Tagha skwi ta ghəŋa ghəzliŋtá marakw
10
1 Tahula tsa,
ka sliʼaftá i *Yesu nda duhwalha ni hada ka laghwi ta haɗika Zudiya nda təv drəfa *Yardeŋ.
Ka tskəgladaghatá mnduha ta vgha ta vata ni.
Ka nzəglatá tsi ka tagha skwi ŋa taŋ manda ya snu tsi.
2 Ka gavadaghatá la *Farisa ta vata Yesu ŋa hla səla ni.
Ka ɗawaŋtá həŋ da tsi,
ka həŋ mantsa:
« Mamu re haɗ wa a tvi ŋa ghəzliŋta mndu ta markwa taŋ na?
» ka həŋ.
3 Kaʼa nda həŋ mantsa:
« Waká Musa vindaghunafta na?
» kaʼa.
4 « Ka Musa ná,
ka ta kumay mndu ta ghəzliŋtá markwa taŋ katsi ná,
vindanafta ni ta ɗelewera ghəzlatá marakw,
ka ghəzliŋta niª kəʼa,
» ka həŋ.
5 Ka Yesu nda həŋ mantsa:
« Təŋata ghəŋa ghuni kəl Musa ka vindaghunaftá tsa gwaɗa zlahu ya mantsa.
6 Ama ma zlrafta ni,
manda kɗiŋta Lazglafta ta magaftá inda skwi,
“ka tsaftá tsi ta i zəʼal nda marakw.ª”
7 Tsaya dzaʼa kəl zgun ka zlaŋtá da ni nda ma ni,
ka ndiʼanavatá vgha ta markwa taŋ,
8 ŋa nzakwa tsa hahəŋ his ya ka sluʼuvgha turtukª.
Mantsa tama,
nzəgla a həŋ ka mnduha his wu,
ama ka sluʼuvgha turtuk nzakwa taŋ. »
9 Skwi ndiʼanaf Lazglafta ná,
yaha yaha mndu dganata,
kaʼa.
10 Manda vrakta taŋ,
ka lam həŋ nzata ma həga,
ka ɗawaŋtá duhwalha ni da tsi ta ghəŋa tsa gwaɗa ya.
11 Kaʼa nda həŋ mantsa:
« Ka ghəzliŋ ghəzla mndu ta markwa taŋ,
ka klaftá sana marakw katsi,
ta hliri tsa mndu ya,
magana maga tsa mndu ya ta ghwaɗaka skwi ta tsa taŋtaŋa markwa taŋ ya.
12 Mantsa guli,
ka sliʼaf sliʼa marakw ka laghu da wumatá sana zəʼal katsi,
ta hliri tsa marakw ya nda tsa. »
Hlakta mnduha ta zwani kwitikw kwitikw da Yesu
13 Mbaɗa mnduha ka va hlaktá zwani kwitikw kwitikw da *Yesu ŋa tfanaghatá wi ta həŋ,
nda ma fanaghata ni ta dzvu ta həŋ.
Ama ka ghəzlə duhwalha Yesu ta həŋ.
14 Ka nghə Yesu ta tsa skwi ta mag həŋ ya ná,
zɗəgana a wu,
ka kuzlanaftá tsi ta ŋuɗuf.
« Zlaŋwa zla ta zwani kwitikw kwitikw ka sagha həŋ da iʼi,
ma pyə kuni ta həŋ,
kabga ŋa gwal ta gara vgha nda həŋ na ga mghama Lazglaftaª.
15 Kahwathwata ka yu ta mnaghunata,
dər wati ma mndu dzaʼa gi kwal kul tsuʼaftá ga mghama Lazglafta manda zwaŋ kwitikw,
lamta a tsa mndu ya ɗekɗek wa,
» kaʼa nda həŋ.
16 Ka hlamtá tsi ta tsa zwani ya da ghuva ni,
ka pghanaghatá dzvu ta həŋ,
ka tfanaghatá wi ta həŋ.
I Yesu nda sana mnda gadghəl
17 Manda sliʼafta *Yesu ka mbaɗa ta tvi,
ka sliʼaftá sana mndu ka hwayakta tsəlɓata ma ghuva ni,
ka ɗaway da tsi:
« Ari ŋərma mgham,
nu dzaʼa mag yu ŋa mutsafta ɗa ta hafu ŋa kɗekedzeŋ na?
» kaʼa nda tsi.
18 Ka Yesu nda tsi mantsa:
« Kabgawu kəl ka ka hga iʼi ka ŋərma na?
Haɗ sana ŋərma taɓta Lazglafta wa.
19 Nda sna ka ta zlahuha ta mnay kazlay:
Yaha ka da dzatá mndu,
yaha ka da hliri,
yaha ka da ghali,
yaha ka da tsanavatá gwaɗa ta mndu,
yaha ka da nənɓa mndu,
ka vla ka ta glaku ŋa i da gha nda ma ghaª kəʼa,
» kaʼa.
