Ba na sɛ Wɛ kwiə yam, baá na yu-yoŋo
26
«Yɩ zaŋɩ-na á kɩ jwǝnǝ sɩ á zuli-ya. Nan yɩ mɔ-na kamwarʋ, naa sɩ á cəli kandwa, naa a sarɩ-ya á pa ya ji wa-yɔɔrʋ sɩ á zuli-ya. Amʋ mʋ yɩ abam Tu Baŋa-Wɛ dɩm.2 Taá ye-na amʋ siun da yam ni nɩ, sɩ á daarɩ á taá nɩgɩ amʋ jero-vwe dɩm. Amʋ mʋ yɩ Baŋa-Wɛ dɩm.
3 Abam na sɛ amʋ kwiə yam, yɩ á tʋŋɩ á tɔgɩ amʋ niə yam, 4 amʋ dɩ wʋ́ tʋŋɩ dʋa sɩ ka nɩ ka maŋa nɩ, sɩ á wʋdiiru kɩ lanyɩranɩ. Abam tweeru tɩm dɩ maa wʋ́ lə biə zanzan. 5 Abam wʋdiiru na wʋ́ puli zanzan kʋntʋ tɩn, abam ta wʋ́ taá zagɩ wʋdiiru mʋ yɩ á vinyə tiu biə maŋɩ ba yi sɩ á gwəri-ba. Abam nan bá gwəri á tweeru biə á ti, dɩ duum maŋa na yi sɩ á du á wo-dwə. Abam wʋ́ taá jɩgɩ á di á sui á wʋbʋŋa, yɩ á zʋʋrɩ á tɩga kam nɩ dɩ wʋ-zuru.
6 Amʋ wʋ́ pa á taá zʋʋrɩ tɩga kam nɩ dɩ yazurə. Á maa wʋ́ pəni á dɔ yɩ fʋʋnɩ ba jɩgɩ abam. Amʋ wʋ́ lɩ ga-vara sɩ ba yɩ taa wʋ abam tɩga kam wʋnɩ, yɩ a daarɩ a cɩ á dʋna. 7 Cɩga tɩn, abam wʋ́ zəli á dʋna á di dam ba baŋa nɩ, yɩ á gʋ-ba. 8 Abam nɔɔna banu wʋ́ na dam sɩ á zəli á dʋna bam nɔɔna bi. Abam nɔɔna bi dɩ wʋ́ zəli ba nɔɔna mʋrrʋ fugə yɩ á wanɩ-ba á gʋ.
9 Amʋ yigə wʋ́ taa wʋra dɩ abam, pa á na biə zanzan yɩ á puli dɩ dam. A maa wʋ́ su ni-gonim dɩlʋ a na tiŋi dɩ abam tɩn. 10 Abam wʋdiiru na wʋ́ tiini tɩ gaalɩ tɩn ŋwaanɩ, kʋ na yi sɩ á zagɩ wʋdiiru, bɩn-doori dɩm wʋdiu ta wʋ́ taa wʋ á tuli nɩ, pa á dʋlɩ-kʋ á yagɩ sɩ á na je á kɩ á wʋdi-dʋŋʋ da.
11 Amʋ maa wʋ́ ba a taa zʋʋrɩ abam tɩtarɩ nɩ.a Amʋ brɩ a bá yáalɩ abam. 12 Amʋ wʋ́ taa wʋ á tee nɩ. A maa wʋ́ taa yɩ abam Tu Wɛ dɩm, yɩ abam dɩ wʋ́ taa yɩ amʋ nɔɔna. 13 Amʋ mʋ yɩ abam Tu Baŋa-Wɛ dɩm. A ma ja abam a nuŋi Ezipi nɩ, sɩ á daa yɩ taá yɩ Ezipi tiinə gambɛ. A ma cɔgɩ dam dɩlʋ ya na nyɩ abam dɩ sɩn tɩga nɩ tɩn, yɩ a joŋi abam pa á ve yɩ á yum wʋ wɛɛnɩ.»
