Lama Yesu da luwa Ursalima
21
1 Taghwaŋ a i *Yesu nda duhwalha ni ka ɓhadaghata da luwa Ursalima wu,
ndusa həŋ nda luwa Beslaze ta vata ghwá Zaytuŋª,
ka ghunaftá Yesu ta gwal his mataba duhwalha ni.
2 Kaʼa nda həŋ mantsa:
« Lawa la da a luwa ta kəma ghuni a.
Ka ɓhadagha ɓha kuni,
dzaʼa gi slanagha sla kuni hada ta hbatá mana kəɗih nda zwaŋa ni.
Ka pligiɗaghata kuni ta həŋ.
3 Ka mamu mndu ta gwaɗgaghunata ta ghəŋa ni katsi ná,
“Mgham ta kumay,”
ka kuni da zlghanaftá wa ni.
Dzaʼa gi zlaghunaŋ zla həŋ. »
4 Kəl tsaya ka nzakway mantsa ná,
nda nza kabga ŋa dzanaghatá ghəŋa gwaɗa ya mna anabi Zakari kazlay:
5 « Mnanawa mna ta gwal ma luwa *Siyuna,
waʼa mghama
gha ta sagha da kagha,
leɓtekw nzakwa ni katakata,
ta sagha ta kəɗih,
ta vuvuʼukwa kəɗih,
ta nzakway ka zwaŋa kəɗihª,
» kaʼa.
6 Ka sliʼaftá tsa duhwalha ya ka laghu magata manda ya mnanaf Yesu ta həŋ.
7 Ka hlaktá həŋ ta tsa mana kəɗih ya nda zwaŋa ni,
ka pghaftá həŋ ta lgutha taŋ ta həŋ,
ka lafi Yesu nzafta tida.
8 Ka zlazlatə ndəghata mnduha ta lgutha taŋ ta tvi.
Sluhwa ŋa sanlaha ta patsay ka pghay ta tviª guli.
9 Ka hlə gwal ta kəma Yesu nda gwal nda hula ni tani ta wi,
ka həŋ mantsa:
« Ŋa Zwaŋa Dawuda glaku,
ka tfanagha tfa Lazglafta ta wi ta mndu ta sagha ma hga Mgham Lazglafta!
Ŋa Lazglafta ta luwaª glaku!
» ka həŋ.
10 Manda ɓhadamta Yesu da luwa Ursalima,
ka kəɓutá mnduha.
« Wa na mndu na tama?
» ka həŋ.
11 Ka tsa dəmga mista ni ya mantsa:
« Anabi Yesu ta sabi ma luwa Nazaret ta haɗika Galili ya,
» ka həŋ.
Lama Yesu da həga Lazglafta
12 Ka lami *Yesu da həga Lazglafta.
Ka ghəzligiŋtá tsi ta inda gwal ta tsakala nda gwal ta skway tani ma tsa həga Lazglafta ya.
Ka zlambidiŋtá tsi ta tabəla gwal mbəɗu,
nda vla nzakwa gwal ta dzawaptá ghərbuʼ.
13 Kaʼa nda həŋ mantsa:
« Nda vinda ma deftera Lazglafta kazlay:
Həga ɗa ná,
həga maga duʼa ya kəʼa,
ka niŋtá kaghuni ka galigha la gəndaª. »
14 Ka gavadaghatá gwal nda ghulpa nda gwal nda raghwa səla taŋ ta vata ni ma tsa həga Lazglafta ya.
Ka mbambanaftá tsi ta həŋ.
15 Nghay la mali ta ghəŋa gwal ta dra skwi ŋa Lazglafta,
nda gwal tagha zlahu ŋa mnduha ta tsa mandərmima skwi ta mag Yesu,
nda tsa hlawa zwani ma həga Lazglafta kazlay:
« Ŋa Zwaŋa Dawuda glaku!
» kəʼa ya ná,
ka kuzlanaftá tsi ta həŋ ta ŋuɗuf.
16 Ka həŋ nda Yesu mantsa:
« Nda sna ka ta na skwi ta mnə həŋ na ra?
» ka həŋ.
« Aŋi!
Nda sna yu,
» ka Yesu nda həŋ.
« Ta walaŋ a kuni ta dzaŋaftá tsa gwaɗaha ya ma deftera Lazglafta ra?
Kaʼa na:
“Kagha ta payaftá zləzlva kagha nda ma wa zwani nda ya nda ma wa zwana vziʼuwa,
manda ya kumaŋ kaª,”
» kaʼa.
17 Ka sliʼaftá Yesu ka zlaŋtá həŋ ka saghwi ma tsa luwa ya,
ka laghu da luwa Betani ka hani tsi hada.
