3
1 अदेन साटि ममोट सोसि किया पर्वा सोन्जि, येतेंस नगुडे सिरिप नना अनि सीलले मंदना इन्जेर निर्नय कीतोम.
2-4 मरट तक्लिब्क बोगे माय्वल मंता इन्जेर ममोट मी सङा मनेकेन वेह्तोम.
अहन वेह्ता तीरे जर्ग्ता इंवल मीकुन टावा.
अदेन साटि मा बरोबर मीरे मासि बगवंतना सेवा किय्वल अनि किरिस्तुना चोकोट्ना कबुर पचर किय्वल तिमोति दादन मिह्गा सारि कीतोम.
वोर मीकुन तक्लिब्क वानेके मीवा दिलतगा तकपिका आय्वक्ने गटि-दीर्या सींतोर अनि मीवा बरोसा बडे माय्ले मदत कींतोर.
बति ईतङ तक्लिब्क बोगे माय्लेके, मरट नेमे मातट इंवल गिर मीकुन टावय.
5 इद कारंतुन हिंदल नना उंडे अदिक सोसि किया पर्वा सोन्जि, उंदि मोका सय्तन मीकुन बह्कि कीतोरो बतलो, ममोट कीता काया-कस्टम येर्तम आसि सोडितयो बतलो इन्जेर, मीवा बरोसतुन बारेते करि किय्ले, तिमोतिन सारि कीतोन.
6 बति इंकेने तिमोति मिह्गटल मल्सि मह्गा वातोर.
मीवा बरोसतुन बारेते अनि पेर्मतुन बारेते चोकोट्ना कबुर पिय्सि वातोर.
अद बतल इत्तेके, मा बारेते मिरट बेय हेतु कीसेर मंतिट अले.
मीकुन सूडना इन्जेर माकुन बहंते जीवा आतयो, अह्ने मा पोरो गिर मीकुन बेय जीवा आसेर मंता अले इन्जेर वेह्तोर.
7 अदेन साटि दादलिर-बायिक्निट!
ममोट दुक्सङ अनि गंडल्क्नगा मनेके, मीवा बरोसतुन सूड्सि, मी बारेते माकुन वेले सांति-आनंद लाग्ता.
8 बारितेके मिरट पर्बुना बक्तितगा गट निल्सि मत्तेके, मावा जिन्गनि आसिर्वाद येत्वलिर आतपे.
9 मिह्गटल माकुन पुड्ता आनंदुन हिंदल, बगवंतन ममोट बचोर दनेवाद वेह्तेके गिर अद कमिय आंता.
10 मीकुन सूड्ले वकत पुटना इन्जेर, मीवा बरोसतुन उंडे इचुर बडि कियना इन्जेर मोकतुन साटि, रात-दिहा बगवंतन बर्पुर दिल्ते पार्तना कीसेर मंतोम.
11 मा बाबो बगवंतल अनि मा येसु किरिस्तु पर्बुये माकुन मिह्गा वाय्ले, सरि तेरियना इन्जेर कोरंतोम.
12-13 मा येसु किरिस्तु पर्बु तंवुर पवित्रा वालिर सम्दिर सङा वानेके, मा बाबो बगवंतन मुने, मीवा सुदुड-पांदा गोस्टितुन बारेते, बे-कसुर वालिर आसि मनल मीवङ दिलकुन सक्ति सियना.
अनि मी पोरो ममोट तोह्वल पेर्मा बहंते बडे मासेर मंतयो, अह्ने मी नड्डुम अनि पर्जा सम्दिर पोरो गिर मीवा पेर्मा बर्पुर बडे मानल, पर्बु मीकुन मदत कियना इन्जेर कोरंतोम!