20 « Mghama ɗa,
sna sna yu ta inda tsa skwiha ya daga ma ga zwaŋa ɗa,
» kaʼa nda tsi.
21 Tsəmesl,
ka Yesu nghanavatá tsa mndu ya,
ka ɗvutá tsi,
kaʼa nda tsi mantsa:
« Ta turtuk skwi ta pɗugudughusta.
La ka dzawapta ka ta inda skwa gha,
ka daganafta ka ta gwal ka pɗu,
mantsa dzaʼa mutsay ka ta gadghəl ta luwa.
Magata gha ta tsaya,
ka sagha ka,
ka dzaʼa ka mista ɗa,
» kaʼa nda tsi.
22 Na snaŋta tsa mndu ya ta tsa gwaɗa ya,
ka laghu tsi nda ɓasatá ŋuɗuf,
kabga gadghəl ya.
23 Ka waftá Yesu ta duhwalha ni ta wanafta.
« Kay!
Dzaʼa nda bla ka lama gwal gadghəl da ga mghama Lazglafta!
» kaʼa.
24 Ka ndərmim duhwalha ni nda ndərmima ta tsa gwaɗa ya.
Ka vrəgliŋtá Yesu ta mnay guli,
« Zwana ɗa,
nda bla ka lama gwal ta fafta ghəŋa taŋ ta gadghəl da ga mghama Lazglafta!
25 Ta dər laba ŋalibwa nda ta ghuruma lipir,
ka lama mnda gadghəl da ga mghama Lazglafta,
» kaʼa.
26 Ka va ndərmimgəlta duhwalha ni,
ka həŋ mataba taŋ mantsa:
« Ka si mantsa tsi katsi ná,
wa dzaʼa mutsafta mbaku tama?
» ka həŋ.
27 Ka nghanavatá Yesu ta həŋ,
kaʼa mantsa:
« Haɗ mndu dzaʼa laviŋtá mbanaftá ghəŋa ni wa,
ama laviŋ lava Lazglafta ta mbanaftá mndu,
kabga laviŋ lava ta maga inda skwi. »
28 « Aʼa!
Wana aŋni,
zlanava zla ŋni ta inda skwiha ŋni,
ka dzaʼa mista gha,
» ka *Piyer.
29 Ka Yesu mantsa:
« Kahwathwata ka yu ta mnaghunata,
haɗ mndu ta sliʼafta ka zlaŋtá hga ni,
nda zwana ma ni,
nda kwaghama ni,
nda ma ni,
nda da ni,
nda zwana ni,
nda haɗikha ni,
kabga iʼi nda ya kabga *Lfiɗa Gwaɗa Lazglafta,
30 dzaʼa kwal kul mutsafta fərta ta sgavaghatani daga ta na zamana mida mu na wa.
Dzaʼa mutsay ta həgaha,
nda zwana ma,
nda kwaghama,
nda mamaha,
nda zwani,
nda haɗikha tani,
ama dzaʼa ghuyay ta ɗaŋwa guli.
Ma zamana ta sagha guli,
ŋa mutsayni ta hafu ŋa kɗekedzeŋ da Lazglafta.
31 Nda ndəgha gwal si ta kəma,
dzaʼa nzakway nda hul.
Nda ndəgha gwal si nda hul guli,
dzaʼa nzakway ka gwal ta kəma,
» ka Yesu nda həŋ.
Mahkəna mnaŋta Yesu ta mtakwa ni nda sliʼagaptani
32 Ta mbaɗa həŋ ta tvi ŋa ŋlu ka dzaʼa da Ursalima,
ka lab *Yesu ta kəma taŋ.
Hlu hla zləŋ ta duhwalha ni,
nda gwal ta dzaʼa mista taŋ tani.
Ka tskəglanatá Yesu ta tsa duhwalha ni ghwaŋpəɗ his ya ta vata ni,
ka zlraftá tsi ta mnay ŋa taŋ ta skwi dzaʼa slanaghata.
33 « Snawa sna ɓa!
Wana mu ta dzaʼa da Ursalima.
Hada dzaʼa ksafta lu ta *Zwaŋa mndu,
ŋa vlaŋtá maliha ta ghəŋa gwal ta dra skwi ŋa Lazglafta,
nda gwal tagha zlahu ŋa mnduha,
ŋa tsanaghata taŋ ta guma ŋa dzata,
ŋa vlaŋta taŋ ta gwal kul nzakway ka la *Yahuda,
34 ŋa ganapta tsaha ya ta iri,
ŋa tafay taŋ ta sərɗək tida,
ŋa sləvay taŋ nda krupiha,
ŋa dzata taŋ,
ama baɗu mahkən,
ŋa sliʼagaptani nda hafu. »
Ɗawutá vla i Yakubu nda Yuhwana da Yesu
35 Tahula tsa,
ka gavadaghatá i Yakubu nda Yuhwana ta nzakway ka zwana Zebedi ta vata *Yesu.
« Mghama ɗa,
ta kumay ŋni ta magaŋnata gha ta skwi dzaʼa ɗawaŋta ŋni da kagha,
» ka həŋ nda tsi.
