तेसलोनिकतगा पव्लु कीता सेवा
2
1 मा दादलिर-बायिक्निट!
ममोट मिह्गा वाता काम येर्तम आय्मकि इंवल मीकुन टावये.
2 अदेन मुने पिलिपि नगुडे मावा हिजत तेंड्सि, दुक्सङ बोगे मानल कीतेर.
तेर बति इव सम्दोन सोसि कीसि, बगवंतना मदत्ने मीकुन येसुना चोकोट्ना कबुर दर्यम्ने बोदा कीतोम इंवडुन बारेते मीकुन टावये.
3 बहन इत्तेके, इद मा बोदा गल्तितेन आयि, सेलेके करब उदेस्नेन आयि, सेलेके मीकुन पसि किय्वल मंदेन आयि वेह्मकि.
4 बति बगवंतल तंवा चोकोट्ना कबुर पचर किय्ले, माकुन बरोसतुर आंदिर इन्जेर वोप्तोर.
अदेन साटि मा दिलकुन परिक्सा किय्वल बगवंतने आनंद सियना इन्जेर सूड्तोम.
बति माय्नलिरकुन आनंद सियना इन्जेर सूड्मकि.
5 ममोट बस्केन गोड गोड गोस्टिङ वड्क्मकि इंवल मीकुन टावा.
अनि मीवङ कोतन साटि ममोट बवे येसेल्क गिर वाट्मकि.
इदेन बगवंतले गवा मंतोर.
6 इदे आय्वा, ममोट किरिस्तुनुर अपोस्तुल्क आता काड्कि, मावङ जुरतकुन पूरि किय्ले मी पोरो वजन वाटनल हक मत्ता.
तेर बति अद हकुन वाडकम किय्मकि.
माय्नलिर सिय्वल इत्तेके मिरटे आयि, दुस्रुर आयि माकुन सिय्वल डगुर-पांदुन साटि ममोट सूड्मकि.
7 बति पाल उह्वल अवल तंवुर पसि-बाललिरकुन बहंते पोसि कींतयो, अह्ने ममोट किरिस्तुनुर अपोस्तुल्क आसि गिर, मी नड्डुम सादु-पान वालिर आसि मत्तोम.
8 मिरट माकुन वेले लाड्नुर आंदिट.
मी पोरो मंवल अद इस्टम्ने, बगवंतना चोकोट्ना कबुर वेह्वले आय्वा, मी साटि मावा परन सिय्ले गिर तयर मत्तोम.
9 हो, दादलिर-बायिक्निट!
ममोट बोगे माता तक्लिब अनि कस्टम मीकुन हेतुय मंता.
मीकुन बगवंतना चोकोट्ना कबुर वेह्नेके, मिह्गटल बोन पोरोन मावा वजन तोचुस्वक्ने, ममोट रात-दिहा काया-कस्टम कीसेर पिस्तोम.
10 बक्तलिर आय्वलिर मी नड्डुम ममोट बचोरो सुदुड-पांदे, नियत्ने, बे-कसुर वालिर आसि पिस्तोमो, अदेन मिरट अनि बगवंतल गिर गवा मंतोर.
11 बाबो तंवुर मरि-मियड सङा बहंते मंदंतोरो, अह्ने ममोट मी सम्दिर सङा मत्तोम.
12 मिरट बाव-बक्तिते बगवंतन आनंद सीनल पिसना इन्जेर, मीकुन जुल्मा कीसेर, सुम्जि कीसेर, दर्यम वेह्तोम.
वोर बगवंतले तंवा राज्नगा, मय्मतगा मिरट ईसा येतना इन्जेर मीकुन केय्सेर मंतोर.
13 बगवंतना कबुडुन मिरट मा तोड्दल केन्चि, माय्नलिरा बोदा इंवक्ने बगवंतनय बोदा आंद इन्जेर वोप्तिट.
इदेन हिंदल, ममोट बस्केट बगवंतन दनेवाद वेह्चेर मंतोम.
इद करलेन बगवंतना बोदा आंद.
बक्तलिर आय्वलिर मी रोपो अद काम कीसेर मंता.
14 बहन इत्तेके, दादलिर-बायिक्निट!
यूदया येरियतङ बगवंतना चर्चिनुर बक्तलिर, तम्वा यूदुल्क्ना जातितुरा केय्दे वेले तक्लिब्क बोगे मातेर.
अदे तीर्दे, मिरट गिर येसु किरिस्तुनुर लोकुर आता काड्कि, मी लोकुरा केय्दे अवेन बोगे मातिट.
15 वूर यूदुल्क येसु पर्बुन अनि पर्वक्तलिर्कुन जक्तेर.
वूर माकुन गिर बेय दुक्सा सीतेर.
बगवंतन वूर आनंद सियुर.
अनि पर्जा सम्दिरकुन गिर वूर उल्टा आसि मंतेर.
16 बहन इत्तेके, बचि किय्वल कबुडुन यूदुल्क आयुर वूरकुन वेहा सिय्वक्ने माकुन अड्डम आतेर.
इद तीर्दे तम्वङ पापकुन बडि कीसेर वातेर.
अनि आक्रित वूर पोरो बगवंतना सोङ रेय्ता.
पव्लु तेसलोनिकतुर साटि जीवा किय्वल
17 दादलिर-बायिक्निट!
ममोट मेंदोडा रूप्ने मिह्गटल जरसि कालम वेरि लङ मंतोम.
बति मावङ दिल्क्नगा मिरट करुमे मंतिट.
बेय आसते मीकुन सूडना इन्जेर वेले तीर्क्ने कोसिद कीतोम.
18 बति सय्तन माकुन अड्डम आतोर.
मिह्गा वायना इन्जेर माकुन मंता.
पव्लुना आय्वल नना बचोङो जोकङ कोसिद कीतोन.
19 बारितेके मावा आसा, कुसि अनि डगुर-पान मिरटे आंदिट.
मावोर येसु किरिस्तु पर्बु वाता पेजे, वोन मुने मी हिंदले गर्वते निला परंतोम.
20 माकुन अद डगुर-पान अनि आनंद पुट्ले कारन मिरटे आंदिट.