Izra 9

Kwalaghuta la Israʼila ta snatá gwaɗa

1 Manda kɗatá tsa skwiha ya, ka sagha gwal dagala dagala da mnihata. Ka həŋ mantsa: « Ta dgaghu a mnduha la Israʼila, nda gwal ta dra skwi ŋa Lazglafta, nda la Levi, ta vgha nda mnduha ta na haɗik na wa. Tata ksa saɗa manzakɗawaya skwi ta mag la Kanʼana, nda la Het, nda la Periz, nda la Yəbus, nda la Ghamuŋ, nda la Muwav nda la Masar nda ya nda la Amuru, ya həŋ. 2 Hlaf hla hahəŋ nda zwana taŋ ta kwagha na mnduha na ŋa miʼa taŋ. Ka laɓavaftá mndəra mndu nda ghuɓa nda mnduha ma na haɗik na. Ma maga tsa skwi ya ná, la mali nda gwal dagala dagala taŋtaŋa gwal ta zlrafta kwalaghuta ŋanatá zlahu manda ya ta raku, » ka həŋ.

3 Manda snaŋta ɗa ta tsa gwaɗa ya, ka kuhiŋtá yu ta dawra ɗa nda mayafa ɗa, ka kwitsə yu ta swidi ma ghəŋa ɗa, nda ghumay ɗa, ka nzatá yu tuʼuvuk katakata. 4 Ka sagha inda gwal ta ghudzaku da gwaɗa Lazglafta la Israʼila ta vata iʼi, ta ghəŋa gwaɗa ta tsa dmaku maga tsa gwal si hlagha lu ta vrakta nda iʼi tani ya. Ka nzatá yu tuʼuvuk ha ka lagha ta fitika vla skwa pla ghəŋ ta fitik hawu.

Ɗaway Izra ta pla dmaku da Yawe

5 Ma tsa fitika vla skwa pla ghəŋ ta fitik hawu ya, ka sab yu nda tsa rwatá vgha ɗa ya, ta nda tsa kwahatá lguta ɗa ya yu ta vgha, ka zləmbatá yu ta haɗik, ka tsəlɓata. Ka pghadaftá yu ta dzvu nda ta luwa təv Yawe, Lazglafta ɗa. 6 Ka yu mantsa:

« Lazglafta ɗa, nda kəɓa yu, nda ksa yu katakata da hula, laviŋ a yu ta walaŋta maraghaŋtá kuma ɗa wa. Lazglafta ɗa! kabga fərtu fərta dmakuha ŋni, laghu la ŋni guɗem dida, tskaf tska ta vgha ha ka lafi dikw ta luwa. 7 Daga ta dzidza ŋni ha ka sagha ta gita, dagala dmaku ga ŋni. Ta ghəŋa krughuvi ga ŋni, ka hlaftá lu ta aŋni nda mghamha ŋni, nda gwal ta dra skwi ŋa Lazglafta ŋni, ka vlaŋtá mghamha ta sana haɗikha, ka pslatá həŋ ta aŋni, ka hlaghatá aŋni, ka zatá həga ŋni. Ka pghaŋnaghatá həŋ ta hula manda va na gita na. 8 Ndanana, ŋa fitik kwitikw zlaŋnata ka Lazglafta ɗa. Kagha Yawe, Lazglafta ŋni ta zlaŋtá sanlaha ma aŋni nda zɗakatahuɗa gha, kəl sanlaha ma aŋni ka pɗata nda hafu, ka vrəglakta nzata ma haɗik gha nda ghuɓa na. Mantsa tama, kagha Lazglafta ŋni, ka tsaŋnamtá ka ta hɗits ma huɗi, ka zlaŋnatá ka sliʼef sliʼef sliʼef nda hafu ma ga vuʼa ŋni^*. 9 Aŋ mndani, vuʼa ŋni. Ama ma tsa ga vuʼa ŋni ya, zlaŋna a Lazglafta ŋni wa. Ka mbəɗanaftá ka ta mghamha ma Persiya ŋa zɗaŋnaŋ ta huɗi, ŋa zlaŋnata nda hafu. Tsaya dzaʼa kəl ŋni ka laviŋta bəglaghaftá həga, ka sliʼiglanafta həgaha si ta tasuta ŋa huzla aŋni ma Yahuda nda ya ma Ursalima.

10 Ndana tama Lazglafta ɗa, nu dzaʼa ŋni mnəgəlta ta ghəŋa tsa? Kwalaghu kwala ŋni ta snatá skwi mna ka, 11 ya mnaŋna ka nda ma wa kwalvaha gha la anabi. Ka ka mantsa: “Tsa haɗik dzaʼa lam da dzva ghuni ya ná, ghuɓa a wu, kabga ghuɓa a mndəra mnduha ta nzaku mida wa. Inda vli mida ranaf ra həŋ dikw dikw nda manzakɗawayha taŋ. 12 Yaha kuni da vla kwagha ghuni ŋa zwana taŋ, yaha kaghuni guli da kla kwagha taŋ ŋa zwana ghuni. Yaha kuni walaŋta kataŋtá həŋ ŋa katafta taŋ ta ghəŋa taŋ, nda ya ŋa nzata taŋ nda zɗaku. Tsaya tama ná, dzaʼa mutsay kuni ta mbraku, ŋa zay ghuni ta skwi zɗa zɗa ta tsa haɗik ya. Ŋa zay zivira ghuni ta həga ni ŋa ɗekɗek.” 13 Ari Lazglafta ɗa, inda ghwaɗaka skwi ta slaŋnaghata ná, slaŋnagha sla kabga vəl magata ŋni ta skwi kul ɗinaku, dagala krughuva ŋni. Tsaw kulaf a kagha ta sanlaha ma dmakuha ŋni wa. Ka zlanatá ka ta na aŋni na, nda hafu. 14 Mantsa tama ní, ta dzaʼa vrəglanaf vra ŋni ta kwalaghuta snatá skwi mna ka, ka laghwa ŋni da ndiʼiglaftá vgha nda ma kluvtá vgha nda mnduha ta na haɗik, ta maga manzakɗaway skwi ya na ra? Haɗ ka dzaʼa gaftá sidi nda aŋni ka zaɗaŋnata demdem kul haɗ ya ta ndapta ra? 15 Yawe, Lazglafta Israʼila, tɗukwa kagha, zlana zla ka ta sanlaha ma aŋni ka nzəglata nda hafu gitana. Wana ŋni kay guli ta kəma gha ta nda dmakuha ŋni haɗ mndu má si dzaʼa lavəgliŋtá sladata ta kəma gha nda mndərga tsa nzaku ya wa, » ka yu.