Izra 7

Laghwa Izra da Ursalima

1 Tahula luta tsa skwiha ya, ta fitika nzakwa Artahsasta mghama Persiya ta pala, ka sliʼaftá sana mndu ta hgə lu ka Izra. Izra ná, zwaŋa Səraya, Səraya zwaŋa Ghazarya, Ghazarya zwaŋa Hilkiyya, 2 Hilkiyya zwaŋa Sallum, Sallum zwaŋa Tsaduk, Tsaduk zwaŋa Ahituv, 3 Ahituv zwaŋa Hamariya, Hamariya zwaŋa Ghazarya, Ghazarya zwaŋa Məreymut, 4 Məreymut zwaŋa Zerahya, Zerahya zwaŋa Uzzi, Uzzi zwaŋa Bukki, 5 Bukki zwaŋa Avisuwagh, Avisuwagh zwaŋa Pinhas, Pinhas zwaŋa Ilghazar, Ilghazar zwaŋa Haruna ta nzakway ka mali ta ghəŋa gwal ta dra skwi ŋa Lazglafta. 6 Tsa Izra ya ná, saf ma Babila. Mnda tagha zlahuha ta sutá zlaha Musa vla Yawe, Lazglafta Israʼila ya. Ta vlaŋ vla mgham ta inda skwi ɗawaŋ tsi, kabga ta hula ni Yawe, Lazglafta ni. 7 Ta mandəfáŋa vakwa mgham Artahsasta ta pala, lafa sanlaha ma la Israʼila nda gwal ta dra skwi ŋa Lazglafta, nda la Levi, nda gwal fa laha, nda gwal ta ngha wa tgha, nda la kwalvaha ta ksa slna ma həga Lazglafta da Ursalima. 8 Ka ɓhadaghatá Izra kawadaga nda həŋ ma tila mahutaf ta mandəfáŋa vakwa mgham ta pala. 9 Mantsa tama, ka tsaftá tsi ta fitika sliʼafta tsi ma Babila baɗ taŋtaŋa fitik ma tila mataŋtaŋ. Ka ɓhadaghatá tsi da Ursalima baɗ taŋtaŋa fitik ma tila mahutaf, kabga ta hula ni Lazglafta kahwathwata. 10 Tsaw Izra ná, fa fa ta ghəŋa ni ka dzaŋa gwaɗa Yawe, ka ksa slna nda tsi, ka taghay ŋa la Israʼila ta inda tsa zlahuha ya nda skwiha mnaf lu.

Mbəɗinista Artahsasta ta gwaɗa mista Izra

11 Wya tsa ɗelewer vindanaf mgham Artahsasta ta Izra mnda dra skwi ŋa Lazglafta, mnda tagha zlahuha nda gwaɗaha mna Yawe ta nghanatá la Israʼila ya:

12 « Iʼi Artahsasta, mgham ta ghəŋa mghamha ta vinday ŋa Izra, mnda dra skwi ŋa Lazglafta, mnda tagha zlahuha, ta sutá zlaha Lazglafta ta luwa guli ya, ta gaghagha ga yu ta zgu.^ª

13 Wya skwi ta mnata yu: Inda mnda Israʼila ma vli ta gə yu ta mgham, nda mnda dra skwi ŋa Lazglafta, nda la Levi tani, nda hamata mnduha tani, ka ta kumay tsi ta dzaʼa da Ursalima kawadaga nda kagha, laviŋ lava ta dzaʼa. 14 Iʼi mgham ka ghəŋa ɗa kawadaga nda gwal ndəfáŋ ta vlihatá hiɗaku tani, ta ghuna kagha ta haɗika Yahuda nda ya da Ursalima. Ŋa nghay gha ka kinawu ká lu ta ksa slna nda tsa zlaha Lazglafta gha dzaʼa klafta ka ma dzva gha ya. 15 Ka kliŋta ka guli ta tsedi nda dasu, ya ta kum iʼi kawadaga nda gwal ta vliha ta hiɗaku ta vlaŋtá Lazglafta Israʼila ma Ursalima vla nzakwa ni ya. 16 Ka kliŋta ka guli ta inda hya hya tsedi, nda dasu dzaʼa tsuʼafta ka ta inda haɗika Babila, nda mbəhuha ya dzaʼa vlata i gwal dra skwi ŋa Lazglafta, nda hamata mnduha tani, manda ya ɗvaf ŋuɗufa taŋ, ŋa həga Lazglafta taŋ ma Ursalima. 17 Ɓhadaghata gha da hada ya, ŋa dzawata gha nda tva ni manda ya ta raku ta lghəŋha, nda maŋazakha, nda slaɓalakwa tuwakha, nda inda nimaya, nda inda ya ta slranata nda slra ta dzaʼa kawadaga nda həŋ. Ŋa vlata gha ta inda tsa skwiha ya ta gwira həga Lazglafta gha ma Ursalima. 18 Pɗakwa tsa tsedi nda dasu ya, ka nu skwi ya ta raku manda ya dzaʼa zɗəganatá Lazglafta ghuni ŋa magata ya, laviŋ lava kagha nda gwal ta ksə kuni ta slna, ta magata. 19 Tsa huzlaha dzaʼa vlaghata lu ŋa maga slna ma həga Lazglafta gha ya ná, ka pghata ka ta kəma Lazglafta ma Ursalima. 20 Ka mamu sana skwiha ta raku ta nghanatá həga Lazglafta, ka skwata ka, tseda mgham dzaʼa play.

