Wa ta vlaŋtá tvi ta Yesu ŋa magay mantsa na?
20
1 Ma sana fitik,
ma tsa fitika tataghay *Yesu ta skwi ŋa mnduha ma həga Lazglafta,
ka mna *Lfiɗa Gwaɗa ya,
ka sliʼadaghatá la mali mali ta ghəŋa gwal dra skwi ŋa Lazglafta,
nda gwal tagha zlahu,
nda la galata mndu slanaghata.
2 Ka həŋ mantsa:
« Mnaŋna mna,
ka wa ta mnaghatá maga na skwiha na,
ka wa ta vlaghatá mbrakwa magay?
» ka həŋ nda tsi.
3 Ka Yesu mantsa:
« Ka ɗawaghuna ɗawa iʼi guli.
4 Lazglafta ta ghunagatá Yuhwana da maga batem re,
ari mnduha a na?
mnihawa mna,
» kaʼa nda həŋ.
5 Ka nzatá həŋ ka dzərkay mataba taŋ.
« “Ka Lazglafta ya ta ghunagata” ka mu,
“nu kul zlghaftá kuni ta gwaɗa ni ɓa,”
kaʼa dzaʼazlay nda amu.
6 “Ka mnduha ya” ka mu guli,
dzaʼa zlrətsaku mu nda pala da inda mnduha ŋa pslatá amu,
kabga nda sna inda taŋ kazlay:
*Anabi Yuhwana kəʼa. »
7 « Sna a aŋni ka wa ta ghunagaghata wu,
» ka həŋ nda tsi.
8 Ka Yesu mantsa:
« Ahaa!
Iʼi guli ná,
haɗ yu ta mnaghunata ka wa ta vlihatá mbrakwa maga tsa skwiha ya wu,
» kaʼa nda həŋ.
Sana mnda vwaha inabi ta sidi
9 Tahula tsa,
ka zlraftá *Yesu ta mna mahdihdi ŋa mnduha,
kaʼa mantsa:
« Lagha sana mndu ka ŋaɓatá fuha inabi ma vwaha ni.
Ka sliʼaftá tsi ka laghu dista luwa ŋa nzəɗavata.
10 Magatá fitika ɗaga yakwa fwa inabi,
ka ghunaftá tsa mndu ya ta kwalva ni slanaghatá tsa gwal ta hva vwaha tsa inabi ya,
ŋa hlanaftá mayaka ŋa ni ma yakwa fu.
Ka mbəɗanatá tsa gwal ta hva tsa vwah ya ta tsa kwalva ya nda dzə kul klanafta.
11 Ka ghunəglaftá tsi ta sana kwalva ni,
ka rəhaptá həŋ ta tsaya guli,
ka rarazata,
ka vriŋta kul klanafta.
12 Ka ghunəgladaptá tsi ta mahkəna kwalva ni,
ka balanatá həŋ ta tsaya guli ka vzidiŋta.
13 Ka da ni ma tsa vwaha inabi ya mantsa:
“Waká yu dzaʼa magay?
dzaʼa ghuna zwaŋa ɗa ɗvu yu,
yu.
Tsatsi yeya dzaʼa vlə həŋ ta glaku ŋa ni,”
kaʼa.
14 Na ghur nghay tsa gwal ta hva vwaha tsa inabi ya ta lagha tsa zwaŋ ya,
gi ka həŋ mantsa:
“Ya wana tsa mndu dzaʼa za həga ya tane,
dzama dza,
ka nzakwa na fuha inabi na ka ŋa mu,”
ka həŋ.
15 Ka tsəhaghatá həŋ diʼiŋ nda tsa vwaha inabi ya,
ka dzata.
» Ka Yesu mantsa:
« Mantsa tama ní,
nu dzaʼa maganata da ni ma vwaha inabi ta həŋ?
16 Dzaʼa lagha la slanaghatá tsa gwal ta hva tsa vwaha inabi ya,
ka pslatá həŋ.
