Asta 9

Zaɗanata la Yahuda ta ghumaha taŋ

1 Ka sagha fitik baɗ maghwaŋpəɗ hkən ma tila maghwaŋpəɗ his, tila Adar ya. Baɗ tsa fitik ya má dzaʼa ksa lu ta slna nda gwaɗa mgham ta mnata. Baɗ tsa fitik ya guli ta ndana ghumaha la Yahuda ta zatá ghwa ta ghəŋa taŋ. Ama tskəm kəʼa mbəɗavafta, ka zatá tsa la Yahuda ya ta ghwa ta ghəŋa ghumaha taŋ. 2 Ka tsakavatá la Yahuda ma luwaha ya hada həŋ, ma inda haɗikha ma dzva mgham Ahasverus. Ka guyatá la Yahuda nda gwal ta zba htsiŋa taŋ. Haɗ mndu ta laviŋtá sladata ta kəma taŋ wa. Ta zləŋ inda mndəra mnduha da həŋ. 3 Ka hinistá inda mghamha ma haɗikha, nda guvnaha, nda mnduha mgham ka mali ka mali, nda gwal ta ksanatá slna ta mgham ta dzvu ta la Yahuda, kabga ta zləŋay həŋ ta Murduhay. 4 Tsaw, ka mndu dagala nzakwa Murduhay ma həga ga mgham, tutá hga ni ma inda haɗikha, kabga ta ŋəlaku nda ŋəla Murduhay.

5 Ka pslatá la Yahuda ta inda ghumaha taŋ nda kafay. Ka pslatá həŋ, ka zaɗanatá həŋ. Ka maganatá həŋ ta skwi kumaŋ həŋ ta gwal husaŋ həŋ. 6 Ma tsa vli nda ŋa nda matsaka huzlu ma Susaŋ ya, ka rwanatá la Yahuda ta mnduha hutaf dərmək (500). 7 Ka pslatá həŋ guli ta i: I Parsandataʼ, nda Dalfuŋ, nda Aspataʼ, 8 nda Purataʼ, nda Adaliyaʼ, nda Aridataʼ, 9 nda Parmastaʼ, nda Arisay, nda Ariday, nda Vayzataʼ. 10 Tsaha ya zwana Haman ghwaŋ, zwaŋa Hamədataʼ ta nzakway ka ghuma la Yahuda ya. Ama zləɗa a həŋ ta skwa taŋ wa.

11 Baɗ va tsa fitik ya, ka lagha lu mnaŋta ta kəma mgham ta mbsaka mnduha psla lu ma luwa Susaŋ, ma tsa vli nda ŋa nda matsaka huzlu ma tsa haɗik ya. 12 Ka mgham nda Asta, markwa mgham mantsa: « Ma tsa vli nda ŋa nda matsaka huzlu ma Susaŋ ya ná, psla psla la Yahuda ta mnduha hutaf dərmək, ka zaɗanatá mnduha, nda zwana Haman ghwaŋ, kinawu magata həŋ ma sana pɗakwa haɗikha ɗa tama? Ama ka tata ndanay ka ta ɗawigəlhatá sana skwi katsi, tata maga gha maga yu, » kaʼa. 13 Ka Asta mantsa: « Rvera ɗa, ka zɗəgagha zɗa tsi katsi, vləglaŋ vla ta tvi ta la Yahuda ma luwa Susaŋ, ka magəglata həŋ mahtsim taɓta na zlahu maga lu gita na. Ka dzagwagata lu ta udzu ta tsa zwana Haman ghwaŋ ya, » kaʼa. 14 « Magawa maga manda va tsaya, » ka mgham. Ka vindaftá lu, ka dgamta ma Susaŋ, ka dzagwagatá lu ta tsa zwana Haman ghwaŋ ya ta udzuha. 15 Baɗ maghwaŋpəɗ fwaɗa fitik ma tila Adar, ka tskavatá la Yahuda ta nzakway ma Susaŋ. Ma tsa Susaŋ ya, ka pslatá həŋ ta mnduha hkən dərmək, ama zləɗa a həŋ ta skwa taŋ wa.

16 Ka tsakavata paɗakwa la Yahuda ma haɗikha ma dzva mgham guli, ŋa katá hafa taŋ. Ka mbiʼaptá həŋ ta vgha da ghumaha taŋ, manda pslata taŋ ta ghumaha taŋ dəmbuʼ ndəfáŋ mbsak hutaf mida (75.000). Ama zləɗa a həŋ ta skwiha wa. 17 Baɗ maghwaŋpəɗ hkəna fitik ma tila Adar maguta tsaya. Baɗ maghwaŋpəɗ fwaɗa fitik ka mbiʼi həŋ ta vgha. Baɗ tsaya ka magata həŋ ta skwa zay gagaʼ, ka rfu. 18 Ka tskavata la Yahuda ta nzakway ma Susaŋ kata hafa taŋ baɗ maghwaŋpəɗ hkəna fitik, nda ya baɗ maghwaŋpəɗ fwaɗa fitik ma tsa tila ya, ama ka mbiʼi həŋ ta vgha baɗ maghwaŋpəɗ hutafa fitik. Ka nzakw tsa fitik ya ka fitika skalu nda rfu. 19 Tsaya ta kəl la Yahuda ta nzakway ma zwana luwa ka klaftá ta tsa fitik baɗ maghwaŋpəɗ fwaɗa fitik ma tila Adar ya, ka fitika rfu, ka za skwi, ka skalu. Ka mbahuvtá həŋ ta vgha sani nda sani.

