Wahyu 2

Anak Manusia pe pesan for jemaat di Efesus

1 Abis itu, tu Anak Manusia bilang pa kita, “Yohanes, tulis jo tu Kita mo bilang ini pa tu malaekat yang da jaga tu jemaat di Efesus. Ngana tulis bagini:

Ni pesan dari Kita tu Anak Manusia yang da pegang tuju bintang di tangan kanan deng bajalang di antara tu tuju tiang tampa ja taru akang pelita yang da beking dari mas. 2 Kita tau tu ngoni ja beking. Ngoni so karja kras beking tu Tuhan pe karja, deng lei ngoni tetap batahang percaya ja mangada tu siksa. Ngoni nyanda suka pa orang jaha. Ngoni lei so priksa bae-bae tu orang-orang yang bilang dong pe diri itu rasul tu Yesus pe utusan, mar sebenarnya dorang nyanda bagitu, ngoni da dapa memang dorang pangbadusta. 3 Kita lei tau kalu ngoni tetap batahang percaya biar lei dapa siksa deng ngoni lei mendrita lantaran percaya pa Kita, kong ngoni nyanda perna menyera. 4 Mar biar lei bagitu, Kita mo kritik pa ngoni: ngoni so nyanda basayang lei sama deng waktu ngoni baru percaya pa Kita. 5 So itu ngoni inga jo kalu skarang ngoni so laeng skali dari ngoni yang pertama. Jadi bertobat jo deng beking ulang apa yang ngoni beking dari pertama. Kalu ngoni nyanda bertobat, Kita mo datang pa ngoni kong mo hukum pa ngoni, itu sama deng Kita mo ambe tu ngoni pe tiang tu tampa ja taru akang pelita dari pa de pe tampa. 6 Mar ada yang bagus pa ngoni, ngoni binci tu Nikolaus pe orang-orang ja beking, kong Kita lei binci tu dorang ja beking itu.

7  Sapa ada talinga, lebe bae dia badengar jo apa tu Tuhan pe Roh da kase tau pa jemaat-jemaat, ‘Sapa yang menang dari tu kuasa jaha, Kita mo kase makang pa dia dari tu pohong kehidupan yang ada pa Tuhan Allah pe taman firdaus.’ ”

Anak Manusia pe pesan for jemaat di Smirna

8  Anak Manusia bilang lei, “Yohanes, tulis akang lei for malaekat yang da jaga tu jemaat di Smirna. Ngana tulis bagini:

Ini kata-kata dari Kita tu Yang Pertama deng Yang Akhir. Kita ini so perna mati mar so hidop ulang. 9 Kita tau ngoni pe hidop siksa deng lei miskin, mar sebenarnya ngoni itu kaya di mata Tuhan. Kita tau lei tu orang-orang Yahudi da fitna pa ngoni beking tu hal-hal besae. Tu orang-orang Yahudi itu mangaku kalu dorang Tuhan Allah pe orang yang Dia da pili, padahal dorang itu yang ja basemba pa setang pe bos. 10 Ngoni jang tako deng tu siksa yang ngoni musti mo rasa. Tarukira jo bae-bae, nanti bebrapa orang dari pa ngoni lantaran dorang pe percaya pa Kita mo dapa cobaan dari setang pe bos. Tu cobaan itu bagini, ngoni mo dapa maso ka bui kong dapa siksa di sana slama spulu hari. Mar biar lei ngoni dapa siksa sampe mo mati, ngoni musti tetap percaya pa Kita. Kalu ngoni tetap percaya, Kita mo kase pa ngoni tu hidop kekal, itu sama deng ngoni dapa mahkota tu tanda ngoni so menang.

11  Sapa ada talinga, lebe bae dia badengar jo apa tu Tuhan Allah pe Roh da kase tau pa jemaat-jemaat, ‘Sapa yang menang dari tu kuasa jaha, dia itu pasti nyanda mo trima tu hukuman di neraka, tu ja bilang mati kadua kali.’ ”

Anak Manusia pe pesan for jemaat di Pergamus

12 Anak Manusia bilang lei, “Yohanes, tulis akang lei for malaekat yang da jaga tu jemaat di Pergamus. Ngana tulis bagini:

