Nɔɔnʋ na wʋ́ kwe ni Baŋa-Wɛ tee nɩ tɩn
27
Baŋa-Wɛ daa ma ta dɩ Moyisi DƖ wɩ:2 «Ta dɩ Yisɩrayɛlɩ tiinə bam nɩ: Wʋlʋ na kwe o yɩra nɔɔnʋ sɩ o ma goni ni o pa Baŋa-Wɛ, kʋ tu wʋ́ wanɩ o ŋwɩ səbu sɩ kʋ ləri o nɔɔnʋ wʋm yuu nɩ. Nɔɔnʋ dɩ nɔɔnʋ kwǝrǝ na maŋɩ dɩ səbu-poŋo sɛkɛlɩ na yɩ cɩga cɩga tɩn mʋ tɩntʋ:
3 Baarʋ na maŋɩ dɩ bɩna fiinle sɩ kʋ yi bɩna fusɩrdʋ, sɩ á ŋwɩ səbu-poŋo səbu-dala fiinnu o ŋwaanɩ.
4 Kaanɩ nan na maŋɩ dɩ bɩna yam kʋntʋ, sɩ á ŋwɩ səbu-poŋo səbu-dala fiintɔ o ŋwaanɩ.
5 Bəkərə na maŋɩ dɩ bɩna yanu sɩ kʋ yi bɩna fiinle, sɩ á ŋwɩ səbu-poŋo səbu-dala fiinle o ŋwaanɩ.
Bɩsankana nan na maŋɩ dɩ bɩna yam kʋntʋ, sɩ á ŋwɩ səbu-poŋo səbu-dala fugə o ŋwaanɩ.
6 Bəkərə na maŋɩ dɩ cana dɩdʋa sɩ kʋ yi bɩna yanu, sɩ á ŋwɩ səbu-poŋo səbu-dala yanu o ŋwaanɩ.
Bɩsankana bɩna nan na maŋɩ dɩ bɩna yam kʋntʋ, sɩ á ŋwɩ səbu-poŋo səbu-dala yatɔ o ŋwaanɩ.
7 Baarʋ na kwɩn o yi bɩna fusɩrdʋ o daŋɩ, sɩ á ŋwɩ səbu-poŋo səbu-dala fugə-yanu o ŋwaanɩ.
Kaanɩ nan na maŋɩ dɩ bɩna yam kʋntʋ, sɩ á ŋwɩ səbu-poŋo səbu-dala fugə o ŋwaanɩ.
8 Nɔɔnʋ wʋlʋ na kɩ ni-gonim dɩm kʋntʋ, yɩ o ba jɩgɩ səbu kʋlʋ na maŋɩ dɩ ni dɩm tɩn, sɩ kʋ tu ja o nɔɔnʋ wʋm o yi kaanɩm tu te. Kaanɩm tu wʋm na nii nɔɔnʋ wʋm, o laan wʋ́ jeeli ni-gonim tu wʋm na wʋ́ ŋwɩ bagra sɩ kʋ maŋɩ dɩ o dam na waɩ te tɩn.
9 Wʋlʋ nan na kwe vara balʋ na maŋɩ dɩ kaanɩm tɩn sɩ o kɩ ni-gonim o pa Baŋa-Wɛ, vara bam kʋntʋ doŋ maama wʋ́ ji lanyɩranɩ fasɩ mʋ Baŋa-Wɛ ŋwaanɩ. 10 Cwǝŋǝ tǝrǝ sɩ kʋ tu kwe varɩ-gaa o ləri wʋdoŋ wʋm yuu nɩ. Kʋ na maŋɩ kʋ yɩ o kwe var-ŋʋm mʋ o ləri varɩ-nabwəm yuu nɩ, o daɩ sɩ o kɩ kʋntʋ. Wʋlʋ nan na kɩ kʋntʋ, vara bale bam maama wʋ́ ji Baŋa-Wɛ nyɩm mʋ. 11 Kʋ nan na yɩ varɩm wʋlʋ na wʋ maŋɩ dɩ kaanɩm o pa Baŋa-Wɛ tɩn mʋ kʋ tu lagɩ sɩ o ma o goni o ni dɩm, o nan wʋ́ ja varɩm wʋm o vu kaanɩm tu wʋm tee nɩ mʋ. 12 Kaanɩm tu wʋm na nii varɩm wʋm na jɩgɩ lam te tɩn, oó ta o brɩ nɔɔnʋ wʋm o na wʋ́ ŋwɩ bagra tɩn. O nan na tagɩ te, kʋ zɩgɩ kʋntʋ mʋ. 13 Varɩm wʋm tu nan na lagɩ sɩ o joori o yəgi o varɩm wʋm, sɩ o ŋwɩ varɩm wʋm səbu kʋm, yɩ o ta wǝli səbu kʋm pʋpwara dɩdʋa sɩnu maama wʋnɩ.
