Lama Yesu da luwa Ursalima
11
1 Taghwaŋ a həŋ ka ɓhadaghata da luwa Ursalima wu,
ka lab həŋ nda mista ghwá zaytuŋ,
ndusa nda sana luwaha ta hgu lu ka Beslaze nda Betani.
Ka ghunaftá *Yesu ta gwal his mataba duhwalha ni.
2 « Lawa la da na luwa ta kəma ghuni na.
Ka ɓhadagha ɓha kuni,
dzaʼa slanagha sla kuni ta zwaŋa kəɗih hbana lu ta kul walaŋta mndu ta laf tida.
Ka plata kuni,
ka kladaghata kuni.
3 Ka “ŋaw kuni ta tsa na” ka mndu ɗawaŋta da kaghuni katsi,
“Mgham ta kumay,”
ka kuni dazlay.
Gi dzaʼa zlaghunaŋ zla həŋ ŋa klaktá ghuni da hadna,
» kaʼa nda həŋ.
4 Ka sliʼaftá həŋ ka lab,
ka slanaghatá həŋ ta zwaŋa kəɗih ta hba mabli ta wa tgha ga mndu ndusa nda wa tvi,
ka platá həŋ.
5 Ka gwal ma tsa vli ya nda həŋ mantsa:
« Nu tsa ta mag kuni na?
Ta plə ŋaw kuni ta tsa zwaŋa kəɗih ya na?
» ka həŋ.
6 Ka zlghanaftá həŋ ta wa taŋ manda ya mnanaf Yesu ta həŋ.
Ka zlaŋtá lu ta həŋ,
ka laghu həŋ.
7 Ka klədanaghatá həŋ ta tsa zwaŋa kəɗih ya ta Yesu,
ka pghaftá həŋ ta lguta taŋ,
ka ŋladaftá Yesu nzafta tida.ª
8 Ka liŋtá mnduha ta zlazlatá lgutha taŋ ta tvi,
sləhwa fuha ŋa sanlaha ta ɓalakta ma vwahª ka pghay ŋa tsuʼay.
9 Mbaɗa gwal ta dzaʼa ta kəma Yesu nda gwal ta dzaʼa nda hula ni tani ka hla wi.
« Ŋa Lazglafta glaku!
Ka tfanagha tfa Lazglafta ta wi ta mndu ya ta sagha ma hga ni.
10 Ka tfanagha tfa Lazglafta ta wi ta ga mgham ta sagha,
ga mghama Dawuda ta nzakway ka da ŋni!
*Glaku ŋa Lazglafta ta luwa!
ª » ka həŋ.
11 Ka ɓhadaghatá Yesu da luwa Ursalima,
ka lam tsi da həga Lazglafta.
Tahula naghanatani ta inda skwiha,
ka sliʼaftá tsi ka vraghuta da Betani kawadaga nda duhwalha ni ghwaŋpəɗ his,
kabga nda ghada laghwa fitik.
Ksiʼafta Yesu ta fwa ghuraf
12 Ga mahtsima ni,
ta sab həŋ ma tsa luwa Betani ya ka vru da luwa Ursalima,
ka kuzlanaftá maya ta *Yesu.
13 Ka nghaŋtá tsi ta sana ghuraf manda a nda sləhwa tbukw tida.
Ka lab tsi nghanata,
ka dzaʼa slanaghar slanagha a wa yu ta zwaŋ tida kəʼa.
Lagha ni ta vata tsa fu ya,
kəʼa kəʼa ná,
sləhwa yeya tida,
kabga ta fitika yakwa ghuraf a wa.
14 Ka Yesu nda tsa ghuraf ya mantsa:
« Walglaŋta a mndu ta tsagatá yaku ta kagha ŋa zay wa,
» kaʼa.
Ta snay snay duhwalha ni.
Ghzlagaptá gwal dzawa skwi ma həga Lazglafta
15 Tahula tsa,
ka ɓhadaghatá həŋ da luwa Ursalima,
ka lam *Yesu da daɓa həga Lazglafta.
Ka slanaghatá tsi ta mnduha ta dzawa skwi nda sakwa skwi hada.
Ka liŋtá tsi ta ghəzligiŋtá həŋ dzibil,
ka zlambidiŋtá tsi ta tabəlha gwal ta mbəɗ,
nda vla nzakwa gwal ta dzawa ghərbuʼ tani.
16 Zlana a ta mndu dər turtuk ŋa tsughwaɗadapta nda ma tsa daɓa həga Lazglafta ya nda skwi wa.
17 Ka mnə tsi ŋa taŋ.
Kaʼa mantsa:
« Vinda a ma gwaɗa Lazglafta kazlay:
Həga ɗa ná,
dzaʼa nzakway ŋa həga maga duʼa mndəra mnduha demdem kəʼa ra?
