Dzəghaŋta halaway ta Yesu
4
1 Ta vragaptá *Yesu ma ghwa *Yardeŋ,
nda ndəgha nda Sulkum nda ghuɓa.
Ka wawu tsa Sulkum ya ma mtak,
2 fitik fwaɗ mbsak zaŋ a ta skwa zay wa.
Ka dzəghaŋtá halaway.
Tahula luta tsa fitikha ya,
ka kuzlanaftá maya.
3 Ka halaway nda tsi mantsa:
« Ka Zwaŋa Lazglafta ka katsi,
mnana mna ta na pala na,
ka navapta tsi ka buradi,
» kaʼa.
4 Ka Yesu mantsa:
« Nda vinda ma deftera Lazglafta kazlay:
Nda skwa zay kweŋkweŋ yeya a ta nzata mndu nda hafu wu kəʼa,
» ka Yesu.ª
5 Ka kladaftá halaway ta Yesu ta wa lilwa,
ka gi maranatá tsi ta inda za mgham ma ghəŋa haɗik.
6 Kaʼa nda tsi mantsa:
« Dzaʼa vlagha vla yu ta inda na mbraku nda glaku ma na ghəŋa haɗik na,
kabga klaf kla lu ka vlihata ma dzva ɗa.
Laviŋ lava yu ta vlaŋtá mndu ya ta ɗvu yu guli.
7 Ka tsəlɓa tsəlɓa ka ma ghuva ɗa,
ta vlagha vla yu,
» kaʼa.
8 Ka Yesu nda tsi mantsa:
« Nda vinda ma deftera Lazglafta kazlay:
ma ghuva Mgham Lazglafta gha dzaʼa tsəlɓa ka ta tsəlɓu,
ka maganatá slna ni turtukwa niª,
» kaʼa.
9 Ka kləglaghatá halaway ta Yesu da Ursalima,
ka kladafta ta bɗəma həga Lazglafta ka sladanata.
Kaʼa nda tsi mantsa:
« Ka si Zwaŋa Lazglafta ka katsi,
vzada vgha gha hadna,
kabga nda vinda ma deftera Lazglafta kazlay:
10 Dzaʼa mnana mna ta duhwalha ni ta luwa ŋa nghapta ka kagha kəʼa.
11 Kaʼa guli na:
“Ŋa tsuʼafta taŋ ta kagha ma dzva taŋ,
yagha pala da dzughusta ta səla” » kaʼaª.
12 Ka Yesu nda tsi guli mantsa:
« Nda vinda ma deftera Lazglafta kazlay:
ma dzəghə ka ta Mgham Lazglaftaª gha ɗekɗek kəʼa,
» kaʼa.
13 Kɗakwa halaway ta dzəghaŋta nda inda tsa skwiha kavghakavgha ya,
ka zlanavatá tsi ka laghu ŋa baɗu ma sani guli.
Kwalaghutá Yesu ma Nazaret
14 Ta sliʼaftá *Yesu ka laghwi ta haɗika Galili nda ndəgha nda mbrakwa Sulkum nda ghuɓa.
Ka tutá hga ni ma inda vli ta wanaftá tsa vli ya.
15 Ka tataghə tsi ta skwi ma həga tagha skwa la *Yahuda,
ka ghubu mnduha.
Zlrafta Yesu ta slna ni ma Galili
16 Ka sliʼaftá tsi ka laghu da Nazaret,
luwa ta glakwa ni.
Ka lam tsi da həga tagha skwa la *Yahuda baɗu Sabatª manda ya snu tsi.
Ka sliʼaftá tsi ŋa dzaŋaftá skwi ma defteri.
17 Ka klaftá lu ta deftera anabi Isaya ka vlaŋta.
Ka plaŋtá tsi,
ka slanaghatá tsi ta vli vindaf lu kazlay:
18 « Kawadaga Sulkuma Lazglafta nda iʼi ŋa vlihatá mbraku.
Zbap zba Lazglafta ta iʼi ka tfiɗaghatawi ŋa mnanatá Lfiɗa Gwaɗa ta gwal ka pɗu,
ghunaf ghuna ta iʼi ŋa mnanatá gwal habaf lu kazlay:
Palaghunispala lu kəʼa,
ŋa gwaniŋtá ira gwal nda ghulpa,
ŋa zluʼagapta ɗa ta gwal raghwana lu,
19 ŋa snanamta ɗa ta mnduha ta vaku
dzaʼa sagha zɗakwa Lazglaftaª » kəʼa.
20 Manda kɗiŋta ni ta dzaŋafta,
ka mbsaftá tsi ka vlaŋtá kwalva ma tsa həga ya,
ka nzadatá tsi.
Ka pghaftá inda tsa mnduha ma tsa həga tagha skwa la Yahuda ya ta iri tida:
21 Ka *Yesu nda həŋ mantsa:
« Nana gwaɗa Lazglafta snaŋ kuni nda sləməŋa ghuni gita na ná,
nda hɗa magata ni ka ŋa ghuni,
» kaʼa.
22 Inda tsa hahəŋ ma tsa vli ya ka zɗəganatá tsi ta həŋ,
ka ndərmim həŋ ta tsa gwaɗa zɗaku ta sab ma wa ni ya.
Ka həŋ mantsa:
« Zwaŋa Yusufu a na mndu na kay tsawa,
» ka həŋ.
23 Ka Yesu nda həŋ mantsa:
« Nda sna yu dzaʼa mnay kuni ta mahdihdi ta ghəŋa iʼi kazlay:
Ka duhtur ka katsi ná,
mbanaf mba ta ghəŋa gha kagha ka ghəŋa gha kəʼa.
