बोयज अनि उंडे वोरोर पालेवांडल
4
1 अद वकत्ने बोयजु चहर्ता पाटकुन करुम मंवल पर्जा उद्वल जागतगा उत्तोर.
तना वेह्चि मत्तोर वोर चोकोट-वायुट सूड्वल पालेवांडल वासेर मनेके, “दादा!
इगे वासि उदा” इत्तोर. ते अगा सोन्जि उत्तोर.
2 वोर उत्ता पेजे बोयजु अद चहर्तुर दहा जन्क डगुक वेडिलकुन गिर केयुस्तोर.
ते वूर वासि अगा उत्तेर.
3
बोयज पन्चद्नगा पालेवांडन सङा वड्क्वल
अद नयोमि इंके, ‘तंवोर माड्सो येलिमेलेक्ना बोमि वोम्का’ इन्जेर मंता.
4 इदेन बारेते नीकुन गिर वोड्कि अरुसना इन्जेर विचर कीतोन.
इगे उच्चि मंवलिर वेडिलकुन मुने अनि वीर सम्दिर मुने इद बोमितुन येत्का इंद्किते, येता.
उंदि मोका येतोन इंद्किते, नाकुन वेहा.
अद बोमितुन येत्वल हक नी पेजेय नाकुने मंता” इन्जेर वेह्तोर.
ते वोर पालेवांडल, “ननय येतंतोन” इत्तोर.
5 अस्के बोयजु पालेवांडन सङा, “नयोमिनगटल अद बोमि येतन नेटि, सातोर वोर महलोंता बाय्को मोयब देस्ना रूतुन गिर निमेय तुङा लागर.
बारितेके अद जाय्जतुन पोरो सातोर वोना पोरोल राकि किया लागर” इन्जेर वेह्तोर.
6 अद केन्चि, वोर पालेवांडल, “अहन बेहेते, नना येता परोन.
बारितेके ना तोडो पुड्तुर मर्क्ना पोरोडे अद आया परो.
अदेन साटि ना बद्लि निमेय अद बोमितुन येता” इन्जेर वेह्तोर.
7 तोले इज्रयेल जातितगा चुटल-बंद तम्वा तमा जाय्जतुन येत्नेके आयि, वोम्नेके आयि, वोरोर तंवा चेपुल तेंड्सि उंडे वोरोन सियना.
वोम्ता येत्तता पूरि कियन साटि ईतल रिवज ताक्सेर मत्ता.
8 अदेन साटि वोर पालेवांडल, “निमेय अद बोमितुन येता” इन्जि, तंवा चेपुल टेंड्सि बोयजुन सीतोर.
9 अस्के बोयज डगुक वेडिलकुन मुने अनि अगा मंवलिर सम्दिर सङा, “नेंड मिरटे गवा मंतिट.
येलिमेलेक्ना, किलियोंता अनि महलोंता सम्दो जाय्जतुन नयोमिना केय्दल येत्तोन.
10 सातोर वोना पोरोडे जाय्जत राकि कियन साटि, वोना पोरोल कुटुंबतगा अनि चहर्ता जनोबा लेकतल पासि वाट्वक मंले, नना महलोंता बाय्को मोयब देस्ना रूतुन सङा पाट आंतोन.
इद सम्दोतुन नेंड मिरटे गवा मंतिट” इन्जेर वेह्तोर.
बोयज रूतुन सङा पाट आय्वल
11-12 अद केन्चि अगा उच्चि मंवलिर वेडिल्क अनि अद पाटक्नगा निल्सि मंवलिर पर्जा, “हो!
हो!
ममोटे गवा मंतोम.
बगवंतल याकोब्नङ* बाय्कोक राहेल अनि लेयन आसिर्वाद सीतपे, नीवा रोन वाता वेय्लोन गिर वेले मरि-मियड आयन लासि आसिर्वाद सियिर. येप्रतियुल्क्ना सगतुर्गटल दन-दव्लत्ने बडे मासि बेत्लेहम चहरतगा चोकोट्ना पोरोल कमय कीनिर. बगवंतल इद डिया पेडिन हिंदल नीकुन सिय्वल संतान, तामरु अनि यूदनोर मरि पेरेसुना* कुटुंबत दात बडे मायिर” इन्जेर इत्तेर.
रूतु मरिन जल्मा सिय्वल
13 ते बोयजु
रूतु मोड्डन जल्मा सिय्वल
तान सङा मनेके, बगवंतल तान आसिर्वाद सीतोर.
ते अद पीटे मन्जि, मरिन जल्मा सीता.
14-15 अस्के वेय्लोक नयोमिन सङा, “नीवा कोरियड नीकुन येड्विर मरकुन तेर अदिक मयते सूडंता.
बगवंतने डगुर-पान वायि बारितेके नीकुन तङ्मरिन सीतोर अनि वोर नीवा मातरि पांदा जिमेदारि येतनुर.
वोर मोड्डल पूरो इज्रयेल देस्नगा चोकोट्ना पोरोल कमय कियिर.
वोर मोड्डल नीकुन आनंद सीनुर अनि मातरि पांदे पोसि कीनुर” इन्जेर इत्तङ.
16 अस्के नयोमि वोर मोड्डन कोरते येच्चि, वोन मर्किङ कीसेर मत्ता.
17 आजुबाजु मंवलिक वेय्लोक, “वोर मोड्डल नयोमिन साटि पुड्तोर” इन्जि, वोन वोबेदु* इंवल पोरोल दोस्तङ.
वोर वोबेदु येसयिन मिय्तोर.
येस्सयि दाविद राजन मिय्तोर.
रूतु अनि बोयज्ना वेलि
18 इद पेरेसुना कांदांता वेलि:
हेस्रोन पेरेस्ना कांदांतोर.
19 रामु हेस्रोंता कांदांतोर.
अंमिनदाबु रामुना कांदांतोर.
20 नयसोन अंमिनदाब्ना कांदांतोर.
सल्मान नयसोंदा कांदांतोर.
21 बोयज सल्मांता कांदतोर.
वोबेद बोयज्ना कांदतोर.
22 येस्सयि वोबेद्ना कांदतोर.
दाविद येसयिना कांदतोर.