14 Nɔɔnʋ nan na kwe o sɔŋɔ sɩ o kɩ-kʋ Baŋa-Wɛ jɩŋa nɩ, kaanɩm tu mʋ wʋ́ yi da sɩ o nii kʋ duuni na maɩ te tɩn. Kaanɩm tu nan na brɩ kʋ səbu sɩ kʋ taa yɩ te, kʋ zɩgɩ kʋntʋ mʋ. 15 Sɔŋɔ kʋm tu nan na lagɩ sɩ o joori o yəgi-kʋ, sɩ o ŋwɩ kʋ səbu kʋm, yɩ o ta wǝli səbu kʋm pʋpwara dɩdʋa sɩnu maama wʋnɩ. O na kɩ kʋntʋ, sɔŋɔ kʋm wʋ́ joori kʋ taa yɩ o nyɩm.
16 Nɔɔnʋ wʋlʋ na fɔgɩ o nabaara tɩga wʋnɩ sɩ o kɩ-ka Baŋa-Wɛ jɩŋa nɩ, baá jeeli ka kwǝrǝ sɩ kʋ maŋɩ dɩ wo-dwə na wʋ́ maŋɩ te sɩ ba du ka wʋnɩ tɩn mʋ. Baá maŋɩ səbu-poŋo səbu-dala fiinnu mʋ mɩna ywəllu tɩtɔ maama ŋwaanɩ. 17 Kʋ na yɩ wǝǝnu yirim bɩnɩ dɩm wʋnɩ mʋ kʋ tu kwe tɩga kam o pa Baŋa-Wɛ, oó ŋwɩ ka səbu jeelim maama na yɩ te tɩn mʋ. 18 Sɩ kʋ na yɩ wǝǝnu yirim bɩnɩ dɩm kwaga nɩ mʋ o kwe-ka sɩ o pa Baŋa-Wɛ, baá jeeli ka səbu ni sɩ kʋ maŋɩ dɩ bɩna yagra ta na daarɩ sɩ wǝǝnu yirim bɩnɩ dɩlʋ na bɩɩnɩ tɩn laan yi mʋ. Kʋ tu bá ŋwɩ sɩ kʋ yi ka səbu kʋm maama. 19 Nɔɔnʋ wʋm na bʋŋɩ sɩ o joori o yəgi o tɩga kam, sɩ o ŋwɩ ka səbu kʋm, yɩ o ta wǝli səbu kʋm pʋpwara dɩdʋa sɩnu maama wʋnɩ. O na kɩ kʋntʋ, tɩga kam wʋ́ joori ka taa yɩ o nyɩm. 20 Kʋ tu nan na wʋ joori o yəgi-ka Baŋa-Wɛ tee nɩ, yɩ o na kwe-ka o yəgi o pa nɔɔnʋ wʋdoŋ, o daa ba jɩgɩ cwǝŋǝ sɩ o joori o yəgi-ka. 21 Wǝǝnu yirim bɩnɩ dɩm na kaagɩ dɩ yi, yɩ ba lagɩ ba kwe tɩga kam kʋntʋ ba pa, ka wʋ́ yɔɔrɩ ka ji lanyɩranɩ fasɩ mʋ Baŋa-Wɛ ŋwaanɩ. Ba maŋɩ sɩ ba pɔɔrɩ-ka ba pa Wɛ kaanɩm tiinə sɩ ba taa te-ka maŋa maama.
22 Nɔɔnʋ wʋlʋ nan na kwe tɩga kalʋ na daɩ o nabaara tɩga yɩ o tɩtɩ yəgi-ka nɔɔnʋ wʋdoŋ tee nɩ tɩn mʋ sɩ o kɩ-ka Baŋa-Wɛ jɩŋa nɩ, 23 kaanɩm tu wʋm mʋ wʋ́ jeeli ka səbu ni sɩ kʋ maŋɩ dɩ bɩna yagra ta na daarɩ sɩ wǝǝnu yirim bɩnɩ dɩm yi tɩn. Nɔɔnʋ wʋm laan maa wʋ́ ŋwɩ ka səbu kʋm dɛ dɩm kʋntʋ wʋnɩ nɔ́ɔ. Səbu kʋm kʋntʋ yɩ Baŋa-Wɛ nyɩm mʋ. 24 Wǝǝnu yirim bɩnɩ dɩm na yiǝ, sɩ nɔɔnʋ wʋm kwe tɩga kam kʋntʋ o joori o pa o na yəgi-ka wʋlʋ tee nɩ tɩn, sɩ wʋntʋ dwi dɩm taa te-ka.a
25 Səbu kʋm kʋntʋ maama duuni maŋɩ sɩ kʋ tɔgɩ jero-vwe dɩm maŋɩm cɩga cɩga mʋ. Sɛkɛlɩ dɩdʋa maa yɩ gɛra-dala kuni fiinle.