Zwabaniə taanɩ
14 «Abam nan na ba sɛ amʋ kwǝrǝ, yɩ á ba tɔgɩ a niə yam maama, 15 á na nuŋi amʋ kwiə yam kwaga nɩ, á daarɩ á cɔgɩ ni-gonim dɩlʋ a na kɩ dɩ abam tɩn, 16 amʋ laan wʋ́ waarɩ abam tɩntʋ mʋ: lɛɛrʋ wʋ́ yi abam lɩla, nɩnɛɛnɩ yawɩ-cɛɛrʋ, dɩ sɩsa-dwəənu, dɩ paa. Tɩntʋ mʋ lagɩ tɩ dwe á yiǝ, sɩ á daarɩ á bugi á je. Abam na dugi wʋdiiru, kʋ bá joŋi abam. Bɛŋwaanɩ, á dʋna mʋ lagɩ ba vrɩ-tɩ á tee nɩ ba di ba daarɩ abam. 17 Amʋ tɩtɩ mʋ lagɩ a nuŋi abam kwaga nɩ, pa á dʋna di abam najara wʋnɩ. Nɔɔna balʋ na culi abam tɩn wʋ́ di dam á baŋa nɩ. Á ta wʋ́ kwaanɩ sɩ á duri á lu yɩ nɔɔn-nɔɔnʋ ba zəli abam.
18 Tɩntʋ maama nan na yi abam yɩ á ta vɩn sɩ á sɛ amʋ kwǝrǝ, a laan wʋ́ pa á waarɩm dɩm puli dɩ kɩ da kuni bɩrpɛ mʋ á lwarɩm dɩm ŋwaanɩ. 19 Amʋ maa wʋ́ pa á kamunni dɩm ba dɩ tu tɩga. Amʋ wʋ́ cɩ sɩ dʋa yɩ nɩ ka pa abam, sɩ á tɩga kam kʋ yɩ ka taa dana nɩnɛɛnɩ luu na yɩ te tɩn. 20 Abam tɩtʋŋ-dɛɛra yam maama bá ja kuri ya pa abam. Bɛŋwaanɩ, tɩga kam bá kɩ wʋdiiru ka pa abam, á tweeru tɩm dɩ nan bá lə biə.
21 Kʋntʋ maama nan na kɩa, yɩ abam ta na vɩ-nɩ, yɩ á ba sɛ a kwǝrǝ kam, amʋ laan wʋ́ pa á cam dɩm puli mʋ dɩ kɩ kuni bɩrpɛ dɩ wǝli da. 22 Amʋ wʋ́ saasɩ ga-vara a yagɩ abam yɩra nɩ, yɩ ba wʋ́ ja á biə, ba ja á vara, yɩ kʋ pa á ti, á ba á daarɩ fɩnfɩɩn yɩra nɩ, yɩ kʋ pa á cwe sɩm ba sɩ ji kagʋa.
23 Dɩ kʋntʋ maama dɩ, abam ta na vɩn amʋ kʋrɩsɩm dɩm kʋntʋ, 24 amʋ dɩ wʋ́ vɩn abam. A ta wʋ́ waarɩ abam kuni bɩrpɛ mʋ a daa wǝli da á lwarɩm dɩm ŋwaanɩ. 25 A lagɩ a pa najara mʋ zaŋɩ abam dɩ á dʋna tɩtarɩ nɩ, abam na cɔgɩ ni-gonim dɩlʋ amʋ na kɩ dɩ abam tɩn ŋwaanɩ. Abam na duri sɩ á zʋ á tɩ-kamunnu tɩm wʋnɩ á səgi da sɩ á lu, amʋ wʋ́ pa yawɩ-cɛɛrʋ ja abam dáanɩ. Abam dʋna laan maa wʋ́ na cwǝŋǝ sɩ ba wanɩ abam. 26 Amʋ wʋ́ pa á ga wʋdiu sɩ á di. Dɩpɛ wɔɔm jǝgǝ dɩdʋa wʋnɩ mʋ kaana fugə wʋ́ larɩ muni ba wɔ dɩpɛ sɩ ba di sɩm tiinə di. Ba nan na cɛ dɩpɛ dɩm sɩ ba pa daanɩ, digə maama wʋ́ na fɩnfɩɩn yɩranɩ mʋ. Á na nɛ wʋdiu, sɩ nɔɔnʋ maama kwe o nyɩm tɩn, kʋ bá zuri á kana.
