Asta 2

Zbaftá sana makwa ŋa mgham

1 Tahula luta tsa skwiha ya, manda lɓata gufatá ŋuɗufa mgham Ahasverus, ka havaktá tsi ta skwi maga Vasti, nda skwi ya maga tsi nda zlahu ya fa tsi ta ghəŋa ni ya. 2 Ka duhwalha mgham ta maganatá slna mantsa: « Ka zabanak zaba lu ŋa mgham ta kuʼaha gwal nda mbaza ma kuma ta kul snaŋtá zgun. 3 Ka zabaf zaba mgham ta mnduha dzaʼa maga tsa slna ya ma inda haɗikha ta gə tsi ta mgham ta ghəŋa taŋ ya, ŋa hlakta taŋ ta inda kuʼaha, nda mbaza ma kuma, gwal ta kul snaŋtá zgun ya, ŋa pghamta həŋ ta fila tska miʼaha ma vli nda ŋa nda matsaka huzlu ma Susaŋ, ŋa nghapta Hegay, mapsla mgham ta ngha miʼaha ya, ka həŋ. Ka vla lu ta rɗi kavghakavgha ŋa taŋ manda ta raku ŋa rka taŋ. 4 Ka wati tsa makwa dzaʼa lanaftá mgham ya, tsaya dzaʼa nzakway ka markwa mgham ma vla Vasti, » ka həŋ. Ka zɗəganatá tsa gwaɗa ya ta mgham, ka magatá tsi manda tsaya.

5 Ma vli nda ŋa nda matsaka huzlu ma Susaŋ, mamu sana mnda la Yahuda ta hgə lu ka Murduhay zwaŋa Yaʼir, zigha la Simghi, zigha papaha Kis, ma mndəra la Biŋyamiŋ. 6 Mndəra la Biŋyamiŋ ná, hlagap ma Ursalima lu ta həŋ kawadaga nda sanlaha ma mnduha, ma fitika hlaghata Nevuhadnetsar mghama Babila ta Yəhuniya mghama la Yahuda. 7 Ka glanaftá Murduhay ta makwa da ni, Hadasa ta nzakway ka Asta, kabga haɗ da ni nda ma ni wu, tawakra ya. Ká ka nda ɗinakwa tsatá tsa makwa ya, ká ka nda mbazata ni ma kuma guli. Ma rwuta i da ni nda ma ni, ka klaftá Murduhay ka makwa ni.

8 Manda dgiŋta lu ta tsa zlahu mna mgham ya kay, ka tsəkanatá lu ta ndəghata daghala kuʼaha ma vli nda ŋa nda matsaka huzlu ma Susaŋ, ma dzva Hegay. Ka kladaghatá lu ta Asta mista sanlaha guli da həga ga mgham. Ka nghə tsa Hegay mnda ngha miʼaha ya ta həŋ. 9 Ka laghu tsa daghala makwa ya da fləma Hegay, ka mutsaftá tsi ta zɗaku da tsi. Ka gi hlanaftá tsi ta inda huzla ŋa rka ni nda ya ŋa zay ni. Ka hlanaftá tsi ta kurɗuha ndəfáŋ ka daghali ka daghali ɗagap lu ma həga ga mgham. Ka klaghatá tsi kawadaga nda tsa kurɗuha ya da sana ŋərma dzuguvi ta fila miʼaha. 10 Mnaŋ a Asta ta mndəra taŋ la Yahuda wu, kabga yaha ka dá mnay ka Murduhay nda tsi. 11 Inda fitik Murduhay ta lagha wawavata ta kəma daɓi tgha həga miʼaha. Ta kumay ta snaŋta ka kinawu nzakwa Asta, ka nu ta mag lu nda tsi.

12 Tsa kuʼaha ta fila nzakwa miʼaha ya ná, dzaʼa maga maga həŋ ta vaku təŋ ta paya vgha ka rka manda ya mnanaf lu ta miʼaha. Tili mkuʼ dzaʼa magata həŋ ta masa rɗa mur ka urdi. Tsa pɗakwa tili mkuʼ ya guli ná, urdi nda skwiha rka miʼaha ta mag həŋ. Tahula tsaya, ŋa dzaʼa taŋ da mgham Ahasverus dər wa nda fitika ni nda fitika ni. 13 Ka sliʼaf sliʼa makwa ma tsa fila miʼaha ya ka dzaʼa da mgham, inda skwa rka ya ɗawaŋ tsi ta vlaŋ vla lu, ŋa dzaʼa ni nda tsi. 14 Ŋa sliʼafta tsa makwa ya ga hawu, ka dzaʼa da mgham. Ga sərɗək, ŋa saba ni ka laghu da sana fila miʼaha ta nghə Saghasəgaz mapsla mgham ta ngha miʼa sanagha ya. Ta haɗ tsa makwa ya ta ləglami da mgham wu, ba ka zɗəgana zɗa tsi ta mgham kasiʼi, ka hgaŋ nda hga a mgham ta tsa makwa ya nda hga ni.

15 Ma sana fitik, ka sagha fitika Asta makwa Avihayil dasliʼiŋa Murduhay ta klafta ka makwa ni ya. Ka sliʼaftá tsi ŋa dzaʼa da mgham. Ɗawaŋ a ta sana skwi wu, ba skwi ya mnana Hegay mapsla mgham ta ngha miʼaha yeya. Ka mutsaftá Asta ta zɗaku da inda mndu ta nghaŋta. 16 Ta mandəfáŋa vakwa mgham Ahasverus ta pala, ma tila maghwaŋ tila Tevet, ka kladamtá lu ta Asta da mgham, da həga ga mghama ni. 17 Ka ɗvutá mgham ta Asta ka malaghutá tsa hamata miʼaha ya kay. Ka mutsutá tsi ta zɗakatahuɗi nda zɗakwa ni ta kəma ni, ka malaghutá inda tsa hamata kuʼaha ya. Ka klaftá tsi ta gwambar ga mgham ka fanamta ma ghəŋ, ka nzakw tsi ka markwa taŋ ka mgham ma vla Vasti. 18 Ka maganatá mgham ta skwa zay dagala ta inda mnduha ni ka mali ka mali, nda kwalvaha ni. Tsa skwa zay ya ná, ŋa ga maghurba Asta nzakwa ni. Ma tsa fitik ya, ka mbiʼanaptá tsi ta vgha ta mnduha ta inda haɗikha nda pla dzumna. Ka mbahatá tsi ta mnduha ka muvla mamgham mgham.

Mbanafta Murduhay ta mgham

19 Ta tskəglanatá lu ta daghala kuʼaha ka mahis ná, mutsaf mutsa Murduhay ta vla nzaku ta wa tgha ga mgham. 20 Asta ya tani, mnaŋ a tsatsi kazlay makwa mndəra la Yahuda yu kəʼa wu, kabga mnana mna Murduhay kazlay yaha ka da mnay kəʼa. Ka snatá tsi manda va ya ma fitika glanafta ni.

21 Ma tsa fitik ya, ta nzaku Murduhay ta wa tgha ga mgham, ka lagha sana mapslaha his ta ngha wa tgha, i Bigtaŋ nda Teres. Ka zbə həŋ ta tva dzatá mgham Ahasverus, kabga ɓasanava ɓasa həŋ ta ŋuɗuf. 22 Ka snaŋtá Murduhay, ka lagha tsi mnanatá Asta, markwa mgham, ka mnanatá Asta ta mgham guli nda hga Murduhay. 23 Tahula psaptá tva ni, ka tsatsaftá lu ná, manda va tsaya nzakwa ni. Ka dzagwuŋtá lu ta tsa mapslaha ya his his ta udzu. Ka vindamtá lu ta tsa skwi ya ma ɗelewera rusa skwi ta maguta ma ga mgham ta kəma mgham.