Ksiʼafta Yesu ta sana ghuraf
18 Ga sərɗək ta vru *Yesu ka dzaʼa da tsa luwa dagala ya,
ka kuzlanaftá maya.
19 Ka nghaŋtá tsi ta fwa sana ghuraf ta wa tvi.
Ka lagha tsi distani.
Kəʼa kəʼa ná,
sluhwa yeya dzeʼdzeʼ tida.
« Haɗ ka dzaʼa walglaŋta yəglafta wu,
» kaʼa nda tsi.
Gi hada hada dzuŋ ghwalatá tsa fu ya tsa.
20 Kəʼa ká tsa duhwalha ni ya nghanata ghwalatá tsa fu ya ná,
ka ndərmimi həŋ nda ndərmima.
Ka həŋ mantsa:
« Waká na ghuraf na gi ghwaluta hada hada kay ka na?
» ka həŋ.
21 Ka Yesu nda həŋ mantsa:
« Kahwathwata ka yu ta mnaghunata,
ka zlghaf zlgha kuni ta Lazglafta nda ŋuɗuf dgaŋ a kuni ta ghəŋ ɗekɗek wu katsi ná,
skwi magana lu ta na ghuraf na yeya a dzaʼa kuni magay wa:
“Ama,
sliʼaf sliʼa hada ka vzamta ka ta vgha da drəf,”
ka kuni dzaʼazlay nda ya ghwá ya ná,
dzaʼa magaku manda va tsaya.
22 Inda skwi dzaʼa ɗawaŋta kuni nda zlghay nda ŋuɗuf nda ma maga duʼa ná,
dzaʼa mutsay kuni,
» kaʼa.
Wa ta vlaŋtá mbrakwa maga skwiha manda na?
23 Ka lam *Yesu da həga Lazglafta ka taghə tsi ta skwi ŋa mnduha.
Ka gavadaghata la mali ta ghəŋa gwal dra skwi ŋa Lazglafta,
nda la galata mndu da ɗawaŋta da tsi.
« Mutsu ga kagha ta na mbraku ta kəl kagha ka maga na skwiha na na?
Wa ta vlaghata na mbraku na?
» ka həŋ.
24 Ka Yesu nda həŋ mantsa:
« Mamu skwi turtuktuk dzaʼa ɗawaŋta yu da kaghuni guli.
Ka zlghiɗif zlgha kuni ta wa ni katsi,
dzaʼa mnaghuna mna yu ta vli ta mutsu yu ta na mbraku ta kəl yu ka maga na skwiha na.
25 Wa taghunafta Yuhwana ŋa maga batemª na?
Lazglafta re,
ari mnduha a na?
» kaʼa nda həŋ.
Ka laghu həŋ da dzray mataba hahəŋ hahəŋ.
Ka həŋ mantsa:
« “Ka Lazglafta taghunafta Yuhwana ka mu,”
nu kwal kuni kul zlghafta ɓa?
kaʼa dzaʼazlay nda amu.
26 Ala,
ka “mnduha taghunafta” ka mu guli,
ta zləŋay mu ta mnduha guli,
kabga klaf kla həŋ demdem kazlay:
*Anabi Yuhwana kəʼa. »
27 Ka həŋ nda Yesu tama mantsa:
« Sna a aŋni ka wa taghunafta wu,
» ka həŋ.
Ka Yesu nda həŋ guli mantsa:
« Iʼi guli ná,
haɗ yu ta mnaghunata ka wa ta vlihata na mbraku ta kəl yu ka maga na skwiha na wu,
» kaʼa.
Gwaɗa ta ghəŋa zwani his
28 Ka *Yesu nda həŋ guli mantsa:
« Kinawu ka kaghuni ta ndanay na?
Mamu sana mndu his zwana ni.
Kaʼa nda sani taŋtaŋ mantsa:
“La ka dzaʼa ka da maga slna ma vwaha inaba u sagəŋ,”
kaʼa nda tsi.
29 “La a yu wu,”
kaʼa.
Tahula tsa,
ka ndanglaptá tsi ka sliʼafta ka laghu da vwah.
30 Ka mnanatá da ni ta tsa sana zwaŋ ya manda va tsaya guli.
“Aray,
ta dzaʼa yu da,”
kaʼa.
Tahula tsa,
ka kwalaghuta tsi.
31 Wati mataba tsa zwani his ya,
ta magata skwi ya kum da taŋ ná?
» ka Yesu nda həŋ.
« Tsa taŋtaŋa ya ya,
» ka həŋ.
