Ghumaha la Yahuda ta kuma sladanatá slna ba həga Lazglafta
4
1 Ka snaŋtá ghumaha la Yahuda nda Biŋyamiŋ kazlay waʼa tsa mnduha ta vragaghata ya kay ta bəgəltá həga Yawe, Lazglafta Israʼila kəʼa. 2 Ka lagha həŋ slanaghatá i Zərubabel nda la mali mataba mndəra mnduha, ka həŋ nda həŋ mantsa: « Ta kumay ŋni ta kataghunata nda ba na həga na. Aŋni guli ná, va na Lazglafta ta tsəlɓu kaghuni ŋa ni na ta tsəlɓu aŋni ŋa ni. Ta vlay aŋni ta skwa pla ghəŋ ŋa ni daga ka yawu hlagaŋnaghata Assarhadduŋ mghama Asur da na vli na, » ka həŋ.3 Ama ka i Zərubabel nda Yəhusuwa nda pɗakwa maliha mataba mndəra Israʼila nda həŋ mantsa: « Haɗ skwi ta guyaŋnafta nda kaghuni ŋa bay mu ta həga Lazglafta ŋni kawadaga wa. Aŋni nda ghəŋa ŋni dzaʼa baftá həga Yawe, Lazglafta la Israʼila manda va ya mnaŋna Kurets mghama Persiya, » ka həŋ. 4 Mantsa tama, ka ŋavata tsa mnduha ta tsa haɗik ya, ka psa tvi ŋa rwanatá vgha ta la Yahuda ŋa zlanata taŋ ta kɗaŋtá ba tsa həga ya. 5 Ka mbahatá həŋ ta gwal vla hiɗaku ŋa mgham ŋa zləmbiŋtá tsa slna taŋ ya. Mantsa ya ka həŋ magay ma inda tsa fitik gə na Kurets mghama Persiya ta mgham ya, ha ka lagha ta fitika ŋlafta Daryaves mghama Persiya guli ta pala.
Gruŋta la Yahuda ta fitika ga mghama Ahasverus nda Artahsasta
6 Lula vakuha tama, ma zlrafta mgham Ahasverus ta ga mghama ni, ka vindanaftá tsa ghumaha ya ta ɗelewera tsanavatá gwaɗa ta la Yahuda nda la Ursalima.
7 Lula vakuha guli, ma fitika nzakwa Artahsasta ka mghama Persiya, ka vindanaftá i Bisəlam nda Mitrədat nda Tavʼel, nda gwal ta ksə həŋ ta slna kawadaga nda həŋ, ta ɗelewer ta Artahsasta guli. Ka vindaftá həŋ ta tsa ɗelewer ya nda gwaɗa la Aram, ka mbəɗaptá həŋ guli. Wya ká həŋ vindafta nda gwaɗa Aramayeŋ:
8 Ka vindanaftá i guvna Rəhum, nda Simsay mnda vindi ta ɗelewer ta mgham Artahsasta ta ghəŋa Ursalima. Wya ká lu vindaftá tsa ɗelewerª ya:
9 « Iʼi guvna Rəhum nda Simsay mnda vindi, nda gwal ta ksa slna kawadaga nda aŋni, gwal ma Diŋ, nda Afarsatak, nda Tarpel, nda Afaras, nda Uruk, nda Babila, nda Susaŋ, nda Deha, nda Ilam, 10 nda sanlaha ma mnduha hlagagha Asnapar mgham klu lu, ka pghatá həŋ ma luwaha la Samari nda pɗakwa sana vliha ta tsa haɗik ta ɓla ghwa nda təv dɗakwa fitik ya. »
11 Ndana tama, wya tsa ɗelewer vindaf həŋ ya:
« Ari mgham Artahsasta, aŋni kwalvaha gha gwal ta ɓla ghwa nda təv dɗakwa fitik ta vindaghafta. 12 Rvera ɗa, wya skwi ta kum ŋni ta snaghamta: Wana na la Yahuda ta sliʼafta da kagha ka safi da aŋni ma Ursalima ná, ta bəgəlta na luwa kul haɗ ghuya ni ta mndu, ta sidi ya. Ta baybay həŋ ta muhula ni ta hula payafta taŋ ta tughwa ni.
13 Rvera ɗa, skwi ta kum ŋni ta snaghamta na: Ka bəglaf ba lu ta na luwa na, bafha lu ta muhula ni katsi ná, haɗ həŋ dzaʼa pləgəltá dzəmna nda tiket, nda dzəmna həga wa. Dazlay ta kəma ná, dzaʼa htavaghu hta gadghəl ma ga mghama gha. 14 Ndanana, manda na mutsafta aŋni ta zɗaku ta ksanatá slna ta mgham na ná, rəgla a nghay aŋni ta skwi dzaʼa pghanaghatá hula ta mgham wa. Tsaya kəl ŋni ka tsghaghaftá na ɗelewer na ŋa snaghamta. 15 Mantsa tama, laviŋ lava ka ta pasaŋta ma ɗelewerha vivindaf mghamha ta luta daga ghalya. Ma tsa ɗelewerha ya ná, dzaʼa slanagha sla ka ta gwaɗa ta ghəŋa Ursalima kazlay na luwa kul haɗ ghuya ni ta mndu ya kəʼa. Ta pghay ta hula ta ghəŋa mghamha nda guvnaha haɗik ya kəʼa. Daga ka yawu haɗ tsəna luwa na ta zlanatá pgha ghəŋ wa. Tsaya kəl lu si ka hwanzaɓiŋtá na luwa na. 16 Ta snagham sna ŋni mgham ɗa kazlay na, ka bəglaf ba lu ta tsa luwa ya, bəglafha lu ta muhula ni katsi ná, gəgəlta a kagha ta mgham ta na haɗik ta ɓla ghwa nda təv dɗakwa fitik na wu, » ka həŋ.
17 Wya ká mgham Artahsasta zlghanaftá wa ni ta həŋ:
« Ŋa i guvna Rəhum nda Simsay mnda vindi, nda ya ŋa pɗakwa gwal ta ksa slna kawadaga nda həŋ ta nzaku ma Samari nda pɗakwa haɗik ta ɓla ghwa nda təv dɗakwa fitik, ta gaghunagha ga yu ta zgu.
18 Tsa ɗelewer tsghəgiɗagha kuni ya ná, ka mbəɗapta lu ka dzaŋiɗifta. 19 Psiɗifwa psa, ka yu mnata. Ma tsa psay ya, ka slanaghatá lu ta vəl mnata kazlay na: Daga manda ghalya ta pgha ghəŋ tsa luwa ya nda mghamha. Ta kuktsay həŋ ta vli, ta glay həŋ ta ghəŋ. 20 Ghalya ma Ursalima ná, si mamu mghamha nda mbra nda mbra ta ga mgham ta ghəŋa inda tsa haɗik ta ɓla ghwa, nda ta təv dɗakwa fitik ya. Si ta play lu ta dzəmna, nda tiket, nda dzəmna həga ŋa taŋ. 21 Tsaya tama, mnanawa mna ta tsa mnduha ya ka zlanata həŋ ta maga tsa slna ya, ma bə lu ta tsa luwa ya, ba ta mnata ɗa. 22 Yaha kuni kwalaghutá magata. Kabgawu dzaʼa kəl lu ka magatá ghwaɗaka skwi ŋa pghanaghatá hula ta mghamha na? » kaʼa.
23 Na tsa gi dzaŋaftá skwi ma tsa ɗelewera mgham Artahsasta ya ta kəma i guvna Rəhum, nda Simsay mnda vindi, nda ya nda pɗakwa gwal ta ksa slna kawadaga nda həŋ, ka gi sliʼaftá həŋ misimmisim ka laghu da Ursalima slanaghatá la Yahuda. Ka mblaftá həŋ ka mbraku mbraku ta həŋ ka hlanatá tsa slnaha ya.
Vrəglanaftá ba həga Lazglafta
24 Mantsa tama, ka zlanatá həŋ ta tsa slna ba həga Lazglafta ma Ursalima ya. Ka sladanatá lu ha ka lagha ta mahisa vakwa Daryaves mghama Persiya ta pala.