27 Dɩ kʋntʋ maama dɩ, abam ta na ba sɛ amʋ kwǝrǝ kam yɩ á vɩ-nɩ, 28 amʋ laan wʋ́ yɔɔrɩ a lɩ a banɩ mʋ sɩ dɩ zaŋɩ abam baŋa nɩ. Amʋ ta wʋ́ waarɩ abam á lwarɩm dɩm ŋwaanɩ kuni bɩrpɛ mʋ. 29 Kana wʋ́ tiini ka ni abam mʋ pa á ja á tɩtɩ biə á di. 30 Amʋ nan wʋ́ cɔgɩ wara-je bimbinə yam mɛ á na ve da á kaanɩ á wa yam tɩn. A ta wʋ́ yigi á bimbinə yalʋ á na zwɛ wǝǝnu tɩlʋ lwǝm na ywǝmmǝ tɩn ya baŋa nɩ tɩn a dɩ tɩga nɩ. A laan wʋ́ tiŋi á twa a daŋɩ á jwǝnǝ yam baŋa nɩ, ya na yɩ wo-yɔɔrʋ tɩn ŋwaanɩ. Amʋ wʋ́ culi abam. 31 A maa wʋ́ pa á tɩɩnɩ dɩm ji di-dwəənu yɩranɩ, yɩ a daarɩ a cɔgɩ wara-je sɩlʋ á na ve da á zuli á wa yam tɩn. Á na zwɛ wǝǝnu á pa-nɩ, tɩ lwəm bá poli a wʋʋ. 32 Amʋ tɩtɩ nan mʋ lagɩ a cɔgɩ á tɩga kam. Abam dʋna na tu sɩ ba zʋ ka wʋnɩ, kʋʋ́ sʋ-ba zanzan. 33 Amʋ wʋ́ zəli abam a jagɩ a yagɩ tɩɩnɩ dɩdonnǝ wʋnɩ, jara-kǝm ŋwaanɩ. Abam maama wʋ́ nuŋi á daarɩ á tɩga kam mʋ sɩ ka ji di-dwəənu yɩranɩ.b 34-35 Kʋ maa wʋ́ pa tɩga kam na siun, nɩ kʋ ya na maŋɩ sɩ ka na bɩna yarpɛ maama wʋnɩ tɩn. Abam na zʋʋrɩ ka wʋnɩ yɩ á wʋ pɔɔrɩ siun bɩnɩ dɩm á pa-ka, ka laan wʋ́ sin bɩna yalʋ maama abam na wʋ́ jagɩ á taá wʋ á dʋna bam tɩɩnɩ dɩm wʋnɩ tɩn.
