रूतु
मोदोल वाचि किय्वल गोस्टि
इद कलित रोपो तंवङ कार्यङ पूरि कियन साटि, यूदुल्के आय्वा यूदुल्क आयुर वूरकुन गिर बगवंतल बहन वाडकम कींतोरो इज्रयेल जातितुर करि कियना इन्जेर इद रूतु इंवल पुस्तक्नगा लिहि कीसि मंता. रूतु इंवल वेय्लो मोयब देस्ना आंद, इज्रयेल देस्ना आयो. पोसटि वेय्लो आता अद नयोमिना चोकोट-वायुट सूडन साटि रूतु तंवा पर्जतुन सुटि कीसि, इज्रयेल देस्नगा वांता. इज्रयेल देस्नोर दाविद राजल अनि वोनुर तोत्तुरकुन इद रूतु बहन अवल आसि निल्तयो, इद कततगा लिहि कीसि मंता.
इद कततुन वाचि कियन मुने इद गोस्टि करि कीम्ट
तोले इज्रयेल देस्नगा यूदा जातितुन रोपो उंदि नियम मत्ता. बतल इत्तेके कुटुंबतगा इविर मर्क्मन्जि डगुर मरि मर्मिङ आसि मार्तेके, सेर्न्डु तङेन तुङ्सि, तादना आस्तितुन पोरो अदिकार वाले आंतोर. उंडे वूरकुन मरि-मियड जल्मा आतेके, अद आस्ति मर्क्ना आंता. उंदि मोका वोरोरे मन्जि मार्तेके, अद आस्ति करुम्नोर पालेवांडन आंता. बोर्ते वोना कुटुंबतल उंडे गिर पिसि मंदंतेरो, वूर सम्दिरा चोकोट-वायुट सूड्वल जिमेदारि वोर पालेवांडन पोरो मंदंता.
इद पुस्तकनल करिवलिक गोस्टिङ
बगवंतनङ इचङ नमा परुर अहन पूरे माय्वल.
बरोसते पिस्वलिर हिंदल बगवंतल तंवङ कार्यङ पूरि किय्वल.
दुस्रुरकुन मदत किय्वडुन हिंदल, कुटुंबमुन पोरो, सोप्तलिर पोरो बरोसा इर्वडुन हिंदल, वूरा पिस्वल तरिका मार्युसि, बगवंतल वूरकुन आनंद सिय्वल.
बगवंतना चोकोट-पान सिरिप यूदुलकुन साटिने आयो बति सम्दि जातिनुर साटि मंता.
बगवंतल जग्दुनियता पर्जतुन चोकोट सूड्वल अनि वूरा पिस्वडुन रोपो तंवङ कार्यङ पूरि किय्वल आंदुर.
बगा बतल मंता
येलिमेलेक्ना कुटुंबतगा वेले दुक्सा वाय्वल 1:1-5
नयोमि बेत्लेहम मल्सि सोंवल 1:6-18
नयोमि अनि रूतु बेत्लेहम येव्वल 1:19-22
बोयज्ना पोलम्नगा रूतु सर्वा पेर्वल 2:1-7
बोयजु रूतुन पोरो दया तोह्वल 2:8-13
बोयजु दुपरिता नेह्लि तिंले रूतुन केय्वल 2:14-16
बोयजुन बारेते नयोमि केन्ज्वल 2:17-23
नयोमि रूतुन सङा बतल बहन कियना इन्जेर वेह्वल 3:1-5
रूतु बोयजुन बेटे माय्ले सोंवल 3:6-15
रूतु कडतल नयोमिनगा मल्सि सोंवल 3:16-18
बोयज अनि उंडे वोरोर पालेवांडल 4:1-12
रूतु मरिन जल्मा सिय्वल 4:13-17
रूतु अनि बोयज्ना वेलि 4:18-22