Wahyu
Wahyu yang Yesus Kristus se tunjung pa Yohanes
Kata Pengantar
Ni kitab Wahyu ini Yohanes yang da tulis. Kitab ini de pe model surat, kong samua tu dia da tulis itu dari tu penglihatan yang dia da dapa. Tu de pe isi surat ini tentang apa yang Tuhan Allah da se tunjung pa Yesus Kristus, trus Yesus suru tu Dia pe malaekat se tunjung tu samua itu pa Yohanes (Why. 1:1), supaya lewat surat ini tu orang-orang tu ja iko pa Yesus mo dapa tau samua tu mo jadi nanti.
Tu tujuan yang paling utama da tulis ini supaya orang yang babaca ni surat de pe hati jadi kuat, tetap baharap deng percaya trus biar lei dorang dapa siksa. Ada tiga hal yang muncul pa Yohanes pe penglihatan: 1. Yang da berkuasa di bumi mo beking jaha pa orang-orang yang percaya sampe dorang mendrita kong mati; 2. Yesus Kristus itu Tuhan yang berkuasa, yang mo se kala samua tu da malawang pa Tuhan Allah; 3. Banya tu berkat yang Tuhan Allah da se siap for Dia pe umat yang setia deng dengar-dengaran pa Dia, lebe kusus tu orang-orang yang mati dapa bunung lantaran dorang da iko pa Tuhan. Ni surat da tulis waktu tu orang-orang percaya da dapa siksa lantaran dorang pe percaya pa Yesus. Waktu itu samua orang di bawa pemerenta Romawi dapa suru for semba pa raja paling tinggi di Roma. Kong ada tu orang-orang percaya yang da dapa bunung ato dapa se maso ka bui lantaran dorang nimau mo semba tu raja yang paling tinggi, dorang bilang kalu cuma Yesus yang jadi dorang pe Tuhan. Mar ada yang manyangkal tu dorang percaya lantaran dorang tako. Yohanes pe maksut da tulis ini supaya lewat dorang baca ni surat, itu bole se kuat tu dorang pe hati supaya dorang nyanda se tinggal tu dong pe percaya pa Yesus, kong tetap baharap deng tu Tuhan Allah pe janji. Kong tu gambaran-gambaran dari penglihatan di sini, tu orang-orang jaman itu tau skali. Mar di waktu skarang ini, tu samua gambaran itu so nyanda talalu jelas. Mar biar lei bagitu, tu pokok ajaran di surat ini jelas: di dunia ini tu orang-orang yang percaya pa Yesus pasti dapa siksa, mar jang sampe torang yang percaya se tinggal tu tong pe iman pa Yesus, lantaran nanti Tuhan Yesus mo se kala samua tu musu deng Dia mo baprenta for slama-lamanya (Why. 11:15), kong torang yang percaya mo sama-sama baprenta deng Dia.