Vlaŋta Haman tkweʼ ta sgit ta Murduhay
6
1 Ta tsa rviɗik ya, faf a mgham ta hani ta iri wa. « Klaɗikwa ɗelewerha vivindam lu mida ta skwiha ta magaku, » kaʼa. Ka dzaŋafta lu ta kəma mgham. 2 Ka slanaghatá lu ta vinda ta skwi ta ghəŋa Murduhay ta mnaŋtá skwi kinawu ka i Bigtaŋ nda Teres gwal his ka mapslaha mgham ta ngha wa tgha lami da həga ga mgham, si ta zba tva dzatá mgham Ahasverus ya. 3 Ka mgham mantsa: « Nahgani vlaŋ lu ta Murduhay ŋa vlaŋtá sgit ta kəma mnduha, ŋa nisəla skwi maga tsi na? » kaʼa. Ka kwalvaha ta ksanatá slna ta mgham mantsa: « Haɗ sana skwi vlaŋ lu wu, » ka həŋ.4 Ka mgham mantsa: « Wana ta daɓi tgha na na? » kaʼa. Tsaw lagha la Haman ta daɓi tgha nda mabli ma həga ga mgham, da mnay ŋa mgham, ka dzugwuŋta lu ta Murduhay ta tsa udzu payanaf tsi ya. 5 Ka duhwalha mgham nda tsi mantsa: « Waʼa Haman ta sladu ta daɓi tgha, » ka həŋ. Ka mgham mantsa: « Ka sam sa tsi, » kaʼa. 6 Ka lam Haman. Ka mgham nda tsi mantsa: « Nu ta raku ŋa maganatá mndu ta kum mgham ta vlaŋtá sgit na? » kaʼa. Ka Haman ma ŋuɗufa ni mantsa: « Ka si ta ndanay mgham ta ŋlanaftá sana mndu katsi ná, ba va iʼi a ra! » kaʼa. 7 Ka Haman nda mgham tama mantsa: « Ka si ta ndanay mgham ta vlaŋtá sgit ta mndu ta zɗəganata katsi ná, 8 klafta ni ta lgut ya ta suɗ mgham, nda plis ya ta ŋlə mgham, wanam lu ta tsa plis ya ta gwambara ga mgham ma ghəŋ. 9 Ka klafta lu ta tsa lgut ya, nda tsa plis ya, ka vlaŋtá sani mataba mnduha mgham ka mali ka mali, mndu ya kulaŋ lu, ŋa suɗanavatá tsa mndu ta kum mgham ta vlaŋtá sgit ya, ka fafta ta tsa plis ya, ka waway ta badawaha ma luwa ka dzaʼa nda hla wi ta kəma ni: “Manda nana ta maga lu ŋa mndu ta vlaŋta mgham ta sgit,” » kaʼa.
10 Ka mgham nda Haman mantsa: « Sliʼaf sliʼa misimmisim, klaf kla ta lgut, nda plis, manda va ya mna ka, ka maganata ka ta Murduhay la Yahuda ta nzaku ta wa tgha ga mgham ya. Yaha ka da htanaghuta sana skwi ma tsa skwiha mna ka ya, » kaʼa. 11 Ka klaftá Haman ta lgut, nda plis. Suɗanavaha ta tsa lgut ya ta Murduhay, fafha ta plis ka waway ta badawaha ma luwa ka dzaʼa nda hagaku ta kəma ni: « Manda nana ta maga lu ŋa mndu ta vlaŋta mgham ta sgit, » kaʼa. 12 Tahula tsa, ka vraktá Murduhay ta wa tgha ga mgham, ta laghu Haman misimmisim dzagha ni, ka mbsamtá ghəŋa ni da ksata ni da hula. 13 Ka rusanaftá Haman ta markwa taŋ Zeres, nda inda graha ni ta inda skwi ta slanaghata. Ka tsa graha ni ta vlaŋtá hiɗaku, nda markwa taŋ Zeres ya nda tsi mantsa: « Tsa Murduhay zlraf lu ta vragaghata ta kəma ni ya ná, haɗ sana skwi dzaʼa lavəgliŋta kagha ta maganata wa. Ama, dzaʼa kɗay ka kahwathwata ta vraganatá ghəŋ ta kəma ni. Tsatsi ná, la Yahuda ya, » ka həŋ. 14 Tata tsa gwaɗa ya həŋ nda tsi, ka lagha mapslaha mgham da pghaftá Haman misimmisim da za skwa zay payaf Asta.