बगवंतन आनंद सीनल ताकना
4
1-2 ते इंके दादलिर-बायिक्निट!
येसु पर्बुना अदिकार्दे वेह्तङ आगेङ मीकुन टावा.
बहन ताक्तेके बगवंतल आनंद येतंतोर इंवल बोदा मा तोड्दे केन्चि, अहन ताक्सेर मंतिट.
अदेन साटि मिरट उंडे इचुर बक्तितगा बडे मासेर मुने सोंदना इन्जेर, येसु पर्बुन हिंदल आसि, ममोट मीकुन कोर्सेर मंतोम.
3 मिरट पवित्रा मंदना इत्तेके, लन्जेतनमनल लङ मंदना इंवले बगवंतना इचा.
4-5 बगवंतन करि किय्मकि वूर दुस्रोक जातिनुर पीर किय्वलिक आसने पिसेर मंदंतेर.
बति मिरट अहन पिस्वा.
मिरट मान-मर्यदते पिसना अनि सुदुड-पांदे मीवङ मेंदोलकुन मिरट जरब्ने इरना इंवले बगवंतना इचा.
6 इद गोस्टितगा बोरे गिर आयि तन सङा मंवल बक्तन पसि किय्वा.
बारितेके लन्जेतनम किय्वलिर सम्दिरकुन पर्बु सिक्सा कींतोर इन्जेर ममोट मीकुन मोदोले दम्कि सीतोम.
7 बगवंतल माकुन सुदुड-पांदे पिस्लेके केय्तोर बति, लन्जेतनम कीसेक पिस्ले केय्मकि.
8 अदेन साटि, इद बोदतुन वोपोर वोर मायनल माकुन आयो बति, मीकुन पवित्रा आत्मा सीतोर वोर बगवंतने, वोप्सेर सेलोर.
9 मी बरोबर्तुर बक्तलिरकुन पेर्मते सूडना इन्जेर मीकुन लिहि किय्वल जुरत सेले.
वोरोन वोरोर पेर्मते सूडट इन्जेर बगवंतले मीकुन करुस्तोर.
10 अनि मीवा मासिदोनिया येरियतगा मंवलिर दादलिर-बायिक सम्दिरकुन मिरट करलेन पेर्मते सूड्सेर मंतिट.
तेर बति इद पेर्मते सूड्वडगा, उंडे अदिक बडे मासेर मुने सोंदना इन्जेर कोर्सेर मंतोम.
11 ममोट इदेन मुने वेह्तपिनय सांतिते पिस्ले कोसिद कीम्ट.
अनि कुद मिरट काया-कस्टम कीसेर दुस्रुरा जोलित सोंवक्ने पिसट.
12 अहन मीवा पिस्वल तरिका सूड्सि, दुस्रुर मीकुन मान सींतेर.
अस्के मिरट दुस्रुर पोरो आदर आसि मंवल जुरत सेले.
पर्बुना वाय्वडुन बारेते
13 दादलिर-बायिक्निट!
सातुर वूर बक्तलिर बारेता सतेम मिरट करियना इंवले मावा इचा.
इदेन हिंदल आसा सेल्वक मंवलिर दुस्रुर मोडि बेय दुक्सते मंविट.
14 येसु सासि-नेंड्तोर इन्जेर मरट बरोसा कींतट.
अह्ने येसुनगा बरोसा इर्तुर सातेके गिर, बगवंतल नेंडुसंतोर इन्जेर नमंतट.
15 पर्बुना गोस्टित पिय्सि मीकुन वेह्वल बतल इत्तेके, मरट पर्बु वानल पिसि मत्तेके, इदेन मुने सातुरकुन तेर मोदोले वोना चर्नते येवा पर्वट.
16 पर्बु स्वर्गनल रेय्सि वानेके, पेर्सोर दूतन सङा, अदिकार्दे वांतोर.
अस्के पेर्सोर दूतना आवज अनि बगवंतल नेकुस्वल तुरता आवज केन्जा वांतङ.
अद गट्कते किरिस्तुनगा बरोसा इर्सि सातुर वूर मोदोल नेंडंतेर.
17 अद आता पेजे, पिसि मंवलिर माकुन गिर, वूर बरोबर पोरो टेपनगा पर्बु वोंतोर.
अस्केडल मरट वोर पर्बुन सङा बस्केट मंदंतट.
18 अदेन साटि इव गोस्टिने वोरोन वोरोर गटि-दीर्या सीसेर मंट.