रूतु
येलिमेलेक्ना कुटुंबतगा वेले दुक्सा वाय्वल
1
1 नाय वेह्वलिर अदिकारिर राज ताकुस्वल गट्कते* इज्रयेल देस्ने करु अर्ता.
ते यूदा येरियता बेत्लेहम चहर्तल वोरोर मायनल तंवा बाय्कोन अनि इविर मरकुन पिय्सि, मोयब देस्ने पिस्ले सोत्तोर.
येलिमेलेक्ना कुटुंबा मोयब देस्ने सोंवल
2 वोर माय्नना पोरोल येलिमेलेक, वोना बाय्कोना पोरोल नयोमि.
* इविर मर्क्नङ पोरोल्क महलोन अनि किलियोन.
वूर यूदा येरियता बेत्लेहम चहर्ते मंवल येप्रतियुल्क इंवल सगतेर आंदिर. वूर मोयब देस्ने सोन्जि, अगा पिसेर मत्तेर.
3 अहन पिसेर मनेके, नयोमिनोर माड्सो येलिमेलेक मार्तोर.
ते रांडे वेय्लो नयोमि अनि तानुर इविर मर्के मेय्सि मत्तेर.
4-5 वूर मर्क मोयब देस्नङ पेकिन तुङ्तेर.
अव पेकिकनल उंदिता पोरोल वोर्पल, उंदुंदिता पोरोल रूतु.
अहन कमि जादा दहा साल्क आता पेजे महलोन अनि किलियोन गिर मार्तेर.
ते नयोमि माड्सो अनि मर्क सेल्वा पोसटि वेय्लो आता.
नयोमि बेत्लेहम मल्सि सोंवल
6-7 अहन मोयब देस्नगा पिसेर मनेके नयोमि, “तंवा देस्नगा पंटङ मुक्तरि पंडनल बगवंतल तंवा पर्जतुन आसिर्वाद सीसि, पिर वायुस्तोर*” इन्जेर केन्ज्ता.
अदेन साटि नयोमि अनि तानङ कोर्यक अगटल यूदा येरियते सोंले तयर आसि, सरिय पेसितङ.
8 बति अहन सोन्जेर मनेके, नयोमि कोर्यकुन तोडो, “मिरट मी सेड्मिते मल्सि सोंट.
* सातुर ना मरकुन पोरो अनि ना पोरो मिरट बचोरो पेर्मता-दया तोह्तिट.
अह्ने बगवंतल मी पोरो गिर दया तोहनुर.
9 बगवंतल मीकुन आसिर्वाद सीसि, मिरट उंडे उंदि जोका मर्मिङ आसि, मीकुन रोन-रच्चा सीनुर” इन्जेर कोर्यकुन कलिता.*
10 अस्के रंडुते कोर्यक जोर्ते आड्सेर, “नी सङने नी लोकुर्गा वांतोम” इत्तङ.
11 बति नयोमि, “ना कोर्यक्निट!
मिरट ना सङा बारि वांतिट? मी सेड्मिते मल्सि सोंट. मीकुन तुङ्ले, उंडे ना पीटे मर्क पुटनिर इंतिट कि बतल?
12-13 ना कोर्यक्निट!
मी सेड्मिते मल्सि सोंट.
नना उंडे वोरोन तुङा परोनचोर मातरिना आतोन.
उंदि मोका नाकुन बरोसा मंता इन्जेर नेंड बोने तुङ्सि, इविर मरकुन जल्मा सीकतेर, वूर डगुक आनल वेरि, वूर साटि मिरट मंदा पर्किट कि बतल? ना कोर्यक्निट! मंदा पर्विट. बगवंतल नाकुन बय्मन आतोर, अदेन साटिने मीकुन लाक्ता दुक्सत तेर नाकुन अदिक दुक्सा लाक्ता” इन्जेर अवेन तोडो वेह्ता.
14 अद केन्चि उंडे अदिक आड्तङ.
अद वकत्ने वोर्पल पोरडुन कलिसि, तंवा सेड्मिते सोंले पेसिता.
बति रूतु पोरडुन उर्न्गि कीसि, मत्ता.
15
रूतुन गिर सेरियडुन बरोबर नयोमि सोन इंवल
नीवा सेरियड तंवा पर्जतगा तंवा पेंदगा मल्सि सोन्जेर मंता. निमे गिर तान सङा सोन” इन्जेर वेह्ता.
16 बति रूतु, “‘ना पेजेय वाय्मा, सुटि कीसि सोन’ इन्जेर नाकुन जुल्मा किय्मा.
निमे बगा दाकि अगा वांतोन, निमे बगा मंद्कि अगा मंदंतोन, नी लोकुरे ना लोकुर, नी बगवंतले ना बगवंतल.
17 निमे बगा साकि अगा नना गिर साका अनि अगने नाकुन माति कीनिर.
मरन तप्सि दुस्रो बतय निह्गटल नाकुन पाकि कियर्ते, बगवंतल नाकुन बेय डगुर सिक्सा सियिर” इन्जेर इत्ता.
18 इद गोस्टि केन्चि, तंवा सङा वाय्ले, रूतुना मन मारिता इन्जेर नयोमि सम्जे मासि, अद गोस्टित बारेते जुल्मा किय्वक्ने दब मत्ता.
नयोमि अनि रूतु बेत्लेहम येव्वल
19 अहन अव रंड ताक्सेर बेत्लेहम चहर्ते येव्तङ.
येव्ता पेजे, अद चहर्तुर सम्दिरे अवेन सूड्सि, गुल कुसि आतेर.
वेय्लोक अवेक्नगा वासि, “इद नयोमि आंद कि?” इन्जेर उंदित उंदि पूसि कीतङ.
20
बेत्लेहम्नङ वेय्लोकुन सङा नयोमि वड्क्वल
बति नाकुन नयोमि इन्जेर केय्मट. बारितेके वोर सर्वसक्तिवंतल बगवंतल नाकुन बेय दुक्सा सीतोर. अदेन साटि नाकुन नयोमि* इंवडुन बद्लि मारा* इंटु.
21 नन इगेटल सोनेके, गन-गोत्ने सोत्तोन.
* बति इंके बगवंतल नाकुन पोसटिन दात मलुसि तत्तोर.
* मिरट नाकुन नयोमि इन्जेर बारि केयंतिट? महा सक्तिवंतल बगवंतल नाकुन बय्मन आसि, बेय दुक्सा सीतोर” इन्जेर वेह्ता.
22 अहन नयोमि अनि मोयब देस्ना तंवा कोरियड रूतु, मीरे मासि वन्जिना पंटा कोय्वल कालम मोदोल आनेके, बेत्लेहम चहर्ते येव्तङ.