Ŋa klafta ni ta tsa fwa inabi ya,
ka fanamta ma dzvu ta sanlaha ma mnduha,
» kaʼa nda həŋ.
« Haɗ tsaya dzaʼa magaku mantsa wu,
» ka tsa mnduha ta sna gwaɗa Yesu ya hlaftá wi.
17 Ka naghadamtá Yesu da kuma taŋ,
kaʼa mantsa:
« Nu klatá ghəŋa tsa gwaɗa vindaf lu ma deftera Lazglafta kazlay:
Tsa pala wuɗidiŋ gwal ta ba həga ya,
ta nuta ka palaka tughwa həgaª kəʼa ya?
18 Inda mndu dzaʼa nzeghwafta ta tsa pala ya,
dzaʼa huruɓu huruɓa.
Ka tsa pala ya ta dəɗanaghatá tsa mndu ya katsi guli,
dzaʼa huʼanap huʼa ŋərɗək,
» kaʼa.
Nda ra ka pla dzumna ŋa mghama Ruma ra?
19 Ma va tsa fitik ya,
ka zbə la mali ta ghəŋa gwal dra skwi ŋa Lazglafta,
nda gwal tagha zlahu,
ta tva ksaftá *Yesu,
kabga nda sna həŋ kazlay:
Ta ghəŋa taŋ ta mna Yesu ta tsa mahdihdi ya kəʼa,
ama ka zləŋaftá həŋ ta mnduha.
20 Ka va ɗakwats həŋ ta Yesu,
ka ghunadaghatá həŋ ta sana mnduha ta nzakway manda va ya ŋərma mnduha ya,
da ɗawa gwaɗa da Yesu,
ŋa ɗakwatsa gwaɗa da tsi,
ŋa ksafta ka vlaŋtá ŋumna.
21 Ka ɗawaŋtá həŋ da tsi:
« Mghama ɗa!
Nda sna ŋni ta gwaɗa ta gwaɗ ka,
nda skwi ta tagh ka tɗukwa nzakwa ni kəʼa.
Haɗ ka ta gala mndu wu,
tva nzaku kahwathwata manda ya ta kum Lazglafta ta tagh ka,
» ka həŋ.
22 « Mnaŋna mna,
nda ra re ra a wa a ka play mu ta dzumna ŋa mgham Sezar na?
» ka ga ŋni.
23 Tsatsafta Yesu ta tsa maɗgwirmaɗgwira taŋ ya,
kaʼa nda həŋ mantsa:
24 « Yahawa ka nghanata yu ta tsa kwaɓuª ya.
Fuwata wa nda hgawa na thaf lu tida na na?
» kaʼa.
« Ŋa mgham Sezar ya,
» ka həŋ.
25 « Ala plawa ŋa mgham Sezar ta ya ta nghanatá mgham Sezar.
Plawa ŋa Lazglafta ta ya ta nghanatá Lazglafta,
» kaʼa.
26 Triɗ trap tra həŋ ta ksaftá krughuva ni ma skwi ya ta mnə tsi ta kəma mnduha.
Tsa zlgha wa ni yeya ta vlaŋtá ndərmimay ta həŋ katək,
ka nzatá həŋ faflara.
Dzaʼa sliʼagap sliʼa gwal nda rwa ra?
27 Ka gavadaghatá sanlaha ma la *Sadukiya guli tavatá *Yesu.
Tsa la Sadukiya ya gwal ta mnay kazlay:
Haɗ sliʼagapta ma mtaku nda hafu wu kəʼa ya.
Ka ɗawaŋtá həŋ da Yesu.
28 « Mghama ɗa!
Ka Musa vindaŋnafta na:
“Ka mamu sana mndu nda zwaŋama ni ta klaftá marakw ka mtuta kul yatá zwaŋ katsi,
ka kla tsa mndu ta ndiri ya ta tsa wadga ni ya,
ŋa yanatani ta zivir ta zwaŋama niª,”
kaʼa.
29 Tsaw mamu la zwana mandəfáŋ həŋ.
Ka klaftá zumali ta marakw ka mtuta kul yatá zwaŋ.
