemi dɩ o bəkəri sɩle sɩm. 4 Bantʋ ma di Moabɩ bukwa ba ma kɩ ba kaana. Dɩdʋa yɩrɩ mʋ Orepa, wʋdoŋ wʋm yɩrɩ maa yɩ Ruuti. Ba dɛɛn ma zʋ Moabɩ nɩ ba yi bɩna fugə. 5 Maklɔnɩ dɩ Kiliyɔnɩ dɩ dɛɛn ma tɩ. Kʋ laan ma daarɩ Noemi, yɩ o daa ba jɩgɩ barʋ naa bu-baara.6 Noemi ta na wʋ Moabɩ laŋa nɩ kʋntʋ tɩn mʋ o ni wɩ Baŋa-Wɛ wǝli DƖ nɔɔna bam pa ba na wʋdiu ba di. O na ni kʋntʋ tɩn, o ma zaŋɩ dɩdaanɩ o bu-kaana Orepa dɩ Ruuti, sɩ o joori o vu o tɩtɩ tɩʋ kʋm. 7 Ba maama ma zaŋɩ ba yagɩ ba dɛɛn na zʋʋrɩ mɛ tɩn yɩ ba tɔgɩ cwǝŋǝ ba maa ve Zuda tɩʋ kʋm. 8 Noemi ma ta dɩ o bu-kaana bale bam o wɩ: «Abam maama joori-na á niina te. Baŋa-Wɛ wʋ́ kɩ abam lanyɩranɩ, nɩnɛɛnɩ abam ya na kɩ amʋ dɩ á banna bam lanyɩranɩ te tɩn. 9 Wɛ wʋ́ pa abam cwǝŋǝ sɩ á zʋ banna badonnǝ yɩ á na yazurə ba sam nɩ.» O ma kukwəri-ba yɩ ba keeri bɔgɩ-bɔgɩ. 10 Ba ma lǝr-o ba wɩ: «Dɩ́ bá yagɩ‑m! Dɩ́ wʋ́ tɔgɩ nmʋ mʋ dɩ́ vu n nɔɔna bam te.»
11 Noemi maa wɩ: «A bukwa bam, joori-na á daarɩ-nɩ. Bɛŋwaanɩ mʋ á bʋŋɩ sɩ á tɔgɩ-nɩ á vu? Amʋ daa lagɩ a lʋ bəkəri sɩ ba ji abam banna mʋ na? 12 Joori-na á sam, sɩ a tiini a kwɩn a kɛ ban-zʋrɩ. A ya na maŋɩ a bʋŋɩ wɩ a wʋ́ wanɩ a lʋ biə, yɩ a na nɛ barʋ zɩm sɩ a daarɩ a lʋ bəkəri mʋ dɩ, 13 abam ta wʋ́ jǝni á cəgi sɩ á zʋ-ba na? Abam bá zʋ banna badonnǝ na? A bukwa bam, kʋ bá kɩ kʋntʋ. Kʋ tiini kʋ camma amʋ yɩranɩ kʋ dwe abam, bɛŋwaanɩ Baŋa-Wɛ mʋ cɔgɩ a yigə.»
14 Noemi na tagɩ kʋntʋ tɩn, ba daa ma keeri bɔgɩ-bɔgɩ. Orɩpa laan ma kukwəri o barʋ nu Noemi yɩ o ban‑o. Kʋ daarɩ Ruuti ma fɔgɩ o pɛ Noemi o ja. 15 Noemi na nɛ kʋntʋ tɩn, o ma ta dɩ Ruuti o wɩ: «N wʋ nɛ na? Nmʋ yuu-doŋ wʋm maa joori o nɔɔna bam te sɩ o daarɩ o taa zuli ba dwi jwǝnǝ yam mʋ. Nmʋ dɩ kwaanɩ sɩ n kɩ kʋntʋ.»
16 Ruuti ma lǝr-o o wɩ: «Yɩ fɩn-nɩ sɩ a kɩ kʋlʋ a na vaɩ tɩn, sɩ a bá ywəri n kwaga nɩ. Nmʋ na lagɩ n vu je sɩlʋ maama tɩn, amʋ dɩ wʋ́ tɔgɩ a vu. Nmʋ na wʋ́ ta n zʋʋrɩ mɛ tɩn, amʋ dɩ wʋ́ zʋ dáanɩ. Nmʋ nɔɔna bam wʋ́ taa yɩ amʋ dɩ nɔɔna. Wɛ dɩlʋ nmʋ na zuli tɩn mʋ, amʋ dɩ wʋ́ zuli. 17 Nmʋ na wʋ́ ba n tɩ mɛ tɩn, dáanɩ mʋ amʋ dɩ wʋ́ tɩ sɩ ba kɩ-nɩ da. Wɛ wʋ́ yaarɩ-nɩ lanyɩranɩ nɩnɛɛnɩ a na sɛ sɩ woŋo pɔɔrɩ dɩbam daanɩ yɩ kʋ daɩ tʋʋnɩ yɩranɩ.» 18 Noemi na maanɩ nɩ Ruuti sɩɩnɩ o yiǝ sɩ o tɔg-o tɩn, o daa wʋ tagɩ kʋlʋkʋlʋ.
19 Ba ma vu taa ba vu ba yi Betelɩhɛm. Ba na yi da tɩn, kʋ ma kɩ tɩʋ kʋm nɔɔna bam yǝǝu. Kaana bam ma bwe daanɩ ba wɩ: «Noemi mʋ tɩntʋ na?» 20 Noemi ma ta o wɩ: «Dam-fɔrɔ Tu Wɛ dɩm pɛ a ŋwɩa kɩ cam mʋ. Kʋntʋ ŋwaanɩ, daa á yɩ bəŋi-na a yɩrɩ nɩ Noemia. Nan taá bǝi a yɩrɩ nɩ Marab. 21 A na nuŋi yo seeni tɩn, a jɩŋa wǝǝnu dɛɛn daga zanzan. Baŋa-Wɛ laan ma pa a joori dɩ jɩ-kʋrɩ. Dam-fɔrɔ Tu Wɛ dɩm mʋ lɔgɩ a kwaga nɩ yɩ DƖ daarɩ DƖ ja cam zanzan DƖ ba a baŋa nɩ. Kʋntʋ tɩn, bɛŋwaanɩ mʋ á daa wʋ́ taá bǝi a yɩrɩ wɩ Noemi? Kʋ ba jɩgɩ kuri.»
22 Kʋ dɛɛn kɩ kʋntʋ mʋ yɩ Noemi nuŋi Moabɩ o joori o vu Betelɩhɛm, wʋntʋ dɩdaanɩ Moabɩ tiinə bukɔ Ruuti na yɩ o bu-kaanɩ tɩn. Maŋa kalʋ ba na puli sɩ ba zagɩ caarac tɩn mʋ ba yi da.