Asta 1

Asta

Skala rfu ga mgham

1 Ma fitika gay Ahasverus^ª ta mgham ta ghəŋa haɗikha dərmək nda hisambsak ndəfáŋ mida, sliʼafta ni daga ma Hindiya ha ka lab da Kus^ª, luta na gwaɗa na. 2 Ma tsa fitik ya, ta nzaku mgham Ahasverus ta dughurukwa ga mghama ni ma vli nda ŋa nda matsaka huzlu ma luwa Susaŋ. 3 Ta mahkəna vakwa ni ta pala, ka magatá tsi ta skwa zay gagaʼ, ŋa inda mnduha ni ka mali ka mali, nda kwalvaha ni. Ka tskanatá tsi ta kəma ni ta maliha sludziha ma Persiya nda ya ma Mediya, nda gwal dagala dagala, nda guvnaha ta ghəŋa haɗikha ni. 4 Ka maranaŋtá tsi ta həŋ ta glakwa inda skwa gadghəla ga mghama ni, nda glakwa sgita ni ma fitik dərmək nda tghas mbsak.

5 Manda hɗatá tsa fitik ya, ka magəglatá tsi ta skwa zaya badawa ma daɓa kawgal ma həga ga mgham ŋa inda hamata mnduha ma vli nda ŋa nda matsaka huzlu ma luwa Susaŋ ka fitik ndəfáŋ, sliʼafta ni ta la galata mndu nduk nda gwal nda hta. 6 Ka habagatá lu nda tɓaŋ ka liŋ kulefeɗ ka ŋusliŋ, nda ya ka dva ghuz ta wupayha ka liŋ ka ŋusliŋ, nda ya ka kubwalkubwal ta gidaŋha ka kfura tsedi, ta guguɗi ka pala kɗiŋizliŋ. Ka paghatá lu ma daɓa tsa həga ya ta dughurukwa dasu nda slara nda slara, nda ya ka kfura tsedi ta fifiɗatá klamha palaha kavghakavgha ɗina ka nghay, ka ghuvazwaŋ ya, ka ŋusliŋ ya, ta wuɗaku ya, ka ŋəra ya. 7 Ma leghwaha ka dasu kavghakavgha tsata həŋ ta zaka lu ta skwa say ŋa mnduha. Zwaku zwaka diŋta mgham ta tsa ghuzu ya, ka vliŋta ka mamgham mgham. 8 Dər wa tsi, say ni manda ya kumaf maya ni, ka lu mnata, kabga mantsa ya mnanafta mgham ta inda kwalvaha ma həga ga taŋ, ŋa magay taŋ manda ya kumaf maya mndu, 9 ta magatá Vasti markwa mgham guli ta skwa zay gagaʼ, ŋa miʼaha ma həga ga mgham Ahasverus.

Kwalaghuta Vasti markwa mgham ta gwaɗa mgham

10 Baɗ mandəfáŋa fitik, tutá ŋuɗufa mgham da rfa satá ghuzu tama, ka mnanatá mgham Ahasverus nda mnduha ndəfáŋ ka mapsla^ª ta maganatá slna, i Məhumaŋ, nda Biztaʼ, nda Harvunaʼ, nda Bigtaʼ, nda ya nda i Avagtaʼ, nda Zetar, nda Karkas 11 ŋa hgəganaghatá Vasti, markwa taŋ ta kəma ni, nda watá gwambara markwa mgham ma ghəŋ, ŋa maranaŋtá ɗinakwa ni ta mnduha, nda ya ŋa mnduha mgham ka mali ka mali, kabga nda mbaza ma kuma. 12 Lagha tsa mapslaha ya da mnanata manda ya mnaf mgham, ama ka kwalaghutá Vasti, markwa mgham ta lagha. Ka ɓasaftá mgham ta ŋuɗuf katakata, ka gufaftá ŋuɗufa ni.

