Asta 4

Famta Asta ta wi ŋa mbanaftá la Yahuda

1 Manda snaŋta Murduhay ta tsa skwi ta maguta ya, ka kwahiŋtá tsi ta lguta ni, ka pghavatá buhu nda hutiɗif ta vgha, ka laghu da huɗa luwa nda wahu, ka hərɓa taw da kuzlakwa ni. 2 Ka lagha tsi ta wa tgha ga mgham kweŋkweŋ, kabga ta lmay lu ta lami da həga ga mgham nda suɗatá buhu ta vgha. 3 Ma inda haɗik ma dzva tsa mgham ya, ma vli ɓhadagha tsa zlaha mgham ya, ta ghəŋa taw, nda suma, ta tawa ghəŋ yeya ta mag la Yahuda. Nda ndəgha gwal ta pghatá buhu nda hutiɗif ka ghəzləŋa taŋ.

4 Ka lagha kurɗuha nda mapslaha da rusanaftá Asta ta skwi ta slata. Ka ghuy tsi katakata ta tsa markwa mgham ya ma vgha. Ka tsəghafta tsi ta lgut ŋa suɗavata Murduhay, ŋa suɗiŋta ni ta tsa buhu ta vgha ni ya, ama ka kwalaghutá tsi ta tsuʼafta. 5 Ka hgaftá Asta ta Hatak sani mataba mapslaha mgham fa tsi ŋa maganatá slna. Ka ghunaftá tsi ŋa ɗawaŋta da Murduhay ta skwi ta magaku, nda ya ka kabgawu kəl tsi ka magaku mantsa ya. 6 Ka sliʼaftá Hatak, ka laghu slanaghatá Murduhay ta dawadawa vli ma luwa mbəŋ nda wa tgha həga mgham. 7 Ka snanamtá Murduhay ta inda skwi ta magaku, nda mbsaka tsedi ya mna Haman kazlay dzaʼa play yu ŋa da akwata mgham ta gwaɗa ta la Yahuda, ŋa zaɗanatá həŋ kəʼa ya. 8 Ka klaftá Murduhay ta tsa skwi vindaf lu ŋa mnaŋta ma Susaŋ ŋa zaɗanatá həŋ ya. Kaʼa mantsa: « La ka maranata ka ta Asta ta na skwi vindaf lu na, ka paslanapta ka ta hya mida. Ka mnanafta ka, ka lama tsi ta kəma mgham slanaghata, ka ndəɓanata dzvu ŋa tawatá ni ta hiɗahiɗa ta ghəŋa mndəra ni, » kaʼa.

9 Ka sliʼaftá Hatak ka lagha rusanaftá Asta ta gwaɗaha ya mnana Murduhay. 10 Ka ghunəglaftá Asta ta Hatak da Murduhay, kaʼa mantsa: 11 « Sliʼafta ni ta kwalvaha mgham, nduk nda mnduha ma inda haɗikha ta gə tsi ta mgham ta ghəŋa taŋ, nda sana həŋ ta tsa zlahu ya. Inda mndu, nda zgun tani, nda marakw tani, ta lami da daɓa həga mgham kul hgaŋtá mgham ná, dzatá tsa mndu ya. Ala, ka fədanap fa mgham ta dafa dasa ni ta tsa mndu ya katsi, tsaya dzaʼa kəl tsi ka nzata nda hafu. Ama, ta magay na ta tili, ta hgaŋ a mgham ta iʼi ŋa lagha ta vata ni wu, » kaʼa.

12 Ka lagha lu mnanatá Murduhay ta tsa gwaɗa Asta ya. 13 Ka Murduhay zlghanaftá wi ta Asta mantsa: « Yaha kagha da ndanay kazlay dzaʼa mbaku iʼi turtukwa ɗa, kabga nzakwa kagha ma həga ga mgham ta pslatá lu ta hamata la Yahuda kəʼa. 14 Ka dər haf ha kagha ta wa gha ta ghəŋa na skwi na ná, dzaʼa mutsay la Yahuda ta katu ma sana vli ŋa mbafta taŋ. Ama kagha, nda la ga ghuni tani, dzaʼa zaɗana zaɗa lu. Haɗ mndu nda sna wu, kawayaka skwi ta ghəŋa skwiha manda nana kəl skwi ka fatá kagha ka markwa mgham, » kaʼa.

15 Ka Asta zlghanaftá wi ta Murduhay mantsa: 16 « La ka tskanata ka ta inda la Yahuda ma Susaŋ, ka maga kuni ta sumay ta ghəŋa iʼi. Yaha kuni da za skwi, dər sa skwi ma fitik hkən, nda fitik tani, nda rviɗik tani. Dzaʼa sumay iʼi guli manda va tsaya, nda kwalvaha ɗa tani. Tahula tsaya ŋa sliʼafta ɗa ka lam da mgham, dər má mna a zlahu. Ka ŋa mtakwa ɗa tsi, dzaʼa mtay yu, » kaʼa. 17 Ka sliʼaftá Murduhay ka laghu magata manda va tsa skwi mnanaf Asta ya.