नयोमि रूतुन सङा बतल बहन कियना इन्जेर वेह्वल
3
1 उंदि दिया नयोमि रूतुन सङा, “ना कोर्यडि, नीकुन वोरोर माड्सो मत्तेके, नीवा चोकोट-वायुट सम्दो सूड्सि येत्ंदुर.
इदेन बारेते नना तप्वक बतल तेर किया लागर.
2 बोनङ बूय्तेकुन पेजेयेन निमे सर्वा पेर्तियो वोर बोयजु माकुन करुम्नोर पालेवांडल आंदुर.
इचुला! नेटा रातुन कडतगा गोह्क कोह्कुसि तुडुसंतोर.
3 निमे येर तुङ्सि, गमा गमा गाडि सिय्वल निय (सेंट) सोक्सि, निह्गा मंवलिक्नगटल चोकोट्ना कप्डि पोंड्सि, कडतगा सोन.
वोर तिनल उनल वेरि वोन दिस्वक मन.
4 वोर बगा मींडंतोरो अद दिहंते सूड्सि, वोन करुम सोन्जि, वोनङ अस्तुर काल्क्ना दुपटि तेरिसि काल्वडा मींडा.
निमे बतल कियनयो वोर वेहंतोर” इन्जेर इत्ता.
5 ते रूतु, “मिरट वेह्ता तीर कींतोन” इन्जेर आतिहरेन जवब सीता.
रूतु बोयजुन बेटे माय्ले सोंवल
6 रूतु कडतगा सोन्जि, आतिहरे वेह्ता तीर सम्दो कीता.
7 बोयजु पेटिमेन तिन्जि, आनंद्ने अद रासिता हंदा बाज सोन्जि, मींड्तोर.
अस्के रूतु नेहारे सोन्जि, वोनङ अस्तुर कालकुन पोरोडा दुपटि तेरिसि अगने मींड्ता.
8 नड्डुम नर्का जोप्ने मिडुङ्नेके कुदुर्क्ने आसि तेत्तोर अनि तंवङ अस्तुर कालकुन करुम उंदि वेय्लो मींड्सि मंवल करि कीतोर.
9 अनि, “निमे बदेनि आंदि?”
इन्जेर बोयज पूसि कीतोर.
ते “माल्का!
नना रूतुना आंदुन. निमे नाकुन करुम्नोर पालेवांडनि आंदि अनि नावा चोकोट-वायुट सूड्वल जिमेदारि नी पोरो मंता. अदेन साटि नीवा दुपटि, ना पोरो जरसि मुचा”* इन्जेर इत्ता.
10 ते बोयजु, “बायि, बगवंतल नी पोरो दया तोहनुर.
निमे नयोमिना कुटुंबत पोरो मोदोल तोह्ता दयतुंतेर अदिक दया तोह्चेर मंति.
निमे पह्जे इत्तेके गरिबे आयि दनेवंतले आयि डियोन सूड्सि, तुङा पर्ंदि.
बति निमे अहन किय्मकि.
11 अदेन साटि बायि निमे वेरिमा.
निमे इत्ता अद सम्दो कींतोन.
निमे चोकोट्ना गुन-गान वाले पेडिनि आंदि इन्जेर सम्दिरकुन टावये.
12 नना करुम्नोर पालेवांडना इंवल करले आंद अनि नीकुन चोकोट-वायुट सूड्वना आंदुन.
बति नाकुन तेर करुम्नोर उंडे वोरोर मंतोर.
13 इद रातुन निमे इगेन मन.
नीवा जिमेदारि येतंतोर बतलो सक्रेन वोन पूसि कीसि, करि कींतोन.
उंदि मोका वोर जिमेदारि येत्वेके, ननय नीवा जिमेदारि येतंतोन इन्जेर बगवंतना पोरोडे आडा वाट्सि वेह्चेर मंतोन.
उज्डे मानल वेरिते, इगेने नर्मा” इन्जेर वेह्तोर.
14 ते अद वोना काल्वडय नरुम्ता.
वोरोन
रूतु बोयज्ना कडतगा सोंवल
अस्के बोयजु, “निमे कडतगा वाता गोस्टि बोने वेह्मा” इन्जेर रूतुन सङा इत्तोर.
15 अनि “नीवा कोङु तारा” इत्तोर.
अहन इनेकेन अद तार्ता.
ते बोयज सारुङ अद्लिङ वन्जिङ कह्चि गटि दोह्चि, तोचुस्तोर. अस्के रूतु चहर्ते मल्सि सोत्ता.*
रूतु कडतल नयोमिनगा मल्सि सोंवल
16 तंवा आतिहरेना रोन येव्ता पेजे रूतुन, “ना कोर्यडि, निमे सोत्ता काम बतल आता?”
इन्जेर नयोमि पूसि कीता. अस्के रूतु, तनकुन बोयज बतल बहन कीका इन्जेर वेह्तोर अद सम्दो वेह्ता.
17 “अदे आय्वा वोर, ‘रिकम केय्क्ने आतिहरेना रोन सोन्मा’ इन्जि, सारुङ अद्लिङ वन्जिङ सीतोर” इन्जेर गिर वेह्ता.
18 अस्के नयोमि, “ना कोर्यडि, बतल बहन जर्गंतयो करे मानल वेरि दीरा.
इद गोस्टि नेंडु तिवुसनल वेरि, वोर बोयज गप-चुक मनोर” इन्जेर रूतुन वेह्ता.