13 Ka gwaɗganatá mgham ta gwal nda ɗifil ma ghəŋa taŋ, gwal nda sna ta skwi, ka ɗawaŋtá hiɗaku da həŋ, kabga inda skwi ta nghanatá mgham ná, gwal ka mbirim ma snaŋtá zlahu, nda tva nzaku ta payay. 14 Gwal ta nzakway hɗeka hɗeka nda mgham ná, tsaha ya i Karsenaʼ, nda Setar, nda Admataʼ, nda Tarsis, nda Meres, nda Marsenaʼ, nda Memuhaŋ. Tsaha ndəfáŋ ya, mnduha mgham ka mali ka mali kulaŋ lu ma Persiya nda Mediya faf mgham ta ghəŋ, hahəŋ gwal kəma ma tsa ga mgham ya. 15 Ka mgham nda həŋ mantsa: « Iʼi, mgham Ahasverus, ghunaf ghuna yu ta mapslaha ɗa da mnanatá skwi ŋa magay Vasti, markwa mgham, ka kwalaghutá tsi ta snata. Kinawu ka zlahu ta mnay ta ghəŋa skwi ŋa magay ŋa ni na? » kaʼa.

16 Ka Memuhaŋ ta kəma mgham nda mnduha mgham ka mali ka mali mantsa: « Ŋa mgham nda ghəŋa ni yeya a ganata Vasti markwa mgham ta dmaku wu, ama nduk nda ya ŋa inda mnduha mgham ka mali ka mali tani, nda inda mndəra mnduha ma inda haɗikha mgham Ahasverus tani. 17 Mantsa tama, tsa skwi maga markwa mgham ya ná, dzaʼa slram slra da sləməŋa inda miʼaha, dzaʼa tsaghu tsa həŋ ta zəʼalha taŋ. “Ya hgigiɗaghawa Vasti markwa mgham, ka mgham Ahasverus ní, kwalaghu a ra, ka həŋ dzaʼazlay.” 18 Daga gita, gwal ka kwagha mgham ka miʼaha ma Persiya nda Mediya ta snanaghatá na skwi maga markwa mgham na ná, dzaʼa sliʼaf sliʼa həŋ da mnay ŋa mnduha mgham ka mali ka mali, ŋa magay hahəŋ guli manda va tsaya, ŋa zəʼalha taŋ. Dzaʼa klak kla ta ɓasa ŋuɗuf, nda ga sidi, dzaʼa kwal kul kɗavata. 19 Mantsa tama, ka zɗəgana zɗa tsi ta mgham katsi, ka fa fa tsi ta zlahu ta sab da tsatsi, ka vindamta lu mataba zlahuha Persiya nda Mediya, ŋa kwal kul mbəɗanafta, ŋa kwala Vasti ləglami ta kəma mgham Ahasverus. Ka klafta mgham ta sgita ga mghama Vasti ka vlaŋtá sani ta malaghutá tsatsi. 20 Tsa zlahu dzaʼa fata mgham ŋa vindafta ya ná, ŋa mbəl snanamtá inda mnduha ma inda glakwa zlambaka ga mghama ni. Dzaʼa vlaŋ vla inda miʼaha ta sgit ta zəʼalha taŋ dər mndu dagala tsi, dər mndu nda hta a tsi, » kaʼa.

21 Ka zɗəganatá tsa gwaɗa ya ta mgham nda inda mnduha mgham ka mali ka mali. Ka magatá mgham manda va tsa mna Memuhaŋ ya. 22 Ka tsaghanaftá mgham ta ɗelewer ta inda haɗikha ta gə tsi ta mgham ta ghəŋa taŋ, nda vindi ta vində lu ma tsa haɗikha ya, nda ya nda gwaɗa ta gwaɗ mndəra mnduha ma tsa haɗikha ya vivindanafta tsi ta həŋ. « Ka ga inda zəʼala həga ta zəʼala həga ma həga ni, ka gwaɗa tsi ta gwaɗa da ni guli, » kaʼa.