Payay Haman ta tva zaɗanatá la Yahuda
3
1 Tahula luta tsa skwiha ya, ka ŋlanaftá mgham Ahasverus ta Haman zwaŋa Hamədataʼ mndəra la Agag. Ka vlaŋtá tsi ta vla mamali mali ta ghəŋa mnduha mgham ka mali ka mali ta nzaku kawadaga nda tsi. 2 Ka tsəlɓu inda kwalvaha ga mgham ta nzaku ta wa tgha ga mgham ta tsəlɓu ŋa vla glaku ta kəma Haman, kabga mgham ta mnafta. Ama ka kwalaghutá Murduhay ta tsəlɓa tsa tsəlɓə ŋa vla glaku ya. 3 Ka kwalvaha mgham ta nzaku ta wa tgha ga mgham nda Murduhay mantsa: « Nya kəl kagha ka kwalaghutá gwaɗa mnaf mgham na? » ka həŋ. 4 Ka gɗatá həŋ ta mnay ŋa ni inda fitik manda va tsaya, ama ka kwalaghutá tsi ta snanatá həŋ. Ka snanamtá həŋ ta Haman, ŋa nghay ka dzaʼa zlanaŋ zla lu ta tvi Murduhay ŋa maga skwi ta mag tsi, tsaw si mnana mna ta həŋ kazlay la Yahuda yu kəʼa. 5 Kəʼa ka Haman ná, haɗ Murduhay ta tsəlɓa tsa tsəlɓu ka vla glaku ŋa ni ya wu, ka gufaftá ŋuɗufa ni katakata. 6 Manda snaŋtá guli kazlay mndəra la Yahuda na Murduhay kəʼa, ka nghadaptá tsi guli ná, slaghuta a fafta ni dzvu ta Murduhay turtukwa ni wa. Ka zbə Haman ta zaɗanatá la Yahuda, mndəra taŋ ma Murduhay ta inda haɗik ta gə mgham Ahasverus ta mgham.7 Ma taŋtaŋa tili, tsaya tila Nisaŋ, ta maghwaŋpəɗ hisa vakwa mgham Ahasverus ta pala, ka vzə lu ta vindima ta hgə lu ka Pur ta kəma Haman. Ta kumay ta snaŋta ka ma wati fitik, nda ya ka ma wati tili rakwa magata ni ta tsa slna ni ya. Ka dɗaftá tsa vindima ya ta tila maghwaŋpəɗ his, tsaya tila Adar.
8 Ka Haman nda mgham Ahasverus mantsa: « Mamu sana mndəra mndu, ta wiɗamtá vgha mataba mndəra sanlaha ma mnduha, ma inda haɗikha ta gə ka ta mgham. Tskəm ŋa taŋ ma nzaku, nda dga ŋa taŋ ma zlahu nda ŋa sanlaha ma mndəra mnduha. Haɗ həŋ ta sna zlaha mgham wa. Ra a ka zlaŋta mgham ta həŋ ka gɗata taŋ ta magay mantsa ya wa. 9 Ka zɗəgana zɗa tsi ta mgham katsi, ka vindafta lu nda vinda ta tvi ŋa zaɗanatá həŋ. Dzaʼa graf gra iʼi ta tsedi ka kiluʼ dəmbuʼ hkən dərmək nda fwaɗa mbsak (340.000) ka vlaŋta ma dzvu ta gwal ksa slna ŋa pghamta taŋ ma akwata ga mgham, » kaʼa.
10 Ka tshagatá mgham ta halagar ta dzva ni, ka vlaŋtá Haman zwaŋa Hamədataʼ, ma mndəra la Agag, ghuma la Yahuda. 11 Ka mgham nda Haman mantsa: « Ŋana ŋa ta tseda gha, vlagha vla yu ta tsa mnduha ya ma dzva gha, ka maga ka ta skwi manda ya kumaŋ ka nda həŋ, » kaʼa.
12 Ka hagadaghatá lu ta gwal ta vindanatá vindi ta mgham baɗ maghwaŋpəɗ hkəna fitik ma tila mataŋtaŋ. Ka vivindaftá lu ta ɗelewerha manda ya mnaf Haman, ka tsaghanaftá guvnaha, nda sanlaha ma maliha ma inda haɗik, nda inda maliha ta ghəŋa mndəra mnduha. Nda vindi ya ta vində mnduha ma inda haɗik, nda ya nda gwaɗa ta gwaɗ inda mndəra mndu, vivindafta həŋ. Ka tahaftá tsa gwal vindi ya ta dzvu tida nda hga mgham Ahasverus, ka thaftá həŋ tida guli ta ŋizla halagara ni. 13 Ka ghwanaftá həŋ nda hwaya nda hwaya ta mnduha hlaghatá tsa ɗelewerha ya da inda haɗikha mgham. Ma tsa ɗelewerha ya ná, vla vla mgham ta tvi, ŋa hərɗiŋta, ŋa pslata, nda ya ŋa zaɗanatá inda la Yahuda, daga ta galaɓayha ha ka lagha ta halata mnduha, nda zwani tani, nda miʼaha tani ta fitika turtuk. Tsaya fitik baɗ maghwaŋpəɗ hkən ma tila maghwaŋpəɗ his, tila Adar. Baɗ tsa fitik ya dzaʼa zləɗata lu ta inda skwiha taŋ guli.
14 Ma inda haɗik ná, dzaʼa nzakway tsa ɗelewerha ya manda zlahu, ŋa klafta ka snanamtá inda mndu, ŋa nzata inda mndu nda payatá vgha baɗ tsa fitik tsaf lu ya. 15 Manda ya mna mgham, ka hlaghatá mnduha ta tsa ɗelewer ya nda hwaya nda hwaya. Ka snanamtá lu guli ta tsa vindi ya ma vli nda ŋa nda matsaka huzlu ma Susaŋ. Ka nzatá i mgham nda Haman ka sutá skwa taŋ, ama ka kəɓutá mnduha ma luwa Susaŋ.