Gwal ta vradafta da Ursalima kawadaga nda Izra
8
1 Wya mbəɗatá hga zəʼala həga ma mndəra mndu ta sliʼafta kawadaga nda iʼi ma Babila, ma fitika nzakwa mgham Artahsasta. 2 Gersum ta sabi ma mndəra la Pinhas. Danyel ta sabi ma mndəra la Itamar. Hattus ta sabi ma mndəra la Dawuda, 3 tekw tsatsi mataba zwana Sekaniya. Zakari ta sabi ma mndəra la Parus, dərmək nda hutaf mbsak zgwana vindaf lu ta həŋ ta safi mista ni. 4 Iliyuhenay zwaŋa Zərahya ta sabi ma mndəra la Pahatmuwav, his dərmək zgwana ta safi kawadaga nda tsi. 5 Sekaniya zwaŋa Yahaziyel ta sabi ma mndəra la Zattu, hkən dərmək zgwana ta safi kawadaga nda tsi. 6 Ibed zwaŋa Yunataŋ ta sabi mataba mndəra la Ghadiŋ, hutaf mbsak zgwana ta safi kawadaga nda tsi. 7 Yesaya zwaŋa Ataliya ta sabi mataba mndəra la Ilam, ndəfáŋ mbsak zgwana ta safi kawadaga nda tsi. 8 Zəbadiya zwaŋa Mikaʼel mataba mndəra la Səfatiya, tghas mbsak zgwana ta safi kawadaga nda tsi. 9 Ubadiya zwaŋa Yehiyel mataba mndəra la Yuwap, his dərmək nda ghwaŋpəɗ tghas zgwana ta safi kawadaga nda tsi. 10 Səlumit zwaŋa Yusifiya mataba mndəra la Bani, dərmək nda mkuʼ mbsak zgwana ta safi kawadaga nda tsi. 11 Zakari zwaŋa Bebay mataba mndəra la Bebay, hisambsak tghas mida zgwana ta safi kawadaga nda tsi. 12 Yuhanaŋ zwaŋa Hakkataŋ, mataba mndəra la Azgad, dərmək nda ghwaŋ zgwana ta safi kawadaga nda tsi. 13 I Ilifela nda Yaʼyel, nda Səmaʼaya, hahəŋ hkən ya kɗavata ni mataba mndəra la Adunikam, mkuʼ mbsak zgwana ta safi kawadaga nda həŋ. 14 Nda i Utay nda Zakkur, ta sabi mataba mndəra la Bigvay, ndəfáŋ mbsak zgwana ta safi kawadaga nda həŋ.Vra Izra da Ursalima
15 Ka tskanatá yu ta tsa mnduha ya ta wa zala ta dzaʼa təv Ahava. Ka fatá ŋni ta ghuɓu, ka zatá ŋni ta fitik hkən hada. Ka fata yu ta iri ka vitsa hamata mnduha nda gwal ta dra skwi ŋa Lazglafta tani, sew ngha a yu dər turtuk ta la Levi wa. 16 Mantsa tama, ka hagaftá yu ta i Iliʼezer, nda Ariyela, nda Səmaʼaya, nda Ilnataŋ nda Yarib, nda Ilnataŋ, nda Nataŋ, nda Zakari, nda Məsulam, nda gwal his ta tagha skwi ŋa mndu, i Yuyariv nda Ilnataŋ. 17 Ka ghunaftá yu ta həŋ ŋa dzaʼa taŋ da mnanatá gwaɗa ta Iddu mghama Kasifiya. Ka mnanaftá yu ta həŋ ta gwaɗa dzaʼa həŋ da mnanatá Iddu nda ya ŋa zwana ma ni la kwalva ta ksa slna ma həga Lazglafta, gwal ma Kasifiya, ŋa hlaŋnakta taŋ ta kwalvaha ŋa ksa slna ma həga Lazglafta mu. 18 Zɗaŋnaŋ zɗa Lazglafta ta huɗi, ka klaŋnaktá həŋ ta Sereviya mndu nda sna ta skwi mataba mndəra la Mahli zivira la Levi, zwaŋa Israʼila, nda zwana ni nda ya nda zwana ma ni kawadaga nda tsi. Ghwaŋpəɗ tghas gwagwata həŋ. 19 Mantsa ya Hasavya guli kawadaga nda Yesaya mataba mndəra la Mərari, nda zwana ma ni nda zwana taŋ. Hisambsak gwagwata zgwana. 20 Mataba gwal ta maga slna ma həga Lazglafta, ya si zabaf i Dawuda nda gwal dagala dagala ta ksa slna mista ni, ŋa maga slna mista la Levi, his dərmək nda hisambsak gwagwata həŋ. Ka vivindaftá lu ta hga taŋ demdem.
