Mutsafta Asta ta zɗakatahuɗa da mgham
5
1 Baɗ tsa mahkəna fitik ya, ka suɗavatá Asta ta lguta ga mghama ni. Ka lami tsi maravata ma daɓa huɗa həga mgham mbəŋ nda tsa həga mgham ya. Ta nzaku mgham ta dughurukwa ga mghama ni, ma həga ga mghama ni mbəŋ nda tva lami da həga. 2 Na gi nghaŋta mgham ta Asta, markwa mgham ta sladu ma daɓa həga, ka zɗanaŋtá tsi ta huɗi. Ka fədanaptá mgham ta dafa dasu ma dzva ni ta Asta. Ka gavadaghatá Asta ksaŋtá wa tsa dafa ya.3 Ka mgham nda tsi mantsa: « Nu ta kum ka ní Asta, markwa mgham, nya ta ɗaw ka na? Dər má nahgani tsi, ta vlagha vla yu. Dər má sləɓahwa ga mghama ɗa tsi, » kaʼa. 4 Ka Asta mantsa: « Ka zɗəgana zɗa tsi ta mgham katsi, ka sagha sa mgham kawadaga nda Haman gita u na, da za skwa zay payanaf yu, » kaʼa. 5 Ka gi ghunaftá mgham ta mndu ŋa hgaktá Haman misimmisim ŋa sna tsa hgu, hga Asta ya. Ka lagha i mgham nda Hama da za tsa skwa zay payaf Asta ya. 6 Ma fitika say taŋ ta ima inabi, ka mgham nda Asta mantsa: « Nahgani skwi ta kum ka ta ɗaway da iʼi na? Ta dzaʼa vlagha vla yu, dər má sləɓahwa ga mghama ɗa tsi, ta maga gha maga yu, » kaʼa.
7 Ka Asta zlghaftá wa ni mantsa: « Wya skwi ta kum yu, ta ɗawu yu: 8 Ka zɗəɗiŋ zɗa mgham ta huɗi, ka zɗəgana zɗa tsuʼiɗifta ni ta ɗaway ɗa, ka magihatá skwi manda ya ta kum yu katsi, ka vrəglak vra tsi da za skwa zay dzaʼa payglafta yu mahtsim guli, kawadaga nda Haman. Tsaya tama, dzaʼa mnana mna yu ta mgham ta skwi ta ndan yu, » kaʼa.
Payay Haman ta tva dzatá Murduhay
9 Baɗ tsaya, ka rfu Haman ta rfu, waɗah ŋuɗufa ni ta sab tsi ga markwa mgham. Ama manda nghaŋta Haman ta Murduhay ta nzaku ta wa tgha ga mgham, má ŋa sliʼavata ni ka vlaŋtá glaku ta Haman ya, gigɗava a wa. Ka gufaftá ŋuɗufa Haman. 10 Ama ka suʼaftá Haman, ka laghu tsi dzagha ni. Ka hagadaghatá tsi ta graha ni, nda Zeres markwa taŋ. 11 Ka rusanaftá Haman ta həŋ ta glakwa gadghəla ni, nda mbsaka zwana ni, nda inda skwi ya magana mgham ŋa ŋlanafta, ŋa nzanaghatá inda mnduha mgham ka mali ka mali, nda sanlaha ma kwalvaha mgham tani. 12 Ka Haman mantsa: « Ta ghəŋa tsaya guli, hgaŋ a Asta, markwa mgham ta sana mndu da vla za skwa zay payaf tsi wu, ta ghəŋa iʼi turtukwa ɗa yeya, nda hga yu ŋa mahtsim guli. Kawadaga nda mgham hgata tsi ta iʼi. 13 Ama inda tsaha ya ná, ngha a yu ka sana skwi ka tata nghaŋ ngha yu ta Murduhay, tsa la Yahuda ta nzaku ta wa tgha ga mgham ya wu, » kaʼa.
14 Ka markwa taŋ Zeres nda inda tsa graha ni ya nda tsi mantsa: « La latá udzu nda slra ka mitər hisambsak hutaf mida. Ga sərɗək ya, ka mnanata ka ta mgham, ka dzugwuŋta lu ta Murduhay ta wa ni, ka dzaʼa ka nda rfu da za skwa zay gha kawadaga nda mgham, » ka həŋ. Ka zɗəganatá tsa gwaɗa ya ta Haman, ka latá tsi ta udzu.