Ka kuni dzaʼazlay nda iʼi guli,
“maga maga hadna ma luwa gha ta tsa skwiha snaŋ ŋni ta mag ka ma Kafarnahum ya” » kəʼa.
24 « Kahwathwata ka yu ta mnaghunata ná,
haɗ lu ta tsuʼafta hmətət ta dər wati ma anabi ma luwa ni wa,
ka Yesu sganaghatá həŋ.
25 Kahwathwata ka yu ta mnaghunata,
ma fitika nzakwa anabi Iliya,
si nda ndəgha wadguha ma Israʼila,
ka ghwalutá luwa ka vaku hkən nda tili mkuʼ,
ka slatá maya dagala ta haɗika Yahuda,
26 Má ŋa ghunafta lu ta Iliya ŋa kataŋta ya dər turtuk ma tsa wadguha la Yahuda ya,
ka ghunaftá lu kataŋtá sana markwa wadga ma luwa Sarepta ta haɗika Tsiduŋ.
27 Ma fitika nzakwa anabi Alisa guli,
si nda ndəgha gwal nda rɗa mndu ta həŋ ma Israʼila,
haɗ ya mbanaf lu dər turtuk mataba taŋ wu,
Naʼama mnda la Siriª yeya mbanaf lu. »
28 Ka ɓasaftá həŋ ta ŋuɗuf demdem ma tsa həga tagha skwa La Yahuda ya,
manda snaŋta taŋ ta tsa gwaɗa ya.
29 Ka sliʼaftá həŋ,
ka ksagaptá Yesu ma huɗa luwa,
ka kladapta ta wa lilwa tsa ghwá baf həŋ ta luwa taŋ tida ya,
ma ŋa sliŋwidiŋta,
30 ka tsəhaptá Yesu ta vgha ni mataba taŋ ka laghwa ni.
Mbanafta Yesu ta sana mndu nda ksa da duhwala halaway
31 Ka laha tsi da luwa Kafarnahum ta haɗika Galili.
Baɗu Sabat,
ka taghə tsi ta skwi ŋa mnduha.
32 Ka ndərmim lu ta tsa tagha skwa ni ya,
kabga nda sgit ma tsa gwaɗa ni ya.
33 Ma tsa həga tagha skwa taŋ ya,
mamu sana mndu ksu duhwala halaway mataba taŋ.
Ka sliʼaftá tsi nda lili.
34 « Aya!
*Yesu zwaŋa la Nazaret,
nu gwaɗa gha nda aŋni sagha ka da zaɗa aŋni?
Wya nda sna yu mndu nda ghuɓa daga da Lazglafta kagha kəʼa,
kaʼa »
35 « Haf wa gha,
sap sa ma na mndu na!
» ka Yesu dvanaghata.
Gi ka slanatá tsa duhwala halaway ya ta tsa mndu ya mataba tskatá mnduha,
ka saghu tsi mida kul balanata.
36 Ka tsutá ŋuɗufa mnduha demdem,
ha ka ɗaɗawu həŋ mataba taŋ kazlay:
Nu mndərga nana ma skwi?
Na gi dvanaghatani nda sgit nda mbraku ta duhwala halaway ná,
gi saghwa taŋ,
ka həŋ.
37 Ka tutá hga ni ma inda vli ta wanaftá tsa vli ya.
Mbanafta Yesu ta gwal kul ɗughwanaku
38 Manda sliʼagapta taŋ ma həga tagha skwa la *Yahuda,
ka laghu həŋ da Simuŋ.
Ta lagha həŋ ta ɓasa ŋuɗidar midza Simuŋ katakata.
Ka ndəɓu lu ta dzvu da *Yesu ŋa kataŋtá tsa marakw ya.
39 Ka ɓukudanaghatá tsi ta tsa marakw ya,
« zliŋ zla!
» kaʼa nda ŋuɗidar,
ka zliŋtá tsi.
Gi hada hada ka sliʼaftá tsa marakw ya ka maganatá skwa zay ta həŋ.
40 Manda dɗata fitik,
ka hladaghatá gwal nda mnduha taŋ kul ɗughwanaku da ɗaŋwaha kavghakavgha ta həŋ da Yesu,
ka fafanaghatá tsi ta dzvu ta həŋ,
ka mbambanaftá həŋ.
41 Ka sliʼagaptá duhwala halaway guli nda lili ma ndəghata mnduha.
Ta sliʼagaptá həŋ,
ka həŋ mantsa:
« kagha ná,
Zwaŋa Lazglafta ka,
» ka həŋ nda tsi.
Ka davanaghatá Yesu ta həŋ,
ŋa hanaftá wi ta həŋ,
kabga nda sna hahəŋ kazlay:
Tsatsi *Kristi kəʼa.
Sliʼa Yesu da mna Lfiɗa Gwaɗa ma luwa Zudiya
42 Na tsaɗakwa vli,
ka sab *Yesu ka laghu da mtak.
Ka sliʼaftá mnduha ka zbay,
ka slanaghatá həŋ,
ka kum həŋ ta ŋanata yaha lavaghwi ta vata həŋ.
43 Ka Yesu mantsa:
« Ɗina guli ka mnanaŋta ɗa ta *Lfiɗa Gwaɗa ta ghəŋa ga mghama Lazglafta ta sana luwaha,
kabga tsaya kəl Lazglafta ka ghunigihata,
» kaʼa nda həŋ.
44 Ka sliʼaftá tsi ka laghu.
Ka va rə tsi ta vli ta mna tsa Lfiɗa Gwaɗa ya ma inda həga tagha skwa la Zudiya.