30 Ka klutá mahis ta tsa wadgu ya,
31 mantsa ya mahkən,
ka raftá həŋ ndəfáŋ ndəfáŋ tida ka rwuta həŋ,
haɗ ya ta yatá zwaŋ nda tsi wa.
32 Mantsa ya guli ka mtanaghatá tsa marakw ya.
33 Mantsa tama ní,
ŋa wa ŋa wa dzaʼa nzakwa tsa marakw ya baɗu sliʼagapta ma mtaku nda hafu,
ya wya klu kla tsa mnduha ya ndəfáŋ ndəfáŋ ka markwa taŋ na?
» ka həŋ nda tsi.
34 Ka Yesu nda həŋ mantsa:
« Ta kluvustá vgha zgwana nda miʼaha ma na ghəŋa haɗik na,
35 ama zgwana nda miʼaha gwal nghadap Lazglafta kazlay:
Nda ra həŋ ka vragapta ma mtaku nda hafu,
ŋa nzaku nda hafu ma mbəɗakwa luwa dazlay kəʼa ya,
haɗ həŋ dzaʼa kluvustá vgha wa.
36 Haɗ həŋ dzaʼa mtəgəltá mtaku wu,
kabga nda nza həŋ manda duhwalha Lazglafta.
Nda nza həŋ ka zwana Lazglafta,
kabga sliʼagap sliʼa həŋ ma mtaku,
ka nzata nda hafu.
37 Kɗiŋ kɗa Musa ta mnata kazlay:
Dzaʼa sliʼagap sliʼa gwal nda rwa ŋa nzaku nda hafu kəʼa.
Ma vla gwaɗa ta ghəŋa mubukw ta zlghaku,
ka hgə tsi ta Mgham,
“ka Lazglafta Abraham,
ka Lazglafta Izak,
ka Lazglafta Yakubuª.”
38 Lazglafta ná,
Lazglafta gwal nda rwa a wa,
Lazglafta gwal ndiri ya,
kabga inda taŋ demdem ŋa ni ta nzakwa həŋ nda hafu. »
39 Rkauʼ tsuʼuwaghu tsuʼa sanlaha ma gwal tagha zlahu ta gwaɗa,
ka həŋ mantsa:
« Zɗa tsa gwaɗa gha ya Mghama ɗa,
» ka həŋ,
40 Walglaŋ a həŋ ta ɗawglaŋtá sana skwi da tsi wa.
Kristi ná, Mghama Dawuda ya
41 Ka *Yesu mantsa:
« Kura ki lu ta mnay kazlay:
*Kristi ná,
zwaŋa Dawuda ya kəʼa na?
42 Wya mna mna vərɗa Dawuda ma deftera Zabura kazlay:
“Ka Mgham Lazglafta nda mghama ɗa ná,
nza nza nda ga zeghwa ɗa,
43 ta nanaftá yu ta ghumaha gha ka skwa ta diŋlay səla ghaª” kəʼa.
44 Waká Kristi dzaʼa nzaku ka zwaŋa Dawuda,
ya wya “Mgham” ka Dawuda ta hgay?
» kaʼa.
Yaha kuni maga skwi manda gwal tagha zlahu
45 Tata sna tsa gwaɗa ta mnə tsi ya mnduha,
ka *Yesu nda duhwalha ni mantsa:
46 « Ɗaswa ka kuni nda gwal tagha zlahu zɗəgana wawaku ta həŋ nda lgut zutututa ta kuma gagay lu ta zgu ŋa taŋ ta dawadawa ya.
Vla nzaku ta kəma ŋa taŋ ta zbay ma həga tagha skwa la *Yahuda nda ya ma vla za skwa zay.
47 Hahəŋ gwal ta tskugudunustá skwa miʼa wadgu.
Ta slriŋslra həŋ ta maga duʼa ŋa ghubu.
Dzaʼa tsanagha tsa lu ta guma ta həŋ katakata,
» kaʼa.