Izra 6

Ŋlanaghata mgham Daryaves ta gwaɗa Kures

1 Mantsa tama, ka mnatá mgham Daryaves kazlay psawa psa ma vla tska ɗelewerha daga manda ghalya, ma vəl kəl lu tska skwa gadghəl ma Babila kəʼa. 2 Ka psaŋtá lu, ama ka slaftá lu ma huɗa luwa Hakmeta ŋam lu ma muhul ta haɗika Mediya, ta mbsatá ɗelewer. Wya gwaɗa vindaf lu tida:

3 « Ma taŋtaŋa vakwa mgham Kures ta pala, wya kaʼa mnata:

Tsa həga Lazglafta ma Ursalima ya ná, bəglafta ŋa nzakwa ni ka vla vla skwi ŋa pla ghəŋ. Ka vrəglanafta lu ta va tsa tughwa ni ŋa ghalya ya. Mkuʼ mbsak ta flugwi lafa ni ta luwa, mkuʼ mbsak ta flugwi bughwata ni guli. 4 Hkən ka lu dzaʼa paghatá ɓalala ratsatá pala, pal ɓalala lfiɗa matala. Ma akwata mgham dzaʼa zaɗa lu ta tseda tsa slna ya. 5 Ta ghəŋa tsa, tsa huzla ka dasu nda ya ka kfura tsedi, si ma həga Lazglafta, hlagaghu Nevuhadnetsar ma tsa həga Lazglafta ma Ursalima, ka hlagaghuta da Babila ya, vriŋta da vla taŋ ma həga Lazglafta ma Ursalima. Ka pghata ka ma həga Lazglafta.

6 Ndana tama, kaghuni i Tatnay ŋumna haɗik nda ta ɓla ghwa nda ta təv dɗakwa fitik, nda ya ŋa Setarbuznay nda gwal ta ksa slna ŋumna kawadaga nda kaghuni ta tsa haɗik ya, ma valam kuni dida. 7 Zlanawa zla ta la Yahuda, ka maga həŋ ta tsa slna ba həga Lazglafta ya. Ka baf ba guvna la Yahuda, nda la galata mndu mataba la Yahuda ta tsa həga Lazglafta ya, ta vla ni.

8 Wya skwi ta mnaghunata yu: Ka kataŋta kuni ta tsa la galata mndu mataba la Yahuda ya ma slna ba tsa həga Lazglafta ya. Nda tseda mgham tskaf lu ta dzəmna ta tsa haɗik ta ɓla ghwa ya, dzaʼa plata lu ta inda skwi dzaʼa zaɗiŋta həŋ. Ka nghapta kuni, yaha tsa slna ya da sladata. 9 Ka vla kuni ŋa taŋ ta ma makwa slaha, nda maŋazakha, nda slaɓalakwa tuwakha ŋa dray tsuh tsuh ŋa Lazglafta ta luwa. Ka vlaŋta kuni guli ta alkama, nda slughul, nda ima inabi, nda rɗi ta həŋ. Ka vla kuni inda fitik ta skwi ya nda ra dzaʼa ɗawaŋta gwal dra skwi ŋa Lazglafta ma Ursalima, yaha kuni da sɗa həŋ. 10 Mantsa tama, ŋa laviŋta taŋ ta dra skwa pla ghəŋ həlhəla ŋa Lazglafta ta luwa, ŋa ɗawa pla dmaku. Ŋa magay taŋ ta duʼa ta ghəŋa nzakwa i mgham nda zwana ni tani.

11 Wya skwi ta mnaghunata yu ta ghəŋa kwal kul snatá skwi ya mna yu: Ka kwalaghu kwala mndu ta snatá na skwi ta mnata yu ná, tsəhatá dzaʼuwa ta həga ga taŋ, ka dalamta ma haɗik, ka dzugwuŋtá tsa mndu ya tawa ni. Ka nanaftá həga ni ka vla tska ŋəɗak, kabga kwalaghuta ni ta snata. 12 Klah, ká Lazglafta ta maraŋtá ghəŋa ni ma Ursalima zaɗanatá inda mgham nda inda mndu ya dzaʼa walaŋta kwalaghuta snatá na gwaɗa ɗa na, ka zba dzaɓiŋta tsa həga Lazglafta ya. Iʼi Daryaves ta mnatá na gwaɗa na. Ka maga inda mndu manda va ya mna yu, » kaʼa.