21 Iʼi mgham Artahsasta, wya skwi ta mnata yu ŋa inda gwal ta ŋa tseda haɗik ta ɓla ghwa nda ta tva dɗakwa fitik ya: Ka nu skwi dzaʼa ɗawaŋta Izra mnda dra skwi ŋa Lazglafta, mnda tagha zlaha ta luwa ya, ka magata həŋ nda tva ni manda ya ta raku. 22 Ka klafta həŋ ta tsediha ka labi ta kiluʼ dəmbuʼ hkən, nda alkama ha ka labi ta kiluʼ dəmbuʼ hkən mbsak, nda ima inabi ha ka labi ta lita dəmbuʼ fwaɗ, nda rɗi ha ka labi ta lita dəmbuʼ fwaɗ, nda slughul manda ya ɗvaŋ həŋ guli, ka vlaŋta həŋ. 23 Inda skwi dzaʼa mnata Lazglafta ta luwa, ta nghanatá həga ni, magata manda va tsaya. Kada kwala ɓasa ŋuɗufa Lazglafta ta luwa lanaghatá vla ga mghama ɗa, nda zwana ɗa tani. 24 Skwi ta sgaghunaghata yu ta ghəŋa tsaha ya, haɗ lu dzaʼa ɗawa dzəmna, nda tiket, nda dzəmna həga da gwal ta dra skwi ŋa Lazglafta, nda la Levi, nda gwal ta fa laha, nda gwal ta ngha wa tgha, nda la kwalvaha, nda pɗakwa sanlaha ta maga slna ma həga Lazglafta wa.

25 Ama kagha Izra, manda ya vlagha Lazglafta ta ɗifila ni ya, ka pghamta ka ta gwal tsa guma, nda gwal dganatá gwaɗa. Ŋa tsa guma mataba inda gwal nda ta ɓla ghwa təv dɗakwa fitik ya, nda sna ta zlaha Lazglafta gha ya. Gwal kul snaŋtá tsa zlahu ya ná, ka taghanafta ka ta həŋ. 26 Tsa gwal dzaʼa kwal kul snatá zlaha Lazglafta gha, nda zlaha mgham manda ya ta raku ya ná, dzaʼa tsanagha tsa lu ta guma: Dər ŋa dzata nda dza tsi, dər ŋa ghəzliŋta ma luwa a tsi, dər ŋa plata ni ta bika a tsi, dər ŋa dzaʼa ni da gamak a tsi, » kaʼa.

Zləzləvanaghata Izra ta Lazglafta

27 Ka Izra mantsa: « Kagha Yawe, Lazglafta dzidzíha ŋni ŋa zləzləvay, kabga kagha ta famta ma ŋuɗufa mgham ta tva vlaŋtá sgit ta həga Yawe ma Ursalima. 28 Mariɗiŋ mara Yawe, Lazglafta ɗa ta zɗakwa ni ta wa ira i mgham, nda gwal ta vlaŋtá hiɗaku, nda inda gwal dagala dagala ta wanafta mgham tani. Iʼi, nda ufatá vgha ya vliha Yawe, Lazglafta ɗa, ka pərɗaftá yu ta tskanatá maliha mataba la Israʼila ŋa sliʼi kawadaga nda iʼi, » kaʼa.