Ka Yesu nda həŋ tama mantsa:
« Kahwathwata ka yu ta mnaghunata ná,
dzaʼa tiŋlaghu tiŋla gwal tska dzumna nda miʼa hliri ta lami da ga mghama Lazglafta ka kaghuni.
32 Wya sagha sa Yuhwana mnda maga batem da kaghuni,
ka maraghunatá tsi ta tvi tɗukwa,
ka kwalaghutá kuni ta zlghafta.
Ama ka zlghaftá gwal ta tska dzumna nda miʼa hliri.
Kulam nda va tsa nghaŋta ghuni ya tani,
mbəɗanaf a kuni ta nzakwa ghuni ka zlghafta wa,
» ka Yesu nda həŋ.
Mahdihdi ta ghəŋa gwal ta hva vwaha inabi
33 « Ka mnaghuna mna yu ta sana mahdihdi ɓa:
Mamu sana mndu ta ŋaɓaftá fwa inabiha ma vwaha ni.
Ka ŋamtá tsi ma muhul.
Ka laptá tsi ta ghurum ŋa ɗitsa yakwa ni.
Ka baghatá tsi ta vli ŋa nzagata ka nghayª.
Tahula tsa,
ka fanamtá tsi ma dzvu ka haya ta gwal hva.
Ka sliʼafta tsi ka laghu dista luwa.
34 Magatá fitika ɗaga yakwa ni,
ka ghunafta tsi ta kwalvaha ni da tsa gwal hva ma tsa vwah ya,
ŋa mutsanafta taŋ ta ŋa ni ma ɗagata yakwa tsa inabi ya.
35 Ama,
ka valaftá tsa gwal hva tsa vwaha inabi ya ta tsa kwalvaha ya.
Ka ɗgaptá həŋ nda ɗgatá sani ka dzata həŋ nda dza ta sani.
Ka zlərtsatá həŋ nda zlərtsa ta sani.
36 Ka ghunəglaftá tsi ta sanlaha ma kwalvaha ni ka malaghuta mbsaka tsaha taŋtaŋ ya.
Ka maganatá tsa gwal hva tsa vwah ya ta hahəŋ guli manava ŋa tsaha ya.
37 Kɗavakta ni,
ka ghunədanaptá tsi ta həŋ ta vərɗa ŋa ni ma zwaŋ nda mnay kazlay:
Dzaʼa vlaŋ vla həŋ ta glaku ta zwaŋa ɗa kəʼa.
38 Na nghay tsa gwal hva fwa inabi ya ta lagha tsa zwaŋ ya,
ka həŋ mataba taŋ mantsa:
“Wana tsa mndu dzaʼa za həga ya kay.
Sawa,
ka dzata mu!
Ŋa zay mu ta həga ni,”
ka həŋ.
39 Ka valaftá həŋ tida.
Ka tshidiŋta diʼiŋ nda tsa vwah ya,
ka dzata.
40 « Baɗu da saghər tsa da ni ma inabi ya ní,
kinawu kəʼa dzaʼa magay nda tsa gwal hva tsa vwaha inabi ya na?
» ka *Yesu nda həŋ.
41 « Dzaʼa psla psla ta tsa ghwaɗakha ya,
ksaŋta a həŋ ka hiɗahiɗa wa.
Ŋa klafta ni ta tsa vwaha inaba ni ya ka fanamta ma dzvu ka haya ta sanlaha ma gwal hva.
Ŋa vlay tsaha ya ŋa ni nda fitika ni ta ŋa ni mataba ɗagata yakwa tsa fwa inabi ya,
» ka həŋ.
42 Ka Yesu nda həŋ guli mantsa:
« Ta walaŋ a kuni ta dzaŋafta skwi vindaf lu ma defteri ra?
“Tsa pala wuɗidiŋ gwal ba həga ya,
tsaya ta nuta ka vərɗa palaka tughwa həga.
Tsaya ná,
Lazglafta ta ɗvaftá nzakwa ni mantsa.
Nda nza ka mazəmzəm ta wa ira amuª.”
43 « Tsaya kəl yu ka mnay ŋa ghuni kazlay:
Dzaʼa klaghu kla lu ta ga mghama Lazglafta da kaghuni ŋa vlaŋtá mndəra mnduha dzaʼa snanatá gwaɗa ni ɗina kəʼa ya.
44 [Tsa mndu dzaʼa zləmbafta ta tsa pala ya,
dzaʼa hurɓə hurɓa.
Ala,
ka tsa pala ya ta zləmbanaghatá mndu katsi,
dzaʼa huʼanap huʼaª ŋərɗək ta tsa mndu ya.] »