Ini kata-kata dari Kita yang da pegang tu peda tajang dua sabla. 13 Kita tau ngoni da tinggal di Pergamus, tu tampa setang pe bos berkuasa. Mar biar lei bagitu, ngoni percaya trus pa Kita, ngoni nyanda manyangkal tu ngoni pe percaya pa Kita, biar lei waktu lalu ngoni da lia orang-orang da bunung pa Antipas tu Kita pe saksi yang setia. Dorang da bunung pa dia di Pergamus, tu tampa setang pe bos berkuasa. 14  Mar biar lei bagitu, Kita mo kritik pa ngoni dalam bebrapa hal: ada bebrapa orang dari antara pa ngoni ja iko Bileam pe ajaran. Bileam itu yang se ajar pa Balak for goda tu orang Israel for beking dosa. Lebe kusus Bileam se ajar pa dorang for makang tu makanan yang so kase for opo-opo, deng lei ja baseks bebas. 15  Bagitu lei ada dari antara pa ngoni yang ja iko tu ajaran dari Nikolaus pe orang-orang. 16 Jadi bertobat jo. Kalu ngoni nyanda bertobat, Kita mo iko datang pa ngoni kong Kita mo baprang deng tu orang-orang itu pake peda yang kaluar dari pa Kita pe mulu.

17  Sapa ada talinga, lebe bae badengar jo apa tu Tuhan pe Roh da kase tau pa jemaat-jemaat, ‘Sapa yang menang dari tu kuasa jaha, dia itu Kita mo kase akang manna yang da se sambunyi, deng Kita mo kase lei pa dia batu puti. Di atas tu batu itu da tulis akang tu da menang itu pe nama baru. Tu nama baru itu cuma tu yang mo trima tu batu puti itu yang tau, orang laeng nintau tu nama.’ ”

Anak Manusia pe pesan for jemaat di Tiatira

18 Anak Manusia bilang lei, “Yohanes, tulis akang lei for malaekat yang da jaga tu jemaat di Tiatira. Ngana tulis bagini:

Ini kata-kata dari Kita tu Anak Allah. Kita pe mata bamanyala-manyala sama deng api, deng Kita pe kaki mangkilat sama deng tembaga yang da bakar di api. 19 Kita tau samua tu ngoni so beking. Ngoni samua baku sayang, deng lei ngoni tetap percaya pa Kita. Kita tau bagimana ngoni ja layani orang deng ngoni tetap batahang percaya biar dapa siksa. Kita tau apa tu ngoni da beking skarang so lebe banya dari waktu ngoni baru percaya pa Kita. 20  Mar biar lei bagitu, Kita mo kritik pa ngoni: ngoni da se biar satu parampuang da mangajar pa Kita pe orang-orang yang ja beking tu Kita da suru. Dia mangajar kong pengaruhi pa dorang supaya dorang sambarang ja baseks deng makang tu makanan yang da kase persembahan for opo-opo. Tu parampuang itu de pe nama Izebel. Dia bilang de pe diri itu nabi tu orang yang ja kase tau Tuhan pe pesan pa orang-orang padahal nyanda. 21 Kita so kase waktu for tu parampuang itu bertobat, mar dia nimau bertobat dari sambarang ja baseks itu. 22 Ngoni tarukira jo bae-bae, Kita mo kase lempar tu parampuang itu ka koi, tu tampa for orang yang saki brat. Kong Kita mo beking mendrita skali tu orang-orang yang da baseks bebas deng dia. Mar kalu tu orang-orang itu bertobat, dorang nyanda mo mendrita. 23  Kita mo bunung tu parampuang itu pe anak-anak, tu orang-orang yang ja iko de pe ajaran. Deng bagitu samua jemaat mo tau kalu Kita ini yang tau apa tu manusia pe pikiran deng isi hati. Kita mo balas tiap orang iko apa tu masing-masing orang da beking. 24 Mar for ngoni tu orang-orang laeng di Tiatira yang nyanda iko tu ajaran dari Izebel, ngoni itu lei nyanda blajar tu hal-hal tentang setang pe bos, pa ngoni Kita bilang kalu kita nyanda mo tamba tugas laeng lei pa ngoni. 25 Mar tu ngoni musti pegang trus tu iman yang so ada pa ngoni sampe Kita datang ulang. 26  Sapa jo yang menang dari tu kuasa jaha deng ja beking tu Kita da suru sampe akhir jaman, pa dia itu Kita mo kase akang kuasa for baprenta pa suku-suku bangsa. 27 Kong dia mo baprenta deng kras pa dorang, itu sama deng dia baprenta pake tongkat besi. Dia mo kase ancor pa dorang sama deng barang dari tana liat yang da kase ancor. Tu kuasa yang dia trima, itu sama deng tu kuasa yang Kita da trima dari Kita pe Bapa. 28 Kong Kita mo kase lei pa dia tu bintang timur.

29 Sapa ada talinga, lebe bae dia badengar jo apa tu Tuhan pe Roh da kase tau pa jemaat-jemaat.”