Mata 18

Fatá ghəŋ manda zwaŋ kwitikw

Mak 9:33-37, Lukwa: 46-48

1 Ma tsa fitik ya, ka gavanavatá duhwalha ni ta *Yesu, ka həŋ mantsa: « Wa ta nzakway ka mali ma ga mghama Lazglafta na? » ka həŋ. 2 Ka hgaktá Yesu ta sana zwaŋ kwitikw ka sladanata ta kəma taŋ. 3 Kaʼa mantsa: « Kahwathwata ka yu ta mnaghunata, ka mbəɗanaf a kuni ta nzakwa ghuni, ka nuta ghuni manda zwani kwitikw kwitikw wu katsi ná, haɗ kuni dzaʼa lami da ga mghama Lazglafta wa. 4 Tsaya tama ná, mndu ta hanaganatá ghəŋa ni manda na zwaŋ kwitikw na ná, tsaya mndu ka mali ma ga mghama Lazglafta. 5 Dər wati ma mndu ta tsuʼaftá zwaŋ manda na zwaŋ wana tsi na ta ghəŋa gwaɗa ta iʼi ná, vərɗa iʼi tsuʼaf tsi. »

Ɗasuwa ka lu da zləmbiŋtá lu ta mndu

Mak 9:42-48, Luk 17:1-2

6 « Ala, ka zləmbiŋ zləmba mndu ta sani turtuk ma tsa zwani ta zlghaftá iʼi ya katsi, ta dər ya má hbiɗim lu ta dughura buna ma ŋurzluŋ ka vzaghata da drəf. 7 Ɗaŋwa ŋa ghəŋa haɗik ta nzakway ta zlazlambiŋtá mndu! Aŋ mndani, nda nza tkweʼ ka nzakwa skwiha ta zlambiŋtá mndu. Ama ɗaŋwa ŋa mndu ya ta sagha tsa zləmbaku ya nda da tsatsi.

8 « Ka nda nza dzva gha, ka səla gha a tsi ka skwi ta famtá kagha da ga dmaku katsi ná, tsiŋ tsa gha ka wuɗiŋta ka diʼiŋ. Ta dər lama ka da hafu ŋa kɗekedzeŋ nda səla gha sluŋ turtuk, ka dzva gha sluŋ turtuk a tsi, ka ya da klafta lu ta kagha nda səlaha gha yipaʼ ka dzvuha gha yəmaɗ a tsi, ka vzamtá kagha da həga vu ŋa kɗekedzeŋ. 9 Ka ira gha ta famtá kagha da ga dmaku katsi ná, tsakwasliŋ tsakwasla gha ka wuɗidiŋta ka diʼiŋ. Ta dər lama ka da həga hafu ŋa kɗekedzeŋ nda ira gha guzliŋ turtuk, ka ya da klafta lu ta kagha nda iriha gha his his ka vzaghamta da həga vu. »

Tuwak nda zaɗa

Luk 15:3-7

10 « Ɗasuwa ka kuni da hərtətatá kuni ta ya dər turtuk mataba tsəna zwani na. Ka yu ta mnaghunata ná, duhwalha Lazglafta ta gɗata ta ngha kuma Da ɗa ta nzakway ta luwa ta ngha həŋ. [ 11 Sa da mbanaftá gwal ya si nda zaɗa na Zwaŋa mndu.]

12 « Kinawu ka kaghuni ta ndanay na? Ka dərmək ka tuwaka mndu, tsa zaɗavaghuta ya turtuk katsi ná, haɗ ta zlaŋtá tsaha təmbay mbsak təmbay mida ya ta ghwá, ka laghu da psa tsa turtuk ta zwaɗuta ya ra? 13 Ka yu ta mnaghunata ná, ka slaf sla tsi tida ná, dzaʼa rfay ta rfu katakata ta ghəŋa ni ka malaghuta ta ghəŋa tsaha təmbay mbsak təmbay mida kul zwaɗuta ya. 14 Manda va tsaya guli ná, va a Da ghuni ta nzakway ta luwa ta zaɗavaghuta ya dər turtuk ma tsa zwani ya wa. »

Tva nzaku nda zwaŋama ta gaghatá dmaku

15 « Ka gagha ga zwaŋama gha ta dmaku ná, la slanaghata ka dzraŋta kaghuni histaghuni. Ka snagha sna tsi katsi, kataf katá ka ta zwaŋama gha. 16 Ala, ka kwalaghu kwala tsi ta snaghata katsi, klaf kla ta mndu turtuk ka his a tsi kawadaga nda kagha, ka vradaghata kada slanaghata, “ŋa da graftá tsa gwaɗa ya ma wa masləmtsəkha his ka hkən a tsi.” 17 Ka kwalaghu kwala tsi ta snanatá tsaha ya guli katsi, mnana mna ta *Igliz. Ka kwalaghu kwala tsi ta snatá ŋa Igliz katsi guli, ngha ta tsa mndu ya manda mndu kul snaŋtá Lazglafta, ka mnda tska dzumna a tsi.

