Baftá gwira Yawe
3
1 Manda lagha ta tila mandəfáŋª, nda nza nzakwa la Israʼila ma luwa taŋ tama, ka tskavata həŋ nda dzratá ghəŋ ma Ursalima. 2 Ka sliʼaftá Yəhusuwa zwaŋa Yutsadak nda zwana ma ni gwal dra skwi ŋa Lazglafta, mantsa ya Zərubabel zwaŋa Səʼaltiyel nda la taŋ guli, ka zlrafta həŋ ta baftá gwira Lazglafta Israʼila, ŋa dra skwi tsuh tsuh, manda ya mna zlaha Musa, mnda Lazglafta. 3 Ka baftá həŋ ta tsa gwir ya ta tughwa ni ŋa ghalya, aŋ mndani, ta zləŋ həŋ da mnduha ta tsa haɗik ya. Ka vlə həŋ ta skwi ŋa dray tsuh tsuh tida ŋa Yawe nda ŋa sərɗək tani nda ŋa hawu tani. 4 Ka skalu həŋ ta skala dumbi manda ya nda vinda ma zlahu. Ka vlə həŋ inda fitik ta mbsaka skwi ŋa dray tsuh tsuh manda ya sladana lu. 5 Tahula tsa, ka gɗata həŋ ta vla skwi ŋa dray tsuh tsuh inda fitik, nda skwi ŋa dray inda nghafta tili, nda ya ŋa inda fitik ya fa lu ŋa skalu ŋa Yawe, nda skwiha ŋa dray ya ta vlata gwal ta vla mbəhu nda ɗvay ŋuɗufa taŋ, ŋa Yawe. 6 Mantsa tama, daga baɗ zlrafta taŋtaŋa fitik ma tila mandəfáŋ, ka zlraftá həŋ ta vla skwi ŋa dray tsuh tsuh ŋa Yawe. Aŋ mndani, dər má ta zlraf a lu ta thaftá həga Yawe wa. 7 Ka zlraftá həŋ guli ta vla tsedi ŋa gwal ta ratsa pala nda ya ŋa gwal ta fiɗa udzu nda mbra nda mbra. Ka vlə həŋ ta skwa zay nda skwa say, nda rɗi ŋa la Tsiduŋ nda la Tir, ŋa tsghəganapta tsaha ya nda ta drəf ta udza sedra daga ma Ləvanuŋ ŋa sagha da Yafu. Ka mag həŋ mantsa ya nda vlata mgham Kurets ma Persiya ta tvi.Thaftá mndəra həga Lazglafta
8 Ta mahisa vaku tahula vradaghata taŋ da vla həga Lazglafta ma Ursalima, ma mahisa tili, ka zlraftá i Zərubabel zwaŋa Səʼaltiyel, nda Yəhusuwa zwaŋa Yutsadak, nda pɗakwa zwana ma taŋ gwal dra skwi ŋa Lazglafta, nda la Levi, nda inda gwal si hlagha lu ta həŋ ta vragaghata da Ursalima, ta maga slna. Ka zabaftá həŋ ta la Levi ta klaftá imi hisambsak ka laghwi ta kəma, ŋa nghanaghatá tsa slna ba həga Yawe ya. 9 Ka sliʼaftá Yəhusuwa nda zwana ni, nda zwana ma ni, nda Kadmiyel nda zwana ni, mataba mndəra la Yahuda, ka nzatá həŋ nda dzratá ghəŋ ŋa nghapta ka inda gwal ta maga slna ma həga Lazglafta. Ka kataŋtá la Levi ma mataba mndəra Henadad nda zwana taŋ, nda zwana ma taŋ ta həŋ ma tsa slna ya guli.
10 Ma fitika thay gwal ba həga ta tughwa tsa həga Yawe ya ná, ka hladaghatá lu ta gwal dra skwi ŋa Lazglafta, nda hbatá vgha nda lguta ksa slna taŋ, nda duli nda duli. Ka hladaghatá lu guli la Levi mndəra la Asaf nda hutsaŋ nda hutsaŋ ŋa zləzləvu taŋ ta Yawe manda ya mnaf Dawuda mghama Israʼila. 11 Wya ka həŋ ta fa tsa laha zləzləvu ya. Faha ya faha ya nda vlaŋtá glaku ta Yawe: « Ŋərma mndu na Yawe, ŋa ɗekɗek ta nzakwa zɗakwa ni ŋa la Israʼila, » ka həŋ. Ka hlə inda mnduha ta wi nda lili nda lili, ka fa laha, ka zləzləva Yawe, kabga ta thay thay lu ta tughwa həga Yawe.
12 Ama nda ndəgha gwal mataba gwal ta dra skwi ŋa Lazglafta, nda la Levi, nda la mali ma mndəra mnduha, ta nzakway ka halata mnduha, gwal si nda ngha ta nzakwa tsa həga ya ghalya, ta hlaftá wi ka taw, ma tsa fitik ta thə lu ta tughwa tsa həga ya ta wa ira taŋ. Nda ndəgha sanlaha ta hla wi nda rfu nda rfu guli. 13 Mantsa tama, snəgla a mnduha ta klatá ghəŋa tsa hla wi ta hlə lu nda rfu nda rfu, nda ya nda taw nda taw ta mag sanlaha ya wu, kabga fərtu fərta hlawa mnduha katakata, ta snaku diʼiŋ.