Wahyu 1

Wahyu

Wahyu yang Yesus Kristus se tunjung pa Yohanes

Yohanes dapa penglihatan

1 Kita ini Yohanes, tu orang yang ja beking tu Tuhan da suru. Tu surat ini pe isi tentang apa yang Tuhan Allah da se tunjung pa Yesus Kristus, trus Yesus Kristus se tunjung pa orang-orang yang ja beking tu Dia da suru supaya dorang bole tau apa tu so nyanda lama lei mo jadi. Kong Yesus suru tu Dia pe malaekat se tunjung tu samua itu pa kita. 2 Kita ini saksi dari tu samua yang kita da lia: kita se tau pa ngoni tentang tu Tuhan Allah pe firman deng lei tentang samua hal yang Yesus Kristus so se tunjung pa kita. 3 Orang yang da se baca tu kita da tulis tentang apa tu mo jadi nanti, deng tu orang-orang yang da badengar kong beking tu da tatulis itu, dorang itu yang paling snang, lantaran samua itu so nyanda lama lei mo jadi.

Yohanes pe salam for tuju jemaat di daera Asia

4  Ni surat dari Yohanes, for ngoni sudara-sudara di tuju jemaat yang ada di daera Asia. Kita minta pa Tuhan deng pa tu tuju roh yang di muka pa Tuhan pe tahta supaya kase tunjung tu bae pa ngoni deng beking ngoni hidop deng hati tenang. Tuhan itu yang so ada dari dulu, yang ada lei skarang deng tu mo datang ulang. 5  Kong kita minta lei supaya Yesus Kristus kase tunjung tu Dia pe bae pa ngoni deng beking ngoni hidop deng hati tenang. Dia itu tu Saksi yang setia. Dia yang pertama tu da hidop ulang dari antara orang mati, kong Dia itu yang berkuasa pa samua raja di bumi ini.

Dia sayang pa torang. Dia pe dara yang tacura waktu Dia mati se bebas torang dari dosa-dosa. 6  Dia beking torang jadi Dia pe rakyat pa De pe krajaan, deng Dia beking lei torang jadi imam-imam yang ja layani Tuhan Allah tu Dia pe Bapa. For Dia tu puji deng hormat, deng Dia yang berkuasa sampe slama-lamanya. Amin.

7  Tarukira jo bae-bae, nanti Dia mo datang di atas awan-awan, kong samua orang di dunia mo lia pa Dia sampe tu orang-orang yang dulu da cucu pa Dia deng tombak mo lia lei pa Dia. Samua suku bangsa di bumi mo manangis akang pa Dia. Itu samua mo jadi bagitu. Amin.

8  Tuhan Allah bilang bagini, “Kita ini, Alfa deng Omega, tu de pe arti yang pertama deng yang akhir. Kita so ada dari waktu samua blum ada, Kita ada skarang kong Kita lei mo datang ulang. Kita ini Yang Mahakuasa.”

Yohanes lia pa Anak Manusia pa de pe penglihatan

9 Kita Yohanes, tu ngoni pe sudara deng tamang karja yang sama-sama da dapa siksa lantaran ja iko pa Yesus. Torang sama-sama ja iko pa Tuhan yang berkuasa sbagai raja, torang batahang percaya pa Tuhan biar lei dapa siksa kong torang da batunggu Yesus mo datang ulang. Kong kita ini da dapa buang ka pulau Patmos lantaran kita da kase tau tu Tuhan Allah pe firman deng da kase tau apa tu Yesus da bilang. 10 Satu hari pas tu hari sombayang, Tuhan pe Roh da kuasai pa kita. Kong waktu itu kita dapa dengar suara yang pe kuat skali dari blakang pa kita. Tu suara itu pe babunyi sama deng trompet pe bunyi. 11 Tu suara itu babilang pa kita, “Tulis jo samua yang ngana mo lia ini di satu kitab, kong ngana kirim tu kitab itu pa tuju jemaat ini: jemaat di Efesus, Smirna, Pergamus, Tiatira, Sardis, Filadelfia deng di Laodikia.”

12 Pe dengar tu suara itu, kita batengo ka blakang for mo lia sapa tu da babicara pa kita. Serta kita batengo, kita dapa lia ada tuju tiang tu tampa ja taru akang pelita tu da beking dari mas. 13  Kong di tenga-tenga tu tampa taru pelita itu da badiri satu orang. Tu orang itu dapa lia sama deng Anak Manusia. Dia da pake juba yang de pe panjang sampe pa de pe kaki, kong Dia pe dada da lingkar akang deng ban dari mas. 14  Dia pe kapala deng Dia pe rambu pe warna puti sama deng domba pe bulu deng salju pe warna. Kong Dia pe mata manyala sama deng api pe manyala. 15  Dia pe kaki mangkilat sama deng tembaga yang da bakar di api. Dia pe suara babunyi kuat sama deng banjer basar pe bunyi. 16 Kong pa Dia pe tangan kanan da pegang tuju bintang, deng dari De pe mulu kaluar satu peda. Tu peda itu de pe dua sabla tajang. Dia pe muka basinar sama deng matahari pe sinar waktu siang.

17  Kong waktu kita lia pa Dia, kita rubu ka tana di muka pa Dia pe kaki, kita kurang sama jo deng tu orang mati. Mar Dia taru Dia pe tangan kanan di atas pa kita trus babilang, “Yohanes, ngana jang tako! Kita ini tu so ada dari pertama deng lei yang tetap mo ada sampe akhir jaman. 18 Kita ini yang da hidop! Kita so perna mati, mar lia skarang Kita so hidop ulang, kong Kita mo hidop sampe slama-lamanya. Kita ada kunci maut, itu de pe arti Kita ada kuasa for se hidop ulang tu orang yang so mati, deng Kita ada lei kunci krajaan maut, itu de pe arti Kita ada kuasa di tampa orang mati. 19 So itu ngana musti tulis samua tu ngana da lia, tu hal-hal yang da jadi skarang deng lei tu hal-hal yang nanti mo jadi. 20 Tu ngana da lia tadi itu de pe arti masi rahasia. Kong Kita mo se bilang tu rahasia itu pe arti bagini: tu tuju bintang yang Kita da pegang deng Kita pe tangan kanan, de pe arti tu Tuhan pe tuju malaekat yang jaga tu tuju jemaat. Kong tu tuju tiang tu tampa ja taru akang pelita yang da beking dari mas, de pe arti tu tuju jemaat.”