36 Abam balʋ na wʋ́ wəri tɩn, amʋ wʋ́ pa á vwana parɩ yɩ fʋʋnɩ ja abam á dʋna tɩɩnɩ dɩm wʋnɩ. Vɔɔ tɩtɩ na siiri tɩga nɩ á wʋ́ duri mʋ kʋ dwanɩm ŋwaanɩ. Á wʋ́ bʋŋɩ nɩ nɔɔna mʋ zəli abam sɩ ba ja yɩ á duri sɩ á lu. Á wʋ́ tʋ tɩga nɩ, yɩ nɔɔn-nɔɔnʋ tǝrǝ. 37 Abam nan wʋ́ duri á tri á tʋ á daŋɩ da-baŋa nɩ, yɩ nɔɔn-nɔɔnʋ ba zəli abam. Abam bá taá jɩgɩ dam sɩ á wanɩ á dwəni dɩ á dʋna. 38 Á wʋ́ tɩ á dʋna tɩɩnɩ dɩm wʋnɩ, pa á dwi dɩm je dáanɩ. 39 Abam wʋnɩ balʋ fɩnfɩɩn na wʋ́ daarɩ á dʋna tɩɩnɩ dɩm wʋnɩ tɩn dɩ maa wʋ́ bugi ba je. Kʋ nan wʋ́ taa yɩ lwarɩm yalʋ ba dɩ ba nabaara na kɩ tɩn ŋwaanɩ mʋ ba lagɩ ba bugi ba je kʋntʋ.
40 Kʋ kwaga seeni, ba nan wʋ́ wanɩ ba sɛ nɩ ba dɩ ba nabaara bam sɩɩnɩ ba tusi, yɩ ba daarɩ ba culi ba lwarɩm, dɩ ba na ywəri amʋ kwaga nɩ yɩ ba vɩn amʋ, 41 pa amʋ dɩ vɩn bantʋ yɩ a daarɩ a zəli-ba a ja vu ba dʋna tɩɩnɩ dɩm nɩ te tɩn. Ba na sɩɩnɩ ba tu ba tɩtɩ ba daarɩ ba ləni ba wʋbʋŋ-balwaarʋ tɩm, yɩ ba sɛ waarɩm dɩlʋ amʋ na pɛ-ba tɩn, 42 amʋ dɩ wʋ́ guli a ni-gonim dɩm a na kɩ dɩ ba nabaara Zakɔbɩ, dɩ Yizakɩ, dɩ Abraham tɩn. Amʋ ta wʋ́ guli ba tɩga kam gulə sɩ a fɔgɩ-ka. 43 Amʋ nan wʋ́ zəli-ba ba tɩga kam nɩ sɩ ka wanɩ ka na siun, nɩ kʋ ya na maŋɩ sɩ ka sin bɩna yarpɛ maama wʋnɩ te tɩn. Ba na viiri ba daarɩ tɩga kam, ka laan wʋ́ na siun kʋntʋ doŋ. Ba maŋɩ sɩ ba na waarɩm dɩlʋ na wʋ́ maŋɩ dɩ ba lwarɩm dɩm tɩn mʋ, ba na yɔɔrɩ ba vɩn amʋ niə yam dɩ a kwiə yam tɩn ŋwaanɩ.
44 Dɩ kʋ dɩ, ba na maŋɩ ba wʋ ba dʋna tɩɩnɩ dɩm wʋnɩ, amʋ bá yɔɔrɩ a vɩ-ba. Amʋ bá yiri ni-gonim dɩlʋ a na kɩ dɩ ba tɩn yɩ a daarɩ a cɔgɩ-ba a ti. Amʋ mʋ yɩ ba Tu Baŋa-Wɛ dɩm. 45 A nan daa wʋ́ joori a guli ni-gonim dɩlʋ a na kɩ dɩ ba nabaara bam tɩn, yɩ a wǝli-ba. Amʋ dɛɛn jaanɩ ba nabaara bam kʋntʋ a ja nuŋi Ezipi nɩ sɩ a taa yɩ ba Tu Wɛ dɩm, yɩ dwi-gɛ tiinə bam zɩgɩ ba niə. Amʋ sɩɩnɩ a yɩ Baŋa-Wɛ dɩm mʋ.»
46 Baŋa-Wɛ dɛɛn zɩgɩ Sinayi piu kʋm yuu nɩ DƖ tɔgɩ Moyisi baŋa DƖ pa Yisɩrayɛlɩ tiinə bam DƖ niə yam, dɩ DƖ kwiə yam, dɩ DƖ cullu tɩm kʋntʋ mʋ, sɩ ba taa tɔga.