36 « Nahgani ta kum kuni ta magaghunata ɗa na?
» kaʼa nda həŋ.
37 « Baɗu lama gha da glakwa gha ya ná,
ka pghata ka ta aŋni,
sani nda ga zeghwa gha,
sani guli nda ga zlaɓa gha ná,
kiɓa,
» ka ŋni.
38 Ka Yesu zlghanaftá wa ni ta həŋ mantsa:
« Sna a kuni ta skwi ta ɗawə kuni wa.
Dzaʼa laviŋ lava kuni ta sa leghwa tsa ghuya ɗaŋwa dzaʼa yu say ya ra?
Ari dzaʼa tsuʼay kuni ta batema tsa ghuya ɗaŋwa dzaʼa ghuyɗipta lu ya?
» kaʼa nda həŋ.
39 « Aŋi,
dzaʼa laviŋ lava ŋni,
» ka həŋ.
Ka Yesu nda həŋ mantsa:
« Mantsa nzakwa ni,
dzaʼa say kuni ta leghwa ghuya ɗaŋwa dzaʼa yu say,
dzaʼa tsuʼay kuni ta batema tsa ghuya ɗaŋwa dzaʼa lu ghuyɗipta yaª.
40 Ama ta ghəŋa skwi ta nghanaŋtá tsa nzaku nda ga zeghwa ɗa nda ya nda ga zlaɓa ɗa ya ná,
nghiɗigha a tsaya wa.
Nda nza tsa vliha ya ka ŋa gwal payanaf Lazglafta ta həŋ,
» kaʼa nda həŋ.
41 Na snaŋta tsa pɗakwa duhwalha ghwaŋ ya ta tsa gwaɗa ya,
ka ɓasanavata həŋ ta ŋuɗuf ta i Yakubu nda Yuhwana.
42 « Saghawa sa,
» ka Yesu nda həŋ.
« Nda sna kuni ta gwal ta nghə lu manda mghamha ta ghəŋa mndəra mnduha ná,
ta gay həŋ ta mamgham mghama taŋ.
Gwal kulaŋ lu guli,
ta maray hahəŋ ta mbrakwa taŋ ta ghəŋa taŋ.
43 Ama mantsa a nzakwa ni mataba kaghuni wa.
Ka ta kumay mndu ta nzaku ka mali mataba ghuni katsi,
ka nzata tsi ka kwalva ghuni.
44 Ka ta kumay mndu mataba ghuni ta nzaku ta kəma katsi,
ka nzata tsi ka kwalva inda mnduha.
45 Wya tsi,
sa a *Zwaŋa mndu kabga ŋa maganata lu ta slna wa,
ama ŋa nzaku ka kwalva mnduha,
vlaha ta hafa ni ŋa vara ndəghata mnduha guli,
ª » ka Yesu zlghanaftá wa ni ta həŋ.
Gunanata Yesu ta ira Bartime
46 Ka ɓhadaghatá həŋ da luwa Yeriku.
Ta sab i *Yesu nda duhwalha ni,
nda tskata sanlaha ma mnduha ma tsa luwa ya,
mamu sana ghulpa ta mndu ta nzaku ta wa tvi ka gatá skwi.
Bartime hga tsa mndu ya,
ta nzakway ka zwaŋa Time.
47 Manda snaŋta ni kazlay:
Yesu zwaŋa la Nazaret ya ta sagha kaʼa,
ka dzatá tsi ta lawlaw,
kaʼa mantsa:
« Yesu zwaŋa Dawuda,
tawa ta hiɗahiɗa ta iʼi,
» kaʼa.
48 Mbaɗa mnduha ka ŋurhway.
« Ma gwaɗaf ka,
» ka həŋ.
Ama ka sganaghatá tsi ta dza lawlaw ka ŋɗaŋɗa:
« Zwaŋa Dawuda,
tawa ta hiɗahiɗa ta iʼi,
» kaʼa.
49 Ka sladata Yesu,
kaʼa mantsa:
« Hgagaghawa hga,
» kaʼa.
Ka hgaktá həŋ ta tsa ghulpa ta mndu ya.
Ka həŋ nda tsi mantsa:
« Ŋava ŋa ka sliʼafta ka,
wya ta hga kagha,
» ka həŋ.
50 Ka slurtidiŋtá tsa ghulpa ta mndu ya ta lguta ni,
ka valavata ka lab nda təv Yesu.
51 Ka ɗawaŋtá Yesu da tsi.
Kaʼa mantsa:
« Nu ta kum ka ta magaghata ɗa na?
» kaʼa.
« Maləma ɗa,
ka nghəglaŋta yu ta vli,
» kaʼa.
52 « La,
nda mba ka,
kabga zlghafta gha ta iʼi nda ŋuɗufa gha,
» kaʼa nda tsi.
Ka gi nghəglaŋtá tsa mndu ya ta vli,
ka ksə tsi ta tvi ka dzaʼa mista Yesu.