21 Ta wa tsa ghwa Ahava ya, magama maga ta suma ŋa maraŋta hanata ghəŋa mu da Lazglafta mu, ŋa vlamata ni ta zɗakwa vgha ma mbaɗa mu, amu nda zwana mu nda ya nda huzlaha mu tani, ka yu. 22 Má dzaʼa ksay hula ta iʼi da mgham, ka má ta ɗawaŋtá yu ta sludziha nda gwal ta plis ta plis, má ŋa katá amu da ghuma ma mbaɗa mu ta tvi. Tsaw wya ka mu mnanatá mgham: « Ta katay Lazglafta mu ta inda mndu ya ta zbaŋta, ama dagala gatá sida ni nda gwal ta kwalaghuta. » 23 Ka mag ŋni ta suma ka ɗawa tsa katu ya da Lazglafta, ka snaŋnatá tsi.
24 Tahula tsa, ka ɗagaptá yu ghwaŋpəɗ his ta la maliha ta ghəŋa gwal ta dra skwi ŋa Lazglafta, kawadaga nda i Sereviya, nda Hasavya, nda zwana ma taŋ ghwaŋ kawadaga nda həŋ. 25 Ka garanaftá yu ta həŋ ta ɗukwata kfura tsedi nda dasu, ŋa həga Lazglafta mu, nda inda huzlaha vla i mgham nda gwal ta vlaŋtá hiɗaku, nda gwal dagala dagala ta ksanata slna tani, nda ya vla inda la Israʼila tani. 26 Ka fanamtá yu ta həŋ ma dzvu ta kiluʼa kfura tsedi dəmbuʼ hisambsak his mida, nda kiluʼa huzlaha ka kfura tsedi, dəmbuʼ hkən nda fwaɗ dərmək, nda kiluʼa dasu dəmbuʼ hkən nda fwaɗ dərmək, 27 hisambsak kliwtirha guli ka dasu, tsaya ta klaftá mbsaka tseda dasu dəmbuʼ, nda sigaha his ka ghuva tili ta wuɗaku ta wuɗaku manda siga dasu. 28 Tahula tsa, ka yu nda həŋ mantsa: « Nda nza kaghuni ŋa maga slna Yawe, nda nza na huzlaha na guli ŋa maga slna ni. Tsedi nda dasu ya guli, mbəhu nda ɗvay ŋuɗuf tsaya ŋa Yawe, Lazglafta dzidzíha ghuni. 29 Ka ngha kuni ɗina, ha ka ɓhadaghata ghuni da Ursalima. Hada guli, ŋa garafta ghuni ta wa ira la mali ta ghəŋa gwal ta dra skwi ŋa Lazglafta, nda la Levi, nda maliha mataba mndəra la Israʼila, ma Ursalima ma dzuguviha ma həga Yawe. » 30 Mantsa tama, ka hlaftá gwal ta dra skwi ŋa Lazglafta, nda la Levi, ta inda tsa skwiha garaf lu, tsedi, nda dasu, nda huzlaha ya, ŋa klay da Ursalima da həga Lazglafta mu.
Ɓhadaghata Izra da Ursalima
31 Ka sliʼaftá ŋni ta wa ghwa Ahava baɗ maghwaŋpəɗ his ma tila mataŋtaŋ, ŋa dzaʼa da Ursalima. Ma inda mbaɗa mbaɗ ŋni, faŋnagha fa Lazglafta ta dzva ni ka katá aŋni da ghumaha nda gəndaha má dzaʼa zluʼatá aŋni. 32 Ka ɓhadaghata ŋni da Ursalima, ka mbiʼapta ŋni ta vgha hkən fitik. 33 Baɗ mafwaɗa fitik, ka garaftá ŋni ta tsa kfura tsedi, nda dasu, nda tsa huzlaha ya ma həga Lazglafta mu. Ka hlafta ŋni ka pghanamta ma dzvu ta mnda dra skwi ŋa Lazglafta ta nzakway ka Məreymut zwaŋa Uriya. Kawadaga Ilghazar zwaŋa Fine nda tsi, hada la Levi i Yuzabat zwaŋa Yəhusuwa nda Nuʼadiya zwaŋa Binnuwi guli ta vata həŋ. 34 Inda ni, ka mbəɗaftá lu ka garafta. Ka vindaftá lu nda vinda ta gwagwata ndəgakwa ni demdem.
35 Tsa gwal si hlagha lu ka mbraku ta vrakta ya ná, ka vlatá həŋ ŋa dray tsuh tsuh ŋa Lazglafta Israʼila ta lghəŋha ghwaŋpəɗ his ta inda la Israʼila, nda maŋazakha təmbay mbsak mkuʼ mida, nda slaɓalakwa tuwakha ndəfáŋ mbsak ndəfáŋ mida, nda dugzumha ghwaŋpəɗ his ŋa dray ŋa ɗawa pla dmaku. Ka dranaftá lu ta inda tsa riniha ya ta Yawe. 36 Ka snanamtá həŋ guli ta zlahuha ya mna mgham ŋa i guvnaha nda sanlaha ma gwal dagala dagala ta tsa haɗik ta ɓla ghwa nda təv dɗakwa fitik ya. Ka hinistá tsaha ya guli ta dzvu ta la Israʼila, mataba skwi ya ta nghanatá həga Lazglafta.