Tagha skwi ta ghəŋa ghəzla marakw
19
1 Manda kɗiŋta *Yesu ta tsa gwaɗa ya,
ka sliʼaftá tsi ta haɗika Galili ka laghwi ta haɗika Zudiya ta ɓla ghwa *Yardeŋ.
2 Ka sliʼafta dəmga rutut mista ni.
Ka mbambə tsi ta mnduha.
3 Ka gavadaghatá la *Farisa da tsi,
kabga ta kumay həŋ ta tsanamtá matsavaɗa.
Ka həŋ nda tsi mantsa:
« Laviŋ lava mndu ta ghəzliŋtá markwa taŋ,
ka maga maga tsi ta dər wati ma skwi tsi ra?
» ka həŋ.
4 Ka Yesu nda həŋ mantsa:
« Ta dzaŋa a kuni ta skwi ya nda vinda ma defteri nda ghuɓa ra?
“Ma zlrafta inda skwi ná,
zlagigiŋ zlaga Lazglafta ta i zgun nda marakwª.”
5 Ka Lazglafta mantsa:
“Tsaya dzaʼa kəl zgun ka zlaŋtá i da ni nda ma ni,
ka laghu da ndiʼaftá vgha nda markwa taŋ,
ŋa nzakway tsa hahəŋ his ya ka mndu turtukª.”
Mantsa ya tama,
6 nzəgla a həŋ ka mnduha his wa,
ama ka mndu turtuk nzakwa taŋ.
Yaha mndu tama da dganatá skwi ya ndiʼanaf Lazglafta,
» kaʼa.
7 Ka la Farisa nda tsi mantsa:
« Kabgawu tama kəl Musa ka mnay kazlay:
Ka ta ghəzlay mndu ta markwa taŋ katsi ná,
vindanafta ni ta ɗelewera ghəzlatá marakw ª kəʼa ɓa?
» ka həŋ nda tsi.
8 Ka Yesu nda həŋ mantsa:
« Təŋata ghəŋa ghuni kəl Musa ka vlaghunatá tva ghəzliŋtá marakw.
Ma zlrafta ni ná,
mantsa ya a nzakwa ni wa.
9 Ama ka iʼi ta mnaghunata ná,
yaha mndu walaŋtá ghəzliŋtá markwa taŋ,
ka ta ghəŋa hliriª a tsi.
Nzakwa ni ná,
ka ghəzliŋ ghəzla mndu ta markwa taŋ,
ka klafta ni ta sani katsi ná,
ta hliri tsa mndu ya nda tsa. »
10 Ka duhwalha ni nda Yesu mantsa:
« Ka si mantsa ya ta magakwa skwi mataba i marakw nda zəʼal katsi ná,
dər kwal kul klay,
» ka həŋ.
11 Ka Yesu nda həŋ mantsa:
« Inda mndu a dzaʼa laviŋtá ŋaftá tsa gwaɗa ya wa,
ba gwal ya vlaŋ Lazglafta ta mbrakwa ŋafta kasiʼi,
12 kabga mamu gwal ya yaga lu ka kuɓitik,
mamu gwal ya pslaf mnduha nda psla,
mamu gwal ta kwalaghutá klay,
kabga gwaɗa ta ga mghama Lazglafta guli.
Mndu ya dzaʼa laviŋtá ŋaftá tsa gwaɗa ya,
ka ŋa tsi,
» kaʼa.
Fanaghata Yesu ta dzvu ta ghəŋa zwani
13 Tahula tsa,
ka hladaghatá mnduha ta zwani kwitikw kwitikw da *Yesu,
ŋa fanaghata ni ta dzvu ta həŋ ka maga duʼa ta ghəŋa taŋ.
Ama ka pyə duhwalha Yesu ta mnduha.
14 Ka Yesu nda tsa duhwalha ya mantsa:
« Zlaŋwa zla ta zwani ka sagha həŋ da iʼi,
ma pyə kuni ta həŋ,
kabga ŋa gwal ta gara vgha nda hahəŋª na ga mghama Lazglafta,
» kaʼa.
15 Ka fafanaghatá Yesu ta dzvu ta ghəŋa tsa zwani ya.
Tahula tsa,
ka sliʼaftá tsi ma tsa vli ya,
ka laghu.
Sana duhwal ka gadghəl
16 Va gi ka lagha sana mndu da *Yesu,
kaʼa mantsa:
« Maləma ɗa,
nahgani skwi dzaʼa yu magata ɗina,
ŋa nzakwa ɗa nda hafu ŋa kɗekedzeŋ kawadaga nda Lazglafta na?
» kaʼa.
17 Ka Yesu nda tsi mantsa:
« Kabgawu kəl ka ka ɗawihata ta ghəŋa ŋərma skwi na?
Turtuktuk ŋərmata nzakway ka Lazglafta.
Ka ta kumay ka ta nzakwa gha nda hafu ŋa kɗekedzeŋ kawadaga nda Lazglafta katsi ná,
snata gha ta zlahuha ni,
» kaʼa.
18 « Wati zlahuha ya na?
» Ka tsa mndu ya.
Ka Yesu mantsa:
« Yaha ka da dzatá mndu,
yaha ka da hliri,
yaha ka da ghali,
yaha ka da tsanavatá gwaɗa ta mndu,
19 vla ta glaku ŋa i da gha nda ma gha,
ɗvu ɗva ta mnda səla manda va ghəŋa ghaª,
» kaʼa.
20 Ka tsa duhwal ya nda tsi mantsa:
« Sna sna yu ta inda tsaha ya demdem,
nu ta pɗakwa ni ŋa magəgəlta ɗa na?
» kaʼa.
21 Ka Yesu nda tsi mantsa:
« Ka ta kumay ka ta nzakwa gha hemª katsi ná,
la ka dzawiŋta ka ta inda skwa gha,
ka daganafta ka ta tseda ni ta gwal ka pɗu.
Dzaʼa mutsay ka ta gadghəl ta luwa,
tahula tsa ka sagha ka,
ka dzaʼa ka mista ɗa,
» kaʼa.
22 Na snaŋta tsa duhwal ya ta tsa gwaɗa ya,
ka ɓasaftá tsi ta ŋuɗuf ka sliʼafta ka laghu,
kabga gadghəl ya.
23 Ka Yesu nda duhwalha ni mantsa:
« Kahwathwata ka yu ta mnaghunata,
nda bla katakata ka lama mndu ta fafta ghəŋa ni ta gadghəl da ga mghama Lazglafta.
24 Ka yu ta vrəgliŋtá mnaghunata na:
Ta dər laba ŋalibwa nda ta ghuruma lipir,
ka lama mndu ta faftá ghəŋa ni ta gadghəl da ga mghama Lazglafta,
» kaʼa.
25 Na snaŋta duhwalha ni ta tsa gwaɗa ya,
ka ndərauʼ həŋ katakata,
ka həŋ mantsa:
« Ka si mantsa tsi,
wa dzaʼa laviŋta mutsaftá mbaku tama?
» ka həŋ.
26 Ka nghanavatá Yesu ta həŋ,
kaʼa mantsa:
« Skwi nda bla da mnduha ya ná,
bla a da Lazglafta wa,
» kaʼa.
27 Gi tsauʼ ka piyer tsuʼaghutá gwaɗa,
kaʼa nda Yesu mantsa:
« Aʼa!
Ya wana aŋni,
zlanava zla aŋni ta inda skwi,
ka dzaʼa mista gha ya ní,
kinawu kəʼa dzaʼa magaku nda aŋni tama?
» kaʼa.
28 Ka Yesu nda həŋ mantsa:
« Kahwathwata ka yu ta mnaghunata,
ma mbəɗavaftaª inda skwi dzaʼazlay ná,
dzaʼa nzafta ta dughurukwa glakwa ni na Zwaŋa mndu.
Kaghuni gwal ta dzaʼa mista ɗa ya guli,
dzaʼa nzanzafta ta dughurukha ghwaŋpəɗ his kaghuni,
ŋa tsa guma ta ghəŋa mndəra la Israʼila ghwaŋpəɗ his guli.
29 Dər wati ma mndu ta zlanavatá həga ni,
ka zwana ma ni a tsi,
ka kwaghama ni a tsi,
ka da ni a tsi,
ka ma ni a tsi,
ka zwana ni a tsi,
ka vwaha ni a tsi,
ta ghəŋa gwaɗa ta iʼi ná,
dzaʼa mutsay həŋ ta dərməkata ni,
ka malaghuta a tsi,
ŋa mutsay taŋ ta hafu ŋa kɗekedzeŋ guli ta ghəŋa ni.
30 Ama nda ndəgha gwal ta nzakway taŋtaŋ,
dzaʼa nzakway nda hul.
Nda ndəgha gwal ta nzakway nda hul guli,
dzaʼa nzakway taŋtaŋ,
» kaʼa.