13 Mantsa tama, ka snatá i Tatnay guvna tsa haɗik ta ɓla ghwa nda təv dɗakwa fitik ya, nda Setarbuznay nda gwal ta ksə həŋ ta slna, manda va tsa tsghanaf mgham Daryaves ta lwi ta həŋ ya.

Skala rfa kɗata batá həga Lazglafta

14 Ka kəɗ la galata mndu mataba la Yahuda ta maga tsa slna ba həga ya ta kəma ta kəma nda tsafarata vgha, manda ya mnana i anabi Hagay nda anabi Zakari zwaŋa Iddu ta həŋ. Ka kɗiŋtá həŋ ta baftá tsa həga ya manda va ya mna Lazglafta Israʼila, nda ya manda va ya mna i Kures, nda Daryaves, nda Artahsasta mghamha Persiya ya. 15 Ka kɗiŋtá həŋ ta baftá tsa həga ya baɗ mahkəna fitik ma tila hadar^ª ta mamkuʼ a vakwa mgham Daryaves ta pala. 16 Ka fata la Israʼila, ta nzakway ka gwal dra skwi ŋa Lazglafta, nda la Levi, nda ya nda inda mndu si hlagha lu ta həŋ ta vradaghata ya, ta fitika skalu nda rfa batá tsa həga Lazglafta ya. 17 Ŋa tsa skala rfa batá tsa həga Lazglafta ya, ka vlatá həŋ ta lghəŋha dərmək, nda maŋazakha his dərmək, nda slaɓalakwa tuwakha fwaɗ dərmək. Ka vlatá həŋ ta dugzumha ghwaŋpəɗ his, pal pal pal ta mndəra mndu ta mndəra mndu, ŋa ɗawa pla dmaku ta ghəŋa inda la Israʼila. 18 Ka fafatá həŋ ta gwal ta dra skwi ŋa Lazglafta ma ghuɓa slna taŋ, ka dagaptá həŋ ta la Levi guli ma ghuɓa taŋ, ŋa maga slna ma həga Lazglafta ma Ursalima, manda ya nda vinda ma deftera Musa.

Skala Pak

19 Ka skalu inda gwal ta vragaghata si hlagha lu ta həŋ ta Pak^ª baɗ ghwaŋpəɗ fwaɗ ma tila mataŋtaŋ. 20 Ka mbazaghutá inda gwal ta dra skwi ŋa Lazglafta, nda la Levi ta mbaza, ka nzatá həŋ ka gwal kul haɗ skwa tsaɗa ta həŋ. Ka han həŋ ta skwi ŋa skala Pak, ŋa inda gwal ta vrakta si hlagha lu ta həŋ, nda ya ŋa zwana ma taŋ gwal ta dra skwi ŋa Lazglafta, nda ya ŋa ghəŋa taŋ tani. 21 Mantsa tama, ka zə inda la Israʼila ta vrakta si hlagha lu ta həŋ ya ta Pak, kawadaga nda inda gwal ma tsa haɗik ya ta dgaghutá vgha nda gwal ta tsaɗ lu ŋa zba Yawe, Lazglafta Israʼila. 22 Ka skalu həŋ nda rfu ta skala buradi kul haɗ is mida. Ndəfáŋ fitika taŋ ta skalay. Ndəghanaf ndəgha Yawe ta ŋuɗufa taŋ nda rfu, kabga mbəɗanaf mbəɗa Yawe ta ŋuɗufa mghama Asur ŋa zɗanaŋtá huɗi ta həŋ. Tsaya ta ufanaftá vgha ta həŋ ŋa ba tsa həga Lazglafta, ta nzakway ka Lazglafta Israʼila ya.