Ama mbaɗa kaghuni ka niŋta ka galigha gwal gəndaª,
» kaʼa.
18 Manda snaŋta la mali ta ghəŋa gwal ta dra skwi ŋa Lazglafta,
nda gwal tagha zlahu ŋa mnduha ta tsa skwi ya,
ka zbə həŋ ta tvi ŋa dzatá Yesu.
Ama ta zləŋ həŋ guli,
kabga ksaŋ ksa tsa skwi ta tagh tsi ya ta hamata inda mnduha.
19 Manda dɗata fitik,
ka sab i Yesu nda duhwalha ni ma tsa luwa ya ka laghwa taŋ.
Maga duʼa kul haɗ dga ghəŋ
20 Ga sərɗək ta lab həŋ ta tvi ka vru da Ursalima,
kəʼa ka duhwalha *Yesu ná,
dzuŋuŋ nda ghwala tsa ghuraf ksiʼaf tsi ya kay,
nduk nda slrəŋha ni tani.
21 Ka havaktá *Piyer ta ghəŋa skwi ta luta.
« Maləma ɗa,
ngha ta ghwalata na ghuraf ksiʼaf ka na kay ɓa!
» kaʼa nda Yesu.
22 Ka Yesu nda duhwalha ni mantsa:
« Fafwa ghəŋa ghuni ta Lazglafta!
23 Kahwathwata ka yu ta mnaghunata,
dər ya ghwá ya mnə mndu kazlay:
Sliʼaf sliʼa ka vzamta ka ta vgha da drəf!
kaʼa nda tsi katsi,
ka dgaŋ a tsi ta ghəŋ ta ghəŋa ni wu,
faf fa ta ghəŋa ni ta skwi ya mna tsi ŋa magakwani katsi,
dzaʼa magana maga Lazglafta ta tsa skwi ya.
24 Tsaya ta kəl yu ka mnaghunata kazlay:
Inda skwi dzaʼa kuni ɗawaŋta nda maga duʼa ná,
fafwa fa ta ghəŋa ghuni tida manda skwi nda ghada mutsatani,
dzaʼa nghay kuni ta magata tsa skwi ya.
25 Ka ta maga duʼa kuni katsi,
ka wa ya kaʼa mamu dgun ma ŋuɗufa ghuni nda sana mndu katsi,
pliniswapla ta dmakwa tsa mndu ya,
kada plighunista Da ghuni Lazglafta ta luwa ta dmakuha kaghuni guli.
26 [Ama,
ka haɗ kaghuni ta plinistá dmakwa mndu wa katsi,
haɗ Da ghuni Lazglafta ta luwa dzaʼa plighunistá dmakwa kaghuni guli wa]ª » ka Yesu nda həŋ.
Ga mutsa Yesu ta glaku
27 Ta mbaɗa həŋ,
ka vrəgladaghatá həŋ da luwa Ursalima.
Ta wawakwa ni *Yesu ma həga Lazglafta,
ka sliʼadaghatá la mali ta ghəŋa gwal ta dra skwi ŋa Lazglafta,
nda gwal tagha zlahu ŋa mnduha,
nda la galata mndu guli slanaghata.
28 « Nda mbrakwa wa ta maga ka ta na skwiha na,
wa ta vlaghatá tvi ŋa magay?
» ka həŋ nda tsi.
29 « Iʼi guli,
ka ɗawaŋ ɗawa yu ta skwi turtuk da kaghuni,
ka zlghiɗif zlgha kaghuni ta wa ni katsi,
dzaʼa mnaghuna mna yu,
ka nda mbrakwa wa ta maga yu ta tsa skwiha ya,
» ka Yesu nda həŋ.
30 « Wya tsa ɗaway ɗa ya:
Lazglafta taghunafta Yuhwana maga batemª re,
ari mnduha a na?
Zlghiɗifwa zlgha ta wa ni,
» kaʼa nda həŋ.
31 Ka laghu həŋ zlərɗay mataba taŋ.
« Waká mu dzaʼa zlgha wa ni.
Ka Lazglafta ya taghunafta ka mu,
kabgawu kwal kuni kul zlghafta ɓa,
» kaʼa dzaʼazlay nda amu.
32 « Ka mnduha taghunafta » ka mu katsi,
lava a mantsa guli wu,
ka həŋ,
kabga nda sna mnduha ta Yuhwana kahwathwata kazlay:
Vərɗa anabi ya kəʼa.
Tsaya tama,
ta zləŋay həŋ ta skwi dzaʼa mag mnduha.
33 Mantsa tama:
« Sna a aŋni ta mndu ta ghunakta wu,
» ka həŋ.
Ka Yesu nda həŋ tama mantsa:
« Mantsa iʼi guli,
haɗ yu dzaʼa mnaghunata,
ka nda mbrakwa wa ta maga yu ta tsa skwiha ya wu,
» kaʼa.