26 Nɔɔn-nɔɔnʋ ba maŋɩ sɩ o kwe wo-kwɩan kalʋ o varɩm na lʋgɩ tɩn o kɩ Baŋa-Wɛ jɩŋa nɩ, ka na maŋɩ ka yɩ Baŋa-Wɛ nyɩm tɩn ŋwaanɩ. Kʋ na yɩ á naanɩ dɩm wʋnɩ, naa á peeni sɩm wʋnɩ, naa á bʋnɩ dɩm wʋnɩ, tɩntʋ wo-kwɩn sɩlʋ maama na yɩ wo-bɛ tɩn yɩ Baŋa-Wɛ nyɩm mʋ. 27 Kʋ nan na yɩ vara balʋ na wʋ maŋɩ dɩ kaanɩm tɩn wʋnɩ wo-kwɩa, ka tu wʋm jɩgɩ cwǝŋǝ sɩ o joori o yəgi-ka. Oó ŋwɩ ka səbu kʋm yɩ o ta wǝli səbu kʋm pʋpwara dɩdʋa sɩnu maama wʋnɩ. Kʋ tu nan na wʋ joori o yəgi varɩm wʋm kʋntʋ, ba jɩgɩ cwǝŋǝ sɩ ba kwe‑o ba yəgi ba pa nɔn-gaa sɩ kʋ maŋɩ dɩ varɩm wʋm səbu na yɩ te tɩn.
28 Wʋlʋ nan na yɔɔrɩ o kwe o woŋo kʋlʋ maama o kɩ Baŋa-Wɛ jɩŋa nɩ, kʋ na yɩ o cʋrʋ, naa o varɩm, naa o nabaara tɩga mʋ, woŋo kʋm kʋntʋ yɔɔrɩ kʋ yɩ lanyɩranɩ fasɩ mʋ Baŋa-Wɛ ŋwaanɩ. Nɔɔnʋ wʋm daa ba jɩgɩ cwǝŋǝ sɩ o joori o yəgi-kʋ, naa o kwe-kʋ o yəgi o pa nɔn-gaa, kʋ na yɩ Wɛ nyɩm maŋa maama tɩn ŋwaanɩ.
29 Ba nan na pɔɔrɩ nabiinu wʋlʋ ba yɔɔrɩ ba kɩ Wɛ jɩŋa nɩ cɔgɩm ŋwaanɩ, cwǝŋǝ daa tǝrǝ sɩ ba joori ba yəgi kʋntʋ tu Baŋa-Wɛ tee nɩ. Ba maŋɩ sɩ ba gʋ-o mʋ.
30 Tɩga kam wʋdiu pɔɔrɩm fugə maama wʋnɩ pʋpwara dɩdʋa yɩ Baŋa-Wɛ nyɩm mʋ, nɩ kʋ na yɩ wʋdiiru, naa tiu biə dɩ. Abam nan wʋ́ pɔɔrɩ-kʋ sɩ kʋ taa yɩ lanyɩranɩ fasɩ Baŋa-Wɛ ŋwaanɩ.b 31 Nɔɔnʋ nan na bʋŋɩ sɩ o joori o yəgi wʋdiiru tɩntʋ tɩlʋ, sɩ o ŋwɩ tɩ səbu kʋm ni nɩ yɩ o ta wǝli səbu kʋm pʋpwara dɩdʋa sɩnu maama wʋnɩ. 32 Sɔŋɔ vara fugə maama wʋnɩ dɩdʋa yɩ lanyɩranɩ fasɩ mʋ Baŋa-Wɛ ŋwaanɩ. Nan jeeli-na á vara bam maama sɩ á lɩ wʋlʋ na yɩ fugə tu maama tɩn á pa Baŋa-Wɛ. 33 Abam ba maŋɩ sɩ á paalɩ á kuri á varɩ-ŋʋna dɩ á varɩ-balwaarʋ wʋnɩ, naa sɩ á ləri balʋ á na maŋɩ á lɩ tɩn yuu nɩ. Abam na kwe varɩm sɩ á ləri wʋdoŋ yuu nɩ á pa Baŋa-Wɛ, vara bale bam maama nan wʋ́ taa yɩ Baŋa-Wɛ nyɩm mʋ. Á ba jɩgɩ cwǝŋǝ sɩ á joori á yəgi-ba dɩ səbu.»
34 Baŋa-Wɛ dɛɛn zɩgɩ Sinayi piu kʋm yuu nɩ mʋ DƖ ta DƖ niə yam kʋntʋ DƖ brɩ Moyisi Yisɩrayɛlɩ tiinə bam ŋwaanɩ.