Izra 5

1 Ama ma sana fitik, ka gwaɗganatá i anabi Hagay, nda anabi Zakari zwaŋa Iddu, ta la Yahuda ma Yahuda nda ya ma Ursalima nda hga Lazglafta la Israʼila ta nzakway ka Lazglafta taŋ. 2 Mantsa tama, ka sliʼaftá i Zurubabel zwaŋa Salatiyel, nda Yəhusuwa zwaŋa Yutsadak, ka zlraftá həŋ ta ba tsa həga Lazglafta ma Ursalima ya. Ka katə anabiha Lazglafta ta həŋ nda vlaŋtá mbraku ta həŋ.

3 Ma va tsa fitika zlrafta taŋ ta tsa slna ya, ka sliʼafta Tatnay guvna nda ta ɓla ghwa təv dɗakwa fitik, nda Setarbuznay nda gwal ta ksa slna kawadaga nda həŋ, ka lagha həŋ slanaghatá həŋ. Ka həŋ nda həŋ mantsa: « Wa ta vlaghunatá tvi ŋa ba na həga na, nda kɗaŋtá maga slna nda na huzlaha na na? 4 Mantsa tama, skwi ta mnaghunata ŋni na: Vlaŋnawa vla ta hga na mnduha ta maga na slna na, » ka həŋ.

5 Ama nda fa ira Lazglafta ta la galata mndu mataba la Yahuda. Haɗ mndu ta pyaftá həŋ ka kɗaŋtá maga slna taŋ wa. Tsghagha tsgha lu ta tsa gwaɗa ya karaku da Daryaves, ta kəzlay kəzlay lu ta vranaktá wuna wa ni.

Ɗelewer tsghanaf ghumaha la Yahuda ta Daryaves

6 Wya vindatá tsa ɗelewer vindaf i Tatnay guvna ta tsa ɓla ghwa nda təv dɗakwa fitik ya, nda Setarbuznay, nda gwal ta ksa slna ŋumna kawadaga nda həŋ ta tsa haɗik ya, ka tsghanaftá həŋ ta mgham Daryaves ya. 7 Wya ká həŋ vindanaftá tsa gwaɗa ya:

« Ari mgham Daryaves, ləŋləŋ ka ka!

8 Mgham ɗa! Ɗina ka snaghamta ŋni kazlay sliʼaf sliʼa ŋni ka lab ta haɗika Yahuda da nghanatá həga Lazglafta dagala kəʼa. Ka slanaghatá ŋni ná, ta baybay la Yahuda ta tsa həga ya nda raratsatá palaha dagala dagala. Ta pghay pghay həŋ ta matala ma muhul. Ɗasuwa nda tva ni ta maga həŋ ta tsa slna ya, kwats kwats nzakwa ni guli. 9 Mantsa tama, ka ɗawaŋtá ŋni da tsa la galata mndu ya, ka ŋni nda həŋ mantsa: “Wa ta vlaghunatá tvi ŋa ba na həga na, nda kɗaŋtá maga slna nda na huzlaha na na?” ka ŋni nda həŋ. 10 Ka ɗawaŋtá ŋni ta hga taŋ guli, kabga ŋa snaghamta ŋni, vindaghafha ŋni ta hga mnduha ka ghəŋ ta ghəŋa tsa slna ya.

11 Wya ká həŋ zlghaŋnaftá wa ni: “Aŋni gwal ta maganatá slna ta Lazglafta ŋa ni luwa nda haɗik ŋni. Ta vrəglanafta baftá na həga si kəɗiŋ mgham dagala ma Israʼila ta bafta daga ghalya na ŋni. 12 Ama ka dmanaftá dzidzíha ŋni ta Lazglafta ta luwa, kəl Lazglafta ka vlatá həŋ ŋa Nevuhadnetsar mghama Babila mnda la Kaldiya, ka sagha tsi tasiŋtá na həga na, ka hlaghatá mnduha da Babila. 13 Nziya nza tsi ná, ma taŋtaŋa vakwa Kures mghama Babila ta pala, ka vlatá tsa mgham Kures ya ta tvi ŋa bəglaftá na həga Lazglafta na.

14 Huzlaha ka dasu, nda ya ka kfura tsedi, si ma həga Lazglafta ma Ursalima ná, ka hlagaptá Nevuhadnetsar ma tsa həga ya ka laghu da pghamta ma həga Lazglafta ni ma Babila. Ka hligiŋtá mgham Kures ma tsa həga Lazglafta ma Babila ya, ka pghanamta ma dzvu sana mndu ta hgə lu ka Sesbatsar fam tsi ka guvna la Yahuda ya. 15 Nda mnanata kazlay na: Hla ta na huzla na, ka dzaʼa ka da pghamta ma həga Lazglafta ma Ursalima. Nda baftá tsa həga ya guli ta vla ni kəʼa. 16 Mantsa tama, ka sagha tsa Sesbatsar ya da Ursalima, thaftá tughwa tsa həga Lazglafta ya. Daga ma tsa fitik ya ha ka sagha ta gitana, ta baybay lu ta tsa həga ya, ama ta kɗa a wa.”

17 Ndana tama, ka si zɗəgana zɗa tsi ta mgham katsi, ka psaŋ psa lu mataba vindiha ŋa ghalya ma həga tska skwa mgham ma Babila. Ka si mamu gwaɗa mna mgham Kures ta nghanata bəglaftá həga Lazglafta ma Ursalima ya. Tahula tsa, ka tsghəgaŋnaghata mgham ta zlghata wa skwi ya kumaŋ tsatsi ta ghəŋa tsa ɗaway ya, » ka həŋ.