Tiŋlaghuta la Yahuda ta planamtá həŋ
8
1 Baɗ va fitik ya, ka klaftá mgham Ahasverus ta həga Haman ghuma la Yahuda, nda inda skwa ni, ka vlaŋtá Asta, markwa mgham ya. Ka snanamtá Asta ta mgham ta nzakwa Murduhay ma tsatsi. Tsaya kəl Murduhay ka lam ta kəma mgham. 2 Ka klaftá mgham ta halagara ni tsəha tsi ta dzva Haman ka vlaŋtá Murduhay. Ka fanamtá Asta ma dzvu ta Murduhay ta həga Haman nda inda skwa ni.3 Ka gwaɗgəlganatá Asta ta mgham. Ka zləmbatá tsi ta kəma ni, ka taw, ka ndəɓa dzvu da tsi, ŋa hliŋtá ni ta tsa zaɗaku si payaf Haman la Agag ta ghəŋa la Yahuda ya. 4 Ka fədanaptá mgham ta dafa dasu ta Asta, ka sliʼafta tsi, ka sladata ta kəma mgham. 5 Kaʼa mantsa: « Rvera ɗa, ka si ta kumay ka ta mariɗiŋtá zɗakwa gha katsi, ka ɗina tsi ta nghə ka ta kəma gha, ka tɗukwa tsa ɗaway ɗa ya katsi, ka zɗəgagha zɗa yu katsi, vindaf vinda ta sana ɗelewerha. Ka nzakwa həŋ ŋa mtanatá tsa ɗelewerha vivindaf Haman zwaŋa Hamədataʼ la Agag, ŋa pslatá inda la Yahuda ma inda haɗikha ta gə ka ta mgham ta ghəŋa taŋ ya. 6 Kinawu dzaʼa suʼa yu ta ngha mghama zləmnda dzaʼa slanaghatá la ini na? Kinawu dzaʼa ngha yu ta zaɗakwa mndəra ini na? » kaʼa.
7 Ka mgham Ahasverus nda i Asta, markwa mgham, nda Murduhay la Yahuda ya mantsa: « Wya dzugwuŋ dzugwa yu ta Haman ta wa udzu, kabga vəl zbay ni ta htsiŋa la Yahuda. Klaf kla yu ta həga ni nda inda skwa ni, ka vlaŋtá Asta. 8 Nziya nza tsi ná, laviŋ a iʼi ta hərɗiŋtá skwi vindaf lu nda hga ɗa, ka thaftá ŋizla halagara ɗa tida wa. Tsaya ná, kaghuni dzaʼa vindaftá skwi ta ghəŋa la Yahuda manda ya kumaŋ kuni, ka thafta ghuni ta dzvu tida nda hga mgham, ka faftá ŋizla halagara mgham guli tida, » kaʼa.
9 Ma va tsa fitik ya, baɗ hisambsak hkən mida ma tila mahkən, tila Sivaŋ, ka hagaktá lu ta gwal vindanatá vindi ta mgham. Ka vindaftá həŋ ta inda skwiha manda va ya mnanaf Murduhay ta həŋ, ŋa tsaghanaftá la Yahuda, nda guvnaha, nda sanlaha ma maliha, nda gwal dagala dagala ta ksa slna ma haɗikha dərmək nda hisambsak ndəfáŋ mida ma dzva mgham, sliʼafta ni ma Hindiya dikw da Kus. Ka vivindaftá həŋ ta tsa vindi ya ŋa haɗikha dərmək nda hisambsak ndəfáŋ mida. Inda haɗik nda vindi ya ta vindi həŋ, ŋa inda mndəra mnduha ma inda haɗikha, nda gwaɗa ya ta gwaɗ həŋ, ŋa la Yahuda, nda vindi ya ta vində həŋ, nda gwaɗa ya ta gwaɗ həŋ. 10 Ka thaftá Murduhay ta dzvu tida nda hga mgham Ahasverus. Ka faftá tsi ta ŋizla halagara mgham tida. Tahula tsa, ka ghwanaftá tsi ta mnduha nda tsa ɗelewerha ya ta plisha ta hwaya katakata, ɗagap lu paɗak ŋa maga slna ga mgham.
11 Ma tsa ɗelewerha ya ná, vlaŋ vla mgham ta tvi ta la Yahuda dər ma wati ma luwa tsi, ŋa tsakavata taŋ ŋa katá hafa taŋ. Ka vlaŋtá tsi ta tvi ta həŋ ŋa dzata, ŋa hərɗiŋta, ŋa zaɗanatá inda dər wati ma bakwa vula, dər wati ma mndəra mndu tsi, dər ma wati ma haɗik tsi. Laviŋ lava hahəŋ guli ta pslatá miʼa taŋ, nda zwana taŋ, ka zləɗatá həŋ. 12 Fitik ya tsaf lu ŋa magay ta inda haɗikha ma dzva mgham Ahasverus ná, tsaya fitik baɗ maghwaŋpəɗ hkən ma tila maghwaŋpəɗ his, tila Adar. 13 Dzaʼa nzakway tsa ɗelewerha vindaf lu ya manda zlahu ma inda haɗik, ŋa snanamtá inda mndəra mnduha. Mantsa ya tama, baɗ tsa fitik ya, ŋa payavatá la Yahuda ŋa planamtá ghumaha taŋ. 14 Ka sliʼaftá tsa mnduha ta plis ɗagap lu paɗak ŋa maga slna mgham ya, ka laghwi nda hwaya nda haya manda ya mna mgham. Ka snanamtá lu ta tsa zlahu guli ta gwal ma vli nda ŋa nda matsaka huzlu ma Susaŋ.
15 Ka sliʼaftá Murduhay ta kəma mgham ka sabi nda suɗatá lguta mamgham mgham, ka kubwalkubwal nda ŋusliŋ, nda fatá gwambara dasu ghəlkəɗ ma ghəŋ ta ghəŋa lguta huɗa liŋ kulefeɗ tsərslata ni nda dva ghuz. Ka gigɗaku vli ma luwa Susaŋ dabga hla wi, nda rfu katakata. 16 Ka tutá ŋuɗufa la Yahuda da rfu katakata ta ghəŋa zɗakwa ŋuɗuf, nda rfu, nda zatá ghwa ta malaghutá mbraku katakata. 17 Ta skalu la Yahuda nda rfu ma inda haɗik, ma inda luwa, dər ga lagha tsa zlaha mgham ya. Ka dadatá həŋ ta skwa zaya badawa, ka skalu. Nda ndəgha mndəra sanlaha ma mnduha ta mbəɗuta ka la Yahuda, kabga zləŋata taŋ ta la Yahuda.