Tɩga kalʋ ta na daarɩ sɩ ba di tɩn
13
Zozwe dɛɛn na tiini o kwɩn maŋa kalʋ tɩn, mʋ Baŋa-Wɛ tagɩ dɩd-o DƖ wɩ:«Nmʋ laan kwɩn zanzan, yɩ tɩga kam je zanzan ta wʋra sɩ á vu á joŋi á taá te. 2 Je sɩntʋ nan mʋ daarɩ sɩ nɔɔna vu ba joŋi: Filisi tiinə laŋa kam, kʋ wǝli dɩ Gesuri tiinə laŋa kam maama. 3 Ka zɩgɩ Sihora bu-tʋla kam nɩ mʋ, Ezipi sisəm dɩm na wʋ mɛ tɩn, sɩ kʋ yi Ekoron sisəm dɩm na wʋ jazɩm baŋa seeni tɩn. Je sɩm kʋntʋ maama yɩ Kaanan tiinə laŋa mʋ. Filisi dɩdɛɛra banu tɩɩnɩ dɩm maa yɩ: Gaza, dɩ Asedodi, dɩ Asekelon, dɩ Gatɩ, dɩdaanɩ Ekoron. Kʋ wǝli dɩ Awa tiinə laŋa kalʋ na wʋ jagwiə seeni tɩn, 4 dɩdaanɩ Kaanan tiinə tɩga kalʋ na zɩgɩ Sidɔn tiinə tɩʋ Ara nɩ sɩ ka ta vu ka yi Afɛkɩ laŋa kam, Amɔɔrɩ tiinə sisəm dɩm na wʋ mɛ tɩn. 5 Abam ta maa wʋ́ joŋi Gebalɩ tiinə laŋa kam á wǝli da, dɩdaanɩ Liban tɩga kam maama na wʋ wa-puli seeni yɩ ka zɩgɩ Baal-Gad na wʋ Hɛrmɔn Piu kʋm jagwiə seeni tɩn, ka vu ka yi Lebo-Hamatɩ.
6 Sidɔn tiinə laŋa kam maama tɔgɩ ka wǝli da mʋ. Bantʋ zʋʋrɩ pweeru je sɩm na wʋ Liban pweeru tɩm dɩdaanɩ Miserefɔtɩ-Mayim tɩtarɩ nɩ tɩn mʋ. Amʋ tɩtɩ nan mʋ lagɩ a zəli nɔɔna bam kʋntʋ maama, sɩ abam wanɩ á zʋ da. Nmʋ nan yɔɔrɩ n pɔɔrɩ tɩga kam n pa Yisɩrayɛlɩ tiinə bam nɩnɛɛnɩ a na pɛ nmʋ ni sɩ n kɩ te tɩn. 7 Kwe tɩga kam kʋntʋ maama n pɔɔrɩ n pa Yisɩrayɛlɩ dwiə nʋgʋ kʋlʋ na daarɩ tɩn, dɩdaanɩ Manasɩ dwi dɩm cicoro, sɩ ba taa te.»
Zʋrdɛn bugə kam wa-puli seeni tɩga kam pɔɔrɩm sɩm
8 Kʋ na yɩ Manasɩ dwi dɩm cicoro kʋdoŋ kʋm, kʋ wǝli dɩdaanɩ Ruban dwi dɩm, dɩ Gadɩ dwi dɩm, Baŋa-Wɛ tɩntʋŋnʋ Moyisi dɛɛn maŋɩ o pa bantʋ ba tɩga kam pʋpwara Zʋrdɛn bugə kam wa-puli seeni mʋ.a 9 Ba laŋa kam yalɩ kʋntʋ mʋ ka yi Aroyɛrɩ na wʋ Aranon bolo kʋm ni nɩ tɩn, dɩ tɩʋ kʋlʋ na wʋ bolo kʋm tɩtarɩ nɩ tɩn, kʋ wǝli dɩ tɩ-kamparɩ je sɩlʋ maama na zɩgɩ Medɩba nɩ sɩ kʋ yi Dibɔn tɩn. 10 Ka ta yi tɩɩnɩ dɩlʋ maama na yɩ Amɔɔrɩ tiinə Pɛ Sɩhɔn nyɩm tɩn. Wʋntʋ dɛɛn nan di paarɩ Hesebon wʋnɩ mʋ. Ka ta ma vu ka yi Amɔn tɩʋ sisəm dɩm. 11 Ba tɩga kam dɛɛn tɔgɩ Galadɩ je sɩm dɩ Gesuri tiinə dɩ Maaka tiinə laŋa kam maama, dɩdaanɩ Hɛrmɔn Piu kʋm je sɩm maama, kʋ wǝli dɩ Basan maama, sɩ ka vu ka yi Salɛka mʋ. 12 Basan tɩʋ Pɛ Ɔgɩ laŋa kam maama dɩ yɩ ba nyɩm mʋ. Wʋntʋ dɛɛn di o paarɩ Asetaro dɩdaanɩ Ederi nɩ mʋ. Wʋntʋ dɛɛn mʋ kweeli Refayim tiinə bam jɩŋa nɩ. Moyisi dɛɛn maa di-ba, yɩ o zəli-ba o daarɩ tɩga kam kʋntʋ. 13 Yisɩrayɛlɩ tiinə bam dɛɛn maa wʋ zəli Gesuri tiinə bam dɩ Maaka tiinə bam. Nɔɔna bam kʋntʋ dɩ dɛɛn maa tɔgɩ ba zʋʋrɩ dɩ Yisɩrayɛlɩ tiinə bam sɩ kʋ yi zɩm maama.
14 Moyisi dɛɛn na pɔɔrɩ tɩga kam o pa Yisɩrayɛlɩ tiinə bam tɩn, Levi dwi dɩm yɩranɩ mʋ wʋ tɔgɩ ba joŋi tɩga kam pʋpwara.b Baŋa-Wɛ maŋɩ DƖ pa Moyisi ni nɩ: bantʋ pʋpwara wʋ́ nuŋi pɛɛra yalʋ Yisɩrayɛlɩ tiinə bam na jaanɩ ba tui ba zwɛ Wɛ bimbim dɩm baŋa nɩ ba pa ba Tu Baŋa-Wɛ dɩm tɩn mʋ.
Ruban dwi dɩm tɩga kam
15 Moyisi dɛɛn kwe tɩga kantʋ mʋ o pa Ruban dwi dɩm. O ma pa dwi maama dɩ kʋ nyɩm sɩ ba taa te.
16 Bantʋ laŋa kam yalɩ kʋntʋ mʋ ka yi Aroyɛrɩ na wʋ Aranon bolo kʋm ni nɩ tɩn, dɩ tɩʋ kʋlʋ na na wʋ bolo kʋm tɩtarɩ nɩ tɩn, kʋ wǝli dɩ tɩ-kamparɩ je sɩlʋ maama na bwələ dɩ Medɩba tɩn. 17 Hesebon dɩ yɩ ba nyɩm mʋ, dɩdaanɩ tɩɩnɩ dɩlʋ maama na wʋ tɩ-kamparɩ dɩm kʋntʋ maama nɩ tɩn: Dibɔn, dɩ Bamotɩ-Baal, dɩ Bɛtɩ-Baal-Meon, 18 dɩ Yahaza, dɩ Kedemɔtɩ, dɩ Mefaatɩ, 19 dɩ Kiryatayim, dɩ Sibima, dɩdaanɩ Zeret-Saharɩ. Tɩʋ kʋntʋ maa wʋ zoŋo kʋlʋ na wʋ bolo kʋm ni nɩ tɩn baŋa nɩ mʋ. 20 Kʋ ta wǝli dɩ Bɛt-Pewɔrɩ, dɩ tɩga kalʋ na wʋ Pisiga piu kʋm təŋə nɩ tɩn, dɩ Bɛt-Yesimɔtɩ, 21 dɩdaanɩ tɩɩnɩ dɩlʋ maama na wʋ tɩ-kamparɩ je sɩm nɩ tɩn. Amɔɔrɩ tiinə Pɛ Sɩhɔn dɛɛn na di paarɩ Hesebon wʋnɩ yɩ o te laŋa kalʋ maama tɩn dɩ maa yɩ Ruban dwi dɩm nyɩm. Moyisi dɛɛn ma di pɛ wʋm kʋntʋ dɩ Madɩan pwa bam maama mʋ: Evi, dɩ Rekem, dɩ Zurǝ, dɩ Huuri, dɩdaanɩ Reba. Bantʋ dɛɛn mʋ te tɩga kam ba pa Pɛ Sɩhɔn. 22 Yisɩrayɛlɩ tiinə bam dɛɛn ma gʋ Bewɔrɩ bu Balam wʋlʋ na yɩ vʋrʋ tɩn ba wǝli dɩ nɔɔna babam bam. 23 Ruban dwi dɩm tɩga kam dɛɛn ve ka kweeli Zʋrdɛn bugə kam bubɛ baŋa nɩ mʋ. Ba dɛɛn kwe tɩɩnɩ dɩm kʋntʋ dɩ dɩ nawuurə yam maama ba te, digə maama dɩ ka nyɩm.
Gadɩ dwi dɩm tɩga kam
24 Moyisi dɛɛn ta ma kwe tɩga kadoŋ o pa Gadɩ dwi dɩm. O ma pa dwi maama dɩ kʋ nyɩm sɩ ba taa te.
25 Bantʋ laŋa kam ma kwe Yazɛrɩ dɩ tɩɩnɩ dɩlʋ maama na wʋ Galadɩ laŋa kam nɩ, kʋ ta wǝli dɩ Amɔn tiinə tɩga kam cicoro, sɩ kʋ taa ve Aroyɛrɩ na wʋ Raba wa-puli seeni tɩn. 26 Ba laŋa kam zɩgɩ Hesebon nɩ, sɩ ka vu ka yi Rama-Mizipɩ dɩdaanɩ Betonim. Ka ta zɩgɩ Mahanayimi nɩ, sɩ ka yi Debiri laŋa kam. 27 Zʋrdɛn bolo kʋm seeni tɩn, ba tɩga kam ma kwe Bɛtɩ-Haram, dɩ Bɛtɩ-Nimira, dɩ Sukɔtɩ, dɩdaanɩ Zafon. Hesebon tɩʋ Pɛ Sɩhɔn laŋa kalʋ ya ta na daarɩ tɩn dɩ maa yɩ ba nyɩm. Gadɩ dwi dɩm tɩga kam dɛɛn ve ka kweeli Zʋrdɛn bugə kam bubɛ baŋa nɩ mʋ, ka ta tɔgɩ bugə kam wa-puli seeni ka yi Galile nɩnɩʋ kʋm ni. 28 Ba dɛɛn kwe tɩɩnɩ dɩm kʋntʋ dɩ dɩ nawuurə yam maama ba te, dwi maama dɩ kʋ nyɩm.
Manasɩ dwi dɩm cicoro tɩga kam
29 Moyisi dɛɛn ta ma kwe tɩga kadoŋ o pa Manasɩ dwi kʋm cicoro. O ma pa digə maama dɩ ka nyɩm sɩ ba taa te. 30 Bantʋ laŋa kam ma kwe Mahanayimi, sɩ kʋ taa ve Basan laŋa kam maama nɩ, Pɛ Ɔgɩ dɛɛn na di o paarɩ dɩm mɛ tɩn. Tɩɩnɩ fusɩrdʋ dɩlʋ Yayiri ya na di yɩ dɩ wʋ Basan nɩ tɩn dɩ ta wǝli da mʋ. 31 Galadɩ laŋa kam cicoro dɩ maa wǝli da, dɩdaanɩ Pɛ Ɔgɩ dɛɛn na di o paarɩ dɩm tɩɩnɩ dɩlʋ nɩ tɩn, Asetaro dɩdaanɩ Ederi mʋ kʋntʋ. Je sɩm kʋntʋ maama dɛɛn laan jigi Manasɩ bu Makira dwi kʋm cicoro nyɩm mʋ.
32 Mʋ kʋ na kɩ te yɩ Moyisi dɛɛn wʋ Moabɩ bwəəlu tɩm laŋa kam nɩ o pɔɔrɩ tɩga kalʋ na wʋ Zeriko tɩʋ dɩ Zʋrdɛn bugə kam wa-puli seeni tɩn. 33 Sɩ kʋ na daarɩ Levi dwi tiinə bam tɩn, Moyisi dɛɛn wʋ pɔɔrɩ tɩga o pa bantʋ sɩ ka taa yɩ ba nyɩm. Bɛŋwaanɩ, Yisɩrayɛlɩ Baŋa-Wɛ dɩm mʋ yɩ ba təri nɩ DƖ na tagɩ dɩ ba te tɩn.