18 « Kahwathwata ka yu ta mnaghunata, inda skwi ya dzaʼa kwalaghuta kuni ta haɗik ná, dzaʼa kwalaghu kwala lu guli ta luwa. Inda skwi ya dzaʼa hbanata kuni ta haɗik ná, dzaʼa hbaf hba lu guli ta luwa.

Guya ghəŋ ka maga duʼa

19 « Ka yu ta mnaghunata guli na: Ka dzraf dzra mnduha his mataba ghuni ta wi, ŋa ɗawa dər wati ma skwi tsi katsi, dzaʼa tsuʼanaf tsuʼa Da ɗa ta luwa ta həŋ. 20 Ma vli ya guyava mnduha his ka hkən a tsi ma hga ɗa ná, mataba taŋ yu, » kaʼa.

Gwaɗa ta kwal kul pla dmakwa mndu

21 Ka sliʼaftá *Piyer ka gavadaghata ɗawaŋta da *Yesu, kaʼa mantsa: « Mghama ɗa! Ka ta giha ga zwaŋama ɗa ta dmaku ní, kidaghi səla dzaʼa planata yu ta dmakwa ni na? Ndəfáŋ səla rki dzaʼa planata yu na? » kaʼa nda tsi. 22 Ka Yesu nda tsi mantsa: « Ndəfáŋ səla yeya a ta mnaghata yu wu, ndəfáŋ mbsak, ndəfáŋ mbsak, ndəfáŋ səla. 23 Tsaya dzaʼa kəl lu ka gra ga mghama Lazglafta nda sana mgham ta kuma mbəɗaftá skwa gadghəla ni ma dzva gwal ta ksanatá slna ya. 24 Ma nzata ni ka mbəɗay, ka klanaktá lu ta sani ya nda dməŋa mleŋwi mleŋwiha tsedi da tsi. 25 Haɗ skwa tsa mndu ya ŋa plata wa. Ka tsa mgham ya mantsa: Skwapwaskwa ta tsa mndu ya, nda markwa taŋ tani, nda zwana ni tani, nda inda skwi ta nzakway ka ŋa ni tani, ŋa pla tsa dməŋ ya, kaʼa. 26 Ka zləmbatá tsa kwalva ya ta haɗik ka tsəlɓata ta kəma ni, kaʼa mantsa: “Wya dzvu, ksata ŋuɗuf, dzaʼa plagha pla yu demdem,” kaʼa. 27 Ksaŋta tsa kwalva ni ya ka hiɗahiɗa katakata ta tsa daŋahəga ni həga ni ya, ka zlanaŋtá tsi ta tsa dməŋ ya ka zliŋta.

28 « Saba tsa kwalva ya manda zliŋtá, ka guyatá tsi nda sana gra ni ya si ta ksə həŋ ta slna kawadaga, nda dməŋa ni da tsi ka sulay dərmək. Ka valaftá tsi tida, ka ksanaftá ŋurzluŋ. “Pliha pla ta skwa ɗa gita gita!” kaʼa nda tsi. 29 Ka zləmbatá tsa gra ni ya ta haɗik, ka ndəɓa dzvu da tsi. Kaʼa mantsa: “Wya dzvu, ksata ŋuɗuf dzaʼa plagha pla yu,” kaʼa nda tsi. 30 “Yaʼ! Ɗva a yu wu, plihata gitagita,” kaʼa. Ka laghu tsi hamtá tsa gra ni ya ma gamak ka kzla planatani ta tsa dməŋa ni ya. 31 Nghay sanlaha ma tsa kwalvaha ya ta tsa skwi maga tsi ya ná, ka kuzlanaftá tsi ta həŋ ta ŋuɗuf katakata. Ka laghu həŋ rusanaftá daŋahəga ni həga taŋ ta inda skwi ta maguta. 32 Ka hgadaghata tsa daŋahəga ni həga ni ya, kaʼa nda tsi mantsa: “Ghwaɗaka kwalva ka, zlaghaŋ zla yu ta inda dməŋa ɗa ta kagha kabga ndəɓata gha ta dzvu da iʼi ná, 33 haɗ kagha guli má dzaʼa tawa hiɗahiɗa ta gra gha, manda ya tawa yu ta hiɗahiɗa ta kagha ya ra?” kaʼa. 34 Huf safi ta ŋuɗufa daŋahəga ni həga ni, ka laghu tsi hamta ma gamak, ka kzla planatani ta inda dməŋa ni da tsi.

35 « Dər wa tsi ma kaghuni kul haɗ ta planatá dmakwa zwaŋama ni ma hya hya ŋuɗufa ni wu katsi ná, manda va tsaya dzaʼa maga Da ɗa ya ta luwa nda kaghuni, » kaʼa.