1वा तेसलोनिका 1

1वा तेसलोनिका

तेसलोनिकतुरकुन लिहि कीता मोदोडा चिटि

1 बाबो बगवंतनगा अनि येसु किरिस्तु पर्बुनगा बरोसा इर्सि ताक्वलिर तेसलोनिका चर्चितुर साटि पव्लु, सीलल अनि तिमोति इंवलिर इद चिटितुन लिहि कीसेर मंतोम. मीकुन बगवंतल तंवा अनि सांति सियिर.

तेसलोनिकतुर बक्तलिरा बरोसा

2-3 ममोट मी सम्दिर साटि पार्तना कीनेके, बगवंतन बस्केट दनेवाद वेह्‍चेर मंदंतोम. बारितेके बरोसते मिरट कीतङ कामकुन बारेते, पेर्मते मिरट किय्वल मदतुन बारेते अनि येसु किरिस्तु पर्बुन पोरो मंवल मीवा हाले मायो अद आसतुन बारेते केन्ज्तोम. इव सम्दोन पिय्सि, ममोट बाबो बगवंतना चर्नते बस्केट हेतु कीसेर मंतोम.

4 लाड्नुर मा दादलिर-बायिक्निट! बगवंतल मीकुन पेर्मा कीसेर मंतोर अनि तंवा साटि मीकुन नेमि कीतोर इंवल माकुन टावय. 5 बारितेके ममोट मीकुन चोकोट्ना कबुडुन आगम गोस्टिने बोदा किय्मकि. बति बगवंतना सक्तिते, , बर्पुर बरोसते बोदा कीतोम. मी साटि मी नड्डुम ममोट बहन पिस्तोम इंवल मीकुन टावये. 6 अनि पवित्रा आत्मा सिय्वल आनंद्ने मिरट वेले दुक्सनगा मनेके गिर, बगवंतना वचंतुन वोप्तिट. अनि मिरट मा दात अनि पर्बुन दात ताक्वल सुरु कीतिट. 7-8 इदेन हिंदल मिरट अकया येरियतुर अनि मासिदोनिया येरियतुर सम्दिर बक्तलिरकुन नमुना आसि निल्तिट. इव येरियनगन आय्वा, हर जागतगा मी हिंदल अद वचन पग्रे माता. बगवंतन पोरोडा मीवा बरोसतुन बारेते ममोट मीकुन बतय वेह्‍वल जुरत सेले. 9-10 बारितेके वूर बक्तलिर, कुद मिरट माकुन बहन मानि कीसि, करुम कीतिट इंवडुन बारेते सम्दिरकुन वेह्‍चेर मंतेर. मिरट मूर्तिन सुटि कीसि, जीवा वाले सते बगवंतना सेवा किय्ले, बहन मल्तिट इंवडुन बारेते गिर वेह्‍चेर मंतेर. अनि वोनोर मरि आय्वल येसु स्वर्गनल मल्सि वाय्वल मंतोर इन्जेर, बहन आसते सूड्सेर मंतिट इंवडुन बारेते गिर, सम्दिरकुन वेह्‍चेर मंतेर. बगवंतना केय्दे वोर येसुये, बगवंतना सोङनल माकुन बचि किय्वल आंदुर.

उंडे करि कीका इंदकिते, www.koyang.in सूडा.