पर्बुना वाय्वडुन साटि तयर मंट
5
1 दादलिर-बायिक्निट!
इव गट्नङ बस्के जर्गंतङ इंवलिक वकतकुन बारेते ममोट मीकुन लिहि किय्वल जुरत सेले.
2 रात्ना येलते कले अचनक वाता तीरे, पर्बुना वाय्वल दिवोस मंदंता इंवल मीकुन टावये.
3 बस्केते पर्जा, “ममोट सांतिते मंतोम.
माकुन बततय वेरे सेले” इन्जेर वेह्नेके, बालेंता वेय्लोन अचनक नोपि वातपिनय नासेडम गिर वूर पोरो वांता.
तान्गटल वूर असले तपुसा परुर.
4 बति दादलिर-बायिक्निट!
कलेन मोडि अचनक अद दिवोस मी पोरो वाय्ले, मिरट सिकटितगा मंवलिर आय्विट.
5 मरट सम्दिर वेड्चिता सेलेके दिहता संतान आंदट.
मरट रात्ना सेलेके सिकटि संतान आय्वट.
6 अदेन साटि दुस्रुर दात नरुम्वक्ने, मन-दिलतगा चेतो मन्जेर दिहंते मंद्कट.
7 बारितेके नरुम्वलिर रात्ने नर्मंतेर.
कल उंवलिर रात्ने निसते मंदंतेर.
8 बति मरट दिहता संतान आता काड्कि, मन-दिलतगा चेतो मंद्कट.
बहंते सिपायि तंवा परंतुन बचि किय्ले तंवा सातितगा कवच केरंतोरो, अह्ने मावा माकुन काबाड्ले बरोसा अनि पेर्मतुन केर्कट.
अदे तीर्दे वोर तलदुन काबाड्ले बहंते कचि टाटा केरंतोरो, अह्ने मावा मंदुन काबाड्ले स्वर्ग्ना आसतुन केर्कट.
9 बारितेके बगवंतल तंवा सोङुन मा पोरो तोह्लेन आयो बति, मा येसु किरिस्तु पर्बुना केय्दे मरट बचे मायना इन्जेरेन माकुन नेमि कीतोर.
10 मरट सासि मत्तेके गिर सेलेके पिसि मत्तेके गिर बति, तंवा सङा जीवते मंदना इन्जेरेन किरिस्तु मा साटि परन सीतोर.
11 अदेन साटि मिरट इंके कीतपिनय, वोरोन वोरोर दर्यम सीसेर, मदत कीसेर बक्तितगा बडे मासेर मंट.
आक्रितङ सूचनङ अनि दंडोस्क
12 नावुर दादलिर-बायिक्निट!
मीकुन कोर्वल बतल इत्तेके, काया-कस्टम कीसेर पर्बुनगा मीकुन मुने सरि ताकुसेर, बोदा किय्वलिरकुन मिरट मान सीम्ट.
13 वूर चोकोट्ना कार्या कीसेर मत्ता काड्कि, वूरकुन सम्दिरकुन तेर अदिक पेर्मा तोह्चेर मानि कीम्ट.
वोरोन सङा वोरोर सांतिते मंट.
14 अह्ने दादलिर-बायिक्निट!
ममोट वेह्वल बतल इत्तेके, गह्ललिरकुन दम्कि सीम्ट.
वेरे-बेक्डलिरकुन गटि-दीर्या वेहट.
कम्जोर वालिरकुन मदत कीम्ट अनि सम्दिरकुन वोर्चि ताकट.
15 बोरे आयि वायुट किय्वलिरकुन मल्सि वायुट किय्मट.
मिरट वोरोन पोरो वोरोर दया तोह्चेर, माय्नलिर सम्दिर साटि चोकोट्नतुने कीसेर मंट.
16 बस्केट आनंद्ने मंट.
17 बस्केट पार्तना कीसेर मंट.
18 हर उंदि गोस्टितुन पिय्सि बगवंतन दनेवाद वेहट.
येसु किरिस्तुनगा उंदि आसि मंवलिर मी रोपो इहिन जर्गना इंवले बगवंतना इचा आंद.
19 मी रोपो मंवल बगवंतना आत्मता डिवेतुन पिह्मट.
20 पर्वक्तलिर वेह्वलिकुन पटि किय्वक्ने मन्मट.
21 बति सम्दोन परिक्सा कीसि, अवेनल चोकोट्नङ गोस्टिन पिय्सि ताकट.
22 सम्दो तीर्क्ना करबनल लङ मंट.
23 सांति सिय्वल वोर बगवंतले मीकुन बर्पुर पवित्रा कियिर!
मा येसु किरिस्तु पर्बु वाय्वल दिवोस वेरि, मीवा आत्मतुन, परंतुन अनि मेंदोडुन, बे-कसुर इरिर!
24 मीकुन केय्वल बगवंतल बरोसा वाले आता काड्कि, तप्वक अहन कींतोर.