Skala Purim

20 Inda tsa skwiha ta maguta ya, ka vindaftá Murduhay, ka tsaghanaftá tsi ta ɗelewerha ta inda la Yahuda ma inda haɗikha ma dzva mgham Ahasverus, ŋa gwal ndusa ndusa nda gwal diʼiŋ diʼiŋ tani. 21 « Ka hava kuni ta tsa skala rfu ya inda vaku, baɗ maghwaŋpəɗ fwaɗ fitik nda ya baɗ maghwaŋpəɗ hutafa fitik ma tili Adar, » kaʼa nda həŋ. 22 Mantsa tama, baɗ tsa fitikha ya zluʼapta la Yahuda ta vgha da ghumaha taŋ. Ma tsa tili ya mbəɗavafta ghuya ɗaŋwa taŋ ka rfu, ta mbəɗavaftá tawa taŋ ka skala rfu. Nda ra tama ka havay taŋ ta tsa skwiha ya, nda skala rfu, ka tsaghay taŋ ta mbəhu ŋa sani nda sani, ka vla mbəhu ŋa la ka pɗu guli.

23 Ka tsuʼaftá la Yahuda ta maga skwi ya zlraf həŋ ta magay, nda skwi ya vindanaf Murduhay ta həŋ. 24 Maga maga həŋ mantsa ya, kabga si kura kura Haman zwaŋa Hamədataʼ ma la Agag, ghuma la Yahuda, ta zaɗanatá la Yahuda. Ka vzə lu vindima ta hgə lu ka Pur ŋa tsaftá fitik ŋa zlaɓanaftá həŋ, ŋa zaɗanatá həŋ. 25 Ama manda sliʼafta Asta ka lagha ta kəma mgham, ka vindaftá mgham ta ɗelewerha kazlay tsa ghwaɗaka skwi vindaf Haman ta ghəŋa la Yahuda ya ná, ta ghəŋa ni ka skwa ni kəʼa. Mantsa tama, ka dzagwuŋtá lu ta həŋ ta udzuha, tsatsi nda zwana ni tani. 26 Tsaya ta kəl lu ka hga tsa fitikha rfu ya, ka Purim. Manda mnay kazlay vindima kəʼa ya.

Taɓ ta inda skwiha ya vivindam lu ma ɗelewerha Murduhay, nda inda skwiha ya nghaŋ həŋ, nda inda skwiha ta slanaghatá həŋ, 27 ka mblatá la Yahuda ta fatá tsa skalu ya ka ŋa taŋ, ŋa zivirha taŋ, nda ya ŋa inda gwal dzaʼa nuta ka la Yahuda. Inda vaku, ta tsa fitik tsaf lu ya, ŋa skalay taŋ ta tsa skalu ka fitik his ya manda ya ta raku, ka magay manda va ya mnaf Murduhay. 28 Inda zivir, ha ka dzaʼa ta kəma, inda wa tgha həga la Yahuda, ma inda luwa ta inda tsa haɗik ya, ŋa gɗata taŋ ta maga tsa skala Purim ya. Ɗina a ka tsanapta la Yahuda nda zivira taŋ tani ta tsa fitika skalu ya wa. Yaha həŋ da zanaptá skwi ta maguta guli.

29 Lagha i Asta, markwa mgham, makwa Avihayil, nda Murduhay mnda la Yahuda, ka vindaftá tsa mahisa ɗelewer ya ŋa fanaghatá mbraku kahwathwata ta ghəŋa tsa ɗelewer ta gwaɗa ta Purim ya. 30 Mantsa ya, ka tsaghaftá həŋ ta ɗelewerha nda gwaɗa zɗaku, nda ya nda kahwathwata ŋa inda la Yahuda ta nzakway ma tsa haɗikha dərmək nda hisambsak ndəfáŋ mida (127) ma dzva Ahasverus ya. 31 Ka nzakw tsa fitika skala Purim ya manda tsa tsaf i Murduhay mnda la Yahuda, nda Asta, markwa mgham ya. Ka tsafta vərɗa hahəŋ ŋa ghəŋa taŋ, nda zivirha taŋ tani, manda va tsa skwi kura həŋ ta ghəŋa gwaɗa ta suma nda ya ta ghəŋa gwaɗa ta tawa ghəŋ taw həŋ ya. 32 Tsa zlahu fa Asta ya ná, fanagha fa ta mbraku skwi ta raku ta ghəŋa skala Purim. Ka vivindamtá lu ma sana ɗelewer.