Zʋrdɛn bugə kam wa-zʋʋrɩ seeni tɩga kam pɔɔrɩm sɩm
14
Kaanan tɩga kam na wʋ Zʋrdɛn bugə kam wa-zʋʋrɩ seeni tɩn dɛɛn ta daarɩ sɩ ba pɔɔrɩ-ka ba pa Yisɩrayɛlɩ tiinə bam. Wɛ kaanɩm tu Eleyazaarɩ, kʋ wǝli dɩ Nun bu Zozwe, dɩdaanɩ Yisɩrayɛlɩ dwi tiinə nakwa bam dɛɛn laan ma pɔɔrɩ tɩga kam kʋntʋ ba pa Yisɩrayɛlɩ tiinə bam maama. 2 Ba dɛɛn tagɩ jɔrɔ mʋ tɩga kam ŋwaanɩ ba pɔɔrɩ-ka ba pa Yisɩrayɛlɩ dwiə nʋgʋ dɩ cicoro kʋlʋ na daarɩ tɩn, nɩnɛɛnɩ Baŋa-Wɛ na maŋɩ DƖ pa Moyisi ni sɩ o kɩ te tɩn. 3-4 Kʋ na yɩ dwiə yale dɩ cicoro kʋdoŋ kʋm, Moyisi ya maŋɩ o pa bantʋ na ba jǝŋǝ je. Bantʋ tɩga kam wʋ Zʋrdɛn bugə kam wa-puli seeni mʋ. Moyisi nan wʋ pɛ Levi dwi tiinə tɩga kam doŋ. O dɛɛn za kuri tɩɩnɩ dɩ vara pwəli mʋ o pa-ba, sɩ ba dɩ wanɩ ba taa zʋʋrɩ dɩ wʋnɩ yɩ ba kɩ kɔnɔ.a Kʋ daarɩ Zʋzɛfʋ dwi dɩm dɛɛn pɔɔrɩ kuni bɩle mʋ: o biə bale Manasɩ dɩdaanɩ Efrayim dwiə yam mʋ kʋntʋ. 5 Yisɩrayɛlɩ tiinə bam dɛɛn na pɔɔrɩ tɩga kam te tɩn kɩ kʋ maŋɩ dɩdaanɩ Baŋa-Wɛ ya na brɩ Moyisi sɩ ba kɩ te tɩn mʋ.Kalɛbɩ joŋi Ebrɔn
6 Yisɩrayɛlɩ tiinə bam dɛɛn ta maa wʋ Giligalɩ nɩ. Ba na wʋra tɩn mʋ Zuda dwi tiinə tʋŋɩ nɔɔna Zozwe tee nɩ. Ba dɩdʋa dɛɛn yɩ Yefune bu Kalɛbɩ, o na nuŋi Kenizi dwi kʋm nɩ tɩn. Kalɛbɩ ma ta dɩ Zozwe o wɩ: «Yɩ swe Baŋa-Wɛ dɛɛn na tagɩ dɩbam bale taanɩ tɩte maama o brɩ o tɩntʋŋnʋ Moyisi, yɩ dɩ́ dɛɛn ta wʋ Kadese-Baranɩa nɩ tɩn. 7 Maŋa kam kʋntʋ nɩ amʋ dɛɛn jɩgɩ bɩna fiinna mʋ. Moyisi dɛɛn zɩgɩ Kadese-Baranɩa nɩ o tʋŋɩ nɩ, sɩ a vu a ŋɔ a nii tɩga kantʋ na yɩ te tɩn. Amʋ dɛɛn ma ja ta-ŋʋm a ba a pa‑o, dɩ a wʋʋ maama. 8 Sɩ kʋ na yɩ amʋ cʋrrʋ tɩlʋ dɛɛn na tɔgɩ dɩ amʋ ba vu sɩ dɩ́ ŋɔ dɩ́ nii tɩga kam tɩn, ba dɛɛn kɩ fʋʋnɩ mʋ nɔɔna bam maama kuri nɩ. Amʋ dɛɛn nan yɔɔrɩ a tɔgɩ a Tu Baŋa-Wɛ dɩm mʋ dɩ a wʋʋ maama.b 9 Dɩntʋ dɛ dɩm nɩ mʋ Moyisi dɛɛn tagɩ o goni ni dɩ amʋ o wɩ: ‹Nmʋ na nɔnɩ n naga Kaanan tɩga kalʋ nɩ kʋntʋ tɩn wʋ́ taa yɩ nmʋ nyɩm. Nmʋ dɩ n biə mʋ wʋ́ taa te-ka sɩ kʋ taa ve maŋa maama, n na tɔgɩ Baŋa-Wɛ dɩ n wʋʋ maama tɩn ŋwaanɩ.›c
10 Tɔ. Moyisi na tagɩ Baŋa-Wɛ taanɩ dɩm kʋntʋ o brɩ-nɩ, sɩ kʋ yi zɩm tɩn, kʋ yɩ bɩna fiinna-yanu mʋ. Maŋa kam kʋntʋ nɩ dɩbam Yisɩrayɛlɩ tiinə ta wʋ kagʋa yuu nɩ mʋ dɩ́ veǝ. Nii amʋ! Amʋ ta ŋwɩ nɩnɛɛnɩ Baŋa-Wɛ na tagɩ te tɩn, pa a zɩm jɩgɩ bɩna funɔnɔ yanu mʋ. 11 Dɩ zɩm maama amʋ nan ta dana, yɩ a damma mʋ, nɩnɛɛnɩ a dɛɛn na yɩ te dɛ dɩm Moyisi na tʋŋɩ-nɩ tɩn. Dam dɩm ta wʋra sɩ a ma a kɩ najara dɩ tɩtʋŋa yalʋ maama a na lagɩ tɩn. 12 Kʋntʋ tɩn, kwe pweeru laŋa kalʋ Baŋa-Wɛ dɛɛn na goni ni sɩ ka taa yɩ amʋ nyɩm tɩn n pa-nɩ. Nmʋ wʋ́ guli nɩ Anakɩ tiinə bam mʋ wʋ daanɩ. Ba tɩɩnɩ dɩm ma lɔ dɩ di vili vili. Dɩ kʋ dɩ, Baŋa-Wɛ na wʋ amʋ tee nɩ tɩn ŋwaanɩ, a wʋ́ wanɩ-ba a zəli, nɩnɛɛnɩ Baŋa-Wɛ na tagɩ sɩ a kɩ te tɩn.»
13 Yefune bu Kalɛbɩ na tagɩ kʋntʋ maama o ti tɩn, Zozwe ma loori Wɛ sɩ DƖ kɩ-o lanyɩranɩ. O ma daarɩ o kwe Ebrɔn o pa‑o, sɩ kʋ taa yɩ o tɩtɩ jɩjɩgɩrʋ. 14 Kʋ na zɩgɩ dɛ dɩm kʋntʋ nɩ sɩ kʋ yi zɩm tɩn, Ebrɔn laan lɛɛrɩ kʋ ji Yefune bu Kalɛbɩ dɩdaanɩ o biə nyɩm mʋ. Bɛŋwaanɩ, wʋntʋ dɛɛn tɔgɩ Yisɩrayɛlɩ Baŋa-Wɛ dɩm mʋ dɩdaanɩ o wʋʋ maama.d 15 Kantʋ maŋa ya ta na wʋ yi tɩn, ba dɛɛn jɩgɩ tɩʋ kʋm mʋ ba bǝi nɩ Kiriyat-Arba, Araba dɛɛn na yɩ Anakɩ tiinə bam nɔn-sawɔrɔ tɩn ŋwaanɩ.
Tɩga kam laan ma sin yɩ najara daa tǝrǝ.