Markus 1

Gwaɗa ta sabi da

Markus

Slna Yuhwana mnda maga batem

Mat 3:1-12, Luk 3:1-18, Yuh 1:19-28

1 Zlrafta *Lfiɗa Gwaɗa ta ghəŋa *Yesu *Kristi Zwaŋa Lazglafta. 2 Nda nza manda ya nda vinda ta ghəŋa ni ma deftera anabi Isaya kazlay:

Iʼi Lazglafta, wana yu ta tiŋlaghutá ghunaftá mndu ka kagha karaku, ŋa dzaʼa faɗaghatá tvi. 3 Lwa tsa mndu ya ta snu lu ta hagaku ma mtak kazlay: Payanawa paya ta tvi ŋa Mgham ka leleʼanata kuni kəʼa.

4 Mantsa tama, ka zlagaptá Yuhwana, mnda maga Batem ma mtak, kaʼa mantsa: « Mbəɗanafwa mbəɗa ta nzakwa ghuni, ka magaghunafta lu ta batem, ka plighunista Lazglafta ta dmakuha ghuni, » kaʼa. 5 Ka sliʼaktá inda gwal ma luwa Ursalima, nduk nda inda hamata gwal ta haɗika Zudiya, ka lagha slanaghatá Yuhwana. Ka manigiŋtá həŋ ta dmakuha taŋ, ka maganaftá Yuhwana ta batem ta həŋ ma imi ma ghwa ta hgu lu ka *Yardeŋ. 6 Tsa Yuhwana ya ná, gatá swida ŋalibwa ta kəl tsi ta vgha nda hbatá ɓanava huta misti. Hiʼi nda zuɗuma mtak skwa zay ni. 7 Wya kəʼa ta mnay guli: « Mamu sana mndu ta sagha nda hula ɗa, mal ŋa ni mbraku ka ŋa ɗa, slaf a iʼi ɗekɗek dər ŋa ɓukwadata ka plaptá zuʼa ɓaɓah ma səla ni wa. 8 Iʼi ná, magaghunaftá batem nda imi ŋa ɗa. Tsatsi, nda Sulkum nda ghuɓa dzaʼa magaghunafta tsi. »

Maganaftá batem ta Yesu ma imi

Mat 3:13–4:11, Luk 3:21-22, 4:1-13

9 Ma tsa fitik ya, ka sliʼaftá *Yesu ma luwa Nazaret ta haɗika Galili ka lagha slanaghatá Yuhwana. Ka maganaftá Yuhwana ta batem ta Yesu ma ghwa *Yardeŋ. 10 Ta sab Yesu ma imi manda kɗaku ta maganaftá, ka nghadaftá tsi ta luwa, gi ka nghaŋtá tsi ta gunatá luwa buwaŋ, ka saha Sulkum nda ghuɓa manda ghərbuʼ ta ghəŋa ni. 11 Ka gi snaku lwa Lazglafta daga ta luwa kazlay: « Kagha zwaŋa ɗa ta ɗvu yu, ma hya hya ŋuɗufa ɗa, » kaʼa.

Dzəghaŋta halaway ta Yesu ma mtak

12 Tahula tsa, ka gi tiŋwaghatá Sulkum nda ghuɓa ta *Yesu da mtak. 13 Ka zatá tsi ta fitik fwaɗ mbsak hada ta dzəghay dzəghay halaway. Ma tsa mtak ya, mataba nimtak ta nzakwa tsi, ta katay katay duhwalha Lazglafta.

Taŋtaŋa hgay Yesu ta duhwalha ni

Mat 4:12-22, Luk 4:14-15, 5:1-11

14 Ma sana fitik, ka ksaghatá lu ta Yuhwana tsamta ma gamak, ka sliʼaftá Yesu ka laghwi ta haɗika Galili da mna Lfiɗa Gwaɗa Lazglafta. 15 Kaʼa ta mnay mantsa: « Nda maga fitik, ndusa ga mghama Lazglafta, mbəɗanafwa nzakwa ghuni, ka zlghafta kuni ta *Lfiɗa Gwaɗa, » kaʼa. 16 Ta lab tsi nda ta wa drəfa Galili, ka nghaŋtá tsi ta i Simuŋ nda zwaŋama ni Andre ta wɗa kadəŋa taŋ da drəf ŋa tuma klipi, kabga tuma klipi slna taŋ. 17 Ka *Yesu nda həŋ mantsa: « Saghawa sa, mbaɗwa mista ɗa, dzaʼa naghunaf na yu ka gwal hlaktá mnduha, » kaʼa. 18 Gi sɗak zlanava zla həŋ ta kadəŋa taŋ, ka laghu mista ni. 19 Manda zadapta taŋ dawʼ, ka lagha həŋ slanaghatá zwana Zebedi, i Yakubu nda zwaŋama ni Yuhwana ta paya kadəŋa taŋ guli ma kwambalu. 20 Ka hgaftá tsi ta həŋ, « mbaɗwa mista ɗa, » kaʼa. Ka gi sliʼaftá tsaha ya guli ka laghu mista ni, ka zlanavatá da taŋ Zebedi ma kwambalu kawadaga nda gwal ksanatá slna ta həŋ.

Ghzligiŋtá Yesu ta ghwaɗaka sulkum ma sana mndu

Luk 4:31-37

21 Tahula tsa, ka ɓhadaghatá həŋ da luwa Kafarnahum. Na gi sagha Sabat, ka lam *Yesu da həga tagha skwa la *Yahuda, ka taghə tsi ta skwi ŋa mnduha ma tsa həga ya. 22 Ka ndərmim həŋ nda ndərmima ta tsa tagha skwa ni ya, kabga nda sgit ma tsa ŋa ni tagha skwi ya. Nza a manda ŋa gwal tagha zlaha Musa ŋa mnduha wa. 23 Ka gi zlagaptá sana mndu ksu ghwaɗaka sulkum mataba taŋ ta lami da tsa həga tagha skwa taŋ ya. Ka sliʼaftá tsi nda lili, kaʼa mantsa: 24 « Yesu zwaŋa la Nazaret, nu gwaɗa gha nda aŋni, sagha ka da zaɗa aŋni? Wya nda sna ŋni kazlay: Mndu nda ghuɓa daga da Lazglafta kagha kəʼa na? » kaʼa. 25 « Haf wa gha! Sab sa ma na mndu na, » ka Yesu dvanaghata. 26 Lagha tsa ghwaɗaka sulkuma ya ka ghudzanaftá tsa mndu ya katakata, ka lilatá tsi, ka saghu tsi mida. 27 Ka tsutá ŋuɗufa mnduha demdem ma tsa vli ya, ha ka ɗaɗawu həŋ mataba taŋ, ka həŋ mantsa: « Nu mndərga nana ma skwi? Aa! lfiɗa skwi ta zlagaptá mndərga nana! Na dvanaghatani ta dər halaway tsi ná, ta snana sna həŋ, » ka həŋ. 28 Ka tutá gwaɗa ta ghəŋa Yesu wdiɗ ta haɗika Galili.

Mbanafta Yesu ta midza Simuŋ

Mat 8:14-17, Luk 4:38-41

29 Tahula sliʼagabta taŋ ma tsa həga tagha skwa la *Yahuda ya, ka gwaghatá həŋ ta vgha nda i Yakubu nda Yuhwana da i Simuŋ nda Andre. 30 Tata lam nda la həŋ da həga, ka gi mnə lu ŋa *Yesu ta gwaɗa ta midza Simuŋ ta hani ta ɓasa ŋuɗidar. 31 Ka gavadaghatá Yesu ta vata ni ka ŋanata ta dzvu, ka sliʼanafta. Na tsa gi sliʼanaftani ya, gi kwandlaŋ mbatani tsa. Ka sliʼaftá tsa marakw ya maganatá skwa zay ta həŋ.

Mbambanafta Yesu ta gwal kul ɗughwanaku

Luk 4:42-44

32 Tahula dɗata fitik baɗu va tsaya, ka hladaghatá lu ta inda gwal kul ɗughwanaku da *Yesu, kulam nda gwal ta tsuta ka halaway tani. 33 Ka tskavatá inda mnduha ma luwa ŋərɓisl ta wa tgha tsa həga ya. 34 Ka mbambanaftá Yesu ta ndəghata mnduha ma ɗaŋwaha taŋ kavghakavgha, ghazligiŋha ta ndəghata duhwalha halaway guli ma mnduha. Vlaŋ a ta tvi ta tsa duhwalha halaway ya ŋa gwaɗa guli wu, kabga nda sna hahəŋ guli ta nzakwa Yesu.

Sliʼapta Yesu ma luwa Kafarnahum

35 Na tsaɗakwa vli ta tsughbura sərɗək, ka sliʼaftá *Yesu, ka laghu da mtak. Ka ndəɓu tsi ta dzvu hada. 36 Ka sliʼaftá i Simuŋ nda sanlaha ma mnduha ka laghu da naghay. 37 Ka nagh həŋ, ka slaftá həŋ tida. « Ta paha kagha inda mnduha, » ka həŋ nda tsi. 38 « Mbaɗma da sana vliha ndusa ndusa, ka dzaʼa yu mnanaŋtá gwaɗa Lazglafta ta tsaha ya guli, kabga tsaya kəl yu ka sagha, » kaʼa nda həŋ. 39 Ka laghu tsi da mna gwaɗa Lazglafta ma həgaha tagha skwa la *Yahuda ta inda haɗika Galili, ghazligiŋha ta duhwalha halaway ma mnduha.

Mbanafta Yesu ta sana mndu nda rɗa mndu tida

Mat 8:1-4, Luk 5:12-16

40 Ma sana fitik, ka lagha sana mndu nda rɗa mndu tida tsəlɓata ta kəma *Yesu. Kaʼa mantsa: « Nda zɗakatahuɗa gha, laviŋ lava ka ta mbiɗifta, » kaʼa. 41 Ka ksaŋtá tsi ta Yesu ka hiɗahiɗa. Ka kapaŋtá tsi ta dzva ni ka ksaŋta. « Ta kumay yu, mbafmba gha, » kaʼa nda tsi. 42 Gi hada hada, hlets mbatani tsa, kləwəɗ vgha ni. 43 « La tama, » ka Yesu vriŋta. 44 Kaʼa nda tsi guli mantsa: « Yaha yaha ka da walaŋta mnanaŋtá mndu, ka dzaʼa ka da maranaŋtá vgha gha ta mnda dra skwi ŋa Lazglafta. Ka plata ka ta ghəŋ manda ya vindaf Musa, ŋa maraŋtá ghuɓatá kagha, ka da grafta mnduha ta mbatá kagha, » kaʼa. 45 Ama ka sliʼaftá tsatsi, ka laghu tay ma luwa, ka tutá tsi wdiɗ. Kabga tsa, ka pyaftá tsa gwaɗa ya ta Yesu ka lam da luwa baŋluwa. Ama ka nzaghutá tsi ta wa mazawa. Kulam nda tsa, ka sliʼadaghatá mnduha dər